Nu ra Bernabé nɛ ra Saulo bi dʉmpꞌ yʉ ꞌbɛfi ngue bi mamp rám hman Oją bʉ nꞌdanni yʉ häi
13
Nubʉ ra hnini Antioquía mi ꞌbʉpʉ yʉ ꞌyɛ̨cꞌyɛi ngue nząi dim pɛti. ꞌDaꞌʉ yʉ pøngahyą, nɛ ꞌdaꞌʉ yʉ xänbate. Mí ꞌbʉpʉ ra Bernabé, nɛ Simón tꞌɛ̨mbi Negro, nɛ ra Lucio ra mɛngu bʉ Cirene. Nɛ mí ꞌbʉpʉ ra Manaén, nuꞌa ꞌdarpʉ bi mba ma tedeui ra Herodes rá tsꞌʉtꞌabi ra häi Galilea, nɛ mí ꞌbʉpʉ ra Saulo. 2 Nꞌda ra pa nuꞌbʉ mí ꞌyøtꞌ ram pɛti ʉ, nɛ mí ɛꞌtꞌ yʉ́n tsꞌihmɛ, nɛ nuꞌa rá Hogandąhi Oją bi ꞌyɛ̨mpꞌʉ:―Dami ꞌuejʉ ya yoho yʉn ꞌyohʉ, ra Bernabé nɛ ra Saulo, nguetho xtá huanhdä ʉ da ꞌyøtꞌ ra ꞌbɛfi dá xifi, bi ꞌyɛ̨mbi.
3 Nuꞌbʉ mí ꞌyɛꞌtꞌ yʉ́n tsꞌihmɛ mahønꞌa, bi ꞌyäp rám fätsꞌi Oją ꞌbʉ mí dospa rá yą ra Bernabé nɛ ra Saulo.
Bin ꞌyɛ̨hmbʉ bʉya:
―Oją da zix ahʉ, bi ꞌyɛ̨mbi.
Nuꞌʉ bi ꞌbɛhni bi mam bʉ rám Hman Oją bʉ Chipre
4 Nubʉya nu rá Hogandąhi Oją bi zixꞌa ra Bernabé nɛ ra Saulo, bi mba bʉ ra hnini Seleucia. Nuꞌbʉ mí nɛxpʉ, bi hyu ra barco, bi mba bʉ ra häi Chipre, ra tꞌʉhäi i ja bʉ made ra deją. 5 Nɛ nuꞌbʉ mi zøm bʉ ra hnini Salamina, bi mam bʉ rám Hman Oją bʉ ja yʉ́ niją yʉ judío. Nɛ ra Xuua Marcos mín ꞌyohʉ nɛ bim fäxpʉ. 6 Nuꞌbʉ mi thopʉ gätho ra häi Chipre, bi zøm bʉ ja yʉ́ hyodi ra hnini Pafos. Nɛ bin tįmhbʉ nꞌda ra judío gue ra bądi, ɛ̨na rá pøngahyą Oją pɛgue ra hyäte a, nu rá thuhu í Barjesús. 7 Nuꞌa mín ꞌyoui bʉ ja rá ꞌbɛfi ra Sergio Paulo, rá tsꞌʉtꞌabi ra häi bʉ. Nuꞌa ra Sergio Paulo nꞌda ran ꞌyohʉ ɛ̨mmɛ mí ja rán ꞌyomfɛ̨ni xʉn ho. Nuꞌa bi zohna ra Bernabé nɛ ra Saulo nguetho nde da ꞌyøh rám Hman Oją. 8 Pɛ nu ra bądi Barjesús, nꞌdatꞌa ra Elimas, bi ꞌyʉꞌtꞌa ra tsꞌʉtꞌabi, nguetho hingui ndepe da ꞌyɛ̨cꞌyɛi a i sifi, nɛ bin junthʉ a ra Bernabé nɛ ra Saulo. 9 Nu ra Saulo, nꞌdatꞌa ra Pablo a, nꞌyoui xʉn ngu ra tsꞌɛdi nangue rá Hogandąhi Oją a, ɛ̨mmɛ bi hyɛ̨tꞌa ran ꞌyohʉ ngue ra bądi. 10 Nɛ bi ꞌyɛ̨mpꞌa:
―Nuꞌi gra ndøhyäte ɛ̨mmɛ guín ꞌyoui gätho ꞌbɛꞌa xʉn tsꞌo. Nuꞌi gra tsꞌʉntꞌʉ i ra dąmantsꞌo. Nuꞌi gadí ʉcua ꞌʉ gätho xʉn ho. Ha njąmꞌbʉ gui ꞌyɛꞌtsꞌa gní xih yʉ jąꞌi hingui ho ꞌbʉ da dɛn Oją. 11 Nuya da ꞌyøtꞌaꞌi ran ʉnbi ra Hmu mahɛ̨tsꞌi. Gan xädä gue hin da zä gui nu ran nɛqui ꞌda yʉ pa, bi ꞌyɛ̨mpꞌa ra Pablo.
