Bim pɛti yʉ ngʉrpi bʉ Jerusalén
15
Nuꞌʉ yʉ pa ʉ bi zøm bʉ Antioquía ꞌda yʉn ꞌyohʉ bi nɛxpʉ ra häi Judea. Nɛ sä bi xiꞌʉ yʉ ꞌyɛ̨cꞌyɛi hing yʉ judío ngue hingui sä dim pøꞌa nꞌda ꞌbʉ hinga nthɛqui yʉ́ xifani, tengu bi xänba ra Moisés ʉ yʉ judío. 2 Nu ra Pablo nɛ ra Bernabé ntsꞌɛdi bin junthʉ ʉ, janangueꞌa bi tꞌɛ̨mbi da mba bʉ Jerusalén, nɛꞌʉ miꞌda yʉ ꞌyɛ̨cꞌyɛi, din yąhʉ bʉ yʉ́ ꞌbäihʉ ra Cristo nɛꞌʉ miꞌda yʉ ngʉrpi bʉ, nangue ꞌbɛꞌa bi manꞌʉ yʉn ꞌyohʉ.3 Janangueꞌa nuꞌʉ yʉ ꞌyɛ̨cꞌyɛi bʉ Antioquía bin ꞌyɛ̨hmbʉ bʉya, bi mbɛnpʉ ja ra ꞌyu ʉ. Nɛ nuꞌbʉ mi hyąx ra ꞌyu ní mba Jerusalén, bi thopʉ ja ra häi Fenicia nɛpʉ ra häi Samaria. Nɛ nubʉ bi thogui, bi xih yʉ ꞌyɛ̨cꞌyɛi ngue bi hyɛꞌʉ yʉ́ tꞌɛ̨cꞌyɛi zɛhɛ ʉ hing yʉ judío, nɛ bi dɛn ra Cristo. Nɛ nuꞌbʉ mí ꞌyøꞌʉ yʉ cu nangue ra Cristo ꞌbɛꞌa bi man ra Pablo, bin johya bʉya.
4 Nu ra Pablo nɛ ra Bernabé nɛꞌʉ mín ꞌyohʉ bʉya, bi zøm bʉ Jerusalén. Nɛ nu yʉ́ ꞌbäihʉ ra Cristo nɛꞌʉ miꞌda yʉ ngʉrpi mi ꞌbʉpʉ, nɛ gätho miꞌda yʉ ꞌyɛ̨cꞌyɛi, bin johya ꞌbʉ mín nuꞌʉ, nɛ bim pɛtihʉ. Nɛ nu ra Pablo nɛ ra Bernabé bi ma gätho ꞌbɛꞌa bi ꞌyøtꞌe, ngue bi zɛꞌa Oją ꞌbʉ mí xiꞌʉ hing yʉ judío. 5 Pɛ ꞌdaꞌʉ yʉ judío, yʉ fariseo ʉ ngue mí ɛ̨cꞌyɛi, bim ꞌbäi nɛ bi ꞌyɛ̨na:
―Jatho da mba nthɛqui yʉ́ xifani yʉ ꞌyɛ̨cꞌyɛi gue hing yʉ judío, nɛ da sifi da ꞌyøtꞌ yʉ́n tꞌɛ̨di ra Moisés, bi ꞌyɛ̨nꞌʉ.
