10
Nuꞌa ran tꞌɛ̨di bin tꞌun ra Moisés nangue yʉ ꞌbøtsꞌe bi ꞌyøtꞌ yʉ mbäją, nꞌda ra hmɛpya thoho nangueꞌa ran ho bá ɛ̨hya. Nɛ hinga gueꞌa majuąni ran ho a. Nɛ njąmꞌbʉ bi zä bi mba ma hocpi yʉ́ tsꞌoqui ʉ mí øtꞌ yʉ ꞌbøtsꞌe, madagueꞌbʉ njɛya ꞌbʉ njɛya midí uni. 2 Nuꞌbʉ da gueꞌʉ yʉ ꞌbøtsꞌe xtán zä xtín hocꞌʉ, pɛ nꞌdandįtho xtí uni, nɛ xtá ꞌyɛꞌtsꞌa ní un yʉ ꞌbøtsꞌe ꞌbʉ. Nɛ ya xtám bądi nꞌdandį thoho bi bo yʉ́ tsꞌoqui bʉya. 3 Pɛ nangue yʉ ꞌbøtsꞌe bi uni gätho yʉ jɛya, bi japi da bɛ̨ni gue in dupate tho yʉ́ tsꞌoqui. 4 Nguetho hinjąmꞌbʉ da zä di punba yʉ́ tsꞌoqui nꞌda ʉ yʉ́ ji yʉ ndąni nɛ yʉ dɛꞌyo. 5 Janangueꞌa bi ꞌyɛ̨n ra Cristo ꞌbʉ mí zøcua ja ra häi, bi ꞌyɛ̨mpꞌa Oją rá Ta:Hinga njuąntho gueꞌʉ yʉ zuꞌuɛ̨ guí nde.
Janangue gá jaqui dán jąꞌigä ngue dam ꞌbøtsꞌegä, bi ꞌyɛ̨nꞌa ra Cristo.
6 Nɛ hin gnán johya nꞌda ran tꞌunni ngue yʉ zuꞌuɛ̨ bi tꞌupʉ ja ra sibi, xínga gueꞌʉ yʉ ꞌbøtsꞌe nangue yʉ tsꞌoqui.
7 Janangue dá ɛ̨ngä: “Bá ɛ̨cä ya ga øtꞌä ni pähä ma Oją i, dam ꞌbøtsꞌe zɛhɛgä,
tengu mán tꞌoꞌtꞌi bʉ ja nim hma,”
bi ꞌyɛ̨nꞌa ra Cristo. 8 Nuꞌa rá mbʉdi bi mangua, hin nán johya Oją ʉ yʉ ꞌbøtsꞌe gue yʉ zuꞌuɛ̨ bi tꞌudi nangue yʉ́ tsꞌoqui nꞌda, madagueꞌbʉ gueꞌa bi manꞌa nꞌda rán tꞌɛ̨di a. 9 Pɛ xø bi ꞌyɛ̨m mahønꞌa bʉya: “Bá ɛ̨cä ya gue ga øtꞌä ni pähä, ma Oją i, gue dam ꞌbøtsꞌe zɛhɛgä.” Gue nde da ma, dí ꞌueh ya yʉ ꞌbøtsꞌe mí ja, nɛ din ja nʉ manꞌda ra ꞌbøtsꞌe. 10 Nu ra Jesucristo bi ꞌyøtꞌ rá pähä Oją, gue bi unsɛ rá jąꞌi nꞌdandį thoho bi juadi. Janangueꞌa bi hogahʉ Oją ya. 11 Nu yʉ́ mbäją yʉ israel mí øtꞌʉ yʉ́ ꞌbɛfi gätho yʉ pa, nɛ thocpa thoho midi un yʉ ꞌbøtsꞌe, madagueꞌbʉ hinjąmꞌbʉ mí sä di hocpa yʉ́ tsꞌoqui nꞌda ʉ. 12 Pɛ nu ra Jesucristo nꞌdandį thoho bin uni bim ꞌbøtsꞌe nangue ma tsꞌoquihʉ, pɛ him manꞌdandį din uni. Nɛ bí ꞌbʉpʉ ꞌdarbʉ ní mandaui Oją ya. 13 Nɛ guepʉ bí ꞌbʉpʉ ya, gueꞌbʉ go bi dąpꞌʉ yʉ́n sʉihʉ. 14 Nguetho nangue nꞌdandį thoho bin unsɛ, janangueꞌa bi juadi bi hocꞌʉ toꞌo bi ꞌyøtꞌe yʉ́ mbɛti. 15 Guesɛ a rá Hogandąhi Oją di jajʉ ga pąhmbʉ a mangua, ꞌbʉ mí ma:
16 Nu ran hoqui ga ørpa yʉ jąꞌi ꞌbʉ mꞌbɛjua, din ja tengu na,
ga bɛ̨nba bʉ ja yʉ́ mbʉi ma pähä zɛhɛ, da ndesɛ gue da dɛngui.
