Nu ra Timoteo bin ꞌyohʉ ra Pablo nɛ ra Silas
16
Nu ra Pablo nɛ ra Silas bi mba bʉ ra hnini Derbe nɛpʉ Listra. Nɛ bin tįmhbʉ bʉ nꞌda ra ꞌyɛ̨cꞌyɛi, ra Timoteo na. Nu rá mbe ra judío, nɛ ra ꞌyɛ̨cꞌyɛi a, pɛ nu rá ta, ra mɛngu bʉ Grecia a. 2 Nu yʉ ꞌyɛ̨cꞌyɛi bʉ Listra nɛpʉ Iconio bi mamanho nangue ra Timoteo. 3 Nɛ nu ra Pablo bi nde din ꞌyoui a, janangueꞌa bi hyɛcpa rá xifani, gue hin di ʉꞌtꞌ yʉ́ mbʉi yʉ judío. Nguetho gätho yʉ judío ꞌbʉpʉ i pądi ngue rá ta ra mɛngu bʉ Grecia a. 4 Nɛ gätho yʉ hnini bʉ bi thogui bi xih yʉ ꞌyɛ̨cꞌyɛi da ꞌyøtꞌe ꞌbɛꞌa bi man ra Jacobo nɛ yʉ́ ꞌbäihʉ ra Cristo nɛ yʉ́ ngʉrpi yʉ ꞌyɛ̨cꞌyɛi bʉ Jerusalén, ngue ꞌbɛꞌa xʉn ho da ꞌyøtꞌʉ hing yʉ judío. 5 Nɛ gätho yʉ ꞌyɛ̨cꞌyɛi bi thoctatho bin te yʉ́ mbʉi nangue ꞌbɛꞌa bi ꞌyɛ̨cꞌyɛi. Nɛ mpa ꞌbʉ mpa ꞌbʉ manꞌda i huxꞌa ná ngu yʉ ꞌyɛ̨cꞌyɛi.Nu ra Pablo bi ꞌuį tenguꞌbʉ nꞌda ra mɛngu Macedonia
6 Nuꞌʉ bi thocpʉ ra häi Frigia nɛpʉ ra häi Galacia bʉya, nguetho him bi japꞌa rá Hogandąhi Oją xtá man ram hma bʉ ra häi Asia. 7 Nuꞌbʉ mi zøm bʉ ra häi Misia ɛ̨na xtá mba bʉ ra häi Bitinia, pɛ nu rá Hogandąhi Oją xínga guepʉ bi japi da mba bʉ. 8 Bi thorpʉ ja ra häi Misia bʉya, bi mba bʉ ra hnini Troas bʉ ndendeją. 9 Nɛ nubʉya nu ra Pablo bi nu nꞌda ran tꞌuti ꞌbʉ mín xui, tenguꞌbʉ ra tꞌį, ɛ̨na gueꞌbʉ nꞌda ran ꞌyohʉ ra mɛngu Macedonia mí ꞌbäpʉ ja rá hmi, nɛ bi ꞌyɛ̨mbi: “Ba ɛ̨cua ja ra häi Macedonia nɛ gui zɛje tsꞌʉ,” bi ꞌyɛ̨na. 10 Nɛ nugä dra Lucas, dí oꞌtꞌä ra søcuą i ja ua, dín nde ga mbähmbe bʉ ra Pablo. Nɛ nangueꞌa bi tꞌutꞌa ra Pablo, janangueꞌa ꞌbex dán sähe ga mbähmbe bʉ ja ra häi Macedonia, nguetho dá hąxhe njuąni ngueꞌa Oją bi zoncähe bʉ, in ndeje ga mamhbe bʉ ran ho maꞌdaꞌyo dí yąnjʉ a.
