Nu ra Pedro i xih yʉ ꞌyɛ̨cꞌyɛi bʉ Jerusalén hague án zä bi ꞌyɛ̨cꞌyɛi ʉ hing yʉ judío
11
Nɛ nuꞌʉ miꞌda yʉ́ ꞌbäihʉ ra Cristo nɛ yʉ ꞌyɛ̨cꞌyɛi bʉ ra häi Judea mí øde gue yʉ jąꞌi hing yʉ judío bi hyąn rám hman Oją. 2 Pɛ nuꞌbʉ mí mbeng bʉ Judea ra Pedro, nɛ bi zøm bʉ Jerusalén, nuꞌʉ ꞌda yʉ judío yʉ ꞌyɛ̨cꞌyɛi bʉ, bi zʉꞌa ra Pedro. 3 Nuꞌʉ bi xiꞌa ra Pedro, bi ꞌyɛ̨mbi:―Hanja gá mba bʉ yʉ́ ngu yʉ jąꞌi ngue hing yʉ judío, nɛ gán sihmɛhʉ ʉ.
4 Nu ra Pedro bʉya bi xifi ꞌbɛꞌa gätho xín ja, gueꞌbʉ mí dʉꞌmi bi xi Oją gue da zøm bʉ rá ngu ra Cornelio. Bi ꞌyɛ̨na:
5 ―Mí ꞌbʉcä bʉ ra hnini Jope, nɛ mí yągäꞌbe Oją. Dá nugä tenguꞌbʉ dá ꞌuį, bá cąh mahɛ̨tsꞌi tengu nꞌda ra theꞌbøꞌtꞌe. Nɛ bá cąi mfɛntꞌi goho yʉ́ tsꞌątꞌi, nɛ bi zøpʉ dí ꞌbʉi. 6 Nuꞌbʉ má handi dá nu høntꞌa go ꞌbɛꞌa má zuꞌuɛ̨ ꞌbʉcua ja ra häi. Dá nuꞌʉ ja goho yʉ́ gua, yʉ zuꞌuɛ̨ nɛ yʉ zate nɛ miꞌda. Nɛ dá nu yʉ pozʉ nɛ yʉ doja. 7 Nɛ dá øꞌa nꞌda ra nde bi xiqui: “Pedro, dami ndantsꞌi gui hyo gue gui sa,” bi ꞌyɛ̨ngui. 8 “Hinꞌna ma Hmu,” dá ɛ̨mbi, “nguetho njąmꞌbʉ dá sagä a man nin tꞌɛ̨di ngue hin ga sahe.” 9 Pɛ nu ra nde mahɛ̨tsꞌi bi xiqui mahønꞌa: “Pɛ ꞌyo guí ɛ̨na hingui ho ꞌbɛꞌa dí sändä da tsꞌa, ngue gätho dá hocä yʉ,” bi ꞌyɛ̨ngä a ra nde. 10 Nhyundį bi ꞌyøtꞌe njabʉ, bi mba ra ꞌbøꞌtꞌe bʉ mahɛ̨tsꞌi bʉya. 11 Nɛ ꞌbexque gueꞌa ra pa bi zøpʉ hyu yʉn ꞌyohʉ bʉ ja ra goxthi guepʉ dám ꞌbʉcä, gue yʉm ꞌbɛhni bá nɛxpʉ Cesarea, nɛ bi hyongui. 12 Nɛ nuꞌa rá Hogandąhi Oją bi xiqui ga tɛnni, nɛ nte mán tꞌänni ga änni. Nɛ ꞌbäcua ya ꞌdato yʉ ꞌyɛ̨cꞌyɛi ngue dá mbähmbe. Nɛ dá cʉthe bʉ ja rá ngu nꞌda ran ꞌyohʉ í Cornelio. 13 Nɛ nuꞌa bi xije gue bi nu nꞌda rám ꞌbɛhni Oją mahɛ̨tsꞌi mí ꞌbäpʉ ja rá ngu, gue bi xifi da mbɛnpʉ ja ra hnini Jope ꞌda yʉn ꞌyohʉ, da ꞌyänni nanguecä. 14 Nɛ bi xifi gue ga xifi hague dán zä dim pøhø, nɛꞌʉ ꞌbʉpʉ rá ngu. 15 Nɛ nuꞌbʉ mí juaꞌa bi xic ra Cornelio, dá dʉꞌmi dá zocä bʉya. Nɛ nuꞌbʉ má dʉꞌmi dá mangä, nu rá Hogandąhi Oją bá ɛ̨hɛ nɛ bi gohmbʉ ʉ mí ꞌbʉpʉ bʉya, tengutho bi ꞌyørcahʉ rá mbʉdi thoho. 16 Nɛ nubʉya dá bɛ̨ngä rám hma ra Hmu Jesús nuꞌbʉ mim ma: “Nu ra Xuua bi xixyą ahʉ ra dehe, pɛ nugä ga ꞌda ahʉ rá Hogandąhi Oją,” bi ꞌyɛ̨ngähe ra Jesús, bi ꞌyɛ̨nꞌa ra Pedro.
