Ga øthʉ a dí numanhojʉ Oją
13
O guí ɛꞌtsꞌa gnán huɛ̨jʉ nꞌda ngu nꞌda ahʉ tenguꞌbʉ guidín cuhʉ. 2 Nɛ guim bɛ̨mhbʉ gui säyabahʉ ja ni ngumhbʉ toꞌo da zøm bʉ. Nɛ nuꞌʉ ꞌda njabʉ mí øtꞌe, bi zin ʉ ꞌda yʉ́m ꞌbɛhni Oją bá nɛxpʉ mahɛ̨tsꞌi nɛ him mí pądi. 3 Nɛ dami bɛ̨mhbʉ ʉ yʉ ofädi, ngue tenguꞌbʉ nꞌda gnan ofädithohʉ. Nɛ guim bɛ̨mhbʉ ʉ bi mba ma ʉnbi, nguetho nɛ ahʉ i ja ni jąꞌihʉ gue sä da mba ma ʉnꞌni ahʉ. 4 Nɛ gätho ahʉ guin numansuhʉ a ran thąti gá ꞌyøthʉ ni xisuhʉ, nɛ a bi ꞌyøtꞌʉ miꞌda. Nɛ gam ꞌbʉmanho nangue nin thątihʉ, njon di tsꞌon a. Nguetho di ʉnba Oją ʉ toꞌo da ꞌyøtꞌ ran ꞌyomtꞌɛ̨ni, nɛ ʉ hinga na din thąti, nɛ ʉ xʉn thąti nuꞌbʉ i øtꞌ ran ꞌyomtꞌɛ̨ni. 5 Nɛ ꞌyo guí numanhohʉ xʉn ngu ra mbɛti. Pɛ gan johyahʉ nangue hangu tsꞌʉ i ja ahʉ. Nguetho: “Njąmꞌbʉ ga hɛcꞌahʉ, thocpa thoho ga jamansu ahʉ,” bi ꞌyɛ̨n Oją. 6 Janangueꞌa sä dan johyahʉ ꞌbʉ dí ɛ̨mhbʉ:I fäxcahʉ ra Hmu,
nɛ hin ga suhʉ ꞌbɛꞌa da zä da ꞌyørcahʉ yʉ jąꞌi.
7 Dami bɛ̨mhbʉ ꞌbɛꞌa bi ꞌyøtꞌʉ yʉ ngʉrpi gue bi xi ahʉ rám hman Oją. Nɛ guim bɛ̨mhbʉ ꞌbɛꞌa bi bøni nangue ra te man nám ꞌbʉ ʉ. Nɛ gui thojʉ a bi ꞌyutꞌahʉ, nangue bi ꞌyɛ̨cꞌyɛi majuąni a Oją ʉ. 8 Nu ra Jesucristo hingui dim pädi, gueꞌbʉ go mayaꞌbʉ, nɛhya nɛ gätho yʉ pa hønꞌbʉ go njąmꞌbʉ. 9 Janangueꞌa hin gan hyɛhmbʉ da tsꞌix ahʉ bʉ maꞌueni, guepʉ i hman yʉm hma ꞌdahma ꞌdanꞌyo nɛ hingam fądi. Pɛ nuꞌa ná bɛ̨mhbʉ rá mate Oją gueꞌa ní zac ma mbʉihʉ a, xinda gueꞌʉ yʉn tꞌɛ̨di gue ꞌbɛꞌa i tsꞌi. Nguetho njoꞌo toꞌo xí zac yʉ́ mbʉi ꞌbʉ supi ꞌbʉ ja a i si. 10 Pɛgue i jajʉ nꞌda ran tsꞌihmɛ, tengu ra hmɛpya gue ra ꞌbøtsꞌe mí øtꞌ yʉ mbäją bʉ ja ra niją mayaꞌbʉ, him mí ja ran tꞌɛ̨di da zi. 11 Pɛ nu rá hmumbäją yʉ israel ꞌbʉ mí mbøspa Oją nangue yʉ tsꞌoqui, bi dɛxpʉ mbo a rá ji ʉ yʉ zuꞌuɛ̨, guepʉ ja ra cuarto manꞌda xʉn dʉxqui. Pɛ nu yʉ́ ngø ʉ yʉ zuꞌuɛ̨ mí zø bʉ ndehnini. 