Nɛ gueꞌa ná ɛ̨cꞌyɛihʉ majuąni a Oją
11
ꞌBɛꞌa nam bønꞌa na ɛ̨cꞌyɛihʉ majuąni a Oją. Nám bøni, gue dí ɛ̨cꞌyɛihʉ majuąni ga hąmhbʉ a ran ho bi xijʉ Oją. Nɛ nam bøni ga ɛ̨cꞌyɛihʉ majuąni ꞌbɛꞌa gätho i ma Oją, madagueꞌbʉ hin dí nuhʉ a. 2 Nu ma bombøtahʉ bi hnumanho nguetho bi ꞌyɛ̨cꞌyɛi majuąni a Oją. 3 Dí ɛ̨cꞌyɛihʉ majuąni bi ꞌyøtꞌ Oją yʉ ximhäi, madagueꞌbʉ hin dá nuhʉ ꞌbʉ mí ꞌyøtꞌʉ. Nuꞌbʉ mí ꞌyɛ̨na din ja, ya bin ja bʉya, gue bi ꞌyøtꞌe nangue ʉ ꞌbɛꞌa him midí nɛqui. 4 Nuꞌa ra Abel bi un Oją nꞌda ra ꞌbøtsꞌe xʉn ho xinda gue a bi un a ra Caín, nguetho bi ꞌyɛ̨cꞌyɛi majuąni a bi xi Oją. Nuꞌbʉ mí thąnba a rán tꞌunni ra Abel, bi fądi bi numanho Oją a. Nɛ madagueꞌbʉ bi du ra Abel, pɛ tengu ꞌbʉ ꞌbʉtho, gue urcahʉ ꞌbɛꞌa mí øtꞌa, gue bi ꞌyɛ̨cꞌyɛi majuąni a Oją. 5 Ngutho ra Enoc, bi ꞌyɛ̨cꞌyɛi mbo rá mbʉi a majuąni. Janangueꞌa bi tsꞌixpʉ ja rá ngu Oją nɛ him bi du. Nɛ him bi thįngua ja ra häi a, nguetho bi zixꞌa Oją. Nɛ i ɛ̨n ra tꞌohni: “Nuꞌbʉ hin ní tsꞌitsꞌi, bi hnumanho a.” 6 Pɛ nuꞌbʉ i ꞌbʉ a nꞌda i nde da zøm bʉ ꞌbʉ Oją, pɛgue da ꞌyɛ̨cꞌyɛi majuąni i ꞌbʉ a, nɛ da ꞌyɛ̨cꞌyɛi majuąni din tꞌun ran ho a to i hon Oją. Nguetho hingui sä da numanho Oją nꞌda ꞌbʉ hingui ɛ̨cꞌyɛi a majuąni. 7 Bi ꞌyɛ̨cꞌyɛi a ra Noé gue majuąni a mí xi Oją din ja a ra dąmbʉntꞌi, madagueꞌbʉ hin ní nu. Nɛ bi ꞌyøtꞌa ra dąbarco bi xifi, guepʉ da yąnꞌʉ i ꞌbʉpʉ rá ngu. Nɛ bi ꞌyɛ̨mbi xʉn ho Oją a nguetho mí ɛ̨cꞌyɛi mbo rá mbʉi a Oją. Nɛ gueꞌa í nɛqui hing yʉ ꞌyɛ̨cꞌyɛi gätho ra ximhäi, jąn í tsꞌɛmba ʉ. 8 Bi ꞌyɛ̨cꞌyɛi majuąni Oją a ra Abraham. Janangueꞌa bi bøm ꞌbʉ mí zonꞌna Oją, gue da mba bʉ ja a ra häi bi xi Oją gue di unni. Bi nɛxpʉ ja rá häi zɛhɛ, nɛ him mí pądi hapʉ man ní mba. 9 Nɛ nuꞌbʉ mí zøm bʉ, pɛ bin ꞌyotho bʉ. Nguetho bi ꞌyɛ̨cꞌyɛi majuąni gue ja nín ząm bʉ rá ngu Oją mahɛ̨tsꞌi. Janangueꞌa bi hyøtho yʉ ngumꞌbøꞌtꞌe bʉ. Nɛ ngutho bi ꞌyøtꞌa ra Isaac rá tsꞌʉntꞌʉ, nɛ a ra Jacob rá ꞌbɛto, gue nɛꞌʉ da gomhbʉ ra herencia bi sih majuąni ra Abraham. 10 Nguetho nu ra Abraham mí tøꞌmi da zøni nín ząm bʉ ja nꞌda ra dąhnini gue mahɛ̨tsꞌi, din ja hønꞌbʉ go njąmꞌbʉ, gue bi bɛ̨n Oją nɛ bi ꞌyøzɛhɛ. 11 Nɛ bi ꞌyɛ̨cꞌyɛi majuąni a ra Sara, nɛ gueꞌa í hyąn rá tsꞌɛdi Oją a gue dim ꞌbʉh rá tsꞌʉntꞌʉ. Nɛ him mí sä xtím ꞌbʉh rá tꞌʉhni, gue ya xʉm bømbe. Pɛ bim ꞌbʉꞌa rá tsꞌʉntꞌʉ, nguetho bi bądi majuąni da ꞌyøtꞌa bi man Oją. 12 Nɛ ngutho ra Abraham, madagueꞌbʉ ya xí thoh yʉ pa gue mí sä xtím ꞌbʉh yʉ́ tꞌʉhni, pɛgue bi zøni bim ꞌbʉh yʉ́m bomꞌbɛto ɛ̨mmɛ xʉn ngu, tengu yʉ sø mahɛ̨tsꞌi, o tengu yʉ ꞌbomu bʉ ja ra ndendeją, gue njongui hätꞌi da mbede. 13 Nɛ gätho ʉ bi du ꞌbʉ him mani hyąn a ran ho bi xi Oją. Pɛ tenguꞌbʉ mí handi yatho bʉ bí ja a ran ho bi sifi, nguetho mí ɛ̨cꞌyɛi mbo yʉ́ mbʉi gue majuąni din tꞌunni. Janangueꞌa bin johya ꞌbʉ mí bɛ̨ni gue da nu a. Jananjabʉ bi mansɛ tenguꞌbʉ bi thotho ua ja ra ximhäi ʉ. 14 Nɛ nu ʉ im ma tengu na, i udi gue i ꞌyotho nɛ i hon manꞌda ra häi guepʉ din ząi. 15 Nɛ nuꞌbʉ xtám bɛ̨ntho a ra häi bʉ xpí bøn ʉ, mí sä xtá mbeng mahønꞌa ʉ ꞌbʉ. 16 Pɛ mí nde nꞌda ra häi manꞌda xʉn ho, gue nde da ma, ra häi mahɛ̨tsꞌi. Janangueꞌa bin johya Oją gue da ꞌyɛ̨mbi yʉ́ Oją ʉ, nɛ bi hocpa yʉ́ hnini ʉ. 17-18 Nɛ nuꞌbʉ mí tsꞌäp rá mbʉi ra Abraham, gue bi sifi bá si a rá tsꞌʉntꞌʉ ra Isaac, da mbøspa Oją. Nɛ mí nde xtá ꞌyøtꞌe, nguetho bi ꞌyɛ̨cꞌyɛi majuąni a Oją, madagueꞌbʉ bi xifi dim ꞌbʉh yʉ́m bomꞌbɛto ꞌbʉ bi xąnd ra Isaac. 19 Gueꞌa bi bɛ̨nꞌa ra Abraham gue i ja rá tsꞌɛdi Oją da xox ʉ xʉn du. Janangueꞌa tengutho ꞌbʉ bi dąmbɛ̨ni bʉ ꞌbʉ ʉ xʉn du a ra Isaac ꞌbʉ mam bá si mahønꞌa a rá ta. Nɛ nꞌda ra hmɛpya bi ꞌyøtꞌ na. 20 Nɛ nangue a bi ꞌyɛ̨cꞌyɛi majuąni ra Isaac gue da gomhbʉ rán ho Oją ʉ yʉ́ tꞌʉhni, janangue bi sih majuąni ra Jacob nɛ ra Esaú gue da mba mająpi. Nɛ bi sifi ꞌbɛꞌa bi zänba Oją nꞌda ngu nꞌda ʉ. 21 Nɛ ngutho a ra Jacob, bi ꞌyɛ̨cꞌyɛi majuąni a ran jąpi bi man Oją. Nɛ ní mba bʉ da du, pɛ bi thocpa a ran jąpi ʉ yʉ́ ꞌbɛto, gueꞌʉ yʉ́ tsꞌʉntꞌʉ ra José. Nɛ bi dąnde Oją ꞌbʉ mí dospa rá yą rá tøhø a ra Jacob. 