17 Nɛ xø bi ꞌyɛ̨na:
―Nuꞌbʉ nꞌdatꞌa ran tꞌunni bi un Oją ʉ, tengutho bi ꞌdajʉ ꞌbʉ ya xtá ɛ̨cꞌyɛihʉ ra Hmu Jesucristo, ha da zä ga sɛrpä a in nde da ꞌyøtꞌ Oją, bi ꞌyɛ̨nꞌa ra Pedro.
18 Nuꞌbʉ mí ꞌyøꞌʉ yʉ ꞌyɛ̨cꞌyɛi ꞌbʉpʉ Jerusalén ꞌbɛꞌa bi man ra Pedro, him mam bi zʉi pɛ bi ꞌyɛ̨spa Oją, nɛ bi ꞌyɛ̨nꞌʉ:
―A, njabʉ øt Oją ꞌbʉ, gue nɛꞌʉ yʉ jąꞌi hing yʉ judío di japi di päh yʉ́n ꞌyomfɛ̨ni nangue yʉ́ tsꞌoqui, ngue nɛꞌʉ din ja ra temaząi ʉ, bi ꞌyɛ̨nꞌʉ.
Nu yʉ ꞌyɛ̨cꞌyɛi dim pɛti bʉ Antioquía
19 Nuꞌʉ ꞌda yʉ ꞌyɛ̨cꞌyɛi ngue bi nu ran ʉnbi bʉ Jerusalén ꞌbʉ mí mba ntho ra Esteban, bin ꞌuɛ̨xtꞌʉ. Nuꞌʉ ꞌda bi mba bʉ nꞌdanni yʉ häi Fenicia nɛpʉ Chipre nɛpʉ ja ra hnini Antioquía. Bi man rán ho maꞌdaꞌyo ra Cristo bʉ bim ꞌbʉi, pɛ høntꞌʉ yʉ́ mijudíohʉ bi xifi. 20 Pɛ nuꞌbʉ mí zøm bʉ Antioquía ꞌda yʉ mɛngu bʉ Chipre nɛpʉ Cirene, bi zoꞌʉ hing yʉ judío, gue nɛꞌʉ bi xifi nangue ra Hmu Jesús. 21 Nuꞌʉ mí ja ra tsꞌɛdi xʉn ho nangue Oją ʉ, janangueꞌa xʉn ngu yʉ jąꞌi hing yʉ judío bi ꞌyɛ̨cꞌyɛi, bi hyɛsɛ yʉ́ tꞌɛ̨cꞌyɛi, nɛ bi dɛnꞌna ra Hmu.
22 Nɛ bi ꞌyøꞌʉ yʉ ꞌyɛ̨cꞌyɛi ꞌbʉpʉ Jerusalén gue bi ꞌyɛ̨cꞌyɛi ʉ ꞌda hing yʉ judío bʉ Antioquía. Janangueꞌa bi mbɛnpʉ a ra Bernabé. 23 Nɛ nuꞌbʉ mí zøm bʉ, bi nu ngue i nu rá mate Oją yʉ jąꞌi i ꞌbʉpʉ. Bin johya rá mbʉi ra Bernabé bʉya, nɛ bi zofo,bi xifi hin da hyɛgui, pɛ din ꞌyomanho bʉ ja rá ꞌyu Oją, nɛ da ꞌyørpa rá ꞌbɛfi Oją ngue gätho yʉ́ mbʉi. 24 Nuna ra Bernabé nