Hin ga huandahʉ toꞌo gan numanhohʉ
2
Ma zi cu ahʉ, nuꞌbʉ dí ɛ̨cꞌyɛ̨ihʉ ma Hmuhʉ ra Jesucristo ngue mixte xʉn ho a, ndeꞌbʉ ga øthʉ tengu i øtꞌa, ngue hin ga huandahʉ toꞌo dín numansuhʉ. 2 Xiꞌbʉ da zøm bʉ ja mam pɛtihʉ nꞌda ran ꞌyohʉ i fo rá ꞌyɛ ram foꞌyɛ ɛ̨mmɛ xʉm hmadi, nɛ mahotho rá he. Nɛ da zøm bʉ nꞌda zi hyoya hingui ho rá he. 3 Nɛ manꞌda gan numanhohʉ a mahotho rá he, xinda gueꞌa nꞌda zi hyoya. Nɛ ga ɛ̨mfʉ a mahotho rá he: “Nuꞌi nꞌyø, damin säya tsꞌʉ ua ja ran thutsꞌi,” ga ɛ̨mfʉ. Nɛ nuꞌa zi hyoya bʉya: “Nuꞌe, damím ꞌbäh nʉ ogue damí hyuh nʉ häi ja rá hyo ran thutsꞌi,” ga ɛ̨mfʉ a bʉya. 4 Ha hin dím bɛ̨mhbʉ ngue yoho man tꞌøtꞌehʉ ꞌbʉ dí samhbʉ a nan hyoya ʉ ꞌda, nɛ nuꞌa na mɛmbɛti ʉ ꞌda, gueꞌa na ɛ̨spahʉ ʉ. Nɛ guextaꞌa ra tsꞌoqui dí øthʉ ꞌbʉ dí huandahʉ a dín numanhohʉ. 5 Ma zi cu ahʉ, damí ꞌyøhmbʉ na ga xi ahʉ. Ha him bi huan Oją ʉ xʉn ngu i hyoya bʉ na nu ra ximhäi, ngue da dįn a manꞌda di muui, ngue da gomhbʉ yʉ́n jąpi ʉ di un yʉ́ tꞌʉhni Oją. Nɛ gueꞌa bi ma majuąni di unꞌndʉ toꞌo gätho da bɛ̨n a. 6 Pɛ nuya gá ꞌyąsäbahʉ yʉ hyoya. Ha hin dí pąhmbʉ ngue gueꞌʉ yʉ mɛmbɛti di ʉngahʉ, nɛ i sixcahʉ bʉ ja yʉ nguntsꞌʉtꞌabi. 7 Ha hinga gueꞌʉ yʉ mɛmbɛti dí øhmbʉ im man ra tsꞌore nangue rá hoga thuhu ma Hmuhʉ ra Cristo. 8 Pɛ: “Ga huɛ̨c ma mijąꞌihʉ tengutho bʉ na huɛ̨czɛhɛ ma jąꞌihʉ.” Guehna xʉn ho ga øthʉ na, nguetho rán tꞌɛ̨di ra Cristo mixte thoho a, tengu man tꞌoꞌtꞌi bʉ rám hman Oją. 9 Pɛ nuꞌbʉ hinga gätho yʉ jąꞌi dadí huɛ̨jʉ, ra tsꞌoqui a dí øthʉ ꞌbʉ, nɛ dín dupatehʉ a ran tꞌɛ̨di ngue im ma gätho ꞌda i gu bʉ dán huɛ̨jʉ. 10 Pɛ dín ndehʉ made tho ga øthʉ gätho rán tꞌɛ̨di Oją. Pɛ madahøntꞌa nꞌdatho rán tꞌɛ̨di Oją hin dá øthʉ, ya dín dupatethʉ gätho rán tꞌɛ̨di Oją ꞌbʉ. 11 Ngubʉ dí ørpahʉ yʉ́n tꞌɛ̨di Oją ngue bi ꞌyɛ̨na: “O guí øthʉ ran ꞌyomtꞌɛ̨ni,” nɛ: “O guí hącpahʉ rá te ni mijąꞌihʉ,” bi ꞌyɛ̨na. Madagueꞌbʉ hin dí øthʉ ran ꞌyomtꞌɛ̨ni, pɛ dí hącpahʉ rá te ma mijąꞌihʉ, guemhma dín dupatethʉ gätho rán tꞌɛ̨di Oją ꞌbʉ. Nguetho nꞌdatꞌa Oją bi ma gätho yʉ́n tꞌɛ̨di. 12 Pɛ nuꞌa rán tꞌɛ̨di ra Cristo, gueꞌa di zɛjʉ ga øthʉ yʉ́n thɛhʉ. Nɛ gueꞌa rán tꞌɛ̨di dí ꞌyängahʉ Oją a ꞌbʉ dá øthʉ o hinꞌna. Janangueꞌa ga jamansuhʉ a dím mamhbʉ nɛꞌa dí øthʉ. 13 Nɛ nuꞌbʉ him bi ꞌyøtꞌ ran huɛ̨cate nꞌda, nɛ hingui ngu ꞌbɛꞌa dí huɛ̨c Oją a ꞌbʉ bi juąnbi. Pɛ nuꞌbʉ bi ꞌyøtꞌ ran huɛ̨cate nꞌda, da bømanho ꞌbʉ bi juąnba Oją a.Hingui ho ꞌbʉ nte nꞌyoui yʉn tꞌøtꞌe rá tꞌɛ̨cꞌyɛ̨i nꞌda
