1 PEDRO
Ná nꞌda ra søcuą bi ꞌyoꞌtꞌa ra Pedro
Ran zɛngua
1
Nugä drá Pedrogä, ma ꞌbäigäꞌbe ra Jesucristo. Dí pɛnhꞌnahʉ ra søcuą gyʉ ꞌyɛ̨cꞌyɛ̨ihʉ ra Cristo, nꞌdaꞌa nꞌdanni gá mbähä ja ra häi Ponto nɛpʉ Galacia nɛpʉ Capadocia nɛpʉ Asia nɛpʉ Bitinia. 2 Nu ma Tahʉ Oją mayaꞌbʉ thoho bi huancahʉ, nɛ bi zänni da ꞌyørcahʉ yʉ́ tꞌʉhni gahʉ. Nɛ bi ꞌuega ma mbʉihʉ a rá Hogandąhi Oją, nɛ bi mbän rá ji nanguejʉ a ra Jesucristo, guepʉ nan zä ga øthʉ a i xijʉ. Dí äpꞌa Oją ngue manꞌda gui hyąmhbʉ rá mate, nɛ manꞌda da hyu ni mbʉihʉ bʉya.Ga tąfʉ ran dąte
3 Jamadi Oją, ngue nu rá Ta ma Hmuhʉ ra Jesucristo, nɛ rá Oją a. Nguetho xʉn ngu rán huɛ̨cate bi jajʉ dám ꞌbʉhmbʉ maꞌdaꞌyo. Nuya dí pąhmbʉ gan nuhʉ ran ho maząi, nguetho bi dąmbɛ̨ni ra Jesucristo. 4 Nɛ nuya dí tømhbʉ ʉ yʉ erencia di ꞌdajʉ Oją ngue mꞌbɛꞌtsꞌi bʉ mahɛ̨tsꞌi, nɛ njąmꞌbʉ dim ꞌbɛdi, nɛ njąmꞌbʉ din tsꞌoni. 5 Nɛ nuya i fäjʉ Oją nangue rá tsꞌɛdi, nguetho dí ɛ̨cꞌyɛ̨ihʉ a. Nɛ ya i sänni da yąnjʉ xʉn ho ꞌbʉ bi zøn ra pa ran zɛgui. 6 Nɛ nuꞌbʉ dím bɛ̨mhbʉ ya, nɛ guehya ní ꞌdajʉ ran johya, madagueꞌbʉ da du ma mbʉihʉ bʉ na sähʉ høntꞌa go man ʉnbi ꞌda yʉ pa ya, ꞌbʉ da ꞌyɛ̨n Oją. 7 Tengu ra oro i tsꞌä ngue ra sibi ngue din hogui. Nɛ ngutho ma tꞌɛ̨cꞌyɛ̨ihʉ i tsꞌä, nɛ manꞌda di muui a xinda gueꞌa ra oro ngue dim ꞌbɛdi. Janangueꞌa di nɛcmanho ma tꞌɛ̨cꞌyɛ̨ihʉ ꞌbʉ bá peng ra Jesucristo, nɛ da numanhojʉ, nɛ di ꞌdajʉ ran ho, nɛ ꞌdarbʉ dam ꞌbʉhmbʉ bʉya. 8 Nɛ nuya madagueꞌbʉ hinga nán nuhʉ ra Cristo, pɛ ɛ̨mmɛ guín numanhohʉ a. Nɛ madagueꞌbʉ hin guín nuhʉ a ya, pɛ guí pąhmbʉ majuąni a. Janangueꞌa ɛ̨mmɛ dadí johyahʉ, tengu thoꞌbʉ ya dí ꞌbʉhmbʉ ra Cristo bʉ mahɛ̨tsꞌi. Nɛ hin di jua ʉ mam hmansɛhʉ gam mamhbʉ a ran johya. 9 Nguetho ya dí dʉꞌmi dí hąmhbʉ a dí tømhbʉ, ngue da yąnjʉ Oją. 10 Guehna bi ꞌyoꞌtꞌʉ yʉ pøngahyą mayaꞌbʉ ngue da yąnjʉ rá mate Oją. Nɛ bi hyądumbʉi min nde xtám bądi xʉn ho ꞌbɛꞌa nam bøn a ram hma bi ꞌyoꞌtꞌʉ. 11 Min nde xtám bądi jąmꞌbʉ din ja a, nɛ ndaꞌa ní pa din ja a bi man rá Hogandąhi ra Cristo mi o yʉ́ mbʉi. Nguetho bi bɛ̨nbi da ꞌyoꞌtꞌi ꞌbɛꞌa da ꞌyøtꞌ ra Cristo ꞌbʉ bi zøhø, ngue da nu ran ʉnbi ngue da tho, nɛ da tꞌɛ̨spa ꞌbʉ mꞌbɛjua. 12 Pɛ bi xi Oją ʉ yʉ pøngahyą ngue hin da bąsɛ, xinga gueꞌʉ yʉ jąꞌi mi ꞌbʉhmbʉ, pɛgue gueꞌa go i sijʉ a ya nangue ran ho maꞌdaꞌyo. Nɛ nuꞌʉ to bi xijʉ na, bi ma nangue rá Hogandąhi bá pɛnpa Oją. Nɛꞌʉ yʉ́m ꞌbɛhni Oją mahɛ̨tsꞌi ɛ̨mmɛ in nde da bądi ꞌbɛꞌa nam bøn a i sijʉ ya.