ꞌBex bin xädä, bi gą ꞌbɛxui rá dä, nɛ bi hyoni toꞌo da gʉrpa rá ꞌyɛꞌa bʉya. 12 Nuꞌbʉ mí nuꞌa ra tsꞌʉtꞌabi ꞌbɛꞌa bin ja, bi hyonya thoho, ꞌbex bi ꞌyɛ̨cꞌyɛi bʉya, nguetho ya bi bądi majuąni a rán xädi ra Hmu mahɛ̨tsꞌi ngue mím manꞌa ra Pablo.
Ra Pablo nɛ ra Bernabé nubʉ ra hnini Antioquía, gue ra häi Pisidia
13 Nu ra Pablo nɛꞌʉ mín ꞌyohʉ bi hyu ra barco, bi nɛxpʉ Pafos nɛ bi zøm bʉ Perge bʉ ja ra häi Panfilia. Pɛ nu ra Xuua Marcos bá ɛ̨ꞌa, bá sotho ʉ mín ꞌyohʉ, nɛ bá peng mahønꞌa bʉ Jerusalén. 14 Nu ra Pablo nɛꞌa ra Bernabé mín ꞌyoui, bi nɛxpʉ Perge bi mba bʉ manꞌda ra hnini Antioquía bʉ ra häi Pisidia. Nɛ nuꞌbʉ mi zøn ra pa ran säya, bi yʉrpʉ ja rá niją yʉ judío nɛ bi hyupʉ ʉ. 15 Nuꞌbʉ mi guaꞌa manꞌʉ ꞌbʉpʉ, ngue rá søcuą yʉ́n tꞌɛ̨di yʉ judío nɛ rá søcuą yʉ pøngahyą, nuꞌʉ di jamansu bʉ ja ra niją bi xiꞌa ra Pablo nɛ ra Bernabé:
―Nꞌyohʉ aui, nuꞌbʉ ja aui tsꞌʉ nꞌda ran zofo, dami xije tsꞌʉ.
16 Bi ndantsꞌa ra Pablo bʉya, bim ꞌbäi, bi uąn rá ꞌyɛ ngue ndepe da ꞌyøh yʉ jąꞌi, nɛ bi ꞌyɛ̨mbi:
―Nꞌyohʉ ahʉ ma miꞌisraelhʉ, nɛ gätho ahʉ guín numansuhʉ Oją, dami ꞌyøhmbʉ ya. 17 Nuꞌa Oją gue dí tɛnhdʉ dyʉ israelhʉ, bi huanꞌdʉ mam bombøtahʉ nɛ bi japi bin xąndi xʉn ngu nuꞌbʉ mí ꞌbʉpʉ ra häi Egipto, nɛ mí ꞌbʉpʉ tengu yʉ nꞌdanꞌyo jąꞌi. Nɛ nu Oją bʉya bá jʉcꞌʉ nangue rá tsꞌɛdi bʉ mi ꞌbʉi. 18 Nɛ madagueꞌa him madí däp Oją yʉ́ mbʉi ʉ ꞌbʉ min ꞌyo mbɛ nyote njɛya bʉ maꞌueni ʉ, pɛ guehma bin ja rá yembʉi Oją. 19 Nɛ bi unꞌna ra häi Canaán ʉ ma miꞌisraelhʉ gue di manda zɛhɛ, ꞌbʉ mí juaꞌa bi hyoꞌʉ yoto yʉ nde xmí ꞌbʉpʉ. Nɛ bin ząm bʉ ma miꞌisraelhʉ bʉya. 20 Nu Oją bʉya bi japi bim ꞌbʉh yʉ́ zɛꞌmi, nɛ goho ciɛnto nɛ yote maꞌdɛtꞌa njɛya madí manda ma miꞌisraelhʉ, asta gueꞌbʉ go mím ꞌbʉh ra pøngahyą Samuel. 