5
Bi thanꞌdʉ ꞌda yʉ jąꞌi israel ꞌbʉ mayaꞌbʉ ngue dim hmumbäją. Nɛ da ꞌyäpꞌa Oją nangue gätho miꞌda. Nɛ midí thocpa Oją ʉ yʉ́ ꞌbøtsꞌe nangue ʉ yʉ zuꞌuɛ̨ bi tho, gue ní mba ma punbi yʉ́ tsꞌoqui yʉ jąꞌi. 2 Nɛ nangue yʉ jąꞌi thoho ʉ yʉ hmumbäją, hinga gätho bi ꞌyøtꞌe xʉn ho, ngutho ʉ miꞌda yʉ́ mijąꞌihʉ. Janangueꞌa bi zä janate tho bi hocꞌʉ yʉ ꞌyąmbʉi nɛ yʉ ꞌyøtꞌatsꞌoqui. 3 Nɛ jatho rá mbʉdi midí un Oją nꞌda ra ꞌbøtsꞌe ra mbäją nangue yʉ́ tsꞌoqui zɛhɛ, tengu bi ꞌyøtꞌe nangue yʉ́ tsꞌoqui yʉ jąꞌi. 4 Njongui sä da ꞌyøtꞌe gue dim hmumbäjąsɛ, nɛ høntꞌa Oją sä da huahna nꞌda ra hmumbäją, tengu ꞌbʉ mí huahna ra Aarón. 5 Nɛ ngutho bin ja nangue ra Cristo, him bi mansɛ gue dim hmumbäjąsɛ, pɛ Oją bi un ran tꞌɛ̨di gue dim hmumbäją, tengu bi ma rá tꞌohni Oją ꞌbʉ mí ꞌyɛ̨na:Nuꞌi ma ꞌdatsꞌʉntꞌʉ i,
dadí ꞌdaꞌa ni tsꞌɛdi ya.
6 Nɛ bi ꞌyɛ̨mbi mahønꞌa:
Nuꞌi gam mbäją gätho yʉ pa ya,
tengu ra hmɛpya bi ꞌyøtꞌ ra Melquisedec,
bi ꞌyɛ̨n Oją bʉ ja rá tꞌohni. 7 Nu ra Cristo ꞌbʉ mim ꞌbʉcua ja ra häi, ząi nan yąui Oją, bi ꞌyäp rá mfätsꞌi da dąpꞌʉ. Ntsꞌɛdi bi mbafi nɛ bin zoni. Pɛ bi bądi ja rá tsꞌɛdi Oją da yąm bʉ ja ran dąte. Nɛ bi ꞌyø Oją ꞌbʉ mí nde din unsɛ bʉ ja rá pähä Oją. 8 Nuꞌa ra Cristo, madagueꞌbʉ rá Tsꞌʉntꞌʉ Oją a, pɛgue bin jąꞌi a, janangueꞌa bi xänba yʉn ʉnbi ꞌbɛꞌa dí ꞌyørpa rá pähä Oją a. 9 Bin jabʉ bi ꞌyøtꞌe, janangueꞌa bi zøni bi jąꞌtsꞌi gätho rá pähä Oją. Nɛ bi zä bi unꞌna ra te maząi gue toꞌo gätho da ꞌyɛ̨cꞌyɛi a. 10 Nguetho bi huan Oją a gue dim hmumbäją nangue dyʉ ꞌyɛ̨cꞌyɛihʉ, tengu ra hmɛpya bi ꞌyøtꞌ ra Melquisedec.
Ntsꞌutho ꞌbʉ ga penjʉ
11 I ja xʉn ngu ꞌbɛꞌa dín nde ga xi ahʉ nangue a bim hmumbäją a ra Cristo. Pɛ xʉn hɛ̨i ga xi ahʉ nguetho hin guí honi gui pąhmbʉ. 12 Nɛ xʉn ngu yʉ pa xʉ thogui gue mí ja ngue xquín xänbatehʉ, pɛ guextaꞌa i jatho da si ahʉ ʉ yʉm hma hingui hɛ̨i nangue Oją. Nguetho gá cohi gán ꞌyąmbʉihʉ. I jatho gui sihʉ ra xiꞌba tenguꞌbʉ gyʉ ꞌuɛrehʉ, nɛ hin guí häthʉ gui sihʉ njuąntho ran tsꞌihmɛ. 13 Nɛ nuꞌa gnán tsꞌihmɛhʉ ra xiꞌba, in ja tengu yʉ ꞌuɛre, nɛ hinda ná pąhmbʉ ꞌbɛꞌa ra te gue dám ꞌbʉhmbʉ njuąntho. 14 Pɛ nu ran tsꞌihmɛ xʉn ho ntꞌøtꞌe nangue yʉ dąjąꞌi. Nɛ xʉn te yʉ́ mbʉi nangue ząi din ꞌyomfɛ̨ni, janangueꞌa pądi ndaꞌa xʉn ho nɛ ndaꞌa hingui ho.