Nguetho ga un man ꞌyomfɛ̨ni bʉ ja yʉ́n ꞌyomfɛ̨ni ʉ.
17 Nɛ xø bi ꞌyɛ̨m mahønꞌa:
Him manꞌdandį gam bɛ̨ngä yʉ́ tsꞌoqui, nɛ xínga gueꞌʉ yʉm fɛꞌtsꞌi mí øtꞌʉ,
bi ꞌyɛ̨n rá Hogandąhi Oją. 18 Nangue Oją bi punga ma tsꞌoquihʉ, hingui sä ga unhdʉ miꞌda yʉn tꞌunni dí punga ma tsꞌoquihʉ.
Da zä ga sømhbʉ bʉ ꞌbʉ Oją
19 Ma zi cu ahʉ, gam bɛ̨mhbʉ nangue a ra nyonhoqui mi ja, njoꞌo nꞌda ra jąꞌi thoho mí sä da yʉrpʉ manꞌda xʉn dʉxqui, nɛ gueꞌa í tꞌuꞌa ra ꞌbøꞌtꞌe mí ndam bʉ. Pɛ nuya bi zä dí cʉthʉ bʉ ja a rá ngu Oją mahɛ̨tsꞌi, manꞌda xʉn dʉxqui. Nɛ dí cʉthʉ nangue a rá ji ra Jesucristo, bi hogahʉ. Nɛ hin dín suhʉ ya. 20 Nɛ dí cʉthʉ nangue a ra ꞌyu maꞌdaꞌyo gue i ꞌbʉi. Nguetho bi ꞌuegahʉ ra ꞌbøꞌtꞌe mí ndam bʉ ja ra goxthi, ꞌbʉ mí unsɛ rá jąꞌi ra Cristo ya. 21 Nuꞌa ra Jesús, gueꞌa ma hmumbäjąhʉ, nanguejʉ gue yʉ́tꞌʉhnigahʉ Oją. 22 Janangueꞌa mbähä ga sømhbʉ bʉ ꞌbʉ Oją ya, nꞌdatꞌa gam bɛ̨mhbʉ majuąni i ndejʉ. Nguetho bi mberca ma mbʉihʉ nangue rá ji ra Cristo, hin gam bɛ̨mhbʉ gue dín dupatehʉ yʉ tsꞌoqui ya. Nɛ tengu ꞌbʉ am ꞌbeꞌtꞌegahʉ a ra dehe xʉn güe. 23 Nɛ ga thoqui ga mamhbʉ a ran ho dí tømhbʉ, hin ga suhʉ. Nguetho majuąni di jąꞌtsꞌa rám hma bi xijʉ Oją gue di pøjʉ. 24 Mbähä dan xänbahʉ ga øthʉ ran huɛ̨cate, nɛ ꞌda dán ɛ̨hyadahʉ ga øthʉ a. 25 Nɛ hin ga øthʉ tengu øtꞌi ꞌda him mi søm bʉ ja mam pɛtihʉ. Pɛgue mbähä ga thoqui dam pɛtihʉ, nɛ dan xänbahʉ nꞌda ngu nꞌdajʉ. Nɛ manꞌda ga humbi ga øthʉ ya, nguetho ya mí tsꞌʉtho ba ɛ̨h ra Hmu. 26 Pɛ nuꞌbʉ dí ndesɛ ga thoctahʉ yʉ tsꞌoqui ꞌbʉ ya má pąhmbʉ a majuąni, tenguꞌbʉ hin dá jamansuhʉ a ra ꞌbøtsꞌe xtím pungahʉ. Pɛ ya hinꞌyʉ ꞌbɛꞌa manꞌda sä ga umhbʉ bʉya, gue dí mba ma pungui ma tsꞌoquihʉ. 