14 Ma zi cu ahʉ, ꞌbɛꞌa gue ní mba a i øtꞌ i ꞌda sä ɛ̨na ja yʉ́ tꞌɛ̨cꞌyɛ̨i, pɛ hingui øtꞌʉ yʉ́n thɛhʉ. Hin da yąn Oją nꞌda ꞌbʉ sä ɛ̨na ja rá tꞌɛ̨cꞌyɛ̨i. 15-16 Xiꞌbʉ ꞌbʉꞌa nꞌda ma cuhʉ ra ꞌyąhe nɛ sä ra thuhu. Nɛ ga ɛ̨mfʉ: “Ní mba, bá he ni he, nɛ bán sihmɛ, da hyu ni mbʉi,” ga ɛ̨mfʉ. Pɛ nte dá unhdʉ ꞌbɛꞌa honi. ꞌBɛꞌa gue ní mba a dá ørpahʉ ꞌbʉ. 17 In jabʉ nꞌda ꞌbʉ hingui øtꞌ yʉn tꞌøtꞌe rán säui rá tꞌɛ̨cꞌyɛ̨i, nu rá tꞌɛ̨cꞌyɛ̨i nte di muui, tenguꞌbʉ nꞌda ra du ngue hingui di ꞌyąni. 18 Pɛ nuꞌbʉ gui ꞌyɛ̨njʉ: “Nuꞌi ja ni hogantꞌøtꞌe, pɛ nugähe dí ɛ̨cꞌyɛ̨i mbo ma mbʉihe.” Nɛ ga xiꞌahʉ bʉya, damí ꞌyurca ni tꞌɛ̨cꞌyɛ̨i ngue nte nꞌyoui nin tꞌøtꞌehʉ, gan nugä. Nugä da zä ga ut ahʉ yʉn tꞌøtꞌe dí øtꞌä, janangueꞌa di nɛqui ma tꞌɛ̨cꞌyɛ̨igä ngue majuąni a. 19 Guí pąhmbʉ i ꞌbʉ Oją, pɛ hin dí gua a zi tsꞌʉ. Nguetho nɛꞌʉ yʉ zįthu i pądi i ꞌbʉ Oją, pɛ ɛ̨mmɛ di fɛtꞌi, nguetho yʉ́n sʉihʉ Oją ʉ. 20 Gyʉ́ ꞌyąmbʉihʉ, ha hin guí pąhmbʉ ngue xingui tsꞌʉ nte di muui ni tꞌɛ̨cꞌyɛ̨ihʉ ꞌbʉ hin te guí øthʉ. 21 Ndeꞌbʉ gam bɛ̨mhbʉ tsꞌʉ nangue mam bombøtahʉ ra Abraham. Ja bi nɛqui a xmí pą Oją xʉn ho ꞌbʉ mi ꞌyøtꞌa bi xifi, ngue bi gäxpʉ ja ra do a Isaac rá tsꞌʉntꞌʉ, ngue ɛ̨na xtá hyo xtí unꞌna Oją. 22 Nangue bi ꞌyɛ̨cꞌyɛ̨i mbo rá mbʉi, bin ja ra tsꞌɛdi bʉya ngue da ꞌyøtꞌʉ yʉ́n thɛhʉ. Janangueꞌa rám pɛ ra tꞌɛ̨cꞌyɛ̨i ʉ yʉn tꞌøtꞌe. 23 Nɛ gueꞌa mi mam bʉ ja rám hman Oją, bi ꞌyɛ̨na: “Nu ra Abraham bi ꞌyɛ̨cꞌyɛ̨i a bi man Oją, janangueꞌa bi ꞌyɛ̨mp Oją xʉn ho,” nɛ bi ꞌyɛ̨mbi rá amigo xʉn ho Oją bʉya. 24 Dí pąhmbʉ ya, i ɛ̨mp Oją xʉn ho nꞌda ra jąꞌi ꞌbʉ øtꞌ rán säui rá tꞌɛ̨cꞌyɛ̨i, nɛ hinga sä da ꞌyɛ̨na ɛ̨cꞌyɛ̨i Oją. 25 Ximangutho a Rahab, ngue ra xisu ząi min ꞌyomtꞌɛ̨ni mam ꞌbɛtꞌo. Pɛ bi ꞌyɛ̨mp Oją xʉn ho ꞌbʉ midí nɛqui rá tꞌɛ̨cꞌyɛ̨i, ꞌbʉ mi ꞌyøtꞌa ran ho bi ꞌyøtꞌe, ngue bi jamansu ʉ yʉ ꞌyɛ̨cꞌyɛ̨i ꞌbʉ mi mba bá ąspa rá hnini. Nɛ bá uti nꞌdanꞌyo ra ꞌyu bá hąx ꞌbʉ mam bá pengui, janangueꞌa him bi mba mfɛntꞌi ʉ. 26 Ja ga pąhmbʉ bʉya ngue hingui ho rá tꞌɛ̨cꞌyɛ̨i nꞌda ꞌbʉ hingui øtꞌʉ yʉ́n thɛhʉ, tengu nꞌda ra jąꞌi xʉn du ngue hinꞌyʉ bʉ rá mbʉi.