Nu ra Jesús manꞌda sä da tꞌɛ̨spi xinda gueꞌa ra Moisés
3
Nuya, ma hoga cu ahʉ, gue bi huanꞌnahʉ ꞌdarpʉ dam ꞌbʉhmbʉ bʉ mahɛ̨tsꞌi a Oją. Dami ꞌyøhmbʉ ya nangue ra Jesús, nuꞌa ra pøngahyą nɛ ra hocpate nangue rá ꞌyu Oją dí tɛnhdʉ. 2 Nu ra Jesús bi juah rá ꞌbɛfi bi unꞌna Oją, tengutho ra Moisés bi juah rá ꞌbɛfi gue bi jamansu ʉ nꞌdamꞌbʉi yʉ́ tꞌʉhni Oją. 3 Pɛ nu ra Jesús manꞌda sä da tꞌɛ̨spi xinda gueꞌa ra Moisés, tengu thoho ra ta bʉ ja nꞌda ra ngu manꞌda da tꞌɛ̨spi xinda gueꞌʉ yʉ́ tꞌʉhni. 4 Pɛ madagueꞌbʉ i ørpa rá ꞌbɛfi Oją ʉ yʉ jąꞌi, tengu bi ꞌyøtꞌ ra Moisés, pɛ nuꞌa Oją i øzɛhɛ gätho rá ꞌbɛfi. 5 Nguetho rá ꞌyɛ̨hɛ Oją a ra Moisés, nɛ bi jąꞌtsꞌ rá bɛfi bi jamansu gätho yʉ́ tꞌʉhni Oją mayaꞌbʉ. Nɛ nu rá ꞌbɛfi ra Moisés bi ꞌyu i tsꞌʉ a rá ꞌbɛfi ra Cristo da ꞌyøtꞌ ꞌbʉ bi zøhø. 6 Pɛ nu ra Cristo rá Tsꞌʉntꞌʉ Oją a, nɛ bi jąꞌtsꞌi bim hmu nangueꞌʉ nꞌdamꞌbʉi yʉ́ tꞌʉhni Oją. Nɛ guectahʉ ya nꞌdamꞌbʉi yʉ́ tꞌʉhni gahʉ Oją, ꞌbʉ dadí thoctahʉ dí pąhmbʉ majuąni a, nɛꞌbʉ dadí thojʉ a nán johyahʉ a ran ho dí tømhbʉ.Da zin yʉ́ tꞌʉhni Oją da hyurpa yʉ́ mbʉi
7 Janangueꞌa i ɛ̨nꞌa rá Hogandąhi Oją bʉ ja rá tꞌohni:
Nuya ra pa i jabʉ ya in zo ahʉ Oją. Pɛ ɛ̨mmɛ xʉn ho ꞌbʉ gui ꞌyøhmbʉ a i xi ahʉ.
8 ꞌYo gadí ʉꞌtꞌ ni mbʉihʉ tengu bi ꞌyøtꞌʉ mí tɛn ra Moisés, bi numanꞌʉtho Oją ꞌbʉ mín ꞌyo bʉ ja ra ʉhäi.
Nɛ bi zä Oją ʉ yʉ jąꞌi nangue ꞌbɛꞌa bi numanhosɛ.
9 Nu nim bombøtahʉ bi ꞌyørca ran tsꞌäte nɛ bi
numanꞌʉthogui ꞌbʉ nyote njɛya mín ꞌyo bʉ ja ra ꞌyu, madagueꞌbʉ bi nu xʉn ngu yʉn tꞌøtꞌe gue dá ut ma tsꞌɛdi, bi ꞌyɛ̨n Oją.
10 Janangueꞌa dán cuɛgä nangueꞌʉ yʉ jąꞌi,
nguetho thocpa thoho i ꞌuegue nangue yʉ́ mbʉi,
hin jąmꞌbʉ bi bą a ra ꞌyu dá xifi, bi ꞌyɛ̨n Oją.
11 Janangueꞌa ɛ̨mmɛ dán cuɛgä nangueꞌʉ. Majuąni dá ma,
hin ga singä bʉ ja ra häi ʉ ngue da hyu yʉ́ mbʉi, bi ꞌyɛ̨n Oją.
12 Ma zi cu ahʉ, pɛ dam fähmbʉ. Xiꞌbʉ nꞌda ahʉ gui ꞌuehmbʉ ꞌbʉ din ja ahʉ ra tsꞌombʉi, gue gui ꞌyɛ̨na hin gui nde gui ꞌyɛ̨cꞌyɛihʉ Oją, i ꞌbʉi. 13 Pɛ nꞌda ngu nꞌda ahʉ damim fäxhʉ bʉ ja ra hogaꞌyu, nꞌda pa ngu nꞌda pa, janya i sä ga øhmbʉ a im ma Oją, yʉ pa ya. Nɛ nuꞌbʉ din jabʉ gui ꞌyøthʉ, xínga nꞌda ahʉ da hyä ahʉ yʉ tsꞌoqui, gue di ꞌbätꞌa ni mbʉihʉ. 14 Nguetho dí comhbʉ a rán ho ra Cristo ꞌbʉ dí thojʉ a ní hyu ma mbʉihʉ a, gueꞌbʉ go rán zɛgui tengu ꞌbʉ rá mbʉdi dá tįmhbʉ. 15 Janangueꞌa i xijʉ a rá tꞌohni Oją ya:
Ɛ̨mmɛ xʉn ho ꞌbʉ gui ꞌyøhmbʉ a rá nde Oją gue in zo ahʉ ya.
ꞌYo gadí ʉꞌtꞌ ni mbʉihʉ tengu bi ꞌyøtꞌʉ ꞌda bi numanꞌʉ tho Oją, bi ꞌyɛ̨na.
16 Toꞌo ʉ bi ꞌyøh rám hma Oją nɛ bi numanꞌʉ tho. Ha hinga gue ʉ yʉ jąꞌi bi yąn Oją nangueꞌa ra häi Egipto mín ꞌyohʉ ra Moisés. 17 Nɛ toꞌo bi un ra cuɛ Oją gätho nyote njɛya. Ha hinga guetꞌʉ bi yąn Oją bʉ ja ra häi Egipto, bi ꞌyøtꞌ yʉ tsꞌoqui, janangue bi du bʉ ja ra ʉhäi. 18 Nɛ toꞌo ʉ majuąni bi tꞌɛ̨mbi hin da hyurpa yʉ́ mbʉi Oją. Ha hinga guetꞌʉ him bi ꞌyɛ̨cꞌyɛi Oją. 19 Gam bɛ̨mhbʉ ya hanja him bi zä bi zin Oją ʉ, nguetho him bi ꞌyɛ̨cꞌyɛi Oją ʉ.