22 Nɛ a ra José bi ꞌyɛ̨cꞌyɛi majuąni a bi man Oją. Janangueꞌa nuꞌbʉ mí tsꞌʉtho da du, bi xi ʉ yʉ́ mɛnguhʉ gue yʉ israel, gue da zøni da mbeng bʉ yʉ́ häi zɛhɛ. Nɛ bi xifi da thuxꞌa ra ánima ꞌbʉ bi bøm bʉ ʉ, gueꞌa ra José xí du. 23 Nɛ rá ta nɛ rá mbe ra Moisés ꞌbʉ mim ꞌbʉh ra Moisés, bi ꞌyąꞌa rá tsꞌʉntꞌʉ an hyuzna. Nɛ him bi numansu a rán tꞌɛ̨di ra tsꞌʉtꞌabi gue mí ma xtí tho ʉ yʉ́ tsꞌʉntꞌʉ yʉ israel. Nguetho midí nɛqui din hocjąꞌi, nɛ mí ɛ̨cꞌyɛi majuąni di jamansu Oją. 24 Nɛ a ra Moisés guextaꞌa mí ɛ̨cꞌyɛi majuąni a Oją. Janangueꞌa nuꞌbʉ mín dąnꞌyohʉ, him mam bi nde da tꞌɛ̨mbi rá tsꞌʉntꞌʉ a rá tꞌįxu ra tsꞌʉtꞌabi bʉ Egipto, gue xtán zä xtín jasɛ rá tsꞌɛdi. Nɛ gueꞌa rá tꞌįxu a ra tsꞌʉtꞌabi bi dįm bʉ mán tꞌągui nɛ bi tede. 25 Pɛ manꞌda bi nde ꞌdarbʉ bin ʉnbahʉ ʉ yʉ́ tꞌʉhni Oją a ra Moisés nuꞌʉ yʉ́ mɛnguhʉ, xinda gueꞌbʉ xtán dɛn rán johya ra ximhäi gue ní mba bʉ da guadi. 26 Nɛ nuꞌbʉ mín ꞌyomfɛ̨ni ra Moisés, manꞌda di muui ꞌbʉ nꞌdatꞌa yʉn tsꞌante da nuui ra Cristo, xinda gueꞌbʉ xtí manda ꞌbɛꞌa gätho mí ja bʉ ra häi Egipto, nguetho manꞌda mí numanho ꞌbɛꞌa di un Oją mꞌbɛjua. 27 Nɛ nangue bi ꞌyɛ̨cꞌyɛi majuąni ra Moisés, janangueꞌa bi bøm bʉ ra häi Egipto, nɛ him bi zu a nán cuɛ a ra tsꞌʉtꞌabi. Pɛ bi hyutꞌan zambʉi, nguetho bi bądi in ꞌyoui Oją, madagueꞌbʉ him mí nu. 28 Pɛ bi ꞌyɛ̨cꞌyɛi majuąni a bi xi Oją a ra Moisés, janangueꞌa bi ꞌyøtꞌa bi xifi, ngue bi manda dí cotsꞌi ra ji bʉ ja yʉ́ ꞌyojutꞌi yʉ israel. Janangueꞌa him bi thop yʉ́ mbʉdi tsꞌʉntꞌʉ ʉ yʉ israel ꞌbʉ mam bá ɛ̨h rám ꞌbɛhni Oją. Gueꞌa tꞌɛ̨mbi ndąbaxjua bi dʉꞌmi bi ꞌyøtꞌʉ. 29 ꞌBʉ mí ꞌyɛ̨cꞌyɛi mbo yʉ́ mbʉi i ja rá tsꞌɛdi a Oją ʉ yʉ israel, janangueꞌa bi japꞌa Oją bi xocpa nꞌda ra ꞌyu bʉ ja ra deją, gue bi tho ʉ. Pɛ nuꞌbʉ mí ꞌyɛ̨na nɛ ʉ xtá ꞌdaxꞌʉ yʉ mɛ egipto, gueꞌʉ mí cute, bi compꞌ ra dehe bi du ʉ bʉya. 30 Nu yʉ israel bi sifi di thɛ̨ꞌtsꞌa ra dąhnini Jericó gätho nyoto pa, nguetho ma mbäꞌtꞌi ra jądo a ra hnini. Nɛ nuꞌa í ꞌyɛ̨cꞌyɛi majuąni a Oją, nɛ gueꞌa í yøtꞌ ra jądo a ꞌbʉ mí guaꞌa nyoto pa di thɛ̨ꞌtsꞌi. Nɛ bi zä bi dąp ra hnini ʉ yʉ israel bʉya. 31 Pɛ mí ꞌbʉpʉ nꞌda ra xisu gue ra Rahab. Nɛ madagueꞌbʉ man ra ꞌyomtꞌɛ̨ni mamꞌbɛtꞌo, pɛ hinga nɛ a bi tho a ꞌbʉ mí tho yʉ́ mɛnguhʉ gue him mí ɛ̨cꞌyɛi Oją. Nɛ nuꞌa í zimmanho ʉ yʉ́m ꞌbɛhni yʉ israel, nɛ gue a í fądi mí ɛ̨cꞌyɛi mbo rá mbʉi a Oją. 32 Nɛ xʉn ngu miꞌda xtán zä xcá xi ahʉ, pɛ hinga xøtꞌa yʉ ora ga xi ahʉ, nangue ra Gedeón nɛ ra Barac, nɛ nangue ra Sansón nɛ ra Jefté, nɛ nangue ra David nɛ ra Samuel, nɛ gätho miꞌda yʉ pøngahyą. 