12 Nɛ gueꞌa bi ꞌyøtꞌ ra Jesús, bin ʉnbi bi du bʉ ndehnini bʉ ꞌbʉh yʉ israel. Nɛ gueꞌa rá jisɛ í hoc yʉ jąꞌi. 13 Pɛ ga mbähä ga tɛnhdʉ bʉ ndehnini bʉ ꞌbʉh ra Jesús, tenguꞌbʉ nꞌda na ꞌbɛngadahʉ bʉ maꞌueni. 14 Nguetho nuua ja ra ximhäi hinꞌyʉ ua nꞌda ma hninihʉ gue din ząi xʉn ho. Pɛ dí homhbʉ ra dąhnini gue njąmꞌbʉ da gua a, guepʉ nín ząmhbʉ bʉ. 15 Nɛ ndeꞌbʉ thocpa thoho ga thąndehʉ Oją nangue ma ndehʉ, nɛ ga xihmbʉ ra jamadi. Nɛ di thocꞌa mam hmamhbʉ a ra Jesucristo, tenguꞌbʉ di un Oją ma ꞌbøtsꞌehʉ. 16 Nɛ hin dam pumbɛ̨nihʉ a na øthʉ ran ho, nɛ hin dam pumbɛ̨nihʉ ga comhbʉ ꞌbɛꞌa jajʉ, nguetho nɛꞌʉ tenguꞌbʉ yʉ ꞌbøtsꞌe i numanho Oją ʉ. 17 Nɛ gui ꞌyøthʉ a xi a ni ngʉrpihʉ, nɛ gui pąhmbʉ ja yʉ́n tꞌɛ̨di da xi ahʉ ꞌbɛꞌa gui ꞌyøthʉ. Nguetho i fätꞌa ni mbʉihʉ ʉ, nɛ i jatho di däp Oją ra güɛnda nangue ahʉ. Gui ꞌyøthʉ a dán johya ni ngʉrpihʉ, nɛ hin da du yʉ́ mbʉi. Nguetho nuꞌbʉ hin gui ꞌyøthʉ a, xín da bømanho ahʉ ꞌbʉ. 18 ꞌYäfʉ rám fätsꞌi Oją nanguecähe, nguetho nꞌdatꞌa dím bɛ̨mhbe ga tɛnhde a, nɛ dí nde ga øthe xʉn ho gätho. 19 Dí ä ahʉ ra mate, gue ɛ̨mmɛ gui ꞌyäfʉ Oją di jaqui ga mbagä bʉ nꞌdihi.
I äp rán jąpi Oją ʉ yʉ́ cu
20 Nu Oją ra hocpate a, bi xoxpʉ ꞌbʉ ʉ xʉn du a ma Hmuhʉ ra Jesucristo, nuꞌa di jamansuc ma mbʉihʉ. Nɛ nuꞌa rá ji í hocꞌa ran hoqui njąmꞌbʉ da guadi. 21 Nɛ dí äp rá mate Oją da ꞌyøtꞌahʉ hin hapʉ gui ꞌbɛhmbʉ, nꞌdahma da zä gui ꞌyøthʉ rá pähä a. Nɛ dí äp rá mate da ꞌyørcahʉ ꞌbɛꞌa gätho i nde a rá tsꞌɛdi ra Jesucristo. Ga numansuhʉ Oją gätho yʉ pa maząi. Nɛ høntꞌa gam bɛ̨mhbʉ a. 22 Ma zi cu ahʉ, dí ä ahʉ ra mate hin gan xømbʉihʉ gui ꞌyøhmbʉ na ran zofo, nguetho nuna ram hma dá otꞌahʉ hingui ngu ꞌbɛꞌa ma. 23 Ja nꞌda ram hma dí nde ga xi ahʉ, nuꞌa man ꞌyohʉhʉ ra Timoteo ya bi soꞌtsꞌi. Nuꞌbʉ da zøcua nꞌdihi, ga six ꞌbʉ dá mba bʉ. 24 Zɛnguagahʉ tsꞌʉ bʉ gätho ni ngʉrpihʉ, nɛ gätho ʉ yʉ cu gue ma miꞌyɛ̨cꞌyɛihʉ. Nɛhya bá nɛxpʉ Italia i pɛnꞌnahʉ ran zɛngua. 25 Nɛ dí äp rán jąpi Oją nangue gätho ahʉ. Nɛ høntꞌa dí xi ahʉ ya.