Nuꞌa ra Cristo tengu nꞌda ra do
2
Jatho ga ɛshʉ gätho ran ʉcpate nɛ ra fɛhni nɛꞌbʉ yoho ma mbʉihʉ, nɛ ga ɛshʉ ran tsꞌɛya nɛ ran cꞌąte. 2 Nɛ tengu yʉ ꞌuɛre ngue maꞌdaꞌyo bim ꞌbʉi, ngue ɛ̨mmɛ i hon ra xiꞌba da zi, nɛ ngutho ga øthʉ, thocpa thoho ga homhbʉ rá hogamhma Oją, ngue dín te xʉn ho ma mbʉihʉ a. 3 Nguetho ya dá tįmhbʉ a rá mate Oją nangue rám hma, nɛ dá pąhmbʉ ngue xʉn ho a. 4 Nɛ manꞌda gam bɛ̨mhbʉ ga cuathʉ ra Cristo xʉn ho, nuꞌa bi ꞌdajʉ ra te. Madagueꞌbʉ i pa ma ʉcpi, tenguꞌbʉ nꞌda ra gądo di bʉntꞌa nꞌda ra do, pɛ Oją bi huahni manꞌda di muui bʉ da thøh rá ngu. 5 Tenguꞌbʉ nꞌda ra do manꞌda di muui a ra Cristo bʉ ja ra ngu, nɛ nujʉ i pa ma cuati gahʉ bʉya, tenguꞌbʉ dyʉ dohʉ, da ꞌyøjʉ rá ngu Oją ngue hin di nɛqui. Nɛ yʉ́ mbäją gahʉ Oją, nguetho dí unhdʉ Oją yʉn tꞌunni gätho ma mbʉihʉ. Nɛ di thocpa a rá Ta man tꞌunnihʉ a ra Cristo, janangueꞌa da numanho Oją ʉ. 6 Nɛ ntꞌoꞌtꞌi mayaꞌbʉ bʉ ja rám hman Oją nangue ꞌbɛꞌa da tꞌørpa ra Cristo. Bi ꞌyɛ̨n Oją:Tenguꞌbʉ drá ngʉrpagądo dá huahna nꞌda ra do manꞌda di muui, nɛ dá høpʉ ja ma dongu bʉ Sión, nubʉ hapʉ ja ma tsꞌɛdi, bi ꞌyɛ̨n Oją.
Nɛ nuꞌa toꞌo da guatꞌa, hin da mbɛꞌtsꞌ rá sä ꞌbʉ bi nu ran juąnbi,
bi ꞌyɛ̨n Oją. 7 Nɛjʉ xʉn ngu dadí muhʉ nguetho dí cuathʉ a ra Cristo. Pɛ madagueꞌbʉ hin da guatꞌʉ ꞌda, pɛ guextaꞌa din ja tengu bi man Oją, ngue bi ꞌyɛ̨na:
Madagueꞌbʉ him bi numanho ʉ ꞌda yʉ gądo a ra do,
pɛ da gopʉ ja ma dongu, ngue manꞌda di muui ꞌbʉ da thøh ma ngu,
Nuꞌa ra Cristo tenguꞌbʉ nꞌda ra do ngue di ferpʉ rá gua nꞌda, nɛ dim ꞌbɛpʉ,
bi ꞌyɛ̨n ra tꞌohni. Nɛ bi tsꞌänbi dim ꞌbɛpʉ, nguetho hinguin nde da ꞌyɛ̨cꞌyɛ̨i ram hma nangue ra Cristo.
Yʉ́ tꞌʉhni gahʉ Oją
9 Pɛ nujʉ, Oją bi huancahʉ bi ꞌyørcahʉ tenguꞌbʉ nꞌdaꞌbʉi gahʉ, maꞌueque ma mbʉihʉ. Nɛ gätho gahʉ dyʉ mbäją gahʉ bi ꞌdac ma tsꞌɛdihʉ Oją, nɛ yʉ́ mbɛti gahʉ a. Nguetho in nde ga uhmbʉ ngue mixte xʉn ho Oją, ngue bá jʉgahʉ bʉ ja ra ꞌbɛxui mi ꞌbʉhmbʉ, nɛ bi zixcahʉ bʉ ja rán nɛqui mahotho ya. 10 Nuꞌbʉ mámꞌbɛtꞌo mi ꞌbʉhmbʉ tenguꞌbʉ dyʉ hyoya tꞌʉhnihʉ, nɛ nuya dí ꞌbʉhmbʉ yʉ́ tꞌʉhni gahʉ Oją. Pɛ nu mámꞌbɛtꞌo him mi pąhmbʉ rá mate Oją, pɛ nuya dá hąmhbʉ rá mate Oją ya.
