Thocpa thoho ga tɛnhdʉ a ma ngʉrpihʉ ra Jesús
12
Janangueꞌa nujʉ i ꞌbʉi xʉn ngu yʉ jąꞌi gue xʉ ꞌyurcahʉ a majuąni Oją tengu ja dá xi ahʉ. Janangueꞌa ga ꞌuejʉ tsꞌʉ gätho di pajʉ, nɛ yʉ tsꞌoqui gue tenguꞌbʉ an thuꞌtꞌi ma guahʉ, nꞌdahma ga häthʉ dan tihmbʉ nangueꞌa ran tąha bin ꞌdajʉ guepʉ go him min sä. 2 Nɛ thocpa thoho ga hanthʉ a ma ngʉrpihʉ ra Jesús, janangueꞌa da zä nꞌdatꞌa ga øthʉ bʉya. Nɛ di jajʉ ga øthʉ tengu bi ꞌyøzɛhɛ, gue bi ꞌyɛ̨cꞌyɛi majuąni a Oją, nɛ gueꞌa í hyätꞌ ran ʉnbi bʉ ja ra pontꞌi a. Nɛ nuꞌa ran dąte bi nu, yʉ́n dąte ʉ yʉ tsꞌomꞌbäi, ɛ̨mmɛ ma ʉcpi a. Pɛ him bi zu da nu a tengu a, nguetho mí pądi din ja ran johya mꞌbɛjua nanguejʉ. Nɛ nuya bí ꞌbʉpʉ mahɛ̨tsꞌi ꞌdarbʉ ní mandaui Oją. Nɛ guepʉ i sixcahʉ bʉ. 3 Nɛ gam bɛ̨mhbʉ tengu bi ꞌyøtꞌ ra Jesús, bi hyät ꞌbʉ mí tsꞌʉi, nɛꞌbʉ bin ʉnba bʉ ꞌbʉh yʉ tsꞌomꞌbäi. Janangueꞌa hin dan xømbʉihʉ, nɛ hin gam bɛ̨mhbʉ gue ga penjʉ. 4 Pɛ nu ahʉ hinga ná ɛsꞌhʉ yʉ tsꞌoqui guepʉ gdí tuhʉ. Pɛ dami ꞌyɛsꞌhʉ ʉ, madagueꞌbʉ gdí tuhʉ ꞌda ahʉ. 5 Ha gá pumbɛ̨nihʉ a ran zofo gue i xijʉ Oją, gue yʉ́ tꞌʉhni gahʉ a, tengu mam bʉ ja ra tꞌohni bʉ i ɛ̨na:Ma tsꞌʉntꞌʉ i, dami bɛ̨ni ꞌbɛꞌa dí mbɛpꞌa a ni Hmu, gueꞌbʉ bi xi i hapʉ gá ꞌbɛdi.
Nɛ xín gui sämanꞌʉ ꞌbʉ bi zʉ i.
6 Nuꞌa ra Hmu i xänba ʉ di huɛ̨qui,
nɛ i fɛ ʉ gätho ʉ i ɛ̨mbi yʉ́ tꞌʉhni.
7 Dami hyäthʉ ʉ yʉm fɛi, nguetho gueꞌʉ i xänꞌnahʉ ʉ. Nu Oją i ɛ̨na yʉ́ tꞌʉhni ahʉ. Nɛ joꞌo nꞌda ra tꞌʉhni gue hin da xänba rá ta nangue yʉm fɛi. 8 Pɛ nuꞌbʉ hin da mbɛpꞌahʉ Oją, tengu ʉ gätho yʉ́ tꞌʉhni i fɛi, nuꞌbʉ, masque hin yʉ́ tꞌʉhni ahʉ ꞌbʉ. Guín jahʉ tengu ra tꞌʉhni gue hinga mfądi toꞌo rá ta. 9 Nɛ manꞌda, nuꞌbʉ mín tꞌʉhnihʉ, gueꞌbʉ mí mbɛgba ma tahʉ dám ꞌbʉhmbʉ ua ja ra häi, dá numansuhʉ ʉ. Hanja manꞌda hin dín umhbʉ da mbɛgbahʉ Oją, rá Ta ma mbʉihʉ, janangue ga tįmhbʉ ra te ma mbʉihʉ. 10 Nu ma tahʉ ua ja ra ximhäi bi mbɛgbahʉ ꞌbʉ nꞌdandį, gue mím bɛ̨ni xʉn ho. Pɛ nu Oją ꞌbʉ i fɛgbahʉ, ząi xʉn ho i ørcahʉ, gue di jajʉ xtán hothogahʉ tengu a. 11 Majuąni hin dí ɛ̨mhbʉ xʉn ho a ram fɛi ꞌbʉ ra ora dí sähʉ a, nguetho xʉn ʉ. Pɛ nuꞌbʉ bin hoh ma mbʉihʉ nangue ram fɛi, nɛ dí ꞌbʉmanhohʉ bʉya, nɛ i hu ma mbʉihʉ.
