Bim mbäją ra Jesús tengu ra hmɛpya bi ꞌyøtꞌa ra Melquisedec
7
Nu ra Melquisedec bim hmutsꞌʉtꞌabi bʉ ja ra hnini Salem, nɛ bim mbäją nangue Oją mixtetho rá tsꞌɛdi. Nɛ nu ra Abraham ꞌbʉ mam bá tąpꞌʉ ꞌda yʉ tsꞌʉtꞌabi, bin cꞌatꞌui ra Melquisedec, bi tꞌäp rán jąpi Oją nangue a ra Abraham. 2 Nɛ nuꞌa ra Abraham bʉya bi unꞌna ra Melquisedec a ná ꞌdɛtꞌa gue xpí hyąnba yʉ́n sʉihʉ, gue rán tꞌunni Oją a ná ꞌdɛtꞌa. Nɛ nu rá thuhu ra Melquisedec nde da ma “ra hoga hmutsꞌʉtꞌabi.” Nɛ nde da ma gue “ra hmutsꞌʉtꞌabi di hocpa ra sʉi,” nɛ gueꞌa nam bønꞌa rá thuhu rá hnini Salem. 3 Nɛ hinga mfądi toꞌo rá ta ra Melquisedec, o toꞌo rá mbe. Nɛ hinga mfądi ndaꞌa rá ꞌyʉ, nɛ hinga ntꞌoꞌtꞌi gueꞌbʉ mím ꞌbʉi o gueꞌbʉ mí du. Janangueꞌa tenguꞌbʉ rá tsꞌɛdi rá Tsꞌʉntꞌʉ Oją bʉ ín ꞌyu a ra Melquisedec, gue dim mbäją gätho yʉ pa hønꞌbʉ go njąmꞌbʉ. 4 Janangueꞌa sä ga pąhmbʉ ya gue xʉn ngu rá tsꞌɛdi ra Melquisedec ꞌbʉ min ja, nguetho guesɛ ma ngʉrpa bøtahʉ ra Abraham bi unꞌna ná ꞌdɛtꞌa bá tąpꞌʉ yʉ́n sʉihʉ. 5 Nu rán tꞌɛ̨di Oją bi xi ʉ yʉ́ tꞌʉhni ra Leví gue yʉ́ mbäją yʉ israel, gue da hyącpa a ná ꞌdɛtꞌa ʉ yʉ́ mɛni, madagueꞌbʉ yʉ́m bomꞌbɛto ra Abraham ʉ, pɛ nɛsɛ ʉ. 6 Pɛ nu ra Melquisedec, madagueꞌbʉ hingui conhui rá ꞌyʉ ra Leví gue ra Abraham, pɛ bi unꞌna ná ꞌdɛtꞌa gueꞌa bá tąh ra Abraham. Nɛ nu ra Abraham, madagueꞌbʉ xʉn ngu rá tsꞌɛdi bʉ nam bɛ̨n Oją, nguetho bi xifi majuąni da ꞌyørpa a Oją. Pɛ manꞌda ja rá tsꞌɛdi ra Melquisedec nguetho bi tꞌäp a ran jąpi a ra Abraham. 7 Nɛ mfądi nuꞌa di jąpꞌa nꞌda manꞌda ja rá tsꞌɛdi xinda gueꞌa pa ma jąpi. 8 Pɛ nuꞌʉ yʉ́ mbäją ra israel ząi midin tꞌunꞌna ná ꞌdɛtꞌa, pɛ yʉ jąꞌi ʉ, nɛ i tu ʉ. Pɛ nu manꞌda ra mbäją gue ra Melquisedec, i mam bʉ ja ra tꞌohni tengu ꞌbʉ i ꞌbʉtho. 9 Nɛ da zä gam bɛ̨mhbʉ ya, gue gätho rá ꞌyʉ ra Leví, gue yʉ́ mbäją ra israel, gue i äpꞌa ná ꞌdɛtꞌa ʉ yʉ́ mɛni, gam bɛ̨mhbʉ gue nɛꞌʉ tenguꞌbʉ bin jutꞌʉ ꞌbʉ mí unꞌna ná ꞌdɛtꞌa xɛqui a ra Melquisedec a ra Abraham. 10 Nguetho da zä gam bɛ̨mhbʉ nangue ra Abraham, tenguꞌbʉ ya xmín ꞌyohʉ yʉ́m bomꞌbɛto ꞌbʉ mín cꞌatꞌui ra Melquisedec, madagueꞌbʉ hin nám ꞌbʉi. 11 Bim mbäją ra Aarón gue rá ꞌyʉ ra Leví, nɛ rá ngʉrpa bøta a ra Abraham a. Nɛ gueꞌʉ bim mbäją ʉ nangueꞌʉ yʉ israel, tengu bi man yʉ́n tꞌɛ̨di Oją. Pɛ nuꞌbʉ da guehya yʉ́ ꞌbɛfi gue ní yąn Oją ʉ yʉ jąꞌi, him mi jatho xtí nɛqui manꞌda ra mbäją gue nꞌdanꞌyo ꞌbʉ, tengu ra hmɛpya bi ꞌyu a ra Melquisedec, nɛ hin nangue a ra Aarón. 