Bi tho ra Jacobo nɛ bi mba mfɛntꞌi ra Pedro
12
Nuꞌʉ yʉ pa ʉ, nu ra tsꞌʉtꞌabi Herodes bi manda da mba mfɛntꞌi yʉ ꞌyɛ̨cꞌyɛi, bi dʉꞌmi di ʉnba ʉ. 2 Nɛ bi manda ngue bi tho ra Jacobo rán ꞌyohʉ ra Xuua, ra juai í tho a. 3 Nuꞌbʉ mi bąh ra Herodes gue i numanho yʉ judío hing yʉ ꞌyɛ̨cꞌyɛi gue bi hyo ra Jacobo, bi bɛntꞌa ra Pedro, nɛ bin thɛui nꞌda ra dąmpɛti mí sänba Oją ʉ yʉ israel, tꞌɛ̨mbi dąbaxjua. 4 Janangueꞌa him ꞌbex bi tho ra Pedro, pɛ bi jotꞌa fädi. Nɛ bi manda ꞌdɛꞌma ꞌdato yʉ́ dofʉi ra Herodes di jamansu ra goxthi, ꞌdaꞌi goho nꞌda cʉtꞌi. Mím bɛ̨nꞌa ra Herodes xtán zixpʉ ꞌbʉh yʉ jąꞌi, mí ɛ̨na xtá hyo bʉ ꞌbʉ mí guaꞌa ram pɛti ran dąbaxjua. 5 Nu ra Pedro guextaꞌa mí pa mꞌbädi xʉn ho bʉ ja ra fädi, pɛ nu yʉ́ mi ꞌyɛ̨cꞌyɛihʉ bim pɛti, nɛ ɛ̨mmɛ bin yąhʉ Oją nangue ra Pedro.Oją bi gʉcꞌa ra Pedro nuꞌbʉ mí ofädi
6 Nu ra xui a gue mi ɛ̨nꞌa ra Herodes xtán gʉc ꞌbʉ mí hyatsꞌi, nu ra Pedro mi cätꞌinde yoho yʉ dofʉi, nɛ nuꞌa, nthuꞌtꞌi yoho yʉ cadena, nɛ bin ąha. Nɛ xø mí ꞌbäpʉ miꞌda yʉ dofʉi bʉ ja rá goxthi ra fädi. 7 Nꞌdahmantho bi zøpʉ ꞌbʉh ra Pedro nꞌda rám ꞌbɛhni ra Hmu mahɛ̨tsꞌi. Nɛ bi nɛcpʉ mbo ra fädi. Nu ram ꞌbɛhni bi ꞌyąnba rá hyo ra Pedro, bi ꞌyäꞌa, nɛ bi ꞌyɛ̨mbi:
―Ndantsꞌa nꞌdihi, bi ꞌyɛ̨mbi.
―Dami tʉꞌtꞌ ni ngʉꞌtꞌi nɛ gui ꞌyʉꞌtꞌ ni thįxfani.
Nu ra Pedro bi ꞌyøtꞌe tengu bi siꞌa. Nɛ xø bi ꞌyɛ̨mbi:
―Hye ni dąpahni nɛ gui tɛngui.
9 Nu ra Pedro bi dɛnꞌna ram ꞌbɛhni, bi bøm bʉya. Pɛ him mí pą ꞌbʉ majuąni gueꞌa rám ꞌbɛhni Oją bi zitsꞌi, uague tenguꞌbʉ bi ꞌuįtho. 10 Nɛ nuꞌbʉ mi thopʉ bí ꞌbäh rá mbʉdi yʉ mbädi, nɛ bi thopʉ ná yoho ꞌbäh yʉ mbädi, bi zøm bʉ bí ja ra jutꞌitꞌɛgui bʉ ja ra ꞌyu ní mba bʉ hnini. Bi xosɛ ra jutꞌi nɛ bi bøm bʉya. Nɛ nuꞌbʉ min ꞌyo bʉ ꞌyu, bi ꞌueꞌa rám ꞌbɛhni Oją, bi tsꞌoꞌa ra Pedro bʉya. 11 Nuꞌa ra Pedro, nuꞌbʉ mi bądi ꞌbɛꞌa gätho bin ja, ngue majuąni nɛ hing ra tꞌį, bi ꞌyɛ̨nsɛ:
―Dí pąsɛgä ya gue ra Hmu mahɛ̨tsꞌi bá pɛhna nꞌda rám ꞌbɛhni, nɛ bá jʉgä bʉ ja rá tsꞌɛdi ra tsꞌʉtꞌabi Herodes, nɛ bi yąngä nangue ꞌbɛꞌa nde xtá ꞌyørcä ma mijudíohe, biꞌ yɛ̨nsɛ ra Pedro.