21 Mꞌbɛjua bi ndesɛ yʉ jąꞌi nꞌda ra hmutsꞌʉtꞌabi di manda ʉ. Nɛ bi jap Oją a ra Saúl dim hmutsꞌʉtꞌabi bʉya. Nu ra Saúl, rá ta a ra Cis, gue rám bombøta ra Benjamín mí ꞌbʉh mayaꞌbʉ. Nɛ nuꞌa ra Saúl bim hmutsꞌʉtꞌabi yote njɛya. 22 Nuꞌbʉ mi ꞌuec Oją ra Saúl bʉya, bi japi bim hmutsꞌʉtꞌabi ra David. Nɛ mi man Oją, bi ꞌyɛ̨na: “Nuna ra David, rá tsꞌʉntꞌʉ a ra Isaí, ɛ̨mmɛ dín numanho, nguetho da ꞌyørca a ma pähä nɛ ꞌbɛꞌa gätho dín nde,” bi ꞌyɛ̨n Oją, bi ꞌyɛ̨nꞌa ra Pablo ꞌbʉ mín zoꞌʉ yʉ́ mijudíohʉ bʉ ra hnini Antioquía, ra häi Pisidia.
23 Nɛ bi thoqui bi man ra Pablo, bi ꞌyɛ̨na:
―Nɛ gueꞌa ra David rám bomꞌbɛto na ra Jesús gue bá pɛncahʉ Oją, ma pørpatehʉ dyʉ israelhʉ, dyʉ judíohʉ, tengu mí man Oją mayaꞌbʉ. 24 Ya ma guepʉ di dʉmpꞌrá ꞌbɛfi ra Jesús, nu ra Xuua mí xih ma miꞌisraelhʉ gue din xixyą toꞌo gätho bi päh yʉ́ mbʉi nangue yʉ́ tsꞌoqui. 25 Nuꞌbʉ mi tsꞌʉtho da du a ra Xuua, nuꞌa mí mam buya: “Nuꞌa gá bɛ̨mhbʉ gue guecä pɛ hinga guecä. Pɛ mꞌbɛjua ba ɛ̨hɛ, nɛ hin dí sʉcä tengu a, nguetho ɛ̨mmɛ xʉn hɛ̨tsꞌi rá tsꞌɛdi a,” mí ɛ̨nꞌa ra Xuua, bi ꞌyɛ̨nꞌa ra Pablo.
26 Nɛ bi thoqui bi man ra Pablo, bi ꞌyɛ̨na:
―Man ꞌyohʉ ahʉ, yʉ́m bomꞌbɛtojʉ ra Abraham, nɛ miꞌda ahʉ gue nɛꞌahʉ guí numansuhʉ Oją, guejʉ bá pɛncahʉ na rám hma Oją, nɛ i ma hague dán zä di pøjʉ. 27 Pɛ nu ma mɛnguhʉ mí ꞌbʉpʉ Jerusalén, nɛ yʉ́ ngʉrpi ʉ, him mi pądi gue gueꞌa ra Jesús mí oꞌtꞌ yʉ pøngahyą, madagueꞌbʉ i hmam bʉ ja ma nijąhʉ gätho yʉ́ pa ran säya. Janangueꞌa bi ꞌyørpa ra Jesús tengu mán tꞌoꞌtꞌi ꞌbʉ mí yąpi gue da hyo. 28 Nu ra Jesús nte min dupate, pɛ bi siꞌa ra Pilato gue di manda da tho. 29 Nɛ nuꞌbʉ mí ꞌyørpe ꞌbɛꞌa gätho mán tꞌoꞌtꞌi bʉ ja rám hman Oją, nɛ mꞌbɛjua bʉya bi mba ma cąꞌmi bʉ ja ra pontꞌi, nɛ bi tꞌägui. 30 Pɛ nu Oją mꞌbɛjua tsꞌʉ bi xoxpʉ ꞌbʉꞌʉ xʉn du. 31 Nɛ nu yʉn ꞌyohʉ mín ꞌyohʉ mamꞌbɛtꞌo a ra Jesús ꞌbʉ mí nɛxpʉ ra häi Galilea, nɛ bi mba bʉ ra dąhnini Jerusalén, nɛ guetꞌʉ i xih yʉ jąꞌi ʉ ya.