12 Pɛ nuꞌbʉ mí mba ma pädi yʉ mbäją, nɛ ꞌbɛꞌa mí øtꞌe, nɛ ʉ yʉn tꞌɛ̨di mí tɛnni, mí jatsꞌɛditho da mba ma pädi ʉ. 13-14 Bi ꞌyɛ̨n ra tꞌohni gue nu a manꞌda ra mbäją gue ra Cristo a, bim ꞌbʉi nangue manꞌda rá tsꞌʉntꞌʉ ra Israel, ngue hing rá ꞌyʉ yʉ mbäją. Nguetho mfądi xʉn ho gue ma Hmuhʉ bim ꞌbʉi nangue rá ꞌyʉ ra Judá. Nɛ nte bi ma yʉ́n tꞌɛ̨di ra Moisés, gue dim mbäją a rá ꞌyʉ ra Judá. 15 Pɛ manꞌda gui pąhmbʉ ꞌbɛꞌa dá mangä ꞌbʉ guim bɛ̨mhbʉ nangue a ra Melquisedec, gue i udi tengu a manꞌda ra mbäją, nuꞌa ra Cristo a. 16 Nɛ hin nangue ra ꞌyʉ bi man ʉ yʉn tꞌɛ̨di da zä dim mbäją a ra Cristo. Nɛ xín nangue ʉ yʉn tꞌɛ̨di mí ma ꞌbɛꞌa da tꞌøtꞌua bi dɛnꞌna, nguetho him mán tsꞌänni ząi din ja ʉ. Pɛgue bi zä bim mbäją nangue a rá tsꞌɛdi a rá tesɛ njąmꞌbʉ da zä da guadi. 17 Gueꞌa bi man Oją:Nuꞌi gra mbäją maząi,
tengu ra hmɛpya bi ꞌyøtꞌa ra Melquisedec,
bi ꞌyɛ̨n Oją. 18 Gueꞌa án tꞌɛꞌtsꞌa ra ꞌyu gue bi tsꞌän mayaꞌbʉ, nguetho mbɛ nte midí muui a. 19 Nguetho njom bi zä bi hocpa yʉ́ tsꞌoqui ʉ yʉn tꞌɛ̨di bin tꞌun ra Moisés. Pɛ bi nɛqui manꞌda xʉn ho, gue i sixcahʉ bʉ bí ꞌbʉ Oją. 20 Nɛ manꞌda xʉn ho ra ꞌyu nangue ra ꞌdaꞌyo mbäją, nguetho bi mansɛ rá thuhu Oją ꞌbʉ mí un rán tꞌɛ̨di a rá Tsꞌʉntꞌʉ. 21 Pɛ nu miꞌda yʉ mbäją ꞌbʉ mín tꞌun yʉ́ ꞌbɛfi, him bi hndønba rá thuhu Oją. Nɛ nanguehna ra hmumbäją, bi mansɛ rá thuhusɛ Oją. Tengu bi mam bʉ ja rá tꞌohni Oją, bi ꞌyɛ̨mpꞌa rá Tsꞌʉntꞌʉ zɛhɛ:
Nugä dra Oją, dí mansɛ ma thuhugä, nɛ hin ga pä a dí ma.
Nuꞌi gam mbäją gätho yʉ pa maząi,
tengutho ra hmɛpya bi ꞌyøtꞌa ra Melquisedec,
bi ꞌyɛ̨n Oją. 22 Nu ra Jesús, da zä di jąꞌtsꞌa nꞌda ran hoqui manꞌda xʉn ho xinda gueꞌa mí ja mamꞌbɛtꞌo, nguetho dim hmumbäją maząi a. 23 Nuꞌʉ ꞌda yʉ mbäją bi zøni xʉn ngu mí ꞌbʉi, nguetho i tu, nɛ him bi zä bi thoqui hønꞌbʉ go njąmꞌbʉ. 24 Pɛ nu ra Jesús hingui tu, janangueꞌa njoꞌo manꞌda sä da hyąnba rá ꞌbɛfi. 25 Janangueꞌa da zä di hoqui xʉn ho ʉ toꞌo da zøm bʉ ꞌbʉ Oją ya, nangue a ra Cristo. Nguetho i ꞌbʉi maząi, da zä thocpa thoho da ꞌyäpꞌa Oją nangue ʉ to da zøm bʉ. 26 Njuąntho ɛ gueꞌa ra Jesús a ma hmumbäją dí homhbʉ. Nguetho xʉn hotho a, nte in dupatesɛ him bi ꞌyøtꞌ yʉ tsꞌoqui, nɛ him bi hyąnba yʉ́m ꞌbäi ʉ yʉ tsꞌomꞌbäi, nɛ manꞌda i pa ntꞌɛ̨spi gue i ja rá tsꞌɛdi bʉ mahɛ̨tsꞌi. 27 Nu yʉ jąꞌi ꞌbʉ mim hmumbäją di thoqui da mbøspa Oją gätho yʉ pa, mbʉdi bi mbøspe nangue yʉ́ tsꞌoqui zɛhɛ, nɛ mꞌbɛjua yʉ́ tsꞌoqui yʉ jąꞌi. Pɛ nu ra Jesús him bi ꞌyøtꞌe tengu ʉ, nɛ nꞌdandį thoho bi mbøspa Oją ꞌbʉ mi un rá tesɛ, nguetho di muui maząi a. 28 Nu rán tꞌɛ̨di Oją bi man ra Moisés bi tꞌɛ̨mbi dim hmumbäją ʉ yʉ jąꞌi thoho, pɛ him bi hyätꞌi bi jąꞌtsꞌʉ yʉ́n tꞌɛ̨di Oją. Pɛ nuꞌbʉ mí mansɛ rá thuhu Oją, bi ma gue dim hmumbäją rá Tsꞌʉntꞌʉ zɛhɛ. Nɛ nuꞌa gätho bi jąꞌtsꞌʉ yʉn tꞌɛ̨di nɛ bi juadi, nte di ꞌbɛh ya. Nɛ gueꞌa rám poniui a rán tꞌɛ̨di Oją bin tꞌun ra Moisés a ra Jesús.