I xijʉ Oją ngue xtán hojʉ
13 Pɛ nuya dan sähʉ ga øthʉ a rán thɛhʉ a dí tɛnhdʉ, ngue ga sąmzɛhɛ ma mbʉihʉ ꞌbɛꞌa gätho dím bɛ̨mhbʉ. Nɛ høntꞌa rá mate Oją ga tømhbʉ di ꞌdajʉ ꞌbʉ bá ɛ̨h ra Cristo. 14 Nɛ ga øthʉ ꞌbɛꞌa i xijʉ Oją, tengu yʉ tꞌʉhni i øtꞌa i xih yʉ́ ta. Nɛ hin ga øthʉ tengu mi øthʉ mamꞌbɛtꞌo ngue ma pähä zɛhɛhʉ ꞌbʉ nte mi pąhmbʉ. 15 Pɛ gä xtán hotho ga øthʉ, nguetho xʉn hotho Oją ngue bi zoncahʉ bi ꞌyøtꞌe yʉ́ tꞌʉhni gahʉ a. 16 Tengu ntꞌoꞌtꞌi: “Xtán hotho ahʉ nguetho xʉn hotho gä,” bi ꞌyɛ̨n Oją. 17 Pɛ nuꞌbʉ dí yąhʉ Oją, dí ɛ̨mfʉ ma Tahʉ. Pɛ gam bɛ̨mhbʉ njuąntho da gurcahʉ ꞌbɛꞌa dá øthʉ nꞌda ngu nꞌdajʉ. Janangueꞌa dam fähmbʉ ngue gan numansuhʉ Oją gätho yʉ pa dí ꞌbʉhmbʉ ua ja ra ximhäi. 18 Nguetho dí pąhmbʉ bi yąnjʉ Oją nangue yʉn tꞌøtꞌe bi xänga ma tahʉ säti thoho. Pɛ hing ra mbɛti í yąnjʉ a, nuꞌa dim ꞌbɛꞌa. 19 Pɛ bi yąnjʉ ra Cristo ꞌbʉ mi du ngue bi mbän rá ji, nɛ høntꞌa da zä di pø a nꞌda a. Nguetho xʉn hotho ra Cristo, tengu nꞌda ra dɛꞌyo mi man Oją mayaꞌbʉ ngue da ꞌbøtsꞌe, pɛ gueꞌa hing ra mbɛdi nɛ xʉn hotho. 20 Nu ra Cristo bi tsꞌänni din yąnte ꞌbʉ hin ní ꞌyøtꞌ ra ximhäi a Oją. Nɛ ran zɛgui ya ja bi nɛqui ua ja ra ximhäi nanguejʉ. 21 Nɛ nangue ra Cristo bi zøcua, gueꞌa dá ɛ̨cꞌyɛ̨ihʉ Oją ya, ngue bi xox a ra Cristo ꞌbʉ mi du, nɛ bi ꞌyɛ̨spi. Janangueꞌa dí pąhmbʉ majuąni di ꞌdajʉ rán ho Oją dí tømhbʉ ya. 22 Nuya nangue rá Hogandąhi Oją dá tɛnhdʉ ram hma majuąni, nɛ gueꞌa dán hojʉ a. Nɛ gueꞌa dán zä ya majuąni ga huɛ̨c ma cuhʉ. Janangueꞌa mpähä thoho dan huɛ̨jʉ nꞌda ngu nꞌdajʉ nangue gätho ma mbʉihʉ. 23 Nguetho dám ꞌbʉhmbʉ maꞌdaꞌyo nangue rám hman Oją da hyätꞌi maząi a, nɛ njąmꞌbʉ di ꞌbɛh rá tsꞌɛdi a. Pɛ nu ma tehʉ bi ꞌdac ma tahʉ nɛ ma mbehʉ, hinga gueꞌa da hyätꞌi maząi a. 24 Nɛ ntꞌoꞌtꞌi:
Tengu yʉ paxi thoho yʉ jąꞌi,
nɛ gätho xʉn ho ꞌbɛꞌa pɛꞌtsꞌi tengu yʉ́ døni ʉ yʉ paxi.
Pɛ nu yʉ paxi di hmangui, nɛ yʉ́ døni i høe.
25 Pɛ nuꞌa rám hman a ra Hmu njąmꞌbʉ dim ꞌbɛh rá tsꞌɛdi.
Gueꞌa ran ho maꞌdaꞌyo i sijʉ a.