Nꞌda ran zofo i sih yʉ mɛmbɛti
5
Damin ꞌyomfɛ̨nihʉ tsꞌʉ gyʉ mɛmbɛtihʉ, gan zomhbʉ nɛ ga mbahmbʉ nguetho ntsꞌutho ra ꞌyąnthį guin nuhʉ. 2 Nuꞌa ꞌbɛꞌa gä guí pɛshʉ tenguꞌbʉ xʉ ꞌya bʉ nam bɛ̨n Oją, nɛ ni hehʉ tenguꞌbʉ xʉn za yʉ zuꞌuɛ̨. 3 Nu ni mbɛtihʉ xʉn tsꞌom bʉ na nu Oją a, nguetho nin tsꞌiyatehʉ a gní tįmhbʉ ʉ, nɛ hin gá pąhmbʉ ndaꞌa xʉn ho xquí jafʉ. Nɛ gueꞌa dí jua ahʉ a tenguꞌbʉ ra sibi. Nɛ tenguꞌbʉ guidí munshʉ a ran ʉnbi guin nuhʉ ꞌbʉ ran zɛgui. 4 Gá hyät ni mbɛfihʉ hin gá juarpahʉ yʉ́n zäbi ꞌbʉ min xopʉ ni huąhihʉ. Nɛ nuꞌa ran zäbi gá cønba ni mbɛfihʉ, nɛ gueꞌa dí yąp ahʉ a. Nɛ nuꞌa rá tsꞌoni ni mbɛfihʉ bi ꞌyø Oją tąte thoho rá tsꞌɛdi, nɛ da hyą ra güɛnda nangueꞌʉ. 5 Nuꞌahʉ gám ꞌbʉhmbʉ nangue nin johya zɛhɛhʉ nguecua ja ra ximhäi gyʉ́ ziyatehʉ. Nɛ bi zac ni mbʉihʉ tengu nꞌda ra tsꞌʉdi. Pɛ gueꞌa dín jaꞌahʉ tenguꞌbʉ ran thotsꞌʉdi ꞌbʉ rán zɛgui ra pa. 6 Nɛ nuꞌahʉ guí cothʉ fädi ʉ nte in dupate, nɛ xø guí hohʉ bʉya, nɛ hin di mu.Ga häthʉ ꞌbɛꞌa i tꞌørcahʉ
7 Janangueꞌa ma zi cuꞌahʉ, nuꞌbʉ i tꞌørcahʉ a, pɛ hin dan xømbʉihʉ, nɛ ga tømhbʉ gueꞌbʉ go bá ɛ̨h ma Hmuhʉ ra Cristo. Tenguꞌbʉ dí tuhmbʉ yʉ hmudä ua ja ra häi, dí tømhbʉ høntꞌbʉ go njąmꞌbʉ ba ɛ̨h ra ꞌye, di hoqui ꞌbɛꞌa gä xtá tuhmbʉ bʉya. Nɛ din ja a mi numanhohʉ din ja bʉya. 8 Janangueꞌa ga sɛthʉ hin dan xømbʉihʉ, nguetho ya him mayaꞌa ba ɛ̨h ra Hmu. 9 Ma zi cuꞌahʉ, hin ga ɛ̨mhbʉ rá tsꞌoqui na nꞌda ma cuhʉ ꞌbʉ dín nuhʉ yʉn ʉnbi, nɛ xømhma di ʉngahʉ Oją. Pɛ guim bɛ̨mhbʉ mi tsꞌʉtho da zøꞌa ra zɛꞌmi ya. 10 Ma zi cuꞌahʉ, gam bɛ̨mhbʉ gue bi hyät yʉn ʉnbi ʉ yʉ́ pøngahyą Oją, nɛ ngutho ga häthʉ ʉ. 11 Nguetho dí pąhmbʉ mająpi ʉ i hät yʉn ʉnbi. Xtá øhmbʉ ngue bi hyät yʉn ʉnbi a ra Job, nɛ xʉn ngu ran ho bi tꞌørpa mꞌbɛjua. Nguetho nuꞌa Oją xʉn ngu rán huɛ̨cate nɛ xʉn ngu rá mate. 12 Hnɛhi thoho hin ga uąspahʉ rá thuhu Oją a mam hmansɛhʉ, xín ga ndønbahʉ rá thuhu ꞌbɛꞌa manꞌda jaua ja ra häi ngue ga ɛ̨mhbʉ di zɛrca mam hmansɛhʉ. “Ha guí ɛ̨cꞌyɛ̨i a dí xiꞌi uague hinꞌna,” ga ɛ̨mthohohʉ. Janangueꞌa hin di ʉngahʉ Oją.
Dan yąhʉ Oją
13 Nuꞌbʉ dín nuhʉ ran ʉnbi, dan yąhʉ Oją ꞌbʉ. O nuꞌbʉ dadín johyahʉ, dan tuhmbʉ nꞌda ra thuhu ngue dí ɛ̨spahʉ Oją. 14 Nuꞌbʉ xʉn ʉjʉ, ga xihmbʉ yʉ ngʉrbi bʉ ja ram pɛti ba ɛ̨hɛ̨ da ꞌyäp rá mfätsꞌi ra Hmu, nɛ da jajʉ ra aceite nangue rá thuhu ra Hmu. 15 Nɛ Oją di ꞌuecꞌa ran ʉ dí hɛ̨mfʉ, nguetho dá ɛ̨cꞌyɛ̨ihʉ ngue majuąni da yąnjʉ ꞌbʉ má äfʉ a. Nɛ nuꞌbʉ ma tsꞌoquihʉ a dán hyɛ̨nhdʉ, pɛ di pungahʉ. 16 Nɛ dan xih ma tsꞌoquihʉ nꞌda ngu nꞌdajʉ, janangueꞌa da zä dan ꞌyäfʉ rá mate Oją nꞌda ngu nꞌdajʉ, nɛ nuꞌbʉ xʉn ʉ nꞌda da yąm bʉya. Nguetho xʉn ngu rá tsꞌɛdi da ꞌyøtꞌ Oją ꞌbʉ da ꞌyäp a majuąni nꞌdatꞌa Oją im bɛ̨ni, nɛ gueꞌbʉ di bɛ̨nba Oją a i ädi. 17 Tengu a ra Elías, nuꞌa nꞌda ra jąꞌi thoho tengu gahʉ, nɛ bi hyąh rá mbʉi bi ꞌyäp Oją ngue hin din ꞌye. Nɛ him bin ꞌye ua ja ra ximhäi gätho nhyunjɛya nɛ nꞌdato ząna. 18 Nɛ xø bin yąui Oją mahønꞌa ngue bi ꞌyäp ra ꞌye. Nɛ bá pɛnhꞌna Oją ra ꞌye, nɛ bi bøx yʉ hmudä ua ja ra häi bʉya. 19-20 Ma zi cuꞌahʉ, nuꞌbʉ nꞌda ra ꞌyɛ̨cꞌyɛ̨i da ꞌuepʉ ja ra ꞌyu xʉn juąni, nɛ nuꞌbʉ da zä ba sihʉ mahønꞌa, ga pąhmbʉ ngue dá yąnbahʉ rá te a xí ꞌuegue. Nɛ madagueꞌbʉ xʉn ngu yʉ́ tsꞌoqui, pɛ bi mba ma punbi.