33 Nɛ mí ɛ̨cꞌyɛi majuąni Oją ʉ, nɛ gueꞌa í hyąn rá tsꞌɛdi Oją ʉ, gue bi dąp yʉ jąꞌi mí ꞌbʉpʉ nꞌdanni miꞌda yʉ häi ꞌbʉ mín sʉhmbʉ. Nɛ bin tsꞌʉtꞌabi xʉn ho. Nɛ mí ɛ̨cꞌyɛi majuąni a bi sifi, janangueꞌa gätho bi zä bi ꞌyør bʉya. Nɛ nuꞌʉ miꞌda mí ɛ̨cꞌyɛi majuąni a Oją, janangueꞌa him bi za yʉ dązate. 34 Nɛ him bin zø ʉ miꞌda bí thøtpʉ ja ra orno ꞌbʉ ɛ̨mmɛ midí thoni nám pa, nguetho bi ꞌyɛ̨cꞌyɛi a majuąni ʉ. Nɛ him bi zä bi tho miꞌda ꞌbʉ mí tꞌɛ̨mbi xtá tho nangue ra juai. Nɛ nuꞌbʉ mí güent yʉ́ jąꞌi ʉ miꞌda, bi japꞌa Oją bi zaqui. Nɛ madagueꞌbʉ him mí ja yʉ́ tsꞌɛdi ʉ miꞌda, pɛgue tenguꞌbʉ ya mí ja yʉ́ tsꞌɛdi ꞌbʉ mí ꞌyɛ̨cꞌyɛi majuąni Oją, nɛ gueꞌa í ꞌda ʉ yʉ dofʉi yʉ́n sʉihʉ. 35 Nɛ mí ꞌbʉ i ꞌda yʉ xisu ꞌdaꞌa nꞌdanni, gue xí du yʉ́ tꞌʉhni. Pɛ bi dąmbɛ̨ni ʉ yʉ́ tꞌʉhni ꞌbʉ mí ꞌyɛ̨cꞌyɛi majuąni ʉ yʉ́ mbe. Nɛ nuꞌʉ miꞌda bi ndesɛ bi tho nangueꞌa bi ꞌbɛnza, nɛ him bi nde bi goh yʉ́ mbʉi guepʉ xtá mba ma thøgue, nguetho bi ꞌyɛ̨cꞌyɛi majuąni da bømanho bʉ ja ran dąte ʉ, da mba bʉ ja ra te manꞌda xʉn ho. 36 Nɛ nuꞌa í ꞌyɛ̨cꞌyɛi majuąni ʉ miꞌda, nɛ gueꞌa í hyätꞌ yʉn ʉcpi gue bi tꞌʉspi, nɛ bi hyätꞌ ꞌbʉ mím ꞌbɛnza, nɛꞌbʉ bi thuꞌtꞌi ꞌda nangue yʉ cadena nɛ bi jotꞌa fädi. 37 Nɛ bi tho ʉ ꞌda gue bi mba ma batꞌado. Nɛ nuꞌʉ miꞌda bi thɛngui nde nangue ra thɛgui. Nɛ miꞌda í tho ra juai ꞌbʉ mí sifi da mba ma thøgue. Nɛ mí ꞌyotho ʉ miꞌda, nɛ í huɛ̨hi thoho ʉ, mí he yʉ xidɛꞌyo, nguetho pa ma ʉcpi. Nɛ mí sä ran ʉ gue mí pa ma ʉnbi. Nɛ gätho ʉ bi hyätꞌi, nguetho bi ꞌyɛ̨cꞌyɛi majuąni a Oją. 38 Nɛ him mí fądi gue manꞌda xʉn ho ʉ, pɛ manꞌda di muui ʉ xinda gueꞌʉ gätho ra ximhäi. Pɛ ha sä mí ꞌyotho bʉ ja yʉ ʉhäi ꞌbʉ mí ꞌdagui, nɛpʉ ja yʉ tꞌøhø. Nɛ mí ꞌbʉpʉ ja yʉ hyądo nɛpʉ ja yʉ hyąhäi. 39 Pɛ gätho bi hnumanho ʉ nangue bi ꞌyɛ̨cꞌyɛi majuąni Oją. Janangueꞌa i pa mfɛ̨ni thoho ʉ. Pɛ him ꞌbex bi hyąn a bi xi a Oją di unni. 40 Nguetho xí zän Oją ꞌbɛꞌa manꞌda xʉn ho da ꞌyøtꞌe nanguejʉ, gue ꞌdarbʉ ní hąmhbʉ ran ho ʉ mí ꞌbʉh mayaꞌbʉ.