Bi zøm bʉ Filipos ra Pablo nɛ ra Silas
11 Nuꞌbʉ má pømhbe bʉ Troas dá huhe nꞌda ra barco nɛ njuąntho dá uɛ̨nthe bʉ ja ra tꞌʉhäi Samotracia gue i jabʉ made ra deją. Nuꞌbʉ mi hyatsꞌi dá thohmbe bʉ Neápolis. 12 Dá nɛxhe bʉ Neápolis bʉya nɛ dá sømhbe bʉ ra dąhnini Filipos, rán guatꞌi ra häi Roma. Nu ra hnini Filipos manꞌda ja rá tsꞌɛdi xinda gue miꞌda yʉ hnini bʉ ra häi Macedonia. Nɛ dám ꞌbʉhmbe bʉ ꞌda yʉ pa. 13 Nɛ nuꞌbʉ ra pa ran säya dá pømhbe bʉ ja ra hnini, dá mbähmbe bʉ ja ra ndendąthe guepʉ ząntꞌa min yąhʉ Oją yʉ jąꞌi. Nɛ dá huhmbe bʉ, dá xihmbe rám Hman Oją ʉ yʉ xisu ngue madím pɛti bʉ. 14 Nɛ nu nꞌda ra xisu í Lidia ra mɛngu bʉ Tiatira, bi ꞌyøde ꞌbɛꞌa dá mamhbe. Nuꞌa ra Lidia ra mbäꞌbøꞌtꞌe na, i pä ra ꞌbøꞌtꞌe xʉn jʉpoi ngue xʉn ho. Nuꞌa i ɛ̨cꞌyɛi nɛ mi numansu Oją, janangueꞌa bi xocua rá mbʉi da ꞌyøde xʉn ho ꞌbɛꞌa bi manꞌa ra Pablo. 15 Nu ra Lidia bin xixyą bʉya nɛ gätho ꞌbʉpʉ rá ngu. Mꞌbɛjua bi xicähe:
―Nuꞌbʉ guí ɛ̨na majuąni dí ɛ̨cꞌyɛi ra Hmu mahɛ̨tsꞌi, ba ɛ̨hmbʉ ua ja ma ngu gam ꞌbʉhmbʉ ua ꞌda yʉ pa, bi ꞌyɛ̨nje.
Nɛ bi ꞌyørcahe tsꞌɛdi janangueꞌa dá mbähmbe.
16 Nꞌda ra pa nuꞌbʉ má mbähmbe bʉ ząi bi yąhʉ Oją yʉ jąꞌi, dán cꞌathe nꞌda ra hmute ra ꞌyɛ̨hɛ. Nuꞌa man ra ꞌyøde nangue ra zįthu min ꞌyoui, nɛ mí tąha xʉn ngu ra mbɛti di unꞌdʉ yʉ́ hmu. 17 Nuꞌa ra hmute mi tɛnꞌna ra Pablo nɛcähe. Bi mbafi bi ꞌyɛ̨na:
―Nuya yʉn ꞌyohʉ, yʉ́ mbɛfi Oją nuįxte thoho, i xängahʉ hague dán zä dam pøhmbʉ, bi ꞌyɛ̨na.
18 Nɛ xʉn ngu yʉ pa ngubʉ mi øtꞌ ra hmute. Madí xømbʉi ra Pablo nɛ bi xiꞌa ra zįthu min ꞌyoui ra hmute:
―Nangue rá thuhu ra Jesucristo dami pøm bʉ rá mbʉi na ra hmute, bi ꞌyɛ̨mbi.
ꞌBexque bi bøn ra zįthu bʉya.
19 Nuꞌbʉ mí pąh yʉ́ hmu ra hmute gue him man zä da dąp rán zäbi, bi bɛntꞌa ra Pablo nɛ ra Silas, nɛ bi zixpʉ ja ra täi guepʉ ꞌbʉh yʉ zɛꞌmi. 20 Nɛ nuꞌbʉ mi dä bʉ ꞌbʉh yʉ zɛꞌmi, bi ꞌyɛ̨nꞌʉ:
―Nuya yʉn ꞌyohʉ ꞌbʉcua, yʉ judío ya. Nɛ in nde di tsꞌon yʉ jąꞌi ꞌbʉcua ja ma hninihʉ. 21 Nɛ i man yʉn tꞌøtꞌe gue hingui sä ga øthʉ, nguetho nujʉ dyʉ romanohʉ. Nɛ hinꞌyʉ man tꞌɛ̨di ga øthʉ a i xijʉ, sä bi ꞌyɛ̨nꞌʉ yʉ yąpate.
22 Nɛ bi muntsꞌ yʉ jąꞌi ngue nde da zʉꞌʉ. Nu yʉ zɛꞌmi bʉya, bi manda da ꞌbøcua yʉ́ pahni, da mba mꞌbɛi ra Pablo nɛ ra Silas. 23 Nɛ nuꞌbʉ mi juadi ngue ɛ̨mmɛ xí ꞌbɛi, bi mba njotꞌi bʉ ja ra fädi. Nɛ bi sih ra mbängoxthi da mbädi xʉn ho. 24 Nuꞌbʉ min tꞌun ran tꞌɛ̨di ra mbädi bi zixpʉ manꞌda mbo. Nɛ bi zɛmba yʉ́ gua bʉ ja ra fädiza.