12 Nɛ nuꞌbʉ mín ꞌyomfɛ̨ni tsꞌʉ, bi mba bʉ ja rá ngu ra María, rá mbe ra Xuua Marcos, nɛ xʉn ngu madím pɛti bʉ, i yąhʉ Oją nangue ra Pedro. 13 Nɛ nuꞌbʉ madí jät ra jutꞌi bʉ thi ja ra mbäꞌtꞌi, bi mba bʉ nꞌda ra hmute, ra ꞌyɛ̨hɛ, í Rode, gue da bądi toꞌo i ꞌbäpʉ. 14 Nɛ nuꞌbʉ mí ꞌyørpa rá nde ra Pedro, bi bądi toꞌo, nɛ ɛ̨mmɛ madí johya. Pɛ him ꞌbex bi xocuabi nguetho in nde mꞌbɛtꞌo bi xiꞌa nꞌdihi yʉ jąꞌi ꞌbʉpʉ, gue ꞌbäpʉ ra Pedro bʉ ja ra goxthi. 15 Nu yʉ jąꞌi bi ꞌyɛ̨mbi:
―Guí häte.
Pɛ nuꞌa ra hmute guextaꞌa mi ma gue gueꞌa ra Pedro. Nɛ nuꞌʉ bi ma:
―Gueꞌa rán dąhi a.
16 Pɛ nu ra Pedro bi thoc thoho di jät ra jutꞌi, nɛ nuꞌbʉ mi xocpi nɛ bi nu gue gueꞌa ra Pedro, bi hyonya thoho ʉ. 17 Pɛ nuꞌa ra Pedro bi uąnba rá ꞌyɛ, ndepe din hɛ̨. Nɛ bi xifi ha án zä bi gʉcpʉ ja ra fädi ra Hmu. Nɛ bi ꞌyɛ̨mpꞌʉ yʉ jąꞌi:
―Dami xihmbʉ a manꞌda ra Jacobo, gue ra Santiago a, nɛꞌʉ miꞌda yʉ ꞌyɛ̨cꞌyɛi ꞌbɛꞌa bin ja, bi ꞌyɛ̨na.
Nɛ bi bønꞌa ra Pedro bi mba nꞌdanni.
18 Nuꞌbʉ mi hyatsꞌi, ɛ̨mmɛ bin ja ran cui, gueꞌda xnin ꞌyänthoho yʉ dofʉi, nguetho him bi bądi ꞌbɛꞌa bin ja ra Pedro. 19 Nɛ nu ra Herodes bi manda dí honi pɛ him bá thįni. Nɛ nubʉya bi ꞌyänꞌdʉ yʉ mbängoxthi hague bin ja, nɛ bi manda ngue da thoꞌʉ bʉya. Mꞌbɛjua bi bønꞌa ra Herodes ra häi Judea, bi mba bʉ ja ra hnini Cesarea, nɛ bám ꞌbʉpʉ.
Bi du a ra Herodes
20 Nɛ nu ra Herodes ɛ̨mmɛ mí numanꞌʉ yʉ jąꞌi ꞌbʉpʉ ra hnini Tiro nɛpʉ Sidón. Pɛ nu yʉ jąꞌi bim pɛti, pɛ mꞌbɛtꞌo bin amigohʉ ra Blasto, rám fätsꞌiui ra tsꞌʉtꞌabi Herodes. Nɛ bi sih ra Blasto din hocpahʉ a ra Herodes, nguetho jatho dí nɛxpʉ ꞌbɛꞌa da zi yʉ jąꞌi bʉ bí ja rá häi ra Herodes. 21 Janangueꞌa bi zän manꞌda ra pa bʉya, nu yʉ jąꞌi bim pɛti. Nu ra Herodes bi hye rá pahni ɛ̨mmɛ xʉn ho, nɛ bi hyupʉ ja rá mɛxa, nɛ bin høtꞌahyą. 22 Nɛ ɛ̨mmɛ bi mbahni yʉ jąꞌi nɛ bi ꞌyɛ̨nꞌʉ:
―Hing rá nde nꞌda ran ꞌyohʉ bʉ na yą nʉ, pɛgue rá nde nꞌda ra oją, sä ɛ̨nꞌʉ.
23 ꞌDahmantho nꞌda rám ꞌbɛhni Oją mahɛ̨tsꞌi bi japi ꞌbex bin zämanꞌʉ ra Herodes, nguetho him bi ma ngue hinga gueꞌa Oją a, him bi ꞌyɛ̨spa Oją. ꞌBex bi nɛqui yʉ zuꞌuɛ̨ mbo rá foho, bi du bʉya.
24 Pɛ nu rám Hman Oją bi thoqui bi hma, gätho bʉ nꞌdanni bi ꞌyøh rám Hman Oją yʉ jąꞌi.
25 Nu ra Bernabé nɛ ra Saulo, nuꞌbʉ mi guah yʉ́ ꞌbɛfi, gue bi sifi da hyąx ra mbɛti bʉ Jerusalén, bá peng bʉya, bán ꞌyohʉ ra Xuua Marcos, bi zøpʉ Antioquía mahønꞌa.