Bi zøm bʉ Corinto ra Pablo
18
Mꞌbɛjua bʉya nu ra Pablo bi bøm bʉ Atenas, bi mba bʉ ra hnini Corinto. 2 Nɛ bin tįmmi bʉ nꞌda ra judío í Aquila, ra mɛngu ponto. Ja ní søhø bí ꞌyɛ̨pʉ Roma bʉ ra häi Italia ra Aquila nɛ rá xisu Priscila, nguetho nu ra hmutsꞌʉtꞌabi Claudio bá hønꞌa thi gätho yʉ judío bʉ ra dąhnini Roma. Nu ra Pablo bi mba bá nuꞌa ra Aquila nɛ ra Priscila bʉya. 3 Nɛ bin ząm bʉ yʉ́ ngu, nguetho ꞌdatꞌa ra ꞌbɛfi i øtꞌe, i øtꞌ yʉ nguꞌbøꞌtꞌe. 4 Nɛ gätho yʉ́ pa yʉn säya mí pa bʉ rá niją yʉ judío a ra Pablo, nɛ bi mam bʉ rám Hman Oją nɛ bi hyoni ꞌbɛpʉ dí ꞌyɛ̨cꞌyɛi yʉ judío nɛꞌʉ hing yʉ judío.5 Nuꞌbʉ bá ɛ̨pʉ ra häi Macedonia ra Silas nɛ ra Timoteo, bi nu ra Pablo gue gätho yʉ pa ɛ̨mmɛ mi mam rám Hman Oją. Mí xänba yʉ judío ngue gueꞌa ra Jesús majuąni ra Cristo mí tøꞌbʉ yʉ judío ngue din yąnte a. 6 Pɛ nu yʉ judío bi dʉꞌmi bi ʉcpa a, nɛ bi man yʉ tsꞌore nangue ra Pablo. Nɛ nu ra Pablo bʉya bi huąc rá pahni, nꞌda ra hmɛpya gue hingui numanho ꞌbɛꞌa i øtꞌʉ. Bi ꞌyɛ̨mbi:
―Ya ni tsꞌoqui zɛhɛhʉ ngue hin gá hyąn ra te maząi, tenguꞌbʉ gán hyosɛhʉ. Nuya hingui pa ma güɛndagä, nguetho ya dá xi ahʉ. Pɛ nuya ga mbagä ga xih yʉ jąꞌi hing yʉ judío, bi ꞌyɛ̨nꞌa ra Pablo.
7 Nɛ má zä bi bøm bʉ ja rá niją yʉ judío a ra Pablo, bi mba bʉ ja rá ngu ra Justo. Nuꞌa, nꞌda ran ꞌyohʉ ngue i thąnde Oją, nɛ nu rá ngu, ꞌdarpʉ jaui rá niją yʉ judío, nɛ guepʉ din xänbate bʉ mahønꞌa. 8 Nu ra Crispo, nꞌda ra ngʉrpi bʉ ja rá niją yʉ judío, bi ꞌyɛ̨cꞌyɛi nɛ gätho ꞌbʉpʉ rá ngu. Nɛ xʉn ngu yʉ mɛngu corinto mi øh ran ho maꞌdaꞌyo, nɛ bi ꞌyɛ̨cꞌyɛi, nɛ bi mba ma xixyąbi. 9 Nu ra Hmu mahɛ̨tsꞌi bi zoꞌa ra Pablo bʉya, nuꞌbʉ min xui, tenguꞌbʉ bi ꞌuį nꞌda ra tꞌį. Nɛ bi xifi:
―O guín su, pɛ dami thoqui gan yą, hin gan hɛ̨tho, 10 nguetho dadí hyʉnꞌaꞌi, nɛ njon da zä di ʉnꞌnaꞌi, nɛ xʉn ngu i ꞌbʉcua ja ra hnini da ꞌyɛ̨cꞌyɛigui, bi ꞌyɛ̨n Oją.
11 Nubʉya nu ra Pablo bi gopʉ ja ra hnini Corinto nꞌda jɛya made, nɛ bi xänba rám Hman Oją ʉ yʉ jąꞌi.
12 Pɛ nuꞌbʉ mín tsꞌʉtꞌabi ra Galión nubʉ ra häi Acaya, nu ꞌdaꞌʉ yʉ judío bim pɛti ngue nde da zʉꞌa ra Pablo. Nɛ bi zixꞌa ra Pablo bʉ ꞌbʉh ra tsꞌʉtꞌabi. 13 Bi ꞌyɛ̨mbi:
―Nuna ran ꞌyohʉ na bi xänba yʉ jąꞌi ngue da dąnde Oją, pɛ nꞌdanꞌyo im ma, hinga gueꞌa tengu man tꞌɛ̨dihʉ, ɛ̨nꞌʉ.
14 Nɛ nu ra Pablo in nde din yą, pɛ nu ra tsꞌʉtꞌabi ra Galión ꞌbex bi ꞌyɛ̨mpꞌʉ yʉ judío:
―Nuꞌbʉ xcuá sihʉ na ran ꞌyohʉ nangue nꞌda ran tsꞌo xtá ꞌyøt na, xcá øcä a guim mamhbʉ. 15 Pɛ guín cuɛhʉ nangue rá tꞌɛ̨cꞌyɛi na, ngue nde da xi ahʉ toꞌo gui thąndehʉ, nɛ nangue nin tꞌɛ̨di zɛhɛhʉ. Hin dí nde dan juąnbate nangue nin tꞌɛ̨di zɛhɛhʉ, janangueꞌa dami hocpa zɛhɛhʉ, bi ꞌyɛ̨nꞌa ra Galión.