Ntsꞌutho ꞌbʉ ga hɛhmbʉ rá nde Oją
12-13 Janangueꞌa dan ɛ̨hyahʉ mahønꞌa gue ga thojʉ a rá ꞌbɛfi Oją, nɛ hin ga ꞌuehmbʉ. Pɛ ga hąxhʉ ra ꞌyu xʉn juąni. Nubʉya nu ni guahʉ guí hɛ̨mfʉ, mí ɛ̨na xtá ꞌuagui, pɛgue da yąni, da hyą ra tsꞌɛdi mahønꞌa. 14 Nɛ gui hyomhbʉ hin gui dʉmhbʉ nꞌda ra sʉi. Nɛ gui hyomhbʉ ra hogambʉi. Nguetho nuꞌa hinꞌyʉ ra hogambʉi hin da zä da nu a ra Hmu. 15 Nɛ ꞌda gdám fäxta nin ꞌyomfɛ̨nihʉ nꞌda ngu nꞌda ahʉ, janangueꞌa hin dim ꞌbʉ i ꞌda ahʉ hin da nde rá mate Oją. Nɛ xínga nꞌda ahʉ din ja tengu nꞌda rá ꞌyʉ ra tsꞌoqui, gue hin di nɛqui ꞌbʉ rá mbʉdi, pɛ nuꞌbʉ bi bøtsꞌe din xąndi, di tsꞌon ʉ miꞌda bʉya. 16 Nɛ dam fähmbʉ njon dan ꞌyomtꞌɛ̨nihʉ. Nɛ xín ga samhbʉ a rá mate Oją, tengu bi ꞌyøtꞌ ra Esaú, gue í pä a ra tʉhʉ a rán jąpi mí ɛ̨na xtí unꞌna Oją, gue rá mbʉdi tsꞌʉntꞌʉ ra Isaac. 17 Nɛ guí pąhmbʉ ꞌbɛꞌa bi ꞌyøtꞌ ra Esaú, gue mꞌbɛjua bi nde a ran jąpi mí ɛ̨na xtí unꞌna rá ta. Pɛ him mam bi zä bi unꞌna. Nɛ tsꞌɛdi bin zoni, pɛ him bi dįni ꞌbɛꞌa xtá ꞌyøtꞌ mahønꞌa gue xtá hyąnꞌa. 18 Gam bɛ̨mhbʉ ꞌbɛꞌa bi ꞌyøtꞌ yʉ israel, bi zøm bʉ ja nꞌda ra tꞌøhø ua ja ra ximhäi, guepʉ bi dɛ ra sibi ntsꞌutho, nɛ bi ꞌbɛxui yʉ güi tengu ꞌbʉ ra xui, nɛ bin ja ra ndønthį ꞌbʉ mi sih yʉ́n tꞌɛ̨di Oją ʉ. Pɛgue nꞌda ra hmɛpya a tengutho bʉ rá ngu Oją gue ɛ̨mmɛ xʉn dʉxqui. 19 Nɛ bi ꞌyøh ra thʉxi, nɛ rá nde Oją bi ꞌyø ʉ. Nɛ nuꞌbʉ mí ꞌyø a rá nde ʉ yʉ israel, ɛ̨mmɛ bi ꞌyäh ra mate gue hin da ꞌyøh mahønꞌa, nguetho ɛ̨mmɛ bin su. 20 Him mí hätꞌi da ꞌyø a ra nde bi xifi, bi ꞌyɛ̨na: “Xinga nꞌda ra jąꞌi nɛ xing yʉ zuꞌuɛ̨ da zä da däcua, nuꞌbʉ da däcua, ꞌbexque da tho, nɛ da mba ma ꞌyɛꞌmado o gue da mba ma sʉnza.” 