Ra Pablo nɛ ra Bernabé nubʉ ra hnini Iconio
14
Nubʉ Iconio, bi yʉrpʉ ra Pablo nɛ ra Bernabé bʉ ja yʉ́ niją yʉ judío, nɛ bi mam bʉ a rám Hman Oją. Nɛ bi ma xʉn ho, janangueꞌa xʉn ngu yʉ́ mijudíohʉ bi ꞌyɛ̨cꞌyɛi, nɛꞌʉ yʉ jąꞌi gue hing yʉ judío. 2 Pɛ nuꞌʉ ꞌda yʉ judío ngue him bi ꞌyɛ̨cꞌyɛi ɛ̨mmɛ madin ꞌyʉthʉ ʉ hing yʉ judío, bim parbi da zʉꞌʉ yʉ ꞌyɛ̨cꞌyɛi. 3 Pɛ nu ra Pablo nɛ ra Bernabé nyaꞌa bim ꞌbʉpʉ, nguetho xʉn ngu bi ꞌyɛ̨cꞌyɛi bʉ, nɛ bi hyutꞌ ran zambʉi bi ma nangue ra Hmu mahɛ̨tsꞌi. Nu ra Hmu bi un yʉ́ tsꞌɛdi ʉ ngue da ꞌyøtꞌ yʉ hmɛpya nɛ yʉn tꞌøtꞌe nuįxte, guepʉ da bąh yʉ jąꞌi, Oją in ꞌyohʉ ra Pablo nɛ ra Bernabé. 4 Pɛ nu yʉ jąꞌi bʉ ja ra hnini bin heque. ꞌDaꞌʉ bi dɛn yʉ judío hing yʉ ꞌyɛ̨cꞌyɛi, nɛ ꞌdaꞌʉ bi dɛn ra Pablo nɛ ra Bernabé. 5 Janangueꞌa, nu yʉ ngʉrpi bʉ ja ra hnini bi un ran tꞌɛ̨di ʉ hing yʉ ꞌyɛ̨cꞌyɛi, yʉ judío ʉꞌda, hing yʉ judío ʉ ꞌda, gue da zʉꞌʉ, nɛ di batꞌado ʉ. 6 Pɛ nu ra Pablo nɛ ra Bernabé, ꞌbʉ mí bądi ꞌbɛꞌa nde da ꞌyørpe, bi ꞌdagui, bi mba bʉ ja ra hnini Listra, nɛpʉ ra hnini Derbe nubʉ ra häi Licaonia. Nɛ bin ꞌyo gätho ra xɛqui bʉ. 7 Nɛpʉ bá mam bʉ rán ho maꞌdaꞌyo ra Cristo bʉ ʉ.
Bi mba ma batꞌado ra Pablo bʉ Listra
8 Nubʉ ja ra hnini Listra mí ꞌbʉpʉ nꞌda ran ꞌyohʉ, ra dogua, ngue ya xín jabʉ ꞌbʉ mim ꞌbʉi. Nɛ mí hurpʉ nguetho hin jąmꞌbʉ bin ꞌyo. 9 Nu ran ꞌyohʉ i øde ꞌbɛꞌa bi man ra Pablo. Nuꞌbʉ mí hyɛ̨t a ra Pablo, mí pądi ꞌbɛꞌa mím bɛ̨nꞌa zʉ dogua, ngue ya i ɛ̨cꞌyɛi gue dí hocpa rá gua ya. 10 Janangueꞌa nu ra Pablo ntsꞌɛdi bi ma:
―Ndantsꞌi gam ꞌbäi.
Nu ran ꞌyohʉ bʉya ꞌbex bi zägui bin ꞌyo. 11 Nɛ nuꞌʉ yʉ jąꞌi, nuꞌbʉ mín nu ꞌbɛꞌa bi ꞌyøtꞌa ra Pablo, ntsꞌɛdi bi mbafi, nɛ bin yą yʉ́ nde ꞌʉ licaonia, bi ꞌyɛ̨na:
―Nuya yʉ oją ya, pɛ bi nɛqui tenguꞌbʉ yʉn ꞌyohʉ, bi zøcua ja ra häi dí ꞌbʉhmbʉ, bi ꞌyɛ̨nꞌʉ.