6 Nuꞌʉ yʉ́ ꞌbäihʉ ra Cristo bʉya, nɛꞌʉ miꞌda yʉ ngʉrpi, bim pɛti ngue bin ꞌyänꞌdʉ ꞌbɛꞌa manꞌda xʉn ho da ꞌyøtꞌe. 7 Nɛ nuꞌbʉ nyaꞌa thoho madín ꞌyomfɛ̨ni ʉ, bim ꞌbäꞌa ra Pedro, nɛ bi ꞌyɛ̨na:
―Nꞌyohʉ ahʉ, guí pąhmbʉ gue mayaꞌbʉ tsꞌʉ bi xicä Oją nꞌdandį gue ga xiꞌʉ ꞌda yʉ jąꞌi hing yʉ judío ran ho maꞌdaꞌyo. Nɛ nangue dá mangä, bi zä bi ꞌyøde nɛ bi ꞌyɛ̨cꞌyɛi. 8 Nu Oją gue i pąrpa yʉ́ mbʉi yʉ jąꞌi, bi jajʉ ga pąhmbʉ i sinꞌʉ hing yʉ judío, nguetho bi un rá Hogandąhi Oją ʉ, tengu bi ꞌdajʉ dyʉ judíohʉ. 9 Nu Oją him bi ꞌyøtꞌa nꞌda ran heque nanguejʉ dyʉ judíohʉ nɛꞌʉ hing yʉ judío, pɛ nɛꞌʉ bi japi bi bo yʉ́ mbʉi ngue bi ꞌyɛ̨cꞌyɛi. 10 Nuya hanja guí ɛ̨mhbʉ hin da zin Oją ʉ gue him bi ꞌyøtꞌ yʉ́n tꞌɛ̨di ra Moisés, pɛ ya bi zin Oją ʉ. Nguetho guí ɛ̨mhbʉ i jatho da ꞌyøtꞌʉ yʉn tꞌɛ̨di, tenguꞌbʉ gui hyøspahʉ nꞌda ra ꞌbɛni, gue hin dá häthʉ, xínga gueꞌʉ mam bombøtahʉ xtá hyätꞌi, bi ꞌyɛ̨nꞌa ra Pedro.
11 Nɛ xø bi ꞌyɛ̨na:
―Pɛ nujʉ dí ɛ̨cꞌyɛihʉ ngue da mba ma pøhøgähʉ nangue rá mate ra Hmu Jesús, nguthoꞌʉ hing yʉ judío, bi ꞌyɛ̨nꞌa ra Pedro.
12 Nɛ nubʉya bi yą ra Bernabé nɛ ra Pablo, nɛ bi xiꞌʉ ꞌbɛꞌa gätho bi ꞌyøtꞌe nangue rá tsꞌɛdi Oją, yʉ hmɛpya nɛ yʉn tꞌøtꞌe nuįxte ngue bi ꞌyørpʉ ꞌbʉh yʉ jąꞌi hing yʉ judío. Nɛ gätho ná yąꞌʉ njom bin yą. 13 Nuꞌbʉ mí guaꞌa bi ma ra Pablo nɛ ra Bernabé, nu ra Jacobo Santiago bi ꞌyɛ̨mpꞌʉ madim pɛti bʉ:
―Nꞌyohʉ ahʉ gui ꞌyøhmbʉ ya ꞌbɛꞌa dí mangä. 14 Nu ra Simón Pedro ya bi xijʉ ha ín ja Oją ra mbʉdi bi huahnꞌni ꞌda yʉ jąꞌi hing yʉ judío ngue da ꞌyɛ̨cꞌyɛi. 15 Nɛ ngutho bi man yʉ pøngahyą ꞌbʉ mayaꞌbʉ, ꞌbʉ mi ꞌyoꞌtꞌi ꞌbɛꞌa bi man Oją.
16 Bi ꞌyɛ̨na:
Mꞌbɛjua gua pengä mahønꞌa,
nɛ ga japi din thąndegui mahønꞌa tengu mi thąndegui nuꞌbʉ mí ꞌbʉh ra David.
Tengutho ꞌbʉ di hoc mahønꞌa nꞌda ra niją gue xʉn yøtꞌe.
17 Nɛ gätho miꞌda yʉ jąꞌi da hyongui, guecä dra Hmu mahɛ̨tsꞌi.
Gätho toꞌo yʉ jąꞌi hing yʉ judío ngue ma mbɛti ʉ, da hyongui.
18 Njabʉ bi man Oją mayaꞌbʉ nɛ bi japi bi fąhya gueꞌbʉ go mayaꞌbʉ.
19 Janangueꞌa dí xi ahʉ ya, ɛ̨nꞌa ra Jacobo, ndeꞌbʉ hin te ga xihmbʉ da ꞌyøtꞌa xʉn hɛ̨i ʉ hing yʉ judío, gue nuꞌʉ xí hyɛsɛ yʉ́ tꞌɛ̨cꞌyɛi nɛ i tɛnꞌna Oją. 20 Pɛ ga othʉ nꞌda ra søcuą, nɛ ga xihmbʉ ʉ da hyɛgui gätho yʉ́n tꞌøtꞌe yʉ hmite, nɛ hin da ꞌyøtꞌ yʉn ꞌyomtꞌɛ̨ni, nɛ hin da za ra ngø gue him bi bøn rá ji ꞌbʉ mí tho, nɛ hin da zi ra ji. 21 Janangueꞌa hin di ʉnba yʉ́ mbʉi to i tɛn yʉ́n tꞌɛ̨di ra Moisés, nguetho xʉn ngu yʉ jɛya xí thogui i hmam bʉ ja yʉ́ niją yʉ judío yʉ́n tꞌɛ̨di ra Moisés, gätho yʉ hnini i hma ꞌbʉ ra pa ran tsꞌäya, bi ꞌyɛ̨nꞌa ra Jacobo.
22 Gätho yʉ ꞌyɛ̨cꞌyɛi nɛ yʉ́ ꞌbäihʉ ra Cristo nɛ miꞌda yʉ ngʉrpi bi numanho ꞌbɛꞌa bi manꞌa ra Jacobo. Nɛ mi ɛ̨nꞌʉ gue da thanhꞌni ꞌda da ꞌbɛhni da mbähä ra Pablo nɛ ra Bernabé bʉ Antioquía. Nɛ bi thanhꞌna ra Judas tꞌɛ̨mbi Barsabás nɛ ra Silas, nɛ gueꞌʉ ꞌda yʉ́ ngʉrpi yʉ ꞌyɛ̨cꞌyɛi ʉ. 23 Nɛ nu ra søcuą ngue bi gątsꞌi bi ma:
“Nugähe, ma ꞌbäigähe a ra Jesucristo, nɛ miꞌda gähe gue dyʉ́ ngʉrpigähe, nɛ gätho ni cuje nangue ra Cristo, dí pɛnꞌnahʉ ra søcuą, ma cu ahʉ, nɛ dadí zɛngua ahe. Dadín cuhʉ nangue ra Cristo gyʉ jąꞌihʉ ngue hin gyʉ judíohʉ guí ꞌbʉhmbʉ bʉ Antioquía, nɛpʉ gätho ra häi Siria nɛpʉ ra häi Cilicia. 24 Nugähe dá øhmbe ngue ꞌda yʉn ꞌyohʉ bi nɛxua bi mba bʉ, nɛ bi patꞌahʉ nɛ bi xi ahʉ ngue jatho da mba nthɛqui ni xifanihʉ nɛ gui ꞌyøthʉ rán tꞌɛ̨di ra Moisés. Pɛ nuꞌʉ hin dá pɛnhdähe ʉ. 25 Nugähe dám pɛtihe nɛ dá sänhde ꞌda yʉn ꞌyohʉ da mbähä ra Pablo nɛ ra Bernabé. 26 Nu ra Pablo nɛ ra Bernabé ɛ̨mmɛ dí numanhohe, nguetho hingui su din ꞌyo bʉ hapʉ ɛ̨na da tho, ngue da ma nangue ma Hmuhʉ ra Jesucristo. 27 Nɛ dá pɛnhde ra Judas nɛ ra Silas da xiꞌasɛhʉ ꞌbɛꞌa dá othe. 28 Nguetho rá Hogandąhi Oją bi xije, nɛ dá numanhohe, ngue hin ga ꞌda ahʉ miꞌda yʉn tꞌɛ̨di xʉn hɛ̨i gui ꞌyøthʉ nangue yʉ́n tꞌɛ̨di ra Moisés. Høntꞌ ya zʉ tsꞌʉ yʉn tꞌɛ̨di dá otꞌahe. 29 Nuya dí xi ahe ya, ngue hin gui sihʉ ꞌbɛꞌa bi ꞌbøspa yʉ hmite, xínga gue ra ji gui sihʉ, xínga gue gui sahʉ ra ngø gue him bi bøn ra ji ꞌbʉ mi tho. Nɛ hin gui ꞌyøthʉ yʉn ꞌyomtꞌɛ̨ni. Nuꞌbʉ gui hyɛhmbʉ gätho ꞌbɛꞌa dí xi ahe, xʉn ho ꞌbʉ. Oją da mbäx ahʉ. Nɛ høntꞌa dí xi ahe ya,” bi ꞌyɛ̨nꞌa ra søcuą bi ꞌyoꞌtꞌa ra Jacobo Santiago ꞌbʉ mi ja ram pɛti bʉ Jerusalén, bi gąx ra Pablo.
30 Nɛ nubʉya, bi mbähä ra Pablo, ra Bernabé, nɛ ra Judas, nɛ ra Silas bʉ ja ra hnini Antioquía. Nuꞌbʉ mí zøm bʉ, bi ma dí pɛti yʉ ꞌyɛ̨cꞌyɛi nɛ bi dä ra søcuą bʉya. 31 Nɛ nuꞌbʉ mí nuꞌʉ ꞌbɛꞌa mí mam bʉ ja ra søcuą, bin johya yʉ́ mbʉi nangue ran zofo bi sifi, ngue bi hyurpa yʉ́ mbʉi. 32 Nu ra Judas nɛ ra Silas, nɛꞌʉ, yʉ pøngahyą ʉ. Nɛ nangue rán zofo ʉ bi hyurpa yʉ́ mbʉi yʉ ꞌyɛ̨cꞌyɛi. Nɛ bi mbätsꞌi da ꞌyɛ̨cꞌyɛi xʉn ho. 33 Nu ra Judas nɛ ra Silas bim ꞌbʉpʉ Antioquía ꞌda yʉ pa. Mꞌbɛjua bin ꞌyɛ̨te yʉ ꞌyɛ̨cꞌyɛi, bi mbɛhni da mbeng bʉ ꞌbʉꞌʉ ngue bá pɛnhꞌdʉ. 34 Nɛ mꞌbɛjua him bi nde bi mbeng bʉ ra Silas, nɛ bá copʉ Antioquía. 35 Nɛ ra Pablo nɛ ra Bernabé bi gopʉ Antioquía. Nuꞌʉ nɛꞌʉ gätho miꞌda yʉ xänbate bin xänbate bʉ, nɛ bi mampꞌa rám Hman ra Cristo.
Ná yondį bi mba nꞌdanni ra Pablo, bi man rám Hman Oją
36 Nuꞌbʉ mí thoꞌi ꞌda yʉ pa, ra Pablo bi ꞌyɛ̨mpꞌa ra Bernabé:
―Ga mbɛ bʉ ja nꞌda ngu nꞌda yʉ hnini xtán ꞌyoui xtám mammi rám Hman Oją. Ga nuui ma cuhʉ nangue ra Cristo ꞌbɛꞌa di jaꞌʉ.
37 Nu ra Bernabé bi nde da zixꞌa ra Xuua Marcos. 38 Pɛ nu ra Pablo him mi nde da zixꞌa, nguetho nuꞌa bi ꞌdapʉ Panfilia, nɛ him bi thoc rá ꞌbɛfi bʉ. 39 Nɛ hinga ꞌdaꞌangu bi bɛ̨mmi nɛ bin heque. Nu ra Bernabé bi zixꞌa ra Marcos bi hyu ra barco í mba bʉ ra tꞌʉhäi Chipre. 40 Nu ra Pablo bi huanhꞌna ra Silas ngue da mbɛ. Nɛ nu yʉ ꞌyɛ̨cꞌyɛi bʉ Antioquía bin yąhʉ Oją, bi ꞌyäp rá mate Oją nangueꞌʉ. Bi mba bʉya. 41 Nɛ nuꞌʉ bi thopʉ ra häi Siria nɛpʉ Cilicia, nɛ nyaꞌa tsꞌʉ bim ꞌbʉpʉ hapʉ bi thogui, gue bi hąt ra tsꞌɛdi xʉn ho yʉ ꞌyɛ̨cꞌyɛi bʉ.