Nɛcua ja ra häi mí ja rá ngu Oją, nɛpʉ mahɛ̨tsꞌi
9
Nuꞌa rá mbʉdi ran hoqui, mí ja yʉ́n tꞌɛ̨di nangue yʉn tꞌøtꞌe mí tꞌørpʉ ja ra niją ua ja ra ximhäi. 2 Nɛ nuꞌa ra niją bi tꞌøtꞌe, bin ja nꞌda ra cuarto rá mbʉdi, tꞌɛ̨mbi xʉn dʉxqui, guepʉ mí ja rán ꞌdøgue yʉ lámpara, nɛ ra mɛxa gue i cʉx yʉ ꞌbøxthuhmɛ. 3 Nɛ mí ja manꞌda ná yoho ra cuarto gue nubʉ mbo, mán joti nꞌda ra ꞌbøꞌtꞌe, guepʉ mí tꞌɛ̨mbi manꞌda xʉn dʉxqui. 4 Nɛ nubʉ, mí ja bʉ ra mɛxa ra oro guepʉ mí zø ra xɛca xiza yʉmanho. Nɛ a rá huada ran hoqui gue mán jotsꞌi ra oro gätho yʉ́ hyo. Nɛ nubʉ mbo ra huada mí høpʉ nꞌda ra xaro gue ra oro, mí o bʉ zi tsꞌʉ ra hmɛ i tꞌɛ̨mbi ra maná. Nɛ a rá tøhø ra Aarón gue bi ꞌdogui, nɛ ʉ yʉ xįndo bi tꞌoꞌtꞌa ra nyonhoqui, gue nuꞌʉ yʉ́n tꞌɛ̨di Oją mayaꞌbʉ. 5 Nɛ nu rán joꞌmi ra huada, nꞌda ra xithɛ i tꞌɛ̨mbi ran tsꞌäya ram punbate. Nɛ mí tøpʉ yoho yʉ́ pøte ʉ yʉ́ mbädi Oją mahɛ̨tsꞌi, mí comꞌpʉ mate ra xithɛ bʉ mí pa nsitsꞌi ra ji dím punba yʉ́ tsꞌoqui yʉ jąꞌi. Pɛ hinga xøtꞌa ga xi ahʉ ꞌbɛꞌa nam bønꞌʉ gätho yʉ hmɛpya mí ja bʉ mbo ra niją. 6 Bin jabʉ bi tꞌøtꞌe. Nu yʉ mbäją thoho, thocpa thoho mí cʉrpʉ a rá mbʉdi ra cuarto, gue mí øtꞌ yʉ́ ꞌbɛfi nangue ran dąnde bʉ ja ra niją. 7 Pɛ nubʉ ná yoho ra cuarto manꞌda xʉn dʉxqui, høntꞌa ra hmumbäją mí thopʉ, høntꞌa nꞌdapa thoho i tho a nꞌda jɛya. Nɛ nuꞌbʉ mí yʉrpʉ, i thɛxpʉ rá ji yʉ zuꞌuɛ̨ gue mí xixpʉ, nangue rá tsꞌoqui zɛhɛ ꞌbʉ rá mbʉdi, nɛ nangue yʉ́ tsꞌoqui yʉ jąꞌi ꞌbʉ ná yondį. 8 Nuꞌa rá Hogandąhi Oją di jajʉ ga pąhmbʉ, ngue hin ní socꞌa ra ꞌyu ní mba bʉ bí ꞌbʉ Oją ꞌbʉ gätho mí tꞌøthoho ran dąnde bʉ ja a ra niją ua ja ra ximhäi. Nɛ gueꞌa nꞌda ra hmɛpya bi ꞌyu a ra ꞌbøꞌtꞌe mí corpʉ manꞌda xʉn dʉxqui, mí corpa bʉ ʉ yʉ jąꞌi. 9 Gätho ʉ yʉn tꞌøtꞌe mí tꞌørpʉ ja a ra niją, nꞌda ra hmɛpya thoho nangue a njuąntho i jajʉ ya. Nguetho yʉn tꞌunni nɛ yʉ ꞌbøtsꞌe bi unꞌna Oją, him bi zä bi hocpa bʉ mbo rá mbʉi ʉ mi øtꞌe. Janangue mí pa njorpi bʉ ʉ. 10 Nguetho høntꞌa