Ga humbi ga øthʉ ngue yʉ́ mbɛfi gahʉ Oją
11 Ma zi cu ahʉ, ɛ̨mmɛ dadí huɛ̨cꞌahʉ. Janangueꞌa ntsꞌɛdi dí xiꞌahʉ ga øthʉ tenguꞌbʉ hin dyʉ mɛnguhʉ ua ja ra ximhäi, hin ga øthʉ rá pähä ma nyon ꞌyomfɛ̨nihʉ ngue i ørcahʉ ran sʉi ma mbʉihʉ. 12 Nɛ thocpa thoho dam fähmbʉ dan ꞌyomanhohʉ, nguetho in nujʉ ʉ hingui pą Oją. Nɛ madagueꞌbʉ i ɛ̨njʉ dyʉ tsꞌomꞌbäihʉ, pɛ xømhma thoho da zøn ra pa da ꞌyɛ̨spa Oją ꞌbʉ bi nu ran hocjąꞌi dí ørpahʉ. Nguetho da zä da xocpa yʉ́ mbʉi Oją ʉ. 13 Nɛ ga øthʉ a im man a ra tsꞌʉtꞌabi ngue i ꞌbɛtꞌo ua ja ma häihʉ, janangueꞌa da hnumanho ma Hmuhʉ ra Cristo bʉya. 14 Nɛꞌʉ miꞌda toꞌo gätho bi un yʉ́n tꞌɛ̨di ra tsꞌʉtꞌabi, gätho ga ɛ̨cꞌyɛ̨ihʉ ʉ. Nguetho i ja yʉ́ tsꞌɛdi di ʉnba ʉ toꞌo øtꞌ yʉ tsꞌoqui, nɛ da numanho ʉ toꞌo øtꞌ ran ho. 15 Nguetho nɛꞌa Oją rá pähä a ꞌbʉ dí øthʉ a, nɛ gueꞌa dí ꞌyɛꞌtsꞌʉ yʉn cꞌąte im man ʉ yʉ ꞌyąmbʉi bʉya. 16 Nuya hingui ørcahʉ ra tsꞌɛdi ga tɛnhdʉ yʉ́n tꞌɛ̨di Oją, nguetho in ndejʉ mpähä thoho ga tɛnhdʉ. Pɛ hin gam bɛ̨mhbʉ gueꞌa ní jajʉ ga øthʉ yʉ tsꞌoqui a, pɛ manꞌda ga øthʉ ngue yʉ́ mbɛfi gahʉ Oją. 17 Nɛ gan numanhohʉ gätho yʉ jąꞌi, nɛ ga huɛ̨c ma miꞌyɛ̨cꞌyɛ̨i hʉ, nɛ gan numansuhʉ Oją, nɛ ga ɛ̨spahʉ ra tsꞌʉtꞌabi i ꞌbɛtꞌo ua ma häihʉ.
Ga øthʉ tengu bi ꞌyøt ra Cristo bin ʉnbi nanguejʉ
18 Gyʉ ꞌyɛ̨hɛ̨hʉ nɛ gyʉ mbɛfihʉ dami ꞌyɛ̨cꞌyɛ̨i ni hmuhʉ ꞌbʉ gadí zɛhmbʉ ʉ. Nɛꞌʉ yʉ hocjąꞌi nɛꞌʉ yʉ tsꞌomꞌbäi ꞌbʉ di ʉnꞌnahʉ, gätho guin numansuhʉ ʉ. 19 Nguetho manꞌda da numanho ahʉ Oją ꞌbʉ gui hyäthʉ yʉn ʉnbi ꞌbʉ nte man tsꞌo gá ꞌyøthʉ, pɛ bi ʉnꞌnahʉ nangue guí tɛnhdʉ Oją. 20 Pɛ nuꞌbʉ gan nuhʉ ran ʉnbi nangue ma tsꞌoquihʉ, nɛ ga häthʉ, pɛ hin gam bɛ̨mhbʉ ga tąhmbʉ nꞌda ran ho nangueꞌa. Høntho dá jut ma tsꞌoquihʉ. Pɛ nuꞌbʉ ga häthʉ ran ʉnbi nangue ran ho dí øthʉ, da numanhojʉ Oją. 21 Oją bi zänni ga häthʉ yʉn ʉnbi tengu ra Cristo, bi nde bin ʉnbi nanguejʉ, nɛ bi ꞌyurcahʉ ꞌbɛꞌa ga øthʉ. 22 Nguetho nu ra Cristo njąmꞌbʉ bi ꞌyøtꞌ yʉ tsꞌoqui, nɛ njąmꞌbʉ bi man yʉ fɛhni. 23 Nɛ nuꞌbʉ mi tsꞌani, njąmꞌbʉ bi dądi. Nuꞌbʉ mi mba ma ʉcpi, him bi ma dí coꞌtsꞌi. Him bi zu da zan yʉ jąꞌi, nguetho bi bądi Oją da numanho a. 24 Nu rá jąꞌi zɛhɛ ra Cristo bi nu ran ʉnbi nangue ma tsꞌoquihʉ ꞌbʉ mi ꞌdømpꞌʉ ja ra za. Nɛ gueꞌa í thøgahʉ ma tsꞌon ꞌyomfɛ̨nihʉ a, nguepʉ da zä ga øthʉ ran ho ya. Nu yʉn ʉnbi bi zä ꞌbʉ mi tho, gueꞌa í yąnjʉ a. 25 Nujʉ dá ꞌbɛhmbʉ ra ꞌyu, tengu yʉ dɛꞌyo. Pɛ nuya bá penjʉ bʉ ꞌbʉh ma mbändɛꞌyohʉ, nuꞌa i färca ma mbʉihʉ.