25 Nuꞌbʉ mi zøm made ra xui bʉya, nu ra Pablo nɛ ra Silas min yąhʉ Oją nɛ bin tuh yʉ́ thuhu Oją. Nɛ gätho miꞌda yʉ ofädi mi øde. 26 Nɛ ꞌdahmantho ꞌbʉ mi mbʉdi bin ja nꞌda ra ꞌyąnhäi, gueꞌbʉ go mi guhni yʉ́ guangu ra fädi. Gätho yʉ jutꞌi bin xozɛhɛ nɛ gätho yʉ tꞌɛgui man thątꞌi yʉ ofädi bin xozɛhɛ. 27 Nɛ nuꞌbʉ mi nuh rá mbängoxthi ra fädi, bi nu gätho nsoqui yʉ goxthi, bi gʉx rá juai bʉya gue nde xtín hyosɛ, nguetho mim bɛ̨ni ngue ɛ̨mbi gätho xí ꞌdaꞌʉ yʉ ofädi. 28 Pɛ nu ra Pablo ntsꞌɛdi bi mbaꞌtꞌi, bi ꞌyɛ̨mbi:
―O gadín ʉnba zɛhɛ nguetho gätho dí ꞌbʉcähe ua.
29 Nɛ nuꞌa ra mbängoxthi bʉya bi ꞌyäꞌa nꞌda ra sibi, bi yʉrpʉ mbo, nɛ ɛ̨mmɛ di fɛtꞌi nguetho min su. Nɛ bi yørpʉ ja rá gua ra Pablo nɛ ra Silas. 30 Nɛ bi gʉcpʉ thi ʉ, nɛ bi ꞌyänni:
―Nꞌyohʉ aui ꞌbɛꞌa sä ga øtꞌä nguepʉ da zä dam pøcä, bi ꞌyɛ̨na.
31 Nu ra Pablo nɛ ra Silas bi ꞌyɛ̨mbi:
―Dami däp ni mbʉi ra Hmu, ra Jesucristo, di punꞌna ni tsꞌoqui, nɛ da zimanho i, nɛꞌʉ gätho ꞌbʉpʉ ni ngu, ꞌbʉ di däp yʉ́ mbʉi a, bi ꞌyɛ̨mbi.
32 Nubʉya bi xih rán ho maꞌdaꞌyo ra Cristo nɛ gätho ꞌbʉpʉ rá ngu. 33 Nɛ nuꞌa ra mbängoxthi nɛ gätho ꞌbʉpʉ ja rá ngu bin xixyą a ra xui a. 34 Nuꞌa ra mbängoxthi bʉya bi zixꞌa ra Pablo nɛ ra Silas bʉ ja rá ngu, nɛ bi ꞌuįni. Nɛꞌa, nɛ gätho ꞌbʉpʉ ja rá ngu ɛ̨mmɛ bin johya nguetho bi ꞌyɛ̨cꞌyɛi Oją.
35 Nuꞌbʉ mí hyatsꞌi, nuꞌʉ yʉ zɛꞌmi bi mbɛnhꞌdʉ yʉ asmayo da xih ra mbängoxthi da bøm bʉ ja ra fädi ra Pablo nɛ ra Silas. 36 Nɛ nuꞌa ra mbängoxthi bi xiꞌa ra Pablo bʉya:
―Nu yʉ zɛꞌmi bá pɛnh ra nde ga xocꞌaui. Nuya sä gui pømmi nɛ nte gui jaui, bi ꞌyɛ̨mbi.
37 Pɛ nu ra Pablo bi ꞌyɛ̨mbi:
―Nugäꞌbe dí cąꞌbe ran tꞌɛ̨di bi bøm bʉ Roma, pɛ guehma bi ꞌbɛnzagäꞌbe bʉ ꞌbʉh yʉ jąꞌi, nɛ him ꞌbɛ bi juąngäꞌbe pɛ bi goctäꞌbe. Nuya ha ɛ̨nꞌʉ gui jʉgäꞌbe ngue njon da nu. Hinꞌna, hingui sä. Bá xifi ba ɛ̨sɛ da xogäꞌbe, bi ꞌyɛ̨na.
38 Nu yʉ asmayo bʉya bi mba bi xih yʉ zɛꞌmi ꞌbɛꞌa bi ma ra Pablo. Nu yʉ zɛꞌmi nuꞌbʉ mi ꞌyøde ngue i cą yʉn tꞌɛ̨di bʉ Roma a ra Pablo nɛ ra Silas bʉya, ɛ̨mmɛ bin su. 39 Nɛ nuꞌbʉ bá ɛ̨h yʉ zɛꞌmi bʉya, bi xocuabi nɛ bi ꞌyäp ra punbi, nɛ bi xiꞌʉ:
―ꞌYørcahe ra mate gui pømmi ua ja ra hnini, bi ꞌyɛ̨mbi.
40 Pɛ nu ra Pablo nɛ ra Silas ꞌbʉ mí bøm bʉ ja ra fädi, bi mba bʉ ja rá ngu ra Lidia. Nɛ nuꞌbʉ mi nu yʉ cu nangue ra Cristo, bi hąt ra tsꞌɛdi yʉ́ mbʉi ʉ, nɛ bi mba bʉya.