mí man yʉn tꞌɛ̨di nangue yʉn tsꞌihmɛ midí hoqui, nɛ midín xʉtꞌi. Pɛ nuꞌʉ gueꞌʉ ꞌda yʉn tꞌɛ̨di gue i ja thi. Nɛ gueꞌa bi zän Oją da ꞌyøtꞌʉ, ja gueꞌbʉ mam bá ɛ̨h ra Cristo, ja bi nɛqui a majuąni ra ꞌyu ja rá tsꞌɛdi a bʉya. 11 Gue ya bá ɛ̨h ra Cristo, nɛ gueꞌa ma hmumbäjąhʉ a, nangue ra ꞌdaꞌyo nhoqui i ja ya. Nɛ nuꞌa ra niją guepʉ dim pɛhna ra mbäją ya, manꞌda xʉn ho, nɛ guepʉ majuąni bʉ. Nɛ him bi ꞌyøtꞌ yʉ jąꞌi, nguetho hing ra ngugua ja ra ximhäi a. 12 Pɛgue mahɛ̨tsꞌi bʉ bi yʉtꞌ na ra Cristo ya, tengu ra hmɛpya bi ꞌyuh yʉ hmumbäją ꞌbʉ mí yʉrpʉ manꞌda xʉn dʉxqui. Nɛ ya hin di un yʉ́ ji yʉ tꞌʉdɛꞌyo o gue yʉ tꞌʉndąni, pɛ bi un rá jisɛ. Nɛ nꞌdandį thoho bi yʉrpʉ, nɛ bi yąnjʉ xʉn ho a. 13 Nu rán tꞌɛ̨di Oją bi tꞌɛ̨mbi xʉn tsꞌo ní ngøcꞌyɛi nꞌda ꞌbʉ xí dä a nꞌda ra du. Nɛ bi ma jatho da mba ma cꞌuaspa rá ji ra toro nɛ ra dɛꞌyo, nɛ rá ꞌbospi a ra tꞌʉsundąni gue bi tꞌupʉ ja ra sibi. Nɛ gueꞌa dí hocpa ní ngøcꞌyɛi nꞌda a. Ja bi zä bi dąnde Oją ʉ bʉya. 14 Pɛ gam bɛ̨mhbʉ manꞌda ɛ̨mmɛ i ja rá tsꞌɛdi a rá ji ra Cristo, bi mberca ma tsꞌonꞌyomfɛ̨nihʉ midí ꞌuegahʉ nangue Oją, nꞌdahma da zä ga ørpahʉ rá ꞌbɛfi Oją gue i ꞌbʉi. Nguetho hinꞌyʉ rá tsꞌoqui ra Cristo, nɛ bin unsɛ bʉ ꞌbʉ Oją, ra ꞌbøtsꞌe gue maząi di muui bʉ nam bɛ̨n Oją. 15 Nu ra Jesucristo bin hocpate nangue ra ꞌdaꞌyon hoqui ꞌbʉ mí du. Janangueꞌa gätho bi mba mahoqui ma tsꞌoquihʉ, gue guejʉ mí tɛnhdʉ rá mbʉdi ra yonhoqui. Hinga høngdahʉ, pɛ nɛ ʉ mí ꞌbʉ ꞌbʉ hin nán ja a ra ꞌdaꞌyon hoqui. Nɛ nubʉya gätho bi zä dá comhbʉ ran jąpi maząi gue bi xi Oją ʉ bi zohni. 16 Nuꞌbʉ i manꞌa nꞌda toꞌo da zocpa ʉ ꞌbɛꞌa pɛꞌtsꞌi, pɛ ꞌbɛ da fądi ꞌbʉ majuąni bi du, ja da tꞌøtꞌa xi ma bʉya. 17 Hingui sä da tꞌøtꞌa xi ma ꞌbʉ i ꞌbʉtho, hinda hønꞌbʉ bi du. 18 In jabʉ bin ja ꞌbʉ rá mbʉdi a ran hoqui bi man Oją, gue bin ho ꞌbʉ mí mba mꞌbänbi rá ji nꞌda ra zuꞌuɛ̨, ja bi fądi majuąni bi nu ran dąte bʉya. 19 Janangueꞌa nuꞌa ra Moisés ꞌbʉ mí xih rán tꞌɛ̨di Oją