27 Pɛ høntꞌa ra mbidi gan nuhʉ ꞌbʉ, gue ran ʉnbi dí coꞌtsꞌa Oją, nangue ra sibi ntsꞌutho ꞌbʉ bi dɛ, gue di jua ʉ yʉ́n sʉihʉ Oją. 28 Gam bɛ̨mhbʉ tengu ran tꞌɛ̨di bin tꞌun ra Moisés, gueꞌbʉ ꞌbʉ a nꞌda i øtꞌ ram fɛꞌtsꞌi, nɛ di nɛqui yoho o gue hyu yʉ testigo gue bi nu, bi tho a ra jąꞌi bʉya, nɛ hin da mba ma huɛ̨qui. 29 Pɛ ha hin dím bɛ̨mhbʉ gue manꞌda ntsꞌutho ran tsꞌɛmbi ga nuhʉ ꞌbʉ dím bɛ̨ni ga nɛmhbʉ bʉ häi a rá Tsꞌʉntꞌʉ Oją, nɛ dí ɛ̨mhbʉ nte di muui a rá ji xtí hoga ma mbʉihʉ, nɛꞌbʉ dí numanꞌʉ tho a rá Hogandąhi Oją gue mí ɛ̨na xtí huɛ̨gahʉ. 30 Pɛ dí pąhmbʉ a ra Hmu gue bi ma: “Nugä ma ꞌbɛfi ga juꞌtꞌi, ga unꞌna rá muui bi ꞌyøtꞌe.” Nɛ bi ꞌyɛ̨n ra tꞌohni: “Da zɛmba yʉ́ tꞌʉhni Oją ꞌbʉ di thoqui da ꞌyøtꞌ ra tsꞌoqui.” 31 Ɛ̨mmɛ ntsꞌutho ꞌbʉ da dįnba yʉ́ tsꞌoqui nꞌda a Oją bʉ ja ran juąnbi, gueꞌa i ꞌbʉi. 32 Pɛ dami bɛ̨mhbʉ ꞌbɛꞌa gá ꞌyøthʉ ʉ yʉ pa xʉ thogui, gueꞌbʉ ja gmí tįmhbʉ ran nɛqui. Xʉn ho gá ꞌyøthʉ, jante tho gá hyäthʉ yʉn ʉnbi xʉn ndoho. 33 Nɛ ꞌda ahʉ bi mba nthenni ahʉ, nɛ bi mba ma ʉnꞌni ahʉ bʉ ja yʉ́ hmi yʉ jąꞌi. Nɛ miꞌda ahʉ gue hin gá suhʉ da mba ma ʉnꞌni ahʉ ꞌbʉ ꞌdarbʉ gmí ꞌyohʉ ʉ bi mba ma ʉnbi. 34 Nɛ hin gán suhʉ gue gá zɛnguahʉ ʉ ni cuhʉ ꞌbäpʉ ja ra fädi, nɛ gán johya thohohʉ ꞌbʉ mí thąnꞌnahʉ ꞌbɛꞌa gmí pɛsꞌhʉ. Nɛ gá pąhmbʉ ja ahʉ bʉ mahɛ̨tsꞌi a manꞌda xʉn ho, gue da hyätꞌi maząi. 35 O guí ɛsꞌhʉ a gní hyuthʉ nzambʉi, janangueꞌa din ꞌda ahʉ nꞌda ran tꞌunni xʉn ndoho. 36 Pɛ i jatho ga sɛthʉ tsꞌʉ, nꞌdahma da zä ga øthʉ rá pähä Oją, janangue ga hąmhbʉ a bi ma majuąni di ꞌdajʉ. 37 Nguetho i mam bʉ ja rá tꞌohni Oją:
Mi tsꞌʉtho ba ɛ̨ꞌa i ja gue ba ɛ̨hɛ,
ya hin da yaꞌa ba ɛ̨hɛ, nɛ di ꞌda ahʉ a guí tømhbʉ.
38 Nɛ nuꞌʉ to da ꞌyɛ̨cꞌyɛi majuąnigä, gueꞌʉ ga hocpa yʉ́ tsꞌoqui, ga ɛ̨mbi xʉn ho bʉya, nɛ ga unꞌndʉ ra temaząi ʉ.
Pɛ nuꞌʉ bi mbengui hin ga numanho ʉ,