Ran zofo bi sih yʉ xisu nɛ yʉ́ ndø
3
Nuꞌahʉ gyʉ xisuhʉ, gui ꞌyɛ̨spa ni ndøsɛhʉ nꞌda ngu nꞌda ahʉ. Nɛ nuꞌbʉ ꞌda ni ndøhʉ hinguin nde da ꞌyɛ̨cꞌyɛ̨i rám hman Oją, pɛ nuꞌbʉ bi nu guí ꞌbʉmanhohʉ, xømhma thoho da zøni da ꞌyɛ̨cꞌyɛ̨i ʉ, nɛ hinga hnɛhi thoho ja a gui xihmbʉ ꞌbʉ hinguin nde da ꞌyøde. 2 Nguetho da nu ahʉ gadím fähmbʉ ngue guín numansuhʉ Oją, nɛ hin gui ꞌyomtꞌɛ̨nihʉ. 3 Nɛ nuꞌbʉ guím bɛ̨ni gan hoczɛhɛhʉ, pɛ nangue ni mbʉihʉ. Nɛ hin guim bɛ̨mhbʉ nangue ꞌbɛꞌa gä i jaꞌahʉ thi ngue dí nɛcmanho ahʉ, ogue ni yąhʉ, ogue ni hehʉ gui hojʉ, ogue yʉ thebe, ogue yʉ tsꞌʉngu. 4 Pɛ gan hoczɛhɛhʉ ngue ni mbʉihʉ, ngue di nɛcmanhotho bʉ dá nu Oją, ngue hin di nɛqui, nɛ nuꞌa njąmꞌbʉ dim ꞌbɛ a. Ngueꞌa hin gan ꞌyɛ̨zɛhɛhʉ, pɛ gan johyahʉ nangue Oją. Nɛ ɛ̨mmɛ xʉn ngu di muui bʉ nam bɛ̨n Oją a. 5 Nɛ njabʉ mi øtꞌ yʉ xisu mi ꞌbʉh mayaꞌbʉ, ngue gueꞌʉ yʉ ꞌyɛ̨cꞌyɛ̨i mi numansu Oją, nuꞌʉ mi hoczɛhɛ yʉ́ mbʉi ngue mi numansu yʉ́ ndø. 6 Tengu ra Sara bi ꞌyɛ̨cꞌyɛ̨i a rá ndø ngue ra Abraham, nɛ bi ꞌyɛ̨mbi rá hmu. Nuya tenguꞌbʉ yʉ́ tꞌįxu ahʉ ra Sara ꞌbʉ guí øthʉ ꞌbɛꞌa mi øtꞌe, ngue thocpa thoho gui ꞌyøthʉ ran ho nɛ nte gui suhʉ. 7 Nɛ ngutho dí xiꞌahʉ, man ꞌyohʉ ahʉ, dam ꞌbʉmanhohʉ ma xisuhʉ nangue ran ꞌyomfɛ̨ni bi ꞌdajʉ Oją. Ga pąhmbʉ hinꞌyʉ yʉ́ tsꞌɛdi yʉ́ jąꞌi ʉ yʉ xisu, janangueꞌa ga fäxhʉ ʉ. Nɛ gan numansuhʉ ʉ, nguetho nꞌdatꞌa rá mate Oją i conhui rá xisu nꞌda ran ꞌyohʉ, ngue nꞌdatꞌa ra te maꞌdaꞌyo. Nɛ nuꞌbʉ hin dam ꞌbʉmanho ma xisuhʉ, hin da ꞌyømanho ma ndehʉ Oją ꞌbʉ.Ga øthʉ a di bɛ̨nga ma mbʉihʉ Oją
8 Nɛ gätho gahʉ nꞌdatꞌa gam bɛ̨mhbʉ nꞌda ngu nꞌdajʉ, nɛ gam bɛ̨mhbʉ tenguꞌbʉ ꞌda dá sähʉ ꞌbɛꞌa i sä a nꞌda. Nɛ dan huɛ̨jʉ nꞌda ngu nꞌdajʉ, nɛ din ja ma yembʉihʉ, nɛ hin dan ꞌyɛ̨zɛhɛhʉ nꞌda ngu nꞌdajʉ. 9 Nɛ hin ga cospahʉ ran tsꞌo ꞌbʉ ꞌbʉi to da ꞌyørcahʉ ran tsꞌo, xín ga cospahʉ ran tsꞌante ꞌbʉ ꞌboꞌo da zanjʉ. Pɛ ga äfʉ ran jąpi tengu thoho i ørcahʉ Oją, bi zoncahʉ di ꞌdajʉ rán jąpi. 10 Nguetho ntꞌoꞌtꞌi:
Høntꞌa go toꞌo in nde dim ꞌbʉmanho, nɛ da nu yʉ pa xʉn ho,
pɛ i jatho da ząm rá jąni nangue ran tsꞌo,
nɛ xín da man yʉ fɛhni.
