6
Janangueꞌa ndeꞌbʉ ga thoqui ga homhbʉ gue dan dąjąꞌihʉ. Ndeꞌbʉ hinga høntꞌa ga mamhbʉ a rá mbʉdi bi sängahʉ nangue ra Cristo. Ndeꞌbʉ hinga høntꞌa ga mamhbʉ gue ga päh ma mbʉihʉ gue mí ɛ̨na xtá hyojʉ, nɛ hinga høntꞌa ga mamhbʉ ga däp ma mbʉihʉ Oją. 2 Ndeꞌbʉ hinga høntꞌa ga mamhbʉ ram hma dan xixyąhʉ, nɛ nangue ran jäxaꞌyɛ, nɛ nangue da dąmbɛ̨ni ʉ xʉn du, nɛ nangue din ja ran juąnbi ꞌbʉ rán zɛgui, ndeꞌbʉ hinga høntꞌʉ ga mamhbʉ ya, nguetho dí pąhmbʉ ndaꞌa ʉ. 3 Mbähä ga thojʉ ꞌbʉ da zä da xocꞌa ni mbʉihʉ Oją, nguetho i ja miꞌda. 4-6 Nguetho nuꞌbʉ hin ga thohmbʉ, xøhma thoho da bɛ̨ni da mbenc i ꞌda. Nɛ nubʉya him manꞌdandį da nde ba pengui mahønꞌa. Nguetho nuꞌbʉ mí numanho nꞌdandį rán nɛqui Oją, nɛ bi zämanho a bi un Oją, nɛ bin ꞌyohʉ rá Hogandąhi Oją, nɛ bi zämanho a rá hogamhma Oją, nɛ bi bą i tsꞌʉ rá tsꞌɛdi a ra ꞌdaꞌyo ximhäi din ja. Pɛ nuꞌbʉ da mbengui, ya him manꞌdandį da zä di hoc yʉ́ mbʉi mahønꞌa. Nguetho im bɛ̨ni tenguꞌbʉ da zä di cuat mahønꞌa bʉ ja ra pontꞌi a rá Tsꞌʉntꞌʉ Oją, nɛ di japi din thenda a ra Cristo. 7 Nguetho tenguꞌbʉ nꞌda ra häi a ra jąꞌi, nꞌdandį ngu nꞌdandį din ꞌye, i pøtꞌe, nɛ i pøtsꞌe ꞌbɛꞌa pa nthuhu bʉ. Nɛ nuꞌa ra häi nuꞌbʉ di japi din ja ꞌbɛꞌa tupʉ a ra mbɛfi, da hyąn rán jąpi Oją a. 8 Pɛ nuꞌbʉ hin di japi da bøxꞌa ꞌbɛꞌa bi thupʉ, nɛ høntꞌʉ yʉ ꞌuįni i ja bʉ, nte di muui ꞌbʉ. Nɛ hin da hnumanho a ra häi ꞌbʉ. Nɛ nzɛgui da mba ntꞌudi nangue ra sibi.Bi ząngba ma mbʉihʉ a ra Jesús, dí tømhbʉ a ran ho ya
9 Pɛ madagueꞌbʉ njabʉ dá mamhbe, ma zi cu ahʉ, pɛgue dí hąxhe njuąni gan jahʉ tengu ra hogahäi, bin japi bin ja xʉn ngu ꞌbɛꞌa bi thupʉ, nguetho bi hocꞌa ni mbʉihʉ Oją. Nɛ xʉn ndoho ran jąpi ba ɛ̨hɛ, guin nuhʉ. 10 Nguetho xʉn ho øtꞌ Oją ngue hin di pumbɛ̨ni a ra ꞌbɛfi gá ꞌyøthʉ, nɛ ran huɛ̨cate gá ꞌyuthʉ ʉ ꞌda ni cuhʉ, nangue rá thuhu Oją, nɛ nangue a guí ødahʉ ya. 11 Ɛ̨mmɛ dí ndehe gui thojʉ gan ɛ̨hyahʉ, nꞌda ngu nꞌda ahʉ, gueꞌbʉ go rán zɛgui ra pa. Janangueꞌa da zøni gui hyąmhbʉ ꞌbɛꞌa gätho guí tømhbʉ. 12 Hin dí ndehe da yʉndąnhyɛ̨i thoho ahʉ, pɛ dami ꞌyøthʉ ꞌbɛꞌa mí øtꞌʉ ꞌda ꞌbʉ mí bądi majuąni a rám hma Oją, nɛ bi hyätꞌi bi zɛt yʉ́ mbʉi, janangueꞌa bi hyąn a ra herencia bi ma majuąni Oją. 13 Nu Oją ꞌbʉ mí xih majuąni a ra Abraham, bi ma majuąni nangue rá thuhu zɛhɛ. Nguetho njoꞌo manꞌda xʉn ndoho rá tsꞌɛdi hinda hønsɛ a. 14 Nɛ bi ꞌyɛ̨n Oją: “Majuąni xʉn ngu ran ho ga ꞌda i, nɛ ga ꞌda i xʉn ngu nim bomꞌbɛto,” bi tꞌɛ̨mpꞌa ra Abraham. 15 Nu ra Abraham bʉya bi hyätꞌi bi døꞌmi, janangueꞌa bi hyąni ꞌbɛꞌa bi xi a Oją. 16 Nuꞌbʉ ꞌda yʉ jąꞌi im ma majuąni ꞌbɛꞌa da ꞌyøtꞌe, i ndønba rá thuhu Oją, nɛ ya him ma hyom miꞌda yʉm hma dí hocꞌa, nguetho i fądi majuąni a bi ma. 17 Nɛꞌa Oją ꞌbʉ mí nde da ꞌyurcahʉ ngue majuąni a rám hma, bi man rá thuhu zɛhɛ ꞌbʉ mí xijʉ ra herencia. Ngue guejʉ ntsꞌänni ga hąmhbʉ a. Janangueꞌa ga pąhmbʉ njąmꞌbʉ di pä a bi xijʉ. 18 Janangueꞌa yoho bʉ dá pąhmbʉ, rám hmansɛ nɛ rá thuhu zɛhɛ, ga pąhmbʉ hin dim fɛhni Oją, pɛ majuąni da zinjʉ bʉ. Ngue guejʉ bá ꞌdahmbʉ bʉ mí ja xcá tuhʉ, dá bɛnthʉ bʉ hapʉ da zinjʉ ya. 19 Janangueꞌa bi zinjʉ bʉ a ra Jesús, bi ząngba ma mbʉihʉ bʉ mbo rá ngu Oją, njąmꞌbʉ da hyɛgahʉ. 20 Nguetho mꞌbɛtꞌo bi yʉrpʉ a ra Jesús. Nɛ bi xi a Oją ngue bi hogahʉ ngue da numanhojʉ bʉ. Gueꞌa nam bøni ma hmumbäjąhʉ, ngue i ꞌbʉi maząi, tengu ra hmɛpya bi ꞌyøtꞌ ra Melquisedec.