16 Bi ꞌyɛtꞌi, bi hyønꞌa thi bʉya. 17 Nubʉya gätho yʉ mɛngu bʉ ja ra hnini gue hing yʉ judío bi bɛntꞌa ra Sóstenes, ra ngʉrpi bʉ ja rá niją yʉ judío, nɛ bi ꞌbɛnza bʉ ja rá hmi ra tsꞌʉtꞌabi. Pɛ nu ra tsꞌʉtꞌabi ra Galión him bi ꞌyørpamasu.
Bi mbeng bʉ ra häi Siria a ra Pablo
18 Nu ra Pablo bʉya bi thoqui bim ꞌbʉpʉ nyaꞌa tsꞌʉ yʉ pa mahønꞌa bʉ Corinto. Mꞌbɛjua bí ꞌyɛ̨ꞌʉ yʉ ꞌyɛ̨cꞌyɛi, bin ꞌyohʉ ra Aquila nɛ ra Priscila, nɛ bi hyu ra barco bi mba ra häi Siria. Nɛ nuꞌbʉ mí juaꞌa ra hmɛpya gue bi te rá xtą, bi ꞌyąx rá yą bʉya, gueꞌa bi ꞌyørpʉ Cencrea. Nꞌda ra hmɛpya nangue ram hma xí man ra Pablo gue bi xi Oją di jąꞌtsꞌi. 19 Nuꞌbʉ mi zøm bʉ ra hnini Éfeso ra Pablo, bi zopʉ ra Priscila nɛ ra Aquila nɛ bi mba bʉ rá niją yʉ judío. Nɛ bi xih yʉ judío bʉ rán ho maꞌdaꞌyo ra Cristo. 20 Nu yʉ judío mi ndepe xtán gopʉ ꞌda yʉ pa, pɛ nu ra Pablo him bi nde. 21 Bin ꞌyɛ̨te nɛ bi ꞌyɛ̨mbi:
―Jatho ga mba bʉ Jerusalén ga nu bʉ ra dąmpɛti da ꞌyøtꞌ ma mijudíohʉ. Pɛ nuꞌbʉ rá pähä Oją gua pengä mahønꞌa, bi ꞌyɛ̨na.
Bi nɛxpʉ, bi hyu nꞌda ra barco bʉya.
Ná hyundį bi mba nꞌdanni ra Pablo
22 Nubʉ Cesarea bi gąpʉ ra Pablo bʉ ja ra barco, nɛ bi mba bʉ Jerusalén, bi zɛngua yʉ ꞌyɛ̨cꞌyɛi bʉ ja ra niją, nɛ ꞌbex bi mba bʉ Antioquía. 23 Nuꞌbʉ mim ꞌbʉpʉ ꞌda yʉ pa, bi mba bʉ ja nꞌda ngu nꞌda yʉ hnini bʉ ja ra häi Galacia nɛpʉ Frigia, bi hąt ra tsꞌɛdi yʉ́ mbʉi yʉ ꞌyɛ̨cꞌyɛi ꞌbʉpʉ.
Ra Apolos bi mamp rám Hman Oją bʉ Éfeso
24 Nuꞌʉ yʉ pa ʉ bi zøm bʉ Éfeso nꞌda ra judío, rá thuhu Apolos, ra mɛngu bʉ ra hnini Alejandría. Nuꞌa bi bądi xʉn ho rám Hman Oją mayaꞌbʉ. 25 Nɛ bi sänbi zʉ tsꞌʉ nangue ra Hmu, ra Jesucristo. Nɛ ɛ̨mmɛ bin johya nɛ ntsꞌɛdi bi ma xʉn ho ꞌbʉ min xänbate, bi ma majuąni nangue ra Jesús. Pɛ høntꞌa rám hma ra Xuua Nxixyą mí pądi, nɛ rán xixyą. 26 Nɛ nu ra Apolos bi hyutꞌan zambʉi him bi zu bi mam bʉ ja rá niją yʉ judío. Pɛ nuꞌbʉ mí ꞌyøh ra Priscila nɛ ra Aquila ꞌbɛꞌa manꞌa, nꞌdanni bi zitsꞌi nɛ bi xänbi manꞌda xʉn ho ngue rá ꞌyu Oją. 27 Nɛ nuꞌbʉ mí nde da mba ra Apolos ra häi Acaya, guepʉ Corinto, nu yʉ cu nangue ra Cristo bi xifi ngue xʉn ho da mba. Bi ꞌyørpa nꞌda ra søcuą da gątsꞌi, bi xih yʉ ꞌyɛ̨cꞌyɛi bʉ ngue da zini. Nɛ nuꞌbʉ mi zøm bʉ, bi hąt ra tsꞌɛdi yʉ́ mbʉi yʉ ꞌyɛ̨cꞌyɛi bʉ, nɛ bi mbätsꞌi gätho bi ꞌyɛ̨cꞌyɛi rá mate ra Cristo. 28 Nguetho nuꞌbʉ min yąhʉ yʉ judío gue hing yʉ ꞌyɛ̨cꞌyɛi, bi dąha, ngue ya mí yą con rá tsꞌɛdi Oją. Bi ꞌyuti nangue rám Hman Oją mayaꞌbʉ, gue gueꞌa ra Jesús ra Cristo mí hmam bʉ, gue mí tøꞌbʉ.