11 Nɛ da hyɛ a ran tsꞌo, da ꞌyøtꞌ ran ho.
Nɛ hin da nde dim ꞌbʉh yʉ́n sʉihʉ, pɛ ɛ̨mmɛ da hyoni ꞌbɛpʉ dí hocpa rá mbʉi rá mijąꞌiui.
12 Nguetho nu ra Hmu in numanho ʉ to i øtꞌ ran ho,
nɛ i ømanho ꞌbʉ ja a äpi,
pɛgue da zʉ ʉ øtꞌ ran tsꞌo,
bi ꞌyɛ̨n rá tꞌohni. 13 Pɛ toꞌo maha di ʉngahʉ ꞌbʉ dan ɛ̨hya ga øthʉ ran ho. 14 Pɛ madagueꞌbʉ ga sähʉ ran ʉ ꞌbʉ dí øthʉ ran ho, pɛ gueꞌa manꞌda ná tįmhbʉ rán ho Oją a. Janangueꞌa hin ga suhʉ ꞌbʉ in nde di pijʉ ʉ ꞌda, xín da du ma mbʉihʉ. 15 Pɛ høntho gan numansuhʉ ra Cristo mbo ma mbʉihʉ, ngue ma Hmuhʉ a. Nɛ thocpa thoho dan sähʉ ga xihmbʉ ꞌbɛꞌa dí ɛ̨cꞌyɛ̨ihʉ ꞌbʉ ꞌboꞌo da ꞌyängahʉ. Pɛ jante thoho ga xihmbʉ nɛ gan numansuhʉ ʉ. 16 Nɛ thocpa thoho ga øthʉ a di bɛ̨nga ma mbʉihʉ Oją. Janangueꞌa da mbɛꞌtsꞌ yʉ́ sä toꞌo di cꞌąmanꞌʉ ran ho dí øthʉ ꞌbʉ dí tɛnhdʉ ra Cristo. 17 Nguetho manꞌda xʉn ho ꞌbʉ gueꞌa ran ho ná sähʉ ran ʉnbi, ꞌbʉ da nde Oją, xínda gueꞌbʉ ga sähʉ ran ʉnbi nangue ma tsꞌoqui zɛhɛhʉ. 18 Nɛꞌa ra Cristo bin ʉnbi, nɛ njąmꞌbʉ bi ꞌyøtꞌ yʉ tsꞌoqui. Pɛ nꞌdandį thoho bi du nangue ma tsꞌoquihʉ, guejʉ dyʉ tsꞌomꞌbäihʉ, nguetho bi nde da zixcahʉ bʉ bí ꞌbʉ Oją. Nɛ majuąni bi tho rá ngøcꞌyɛ̨i, pɛ nu rá mbʉi guextaꞌa mi ꞌbʉi. 19 Nɛ nu rá mbʉi ra Cristo ꞌbʉ mi du, bi mba bi zop yʉ́ mbʉi ʉ xʉn du ngue ofädi. 20 Ngue yʉ́ mbʉi yʉ jąꞌi nangue ʉ ngue him bi ꞌyɛ̨cꞌyɛ̨i Oją ꞌbʉ mayaꞌbʉ thoho. Pɛ Oją mi tøꞌmi xtá ꞌyɛ̨cꞌyɛ̨i gätho ní ꞌyøtꞌ ra barco ra Noé. Guepʉ bi zä bin yąn ʉ zi hyąto njąꞌi thoho, bi bong ꞌbʉ min ja ran tsꞌɛmbi, nangue ra dehe ra dąmbʉntꞌi. 21 Nɛ nu ran xixyą nam bøni, nɛjʉ dám pomhbʉ ran tsꞌɛmbi nangue bi dąmbɛ̨ni ra Jesucristo. Nɛ nu ran xixyą hinguin nde da ma ngue i pa mꞌbeꞌtꞌe ma jąꞌihʉ ngue ra häi, pɛ nam bøni dí äfʉ Oją di hoga ma mbʉihʉ. 22 Nɛ nuya, nu ra Jesucristo bi mba mahɛ̨tsꞌi, darbʉ di mandaui bʉ ja rá tsꞌɛdi Oją. Nɛ nuꞌʉ gätho yʉ tsꞌɛdi i ꞌbʉi i su a ra Cristo, nguetho høntꞌa i ja rá tsꞌɛdi xinda gueꞌʉ yʉ́m ꞌbɛhni Oją mahɛ̨tsꞌi nɛ yʉ zįthu.