Ga sąmzɛhɛ ma jąnihʉ
3
Ma zi cu ahʉ, ndeꞌbʉ hinga gätho dan xänbatehʉ bʉ ja ram pɛti. Nguetho dí pąhmbʉ Oją da nu ꞌbɛꞌa dí øthʉ, nɛ nuje, manꞌda da ꞌyängahe Oją, xinda gueꞌbʉ hin xcán xänbatehe. 2 Nɛ gätho gahʉ xʉn ngu yʉ nidi jaꞌbʉ dí øthʉ yʉ tsꞌoqui. Pɛ nuꞌbʉ ꞌbʉꞌa nꞌda xinga nꞌda ra tsꞌoqui im ma, ya xʉn te xʉn ho rá mbʉi a, nɛ i pądi di jamansu xʉn ho gätho i øtꞌa ꞌbʉ. 3 Tenguꞌbʉ dí cärbahʉ yʉ́n tsꞌare yʉ fani, da ꞌyøtꞌa dí xihmbʉ bʉya, nɛ hinga høntꞌa rá nde di ꞌbäꞌtꞌi, pɛ ꞌda dí ꞌbäthoho. Ngutho ꞌbʉ i sąmzɛhɛ rá jąni nꞌda, nɛ hinga høntꞌa rám hma da bądi da ząmmi, pɛ da da bądi di jamansu xʉn ho gätho i øtꞌe. 4 Nɛ tengu ra dąbarco, madagueꞌa xʉ ndoho, nɛ tsꞌɛdi ran dąhi i joni, pɛ ɛ̨mmɛ zicuɛ a ní mba ma ꞌyoni, pɛ hønbʉ go da ndepe dí mba a di ꞌyoni. 5 Ngutho ma jąnihʉ, zicuɛ, pɛ ɛ̨mmɛ xʉn ngu da bøni nangue ꞌbɛꞌa da ma. O tenguꞌbʉ nꞌda ra dɛspi zicuɛ, pɛ ɛ̨mmɛ xʉn ngu ꞌbɛꞌa da ꞌyudi, nɛ da zä da ꞌyu a nꞌda ra xąnthø xʉ ndoho. 6 Nguetho ma jąnihʉ tenguꞌbʉ nꞌda ra sibi. Nɛ manꞌda xʉn tsꞌo øtꞌ ma jąnihʉ xinda gueꞌa ma ꞌyɛhʉ ogue ma guahʉ. Nɛ gueꞌa ní tsꞌoni gätho dí øthʉ a, nɛ di xąnd ran tsꞌo gätho ra ximhäi, ngue di bɛ̨nba a ra zįthu. 7 Pɛ nu yʉ jąꞌi manꞌda da zä di maxubi høntꞌa go má zate nɛ yʉ doja nɛ yʉ pozʉ nɛ yʉ huą. 8 Pɛ nu rá jąni nꞌda, njoꞌo to da zä di hąt ra ꞌyu. Nɛ i hote, tengu nꞌda ra pozʉ, ɛ̨mmɛ in cuɛ, ran dąte a rá nde. 9 Nangue ma jąnihʉ sä dí ɛ̨mhbʉ dí ɛ̨spahʉ Oją ma Tahʉ, pɛ nɛ dí äfʉ ra ꞌyąnthį ma mijąꞌihʉ. Pɛ nuꞌʉ, bi zänꞌna Oją ʉ, bi ndepe dim ꞌbʉi tengu tho Oją ʉ. 10 Nꞌdatꞌa ma ndehʉ ná yąhʉ ꞌbʉ dí ɛ̨spahʉ Oją nɛꞌbʉ dí äfʉ ra ꞌyąnthį ma mijąꞌihʉ. Pɛ ma zi cu ahʉ, hingui sä ga øthʉ tengu a. 11 Ha i sä ꞌdarbʉ da bøhmi ra dehe xʉn ho a ra dehe xʉn xą. 12 O ꞌbɛꞌa di ja yʉ zaꞌixi, ma zi cu ahʉ, ha nɛꞌʉ yʉ pɛni i zʉpʉ. O xi nꞌda ra zabotꞌi, ha zʉpʉ yʉ ixi. Xíngui sä ꞌdarbʉ da bøhmi ra dehe xʉn ho a hingui ho.Bí nɛxpʉ bí ꞌbʉ Oją ran ꞌyomfɛ̨ni xʉn ho
13 Nuꞌbʉ dí pąhmbʉ ran ꞌyomfɛ̨ni, pɛ ga uhmbʉ ꞌbʉ, nangue ran hocjąꞌi ga øthʉ, nɛ hin dan ꞌyɛ̨zɛhɛhʉ, guepʉ da fądi majuąni i ja man ꞌyomfɛ̨nihʉ. 14 Pɛ nuꞌbʉ xʉn ju dím bɛ̨nba ma mijąꞌihʉ nangue ran tsꞌɛya, nɛ dadí mispahʉ, nɛ sä dí ɛ̨mhbʉ ja man ꞌyomfɛ̨nihʉ, pɛ ra fɛhni a dím mamhbʉ ꞌbʉ. 15 Pɛ nuna ra tsꞌonꞌyomfɛ̨ni na him bí nɛxpʉ bí ꞌbʉ Oją, pɛ bi nɛquida ua ja ra ximhäi, nɛ dá bɛ̨nsɛ ma mbʉihʉ, nɛ ra zįthu bi bɛ̨ngahʉ tengu na. 16 Nguetho nuꞌbʉ dí øthʉ ran tsꞌɛya, nɛ dín nde dam mixtehʉ, nuꞌbʉ, dí øthʉ gätho yʉ tsꞌoqui ꞌbʉ, nɛ yʉ sʉi. 17 Pɛ nu ran ꞌyomfɛ̨ni di ꞌdajʉ Oją, nꞌdatꞌa gam bɛ̨mhbʉ, nɛ ga hocpahʉ rá mbʉi ma mijąꞌihʉ, nɛ gan numanhohʉ ʉ, nɛ din ja man huɛ̨catehʉ, nɛ ga fäxhʉ ʉ, nɛ hin da goh ma mbʉihʉ ꞌbʉ ja a dí xihmbʉ ʉ, nɛ hin ga häthʉ ʉ. 18 Pɛ nuꞌbʉ jante thoho ga hocpahʉ rá mbʉi ma mijąꞌihʉ, dí øthʉ tenguꞌbʉ dí pomhbʉ ra hmudä dí bøx ran ho ꞌbʉ.