12 Nu ra Bernabé bi ꞌyɛ̨mbi tengu rá thuhu yʉ́ oją zɛhɛ ra Júpiter, ximangutho a ra Pablo bi ꞌyɛ̨mbi tengu rá thuhu yʉ́ oją zɛhɛ ra Mercurio. Nguetho manꞌda mi yąꞌa ra Pablo, nɛ i ɛ̨mbi rá pøngahyą ra Júpiter a ra Mercurio. 13 Nuꞌa ra mbäją bʉya, ngue mí pɛpꞌa yʉ́ oją Júpiter, mí ja bʉ nꞌda ra ngu bʉ ndehnini, guepʉ mí thąnde ra Júpiter yʉ jąꞌi. Nuꞌa ra mbäją nɛꞌʉ ꞌda yʉ jąꞌi bá si yʉn dąni guepʉ ꞌbʉh ra Pablo nɛ ra Bernabé, ɛ̨mbi ra Mercurio nɛ ra Júpiter, gue da hyo yʉn dąni da mbøspe. Nɛ bá cą yʉ døni, gätho da mbøspe. 14 Pɛ nuꞌbʉ mí bąh ra Bernabé nɛ ra Pablo ꞌbɛꞌa i nde da ꞌyøtꞌʉ yʉ jąꞌi, bi yʉrpʉ ꞌbʉh yʉ jąꞌi, bi dʉn yʉ́ pahni, ndepe da bąh yʉ jąꞌi hingui numanho ꞌbɛꞌa nde da ꞌyøtꞌʉ, nɛ bi ꞌyɛ̨mbi:
15 ―Nꞌyohʉ ahʉ hanja ngubʉ gní ꞌyøthʉ. Nguetho dyʉ́n ꞌyohʉ thohoꞌbe, pɛ bá ɛ̨ꞌbe ua gue dín nde ga xi aꞌbe gui ꞌyɛsꞌhʉ ꞌbɛꞌa guí øthʉ, nguetho säti thoho ꞌbɛꞌa guím bɛ̨mhbʉ. Ndeꞌbʉ gui ꞌyɛsꞌhʉ gní thąndehʉ ʉ guí ɛ̨mfʉ yʉ oją ua ja ra häi, nɛ gui thąndehʉ majuąni Oją. Nguetho gueꞌa bi ꞌyøtꞌ mahɛ̨tsꞌi nɛcua ja ra häi nɛ ra deją nɛ gätho i ja ua. 16 Nuꞌʉ yʉ pa bi thogui, Oją bi hyɛtho yʉ jąꞌi da ꞌyøzɛhɛ yʉ́ pähä zɛhɛ. 17 Pɛ nu Oją bʉya ząi i urcahʉ rá hogan ꞌyomfɛ̨ni i ørcahʉ, gue bí pɛnh ra ꞌye nɛ di japi din ja ma huąhihʉ, nɛ di ꞌdajʉ ꞌbɛꞌa dí sihʉ nɛ di ꞌdajʉ ran johya ma mbʉihʉ, bi ꞌyɛ̨nꞌa ra Pablo.
18 Madagueꞌbʉ ngubʉ mí man ra Pablo, pɛ xʉn hɛ̨i bʉ í hɛcpa yʉ jąꞌi gue hin da mbøspe.
19 Pɛ bi zøm bʉ ꞌda yʉ judío bá nɛxpʉ ra hnini Antioquía bʉ ja ra häi Pisidia, nɛpʉ Iconio, nɛ nuꞌʉ bi parba yʉ jąꞌi da zʉh ra Pablo nɛ ra Bernabé. Nu yʉ jąꞌi bʉya bi batꞌado ra Pablo nɛ bi gʉrpʉ häi, bi hyønꞌa thi bʉ ja ra hnini, nɛ ɛ̨mbi gue ya bi du. 20 Pɛ nuꞌbʉ mí zøh yʉ ꞌyɛ̨cꞌyɛi bʉ ꞌbɛnꞌa ra Pablo, bi ndantsꞌ pʉya, nɛ bi mba mahønꞌa bʉ ja ra hnini. Nuꞌbʉ mí hyax bʉya bi mbɛ ra Bernabé bʉ ja ra hnini Derbe.
21 Nubʉ ja ra hnini Derbe bi mampꞌa rán ho maꞌdaꞌyo ra Cristo, nɛ xʉn ngu bi ꞌyɛ̨cꞌyɛi. Nɛ nubʉya, nu ra Pablo nɛ ra Bernabé bá nɛxpʉ, bi thoh mahønꞌa bʉ ja yʉ hnini Listra nɛ Iconio nɛpʉ Antioquía bʉ ra häi Pisidia. 22 Guepʉ bi thoqui bi hąt ra tsꞌɛdi yʉ́ mbʉi yʉ ꞌyɛ̨cꞌyɛi, nɛ bi xifi di thocta a dí ꞌyɛ̨cꞌyɛi, nguetho gätho toꞌo da yʉrpʉ di manda rá tsꞌɛdi Oją, jatho da nu xʉn ngu yʉn ʉnbi. 23 Nɛ nubʉya nu ra Pablo nɛ ra Bernabé bi ꞌyɛꞌtꞌ yʉ́n tsꞌihmɛ ꞌbʉ mí huanꞌdʉ din ngʉrpi nꞌda ngu nꞌda bʉ ja yʉm pɛti. Nɛ bi ꞌyäp Oją ngue da mbäxꞌʉ yʉ ngʉrpi. Nɛ bi däpꞌa Oją ʉ gätho na ngu ʉ yʉ ꞌyɛ̨cꞌyɛi gue di jamansu, nguetho bi ꞌyɛ̨cꞌyɛi Oją ʉ.
Bá peng bʉ ra Pablo nɛ ra Bernabé bʉ Antioquía ra häi Siria
24 Nɛ nubʉya ra Pablo nɛ ra Bernabé bi thopʉ ra häi Pisidia nɛ bi zøm bʉ ra hnini Perge nubʉ ra häi Panfilia. 25 Nɛ guepʉ bi mampꞌa rán ho maꞌdaꞌyo ra Cristo. Mꞌbɛjua bʉya bi mba bʉ ra hnini Atalia. 26 Guepʉ bi hyu ra barco bi mba bʉ Antioquía bʉ ra häi Siria, guepʉ ra mbʉdi xí un Oją yʉ́ ꞌbɛfi ʉ, nɛ xí tꞌäp rám fätsꞌi Oją ʉ. Nɛ nuya bi juah ya. 27 Nuꞌbʉ mi zøm bʉ, bi ma dim pɛti yʉ ꞌyɛ̨cꞌyɛi, nɛ bi xifi gätho bi ꞌyøtꞌe ngue bi zɛꞌa Oją, nɛ bi xifi nɛꞌʉ hing yʉ judío bi jap Oją bi ꞌyɛ̨cꞌyɛi. 28 Nɛ nu ra Pablo nɛ ra Bernabé, nyaꞌa bim ꞌbʉhmbʉ yʉ ꞌyɛ̨cꞌyɛi bʉ bʉya.