gätho yʉ mɛ israel, nɛ bi cꞌuaspa ra ji bʉya. Bi mitꞌ ra thɛnga xidɛꞌyo nɛ nꞌda ra tꞌʉꞌyɛza gue nꞌyoui yʉ́ paxi, nɛ bi gąrbʉ ja ra dehe nꞌyoui rá ji ra tꞌʉndąni nɛ rá ji yʉ chibo, bi cꞌuaspa bʉ ja rá søcuą i man rán tꞌɛ̨di Oją, nɛ gätho yʉ jąꞌi bi mba ma cꞌuaspi a ra ji bʉya. 20 Nubʉya bi ꞌyɛ̨na: “Nuna ra ji, guehna dí hocꞌa ran hoqui na, gue bi man Oją nanguejʉ. Nuya da zä di punga ma tsꞌoquihʉ,” bi ꞌyɛ̨n a ra Moisés. 21 Nɛ nubʉya bi cꞌuaꞌtsꞌ ra ji bʉ ja rá niją Oją, nɛ ꞌbɛꞌa gätho mí ja bʉ mbo mí pa nthoni bʉ ja rán thąnde Oją, gätho bi mboxpʉ yʉ ji. 22 Nɛ i mam bʉ ja rán tꞌɛ̨di Oją, gue gueꞌa ra ji í hocꞌʉ ꞌbɛꞌa gätho mí tꞌøtꞌe. Pɛ nuꞌbʉ hin dim fän ra ji, hinꞌyʉ ra punbi nangue ra tsꞌoqui, i ɛ̨m bʉ mán tꞌoꞌtꞌi.Í ꞌuec yʉ tsꞌoqui a ím ꞌbøtsꞌe ra Cristo
23 Nuꞌa ra niją, nꞌda ra hmɛpya thoho mí ja ua ja ra häi, bi mba ma hoqui nangue ʉ yʉ́ ji yʉ zuꞌuɛ̨ mí hma. Janangueꞌa bin ja ra ꞌbøtsꞌe manꞌda xʉn ho gue dí hogahʉ, tenguꞌbʉ dyʉ́ nijąhʉ majuąni bʉ mahɛ̨tsꞌi. 24 Nɛ hinga guepʉ ja ra niją bi ꞌyøtꞌ yʉ jąꞌi i ꞌbʉh ra Cristo ya, nguetho yʉ hmɛpya tho ʉ nangue a majuąni rá ngu Oją. Pɛ ɛ guepʉ mahɛ̨tsꞌi bi yʉtꞌi, i äp Oją ya nanguejʉ. 25 Nu yʉ́ hmumbäją yʉ israel, jɛya ꞌbʉ njɛya mí cʉrpʉ ja ra cuarto manꞌda xʉn dʉxqui, midí un ra ji, pɛ hin rá jisɛ. Pɛ nu ra Cristo hinga thocpa thoho di un ra ꞌbøtsꞌe. 26 Xiꞌbʉ xtín ja tengu yʉ hmumbäją, jɛya ꞌbʉ njɛya midí un ra ji. Mí jatho xʉn ngu yʉ nidi xtán du ra Cristo ꞌbʉ, gueꞌbʉ go rá mbʉdi ra ximhäi. Pɛ him bin jabʉ bi ꞌyøtꞌa. Pɛ nuya nꞌdandį thoho bi zøcua ra Cristo gue bin unsɛ bim ꞌbøtsꞌe zɛhɛ, gue í ꞌuecpa yʉ́ tsꞌoqui yʉ jąꞌi. Nɛ guehya yʉ pa gue di jąꞌtsꞌa mí hma mám ꞌbɛtꞌo. 27 Tengu yʉ jąꞌi, ntsꞌänni nꞌdandį thoho da du, nɛ mꞌbɛjua da nu ran juąnbi. 28 Nɛ ngutho ra Cristo, nꞌdandį thoho bin uni bim ꞌbøtsꞌe, ngue bi ꞌuecpa yʉ́ tsꞌoqui ʉ xʉn ngu yʉ jąꞌi. Nɛ mꞌbɛjua ba pengua da zin ʉ i tøꞌmi, pɛ hin dí ꞌyɛ̨hɛ dí ꞌuec yʉ tsꞌoqui mahønꞌa.