21 Ɛ̨mmɛ ntsꞌutho ꞌbɛꞌa bin ja bʉ. Nɛsɛ ra Moisés bi ꞌyɛ̨na: “Dí fɛtꞌi gue dín su.” 22 Pɛ nujʉ ya njuąntho rá hnini Oją bʉ mahɛ̨tsꞌi dí cʉthʉ, i pąpʉ ma mbʉihʉ, gue Oją ząi ꞌbʉi. Nɛ i tꞌɛ̨mbi ra tꞌøhø Sión a rá hnini Oją, nɛ i tꞌɛ̨mbi Jerusalén bʉ mahɛ̨tsꞌi. Nɛ dá sømhbʉ bʉ ꞌbʉh yʉ́m ꞌbɛhni Oją mahɛ̨tsꞌi gue yʉ mahuąhi thoho, guepʉ di muntsꞌi i thąnde Oją ɛ̨mmɛ di johya. 23 Nɛ dá cʉthʉ bʉ an thutsꞌi ma thuhuhʉ bʉ mahɛ̨tsꞌi, guepʉ dám pɛtihʉ gätho toꞌo bi hyąn ra herencia bi un Oją. Nɛ dá cʉthʉ bʉ bí ꞌbʉ Oją ra Zɛꞌmi di juąnbi gätho. Nɛpʉ ꞌbʉh yʉ́ mbʉi ʉ i tu, gue nuꞌʉ bi tꞌɛ̨mbi xʉn ho ꞌbʉ mí hocꞌa Oją. 24 Nɛ dá cʉthʉ bʉ ꞌbʉh ra Jesús ma hocpatehʉ bʉ bí ꞌbʉ a i ørcahʉ ran hoqui maꞌdaꞌyo. Nɛ dí cʉthʉ nangue rá ji ra Jesús ꞌbʉ mí tho, í pungahʉ Oją a. Janangueꞌa manꞌda xʉn ho i xijʉ rá ji ꞌbʉ mí tho, xinda gueꞌa rá ji ra Abel ꞌbʉ mí tho, nuꞌa i ma di ʉnba a to bi hyo a. 25 Janangueꞌa i jatho dam fähmbʉ hin ga hɛhmbʉ a rá nde a in zojʉ ya. Gam bɛ̨mhbʉ him bi zä bi zo a ran ʉnbi ʉ bi mbɛsta a rá nde Oją, ꞌbʉ mí tsꞌocua ja ra ximhäi. Janangueꞌa ꞌbe xíngui tsꞌʉ da zä ga sohmbʉ ran ʉnbi ꞌbʉ ga fɛstahʉ a Oją, nguetho mahɛ̨tsꞌi bʉ in zojʉ ya. 26 Nuꞌbʉ mí man yʉn tꞌɛ̨di Oją bʉ ja ra tꞌøhø, bi japi bi ꞌyąn ra häi. Pɛ nuya i ɛ̨n Oją: “Manꞌdandį ga japi di ꞌyąni, pɛ hinga høn ra häi, pɛ nɛ mahɛ̨tsꞌi,” bi ꞌyɛ̨n Oją. 27 Nɛ nuꞌa ꞌbɛꞌa gätho hingui dʉ, da mba ma bʉntꞌi. Nɛ din ząm bʉ ʉ hingui sä da mba ma ꞌueque, gue nuꞌʉ ꞌbɛꞌa gätho bi zän Oją gue din ząm bʉ. 28 Nɛ bin ꞌdajʉ bʉ di manda Oją gue hingui sä da mba ma ꞌueque. Janangueꞌa ga xihmbʉ jamadi Oją, nɛ ga thąndehʉ ngue ga numansuhʉ nɛ ga suhʉ. Nɛ gueꞌa numanho a bʉya. 29 Nguetho nu ma Ojąhʉ di juadi ꞌbɛꞌa hingui numanho tengu ra sibi.