Dan darbahʉ rá mate Oją
4
Mꞌbɛtꞌo thoho dan sähʉ din ʉnba ma ngøcꞌyɛ̨ihʉ tengu ra Cristo, nɛ gueꞌa ní täc yʉ tsꞌoqui a. Nguetho nuꞌa to bin ʉnba rá ngøcꞌyɛ̨i, him man da nde yʉ tsꞌoqui a. 2 Nɛ gätho miꞌda yʉ pa dí ꞌbʉhmbʉ ua ja ra ximhäi, hin dám ꞌbʉhmbʉ nangue ma pähä zɛhɛhʉ, pɛ dam ꞌbʉhmbʉ ga øthʉ rá pähä Oją. 3 Dá xøtꞌa dá øthʉ rán tꞌøtꞌe ra ximhäi, midí hohʉ ran ꞌyomtꞌɛ̨ni, nɛ mi øtꞌ ma pähä zɛhɛhʉ, nɛ mi minhdʉ, nɛ madín sixhʉ bʉ ja yʉ calle nɛ mi mbahmbʉ bʉ, nɛ dám munshʉ bʉ dám minhdʉ, nɛ mi thąndehʉ yʉ pøte, pɛgue Oją him bi zänni ga thąndehʉ ʉ. 4 Nɛ nuꞌʉ ꞌbʉcua ja ra ximhäi hingui sä da bądi hanja hin dí øthʉ ran tonto tengu i øtꞌʉ, janangueꞌa i sanjʉ ʉ ya. 5 Pɛ Oją di ʉnba ʉ to i sanjʉ, nguetho di juąnba Oją ʉ ꞌbʉi nɛꞌʉ xʉn du. 6 Nɛ nu yʉ jąꞌi xʉn du ya, bi sih ran ho maꞌdaꞌyo ꞌbʉ mi ꞌbʉi, ngueꞌa í zä bi un Oją ra te yʉ́ mbʉi ʉ, madagueꞌbʉ ya xʉn du yʉ́ ngøcꞌyɛ̨i. Nɛ gueꞌa rán säui nangue yʉ́ tsꞌoqui, nangue gätho yʉ jąꞌi i tu. 7 Nuya bi zøn ra pa ran zɛgui. Janangueꞌa dan ꞌyomfɛ̨nihʉ xʉn ho, nɛ ga sąmzɛhɛ ma mbʉihʉ, ngue da zä thocpa thoho dan yąhʉ Oją bʉya. 8 Nɛ mꞌbɛtꞌo thoho ga øthʉ ngue ɛ̨mmɛ dan huɛ̨jʉ nꞌda ngu nꞌdajʉ. Nguetho nuꞌa toꞌo ja rán huɛ̨cate, di punba rá tsꞌoqui rá mijąꞌiui, madagueꞌbʉ xʉn ngu yʉ́ tsꞌoqui. 9 Dan säyabahʉ nꞌda ngu nꞌdajʉ bʉ ja ma ngumhbʉ nangue ma pähä zɛhɛhʉ. 10 Nɛ ꞌda dám fäxtahʉ nꞌda ngu nꞌdajʉ nangue rá ꞌbɛfi Oją ꞌdahma ꞌdanꞌyo bin ꞌdajʉ, gue dan darbahʉ a rá mate Oją ꞌdahma ꞌdanꞌyo ngue dá hąmhbʉ. 11 Nɛ nu to bin tꞌun ra ꞌbɛfi da mampꞌa rám hman Oją, da ma tenguꞌbʉ da guesɛ Oją da ma. Nu to bin tꞌun ra ꞌbɛfi da mbäxꞌʉ miꞌda, da mbätsꞌi nangue ra tsꞌɛdi xʉn ho bi unꞌna Oją. Ngueꞌa da nde dí ꞌyɛ̨spa Oją a ꞌbɛꞌa gätho øtꞌe, nangue dí tɛnhdʉ ra Jesucristo, nuꞌa mixte thoho, nɛ i ja rá tsꞌɛdi gätho yʉ pa maząi.Gan nuhʉ ran ʉnbi nangue dí tɛnhdʉ ra Cristo
12 Ma zi cuꞌahʉ, hin ga hyonya thohohʉ ꞌbʉ i tsꞌäjʉ yʉn ʉnbi ntsꞌɛdi, nɛ hin ga ɛ̨mhbʉ, hague in ja a ya. 13 Pɛ dan johya thohohʉ, nguetho dí comhbʉ yʉ́n ʉnbi ra Cristo. Nɛ nuꞌbʉ bi nɛqui xʉn ho rá tsꞌɛdi, manꞌda xʉn ngu ran johya gan nuhʉ bʉya. 14 Nuꞌbʉ pa ma ʉgui gahʉ nangue dí tɛnhdʉ ra Cristo, pɛ mająpi gahʉ, nguetho mixte thoho rá tsꞌɛdi rá Hogandąhi Oją dín nuhʉ bʉya. Nɛ madagueꞌbʉ di ʉcpa ra Cristo ʉ ꞌda, pɛ nujʉ dí ɛ̨spahʉ a. 15 Pɛ nuꞌbʉ gan hotehʉ nɛ gam pɛ̨hʉ, ogue nꞌda ran tsꞌo ga øthʉ, ogue sä dan thįnthʉ ꞌbɛꞌa øtꞌ ma mijąꞌihʉ, ga pɛꞌtsꞌ ma sähʉ ꞌbʉ, nɛ gan nuhʉ ran ʉnbi nangue a ra tsꞌoqui dá øthʉ. 16 Pɛ nuꞌbʉ dín nuhʉ ran ʉnbi nangue dí tɛnhdʉ ra Cristo, hin ga pɛꞌtsꞌ ma sähʉ ꞌbʉ. Pɛ ga ɛ̨mfʉ jamadi Oją, ngue dí pąhmbʉ ngue dí tɛnhdʉ ra Cristo. 17 Nguetho bi zøn ra pa ya di dʉꞌmi øtꞌ rán tsꞌɛmbi Oją. Pɛ rá mbʉdi thoho gahʉ i ørcahʉ ran tsꞌɛmbi, ngue yʉ́ tꞌʉhni gahʉ a. Pɛ tsꞌʉtho dín nuhʉ. Pɛ nuꞌʉ hingui ɛ̨cꞌyɛ̨i rám hman Oją, xʉn ngu ꞌbɛꞌa gä da nu ʉ ꞌbʉ bi zøn ra pa da ꞌyøtꞌe xʉn ho rán tsꞌɛmbi Oją. 18 Nɛ ɛ̨mmɛ xʉn ngu yʉn ʉnbi gan nuhʉ bʉ dí pøjʉ Oją, ngue dyʉ ꞌyɛ̨cꞌyɛ̨ihʉ, nguetho jaꞌbʉ nꞌdandį hin dí øhmbʉ a i xijʉ. Nɛ ꞌbʉh miꞌda ꞌbe xíngui tsꞌʉ nde da ꞌyøde, nɛ i san Oją. Nɛ nuꞌʉ hin da zä dim pø ʉ. 19 Janangueꞌa nuꞌbʉ dí sähʉ yʉn ʉnbi bi zängahʉ Oją, pɛ ga däh ma mbʉihʉ Oją di jamansujʉ. Nɛ njąmꞌbʉ da hyɛgahʉ, nguetho gueꞌa bi ꞌdajʉ ra te. Nɛ ga thoqui ga øthʉ ran ho.