4
Nuya i jatho ga suhʉ, janya i ja yʉ pa i xijʉ Oją da zinjʉ bʉ ja rá ngu ngue da hyurca ma mbʉihʉ. Xøhma tsꞌʉrbʉ thoho hin da zøni ga cʉthʉ bʉ. 2 Nguetho nɛjʉ bi sijʉ a ram hma gue dí cʉꞌtꞌa nꞌda, tengu bi sih yʉ jąꞌi mí ꞌbʉh mayaꞌbʉ, gueꞌʉ bin ꞌyohʉ ra Moisés. Pɛ nuꞌʉ, him bi zä í tsꞌim bʉ a ram hma bi sifi, nguetho him bi nde bi bą ʉ gue majuąni a. 3 Pɛ nujʉ gue dí pąhmbʉ majuąni a ram hma, guenjʉ gue ga cʉthʉ bʉ da hyurca ma mbʉihʉ Oją. Nɛ guepʉ him bi zä bi yʉtꞌʉ ꞌda, bi ꞌyɛ̨n Oją:Janangueꞌa dán cuɛgä nangue ʉ, nɛ majuąni dá ma,
njąmꞌbʉ ga singä ʉ gue da hyu yʉ́ mbʉi, bi ꞌyɛ̨n Oją.
Pɛ bi dʉꞌmi bi xih yʉ jąꞌi gue da zim bʉ ꞌbʉ mí jua a bi ꞌyøtꞌ ra ximhäi Oją, nɛ bin säya bʉ, bi hyu rá mbʉi zɛhɛ. 4 Tengu bi ma rá tꞌohni gue nubʉ bi ma, gue:
Ná yoto ma pa bin säya Oją ꞌbʉ mí jua a bi ꞌyøtꞌ ra ximhäi.
5 Pɛgue bi xiꞌʉ bʉya nangueꞌʉ ꞌda mín ꞌyohʉ ra Moisés:
“Njąmꞌbʉ ga singä ʉ gue da hyu yʉ́ mbʉi,” bi ꞌyɛ̨n Oją.
6 Pɛ guehma ꞌbʉi toꞌo din säya bʉ da hyu yʉ́ mbʉi. Pɛ hinga gueꞌʉ ꞌda bi sifi mayaꞌbʉ, nguetho him bi ꞌyɛ̨cꞌyɛi a ram hma. 7 Pɛgue bi ꞌyu Oją nꞌda ra pa mahønꞌa, gue ra pa i jabʉ ya, tengu bi ma ra David nangue ʉ xʉn ngu yʉ jɛya xí thogui ꞌbʉ mí ꞌbʉh ra Moisés. Nɛ gueꞌa ram hma xí hmangua, gue ɛ̨na:
Nuya ra pa i jabʉ ya in zo ahʉ Oją. Pɛ ɛ̨mmɛ xʉn ho ꞌbʉ gui ꞌyøhmbʉ a i xi ahʉ.
ꞌYo gadí ʉꞌtꞌ ni mbʉihʉ tengu bi ꞌyøtꞌʉ ꞌda bi numanꞌʉtho Oją, bi ꞌyɛ̨nꞌa ra David.
8 Nuꞌa ra Moisés bim pommi a ra Josué bi thoqui bi zix ʉ yʉ jąꞌi. Bi säyabi bʉ ja a ra häi Canaan bi un Oją, bin johya bʉ. Pɛ nuꞌbʉ da gueꞌa ran johya bi man a Oją, hin xtá ma mahønꞌa Oją nangue manꞌda ra pa ꞌbʉ. 9 Janangueꞌa guextaꞌa i ja nꞌda ra xɛqui í juadi xʉn ho, guepʉ da hyurca ma mbʉihʉ Oją, gue yʉ́ tꞌʉhnigahʉ a. 10 Nuꞌʉ toꞌo da yʉtꞌi gue da hyurpa yʉ́ mbʉi a Oją, din säya nangue gätho yʉ́ ꞌbɛfi ʉ tengu tho Oją bin säya nangue gätho rá ꞌbɛfi bi hyu rá mbʉi ꞌbʉ mí jua a bi ꞌyøtꞌ ra ximhäi. 11 Janangueꞌa ndeꞌbʉ ɛ̨mmɛ ga ndehʉ ga cʉthʉ bʉ. Hin ga øthʉ tengu ʉ him bi ꞌyɛ̨cꞌyɛi ram hma ꞌbʉ mí xi Oją. 12 Pɛ nuꞌa rám hman Oją dim pɛfi tenguꞌbʉ ra thɛni yoho yʉ́ hɛtꞌi, pɛ manꞌda i ja rá tsꞌɛdi a xinda gue ra thɛni, ngue i sä da zørpʉ mbo ní mbʉi nꞌda, i urcahʉ ꞌbɛꞌa gätho dím bɛ̨mhbʉ mbo ma mbʉihʉ, ꞌbɛꞌa majuąni dín nde ga øthʉ, ngue ndaꞌa bi bɛ̨ngahʉ Oją, nɛ ndaꞌa dá bɛ̨nsɛhʉ. 13 Xinga nꞌda ʉ bi ꞌyøtꞌa Oją gue i sä da ꞌyącpi ꞌbɛꞌa mbɛ̨ni, gätho i pądi, nɛ di nɛqui bʉ ja rá dä a to i hąscahʉ ra güɛnda.
Nu ra Jesús ma hmumbäjąhʉ xʉn ndoho rá tsꞌɛdi
14 Nu ra Jesús rá Tsꞌʉntꞌʉ Oją, i tꞌɛ̨mbi ma hmumbäjąhʉ nguetho ma hocpatehʉ a. Nɛ bi zøm bʉ mbo mahɛ̨tsꞌi. Nɛ i fäxcahʉ a gue i ja rá tsꞌɛdi mixte. Janangueꞌa ga thoqui ga tɛnhdʉ a rám hma. 15 Nu ra Jesús ma hmumbäjąhʉ i pądi hinga gätho dí häthʉ ʉ dí sähʉ, nguetho bi zä ꞌbɛꞌa gätho dí sähʉ. Pɛ hin jąmꞌbʉ bi ꞌyøtꞌa nꞌda ra tsꞌoqui. 16 Janangueꞌa hin ga suhʉ dan yąhʉ Oją bʉ bí ja rá tsꞌɛdi, nguetho di huɛ̨gahʉ nɛ di pungahʉ, nɛ da mbäxcahʉ a ra ora dí homhbʉ a.