Di jamansu yʉ́ dɛꞌyo Oją ʉ yʉ ngʉrbi
5
Nuya nꞌda ram hma dí xiꞌahʉ, yʉ́ ngʉrbi ahʉ yʉ ꞌyɛ̨cꞌyɛ̨i. Nɛcä drá ngʉrbigä, dá nusɛ ra Cristo ꞌbʉ mi du, nɛcä ga comhbʉ ran jąpi din ꞌdajʉ mꞌbɛjua. 2 Ma mi ngʉrbi ahʉ dyʉ mbändɛꞌyohʉ, dí xiꞌahʉ ya, jatho ga jamansuhʉ yʉ́ dɛꞌyo Oją, nguetho ꞌyo ma güɛndahʉ ga jamansuhʉ ʉ. Nɛ hin gam bɛ̨mhbʉ i tꞌørcahʉ tsꞌɛdi, pɛgue gam bɛ̨mhbʉ ma pähä zɛhɛhʉ ga øthʉ. Nɛ hin nangue a din jurgahʉ ngue dyʉ ngʉrbihʉ, pɛ nangue a dín numanho sɛhʉ a. 3 Nɛ hin ga sʉthohʉ yʉ́ tꞌʉhni Oją hapʉ dí ꞌbʉhmbʉ nꞌda ngu nꞌdajʉ, pɛ janate tho ga uthʉ ra ꞌyu nangue man tꞌøtꞌe zɛhɛhʉ. 4 Nɛ nuꞌbʉ bi nɛqui ma Hmuhʉ dyʉ́ mbändɛꞌyohʉ, di ꞌdajʉ ran jąpi ngue ga tąhmbʉ, ngue hin jąmꞌbʉ din thegue. 5 Ngutho ahʉ man ꞌyohʉ ahʉ, dami ꞌyɛ̨cꞌyɛ̨ihʉ ꞌbɛꞌa im man yʉ dącꞌyɛ̨i ngue ni ngʉrbihʉ. Nɛ gätho ahʉ gan umhbʉ da si ahʉ nꞌda ngu nꞌda ahʉ. Nɛ njąmꞌbʉ gan ꞌyɛ̨zɛhɛhʉ, nguetho:Da zʉ Oją a din ꞌyɛ̨tsꞌi,
pɛ di un rá mate a toꞌo hin din ꞌyɛ̨tsꞌi.
6 Janangueꞌa ga øthʉ ngue hinꞌyʉ ma tsꞌɛdi zɛhɛhʉ bʉ ja rá hmi Oją, gam bɛ̨mhbʉ høntꞌa ja rá tsꞌɛdi xínda guejʉ. Janangueꞌa da ꞌyɛ̨sca zɛhɛhʉ Oją ꞌbʉ bi zøn ra pa. 7 Nɛ ga xihmbʉ Oją gätho ma dumbʉihʉ, nguetho di jamansujʉ a. 8 Damín äthąhʉ xʉn ho, ngue damím fähmbʉ, nguetho nu man sʉihʉ ra zįthu i ꞌyo ua, tengu nꞌda ra zate i ꞌyo, in cuɛ, i honi toꞌo da za. 9 Pɛ dami sʉhmbʉ a ra zįthu nangue rá tsꞌɛdi Oją guí ɛ̨cꞌyɛ̨ihʉ. Nɛ gam bɛ̨mhbʉ ngue nꞌdatꞌʉ yʉn ʉnbi dín nuhʉ ma miꞌyɛ̨cꞌyɛ̨ihʉ ngue gätho ra ximhäi. 10 Pɛ nu Oją ɛ̨mmɛ xʉn ngu rá mate, bi zoncahʉ ga comhbʉ rá tsꞌɛdi mixte gätho yʉ pa maząi, nangue dí ꞌbʉhmbʉ ra Cristo. Pɛ mꞌbɛtꞌo thoho dan ʉnbahʉ tsꞌʉ, ngue di hoga ma mbʉihʉ Oją, nɛ di hąt ra tsꞌɛdi ma mbʉihʉ, nɛ di jajʉ dan ząmhbʉ xʉn ho bʉ. 11 Nu Oją nte hɛ̨mbi, gätho da zä da ꞌyøtꞌe, gätho yʉ pa maząi. Nɛ gueꞌa gam bɛ̨mhbʉ a ya.
Rán zɛgui ran zɛngua
12 Dí pɛnhꞌnahʉ ra søcuą i ja ua, ngue da gąx a ra Silas, nuna nꞌda ma cuhʉ ngue da zä ga ɛ̨cꞌyɛ̨ihʉ a man a. Nuna ra søcuą ja ua, hingui ngu ꞌbɛꞌa ma, nꞌda ran zofo thoho, nɛ dí xiꞌahʉ majuąni rá mate Oją a guí tɛnhdʉ. Janangueꞌa damín ząmhbʉ bʉ. 13 I pɛnhꞌnahʉ ran zɛngua ni cuhʉ i ꞌbʉcua Babilonia, nthahni nangue Oją, tengu ahʉ. Nɛhna ra Xuua Marcos di zɛngua ahʉ, tenguꞌbʉ ma tsꞌʉntꞌʉ na. 14 Nɛ ząi gan zohmbʉ nꞌda ngu nꞌda ahʉ nangue ran huɛ̨cate. Nɛ dín nde da hyu ni mbʉihʉ nangue guí tɛnhdʉ ra Cristo. Nɛ gueꞌa gam bɛ̨mhbʉ a ya. Høntꞌa dí xiꞌahʉ ya.