Jatho ga ʉrpahʉ ra güɛnda a ní yąnjʉ Oją
2
Pɛ nuꞌa rá Tsꞌʉntꞌʉ Oją bi ꞌyurcahʉ rá ꞌyu Oją, xinda gue ʉ ꞌbɛꞌa mí hma mayaꞌbʉ. Janangueꞌa manꞌda ɛ̨mmɛ jatsꞌɛditho ga jamansuhʉ a ꞌbɛꞌa dí øhmbʉ ya, nꞌdahma hin ga ꞌbɛhmbʉ a, nɛ xín dam ꞌbɛhmbʉ bʉya. 2 Nuꞌbʉ mí manꞌʉ yʉ́m ꞌbɛhni Oją ʉ yʉ́n tꞌɛ̨di Oją mayaꞌbʉ, pɛ guehma bi nu ran ʉnbi a rán säui a to bi mbɛsta a bi ma. Pɛ nuꞌa rám hma Oją bi manꞌa rá Tsꞌʉntꞌʉ, manꞌda ja rá tsꞌɛdi a. 3 Janangue ꞌbe xíngui tsꞌʉ ga ponjʉ ꞌbʉ hin dí ʉrpahʉ ra güɛnda a rám hma mixte thoho. Nɛ gueꞌa ram hma ní yąnjʉ Oją a. Nɛ rá mbʉdi bi mansɛ ra Hmu ꞌbʉ mim ꞌbʉcua ja ra ximhäi. Nɛ mꞌbɛjua bi xijʉ ʉ yʉ́ xädi gue bi ꞌyø a bi man ra Hmu. 4 Nɛꞌa Oją bi ꞌyudi majuąni a ram hma ꞌbʉ mí ꞌyøtꞌ yʉ hmɛpya nɛ xʉn ngu yʉn tꞌøtꞌe mixte. Nɛꞌbʉ mí ꞌdajʉ ra tsꞌɛdi nangue rá Hogandąhi, tengu mí ndesɛ Oją bi darcahʉ. Nɛ gueꞌa í ꞌyudi majuąni a ram hma.Nu ra Jesús njuąntho bin ja tengu thohogahʉ
5 Pɛ nuna rá tsꞌɛdi Oją gue dí mangä, hinga nan ja xʉn ho. Pɛ hinga gueꞌʉ yʉ́m ꞌbɛhni mahɛ̨tsꞌi di jap Oją di manda bʉ ja ra ꞌdaꞌyo ximhäi ꞌbʉ bin ja rá tsꞌɛdi Oją xʉn ho bʉ. 6 Pɛgue bi zän Oją toꞌo di manda bʉ, tengu bi siꞌa Oją ꞌbʉ mí tꞌänni ꞌbɛꞌa di ꞌyɛ̨tꞌui yʉ jąꞌi:
ꞌBɛꞌa gue ɛ dí pɛhmbe gue ɛ̨mmɛ guím bɛ̨nje,
nɛ dyʉ jąꞌi thohohe. Nɛ manꞌda guidí jamansuje.
7 Pɛ ja ꞌda yʉ pa gá jaje him mí ja ma tsꞌɛdihe, xinda gueꞌʉ nim ꞌbɛhni bʉ mahɛ̨tsꞌi.
Pɛgue gá sänni gui ꞌyɛ̨scahe, nɛ gui ꞌdac ma tsꞌɛdihe.
Nɛ gá sänni ga mandahe ꞌbɛꞌa gätho i ꞌbʉi nɛ ꞌbɛꞌa gätho i ja gue gá ꞌyøtꞌe.