32 Nɛcäꞌbe dí xi ahʉ ya nangue ra Jesús, ran ho maꞌdaꞌyo gueꞌa mí xi Oją ʉ ma bøtahʉ ꞌbʉ mí ma gue ꞌbɛꞌa majuąni din ja. 33 Nɛ gueꞌa bin ja a ya. Gue bi jącuahʉ ꞌbʉ mí xoxꞌa ra Jesús, gue guejʉ dyʉm bomꞌbɛtojʉ ʉ bi xi Oją majuąni. Tengu mán tꞌoꞌtꞌi bʉ ja rám Hman Oją, ná yoho ra Salmo, i ɛ̨na: “Nuya nam pa ya, dí ɛ̨ꞌtsꞌiꞌi, da nuꞌʉ yʉ jąꞌi ya gue majuąni ma Tsꞌʉntꞌʉ i,” mí ɛ̨n Oją ꞌbʉ mi ꞌyɛ̨na, bi ꞌyɛ̨nꞌa ra Pablo.
34 Nɛ xø bi ꞌyɛ̨nꞌa ra Pablo:
―Nɛ bi xox Oją a ra Jesús ꞌbʉ mí du, nɛ hin da du mahønꞌa. Nɛ gueꞌa bi man Oją, ꞌbʉ mi ꞌyɛ̨na: “ꞌDatꞌa ra hoganjąpi ga ꞌdaꞌi tengu dá xih majuąni ra David,” bi ꞌyɛ̨n Oją, bi ꞌyɛ̨nꞌa ra Pablo.
35 Nɛ xø bi ꞌyɛ̨na:
―Nɛ gueꞌa bi mam bʉ manꞌda ra Salmo gue bi ꞌyoꞌtꞌa ra David, bi xi Oją: “Hin gui japꞌa ni Hoga Tsꞌʉntꞌʉ da ꞌya a rá ngøcꞌyɛi,” bi ꞌyɛ̨mbi. 36 Pɛ nu ra David nuꞌbʉ mí juaꞌa rá ꞌbɛfi ngue bi ꞌyørpa rá pähä Oją gätho mí ꞌbʉcua ja ra häi, bi du. Nɛ ꞌdarpʉ yʉ́n ꞌyägui yʉ́ bøta bi tꞌägui, nɛ bi ꞌya bʉ rá ngøcꞌyɛi a bʉya. 37 Pɛ nuꞌa rá ngøcꞌyɛi ra Jesús, bi xox Oją a, him bi ꞌya a. 38 Ma cu ahʉ, dín nde ahʉ gui pąhmbʉ, nangue ra Jesús i jajʉ ra punbi nangue ma tsꞌoquihʉ, nɛ gueꞌa dí xi ahʉ a ya. 39 Høntꞌa go toꞌo gahʉ ga däp ma mbʉihʉ a ra Jesús, din jajʉ ra punbi gätho ma tsꞌoquihʉ. Nɛ madagueꞌa dí øthʉ yʉ́n tꞌɛ̨di ra Moisés bi xi Oją, pɛ hinga gueꞌʉ dí punga ma tsꞌoquihʉ ʉ. 40 Dami ꞌyɛ̨cꞌyɛihʉ ra Cristo ya, janangueꞌa hin gui nuhʉ ꞌbɛꞌa bi man yʉ pøngahyą bʉ ja rám Hman Oją, nuꞌbʉ mí ma:
41 Damin ꞌyomfɛ̨nihʉ tsꞌʉ a gnán thennate thohʉ,
nguetho dí øtꞌä nꞌda ra ꞌbɛfi nuįxte yʉ pa jabʉya guí ꞌbʉhmbʉ.
Pɛ nuꞌbʉ hin gui ꞌyɛ̨cꞌyɛihʉ ꞌbʉ ꞌboꞌo i xi ahʉ, gui hyonya thohohʉ ꞌbʉ bi mba ma ʉnꞌni ahʉ, nɛ gui tuhʉ bʉya.
Gueꞌa mí man yʉ pøngahyą ꞌbʉ mí ꞌyɛ̨n Oją, bi ꞌyɛ̨nꞌa ra Pablo.
