Hebreos 8

Nu ra Jesús bin hocpate nangue ra ꞌdaꞌyon hogui

Bí ꞌbʉpʉ mahɛ̨tsꞌi a ma hmumbäjąhʉ gue ma hocpatehʉ, ꞌdarpʉ ní mandaui a tąte thoho rá tsꞌɛdi. Nɛ guehna manꞌda jatsꞌɛdi na dí xi ahʉ. 2 Nɛ dim mbäją bʉ majuąni i pa nthąnde Oją bʉ mahɛ̨tsꞌi, tenguꞌbʉ ra niją bi ꞌyøtꞌ Oją, nɛ him bi hyøh yʉ jąꞌi. 3 Gätho yʉ́ hmumbäją ʉ yʉ israel, bi tsꞌänni di un yʉ ꞌbøtsꞌe nangue ʉ yʉ zuꞌuɛ̨ bi tho, nɛ miꞌda. Janangueꞌa nɛ a ra Jesucristo ja ꞌbɛꞌa bi uni, nguetho nɛ a ra hmumbäją a. 4 Pɛ hinga guecua ja ra ximhäi bim mbäją a. Nɛ nuꞌbʉ xtín ząngua ja ra häi, njąmꞌbʉ xtán zä xtím mbäją. Nguetho hing rá ꞌyʉ ra Leví a, nɛ hing yʉ zuꞌuɛ̨ bi mbøxꞌa, tengu bi man rán tꞌɛ̨di Oją bi man ra Moisés. 5 Nɛ nuꞌa ra niją bʉ midím pɛ ʉ yʉ mbäją ua ja ra ximhäi, nꞌda ra hmɛpya thoho gue ꞌbɛꞌa ørpʉ mahɛ̨tsꞌi. Nguetho bi sih ra Moisés ꞌbʉ mí dʉpꞌa ra niją: “Dami jamansu ꞌbɛꞌa gui japꞌʉ i ja bʉ, nɛ ꞌbɛꞌa gätho gui ꞌyørpʉ, tengu thoho dá utꞌa ꞌbʉ gmí ꞌbʉpʉ ja ra tꞌøhø,” bi ꞌyɛ̨mp Oją. 6 Pɛ nu ra Cristo bin tꞌunꞌna nꞌda ra ꞌbɛfi ɛ̨mmɛ manꞌda xʉn ho xinda gueꞌʉ miꞌda yʉ mbäją. Nguetho din hocpate nangue ran hogui manꞌda xʉn ho ꞌbɛꞌa gätho i ma da ꞌyørcahʉ. 7 Nuꞌbʉ xtán zä xtí hocpa nꞌda a rá mbʉdi ran hogui, him mí jatho xtán ja a ná yoho ran hogui. 8 Pɛ nu Oją him bi zä bi numanho yʉ jąꞌi nangue a ran hogui mí ja, pɛ guextaꞌa ndupate bʉ na nu Oją ʉ. Janangueꞌa bi ꞌyɛ̨na:

Da zønꞌa nꞌda ra pa

ga øtꞌä nꞌda ra ꞌdaꞌyon hoqui mahønꞌa nangue yʉ mɛ israel nɛ yʉ mɛ judá.

9 Nɛ hin din ja tengu ran hoqui dá xi ʉ yʉ́m bombøta

ꞌbʉ mambá jʉcpʉ ra häi Egipto, nɛ dá jamansu.

Dá xifi xtí jąꞌtsꞌi, pɛ him bi hyätꞌi da ꞌyøzɛhɛ man hoqui dá xifi, gue man tꞌɛ̨di dá xi a ra Moisés.

Janangueꞌa him bi zä dá numanho ʉ, bi ꞌyɛ̨nꞌa ra Hmu.

10 Pɛ nu ran hoqui ga ørpa yʉ israel ꞌbʉ mꞌbɛjua miꞌda yʉ pa, din ja tengu gam mangä ya.

Ga un man ꞌyomfɛ̨ni bʉ ja yʉ́n ꞌyomfɛ̨ni ʉ,

nɛ ga japi mpähä thoho da dɛngui.

Janangueꞌa da numanhogui, nɛ ga øtꞌä gue yʉ́ Ojągä ʉ, nɛ din ja gue ma tꞌʉhni zɛhɛ ʉ bʉya.

11 Nɛ hinga hnɛhi thoho ꞌboꞌo da xänba ʉ,

nɛ njon da sänbi gue da bąqui,

nguetho gätho da bąc zɛhɛ ʉ,

yʉ ngʉrpi o gue yʉ jąꞌi thoho.

12 Nɛ ga punbi nangue ran tsꞌo,

nɛ him man gam bɛ̨ngä ʉ yʉ́ tsꞌoqui,

bi ꞌyɛ̨n Oją. 13 In jabʉ a ra ꞌdaꞌyon hoqui, nɛ gueꞌa í tꞌɛ̨mbi ra nyonhoqui a mí ja, gue ya bi juah rá ꞌbɛfi a, nɛ ní mba bʉ dim ꞌbɛdi ꞌbʉ mí man na.