8 Nɛ gätho gá sänꞌndʉ miꞌda ꞌbɛꞌa gä gá ꞌyøtꞌe gue da ꞌyɛ̨cꞌyɛigahe,
bi ꞌyɛ̨m bʉ mán tꞌoꞌtꞌi. Janangueꞌa hinꞌyʉ ꞌbɛꞌa bi zänni gue hin ga mandahʉ, nguetho bi ꞌyɛ̨na: “Gätho da tꞌɛ̨cꞌyɛi ʉ yʉ jąꞌi.” Pɛ hindaná nuhʉ gue gätho da ꞌyɛ̨cꞌyɛigahʉ. 9 Pɛ hinda høntꞌa ra Jesús, bin ja tengu mán tꞌoꞌtꞌi, bi tꞌɛ̨spa ꞌbʉ mí du, bin tꞌun rá tsꞌɛdi. Pɛgue xín ja ꞌda yʉ pa bin japi him mí ja rá tsꞌɛdi xinda gueꞌʉ yʉ́m ꞌbɛhni Oją mahɛ̨tsꞌi. Janangueꞌa bi zä bi du nangue nꞌda ngu nꞌdajʉ, nangue rán huɛ̨cate Oją. Nɛ nuꞌa ran dąte bi nu, gueꞌa í tꞌɛ̨spa a. 10 Nu Oją bi zänꞌndʉ gätho da hyonsɛ. Nɛ bi nde bá si xʉn ngu yʉ́ tꞌʉhni bʉ ja rá tsꞌɛdi. Janangueꞌa xʉn ho a bi ꞌyøtꞌ Oją gue bin ʉnba ʉ yʉ́ Hmu, guepʉ bi zä bi yąnjʉ xʉn ho. 11 Nɛ nuꞌa ra hocpate nɛꞌʉ toꞌo mahoqui, nɛ nꞌdatꞌa yʉ Ta. Janangueꞌa hingui pɛꞌtsꞌ rá sä a ra hocpate da ꞌyɛ̨mbi yʉ́ cu ʉ bi hoqui. 12 Tengu mán tꞌoꞌtꞌi, bi ꞌyɛ̨na:
Ga xi ʉ ma cu gätho nangueꞌe,
nɛ ga ɛ̨sꞌiꞌi nubʉ ja rám pɛti ma cu,
Dí tøꞌmi da mbäxcä Oją.
Nɛ xø bi ꞌyɛ̨na:
Dí ꞌbähmbe ua ya yʉ́ tꞌʉhni Oją bi ꞌdaqui,
bi ꞌyɛ̨nꞌa ra Cristo. 14 Nujʉ yʉ́ tꞌʉhnigahʉ a, dyʉ jąꞌi thohohʉ, ngue i ja ma ngøhʉ nɛ ja ma jihʉ. Nɛ a ra Jesús bin jąꞌi nɛ bin ja rá ngøcꞌyɛi tengu thoho gahʉ. Janangueꞌa bi zä bi du ngue í ꞌbɛrpa rá tsꞌɛdi a rá hmu ran dąte, ngue ra zįthu. 15 Nɛ guepʉ da zä di ꞌuecpa yʉ́ mbidi ʉ toꞌo i su ran dąte gätho yʉ pa i ꞌbʉi. 16 Nɛ mfądi hinga gueꞌʉ yʉ́m ꞌbɛhni Oją mahɛ̨tsꞌi bi ꞌyørpa ra güɛnda da yąni, pɛgue guenjʉ dyʉ ꞌyɛ̨cꞌyɛihʉ yʉ́m bomꞌbɛtojʉ ra Abraham, nde Oją da yąnjʉ. 17 Janangueꞌa nu ra Jesús njuąntho bin ja tengu thoho gahʉ, bi bɛ̨ni ꞌbɛꞌa gätho dím bɛ̨mhbʉ, bi zä ꞌbɛꞌa gätho dí sähʉ. Nuꞌbʉ hin xtín jabʉ, hin xtán zä xtí huɛ̨gahʉ, hin xtán zä xtí juah rá ꞌbɛfi Oją gue bi hoga ma tsꞌoquihʉ. Gueꞌa í tꞌɛ̨mbi bim hmumbäją a. 18 Nɛ nuya da zä da mbäxcahʉ toꞌo i tsꞌä nangue yʉn ʉnbi, nguetho nɛsɛ a bi tsꞌä nangue yʉn ʉnbi, nɛ bi hyätꞌi.