42 Nɛ nuꞌbʉ mí bøm bʉ ja ra niją ra Pablo nɛꞌa mín ꞌyoui, nɛ nuꞌʉ ꞌda gue madim pɛti bʉ bi ꞌyäp ra mate gue da xih mahønꞌa ꞌbʉ ni yoto ʉ, tengu xí xih ya. 43 Nɛ nuꞌbʉ mí guaꞌa ram pɛti bʉ ja ra niją, xʉn ngu yʉ́ mijudíohʉ nɛꞌʉ i ɛ̨cꞌyɛi tengu yʉ judío, bi dɛnꞌna ra Pablo nɛ ra Bernabé. Nu ra Pablo nɛ ra Bernabé bi xifi ngue di thoqui da ꞌyɛ̨cꞌyɛi ra Jesús, gue dí ꞌdajʉ rá mate Oją a.
44 Janangueꞌa nuꞌbʉ mí zønꞌa hyąto pa bʉya, ngue ra pa ran säya, mbɛ gätho na ngu yʉ jąꞌi ꞌbʉpʉ ja ra hnini bim pɛti bʉ, ngue da ꞌyøh rám Hman Oją mahønꞌa. 45 Pɛ nuꞌbʉ mi nuꞌʉ yʉ judío ngue ní mba bʉ ja yʉ́ niją gätho yʉ jąꞌi, nɛ bin sɛya ʉ bʉya. Nɛ bin junthʉ ra Pablo nɛ mí ɛ̨nꞌʉ him majuąni a bi ma, nɛ bi cꞌąmanꞌʉ a. 46 Nu ra Pablo nɛ ra Bernabé bi hyutꞌran zambʉi nɛ ntsꞌɛdi bi ma:
―Bi zän Oją mꞌbɛtꞌo thoho bi sijʉ rám Hman Oją dyʉ judíohʉ, nɛ hin gá hyąmhbʉ. Janangueꞌa hin nin sähʉ gui hyąmhbʉ ra temaząi. Pɛ ga mbähmbe ga xihmbe yʉ jąꞌi hing yʉ judío ya. 47 Nguetho ra Hmu mahɛ̨tsꞌi bi mbɛncähe nɛ mi ma:
Ya dá pɛnhꞌnahʉ gui xihmbʉ yʉ jąꞌi hing yʉ judío, din ja ran nɛqui yʉ́ mbʉi.
Nɛ gätho ra ximhäi gui mamhbʉ hague dán zä ga yąnba yʉ́ te yʉ jąꞌi,
nɛ gueꞌa bi xije ra Hmu a, bi ꞌyɛ̨nꞌa ra Pablo.
48 Nɛ nuꞌbʉ mí ꞌyøh yʉ jąꞌi ngue hing yʉ judío ꞌbɛꞌa bi man ra Pablo, bin johya yʉ́ mbʉi, nɛ bi ꞌyɛ̨na:
―Xʉn ho rám Hman Oją, bi ꞌyɛ̨nꞌʉ.
Nɛ bi ꞌyɛ̨cꞌyɛi toꞌo gätho mán thahni gue din tꞌunꞌna ra temaząi. 49 Nɛ nu rám Hman Oją, ya gätho bʉ ja ra häi Pisidia bi hma. 50 Pɛ nuꞌʉ ꞌda yʉ judío bi parpa ʉ ꞌda yʉ xisu, gueꞌʉ ꞌda mí søm bʉ ja yʉ́ niją nɛ mí pa ntꞌɛ̨spi bʉ ja ra hnini, nɛꞌʉ miꞌda yʉn ꞌyohʉ gue yʉ ngʉrpi bʉ ja ra hnini. Nɛ nuꞌʉ bi ʉcpa ra Pablo nɛ ra Bernabé bʉya, nɛ bi xifi da bøm bʉ ja yʉ́ häi. 51 Janangueꞌa nu ra Pablo nɛ ra Bernabé bi huąc yʉ́ gua yʉ fonthäi, ngue nꞌda ra hmɛpya nde da ma, da nu rán thɛui a bi ꞌyøtꞌʉ. Nɛ bi mba bʉ ja ra hnini Iconio bʉya. 52 Pɛ nu yʉ ꞌyɛ̨cꞌyɛi bʉ Pisidia ɛ̨mmɛ bin johya, nɛ bi hyą ra tsꞌɛdi xʉn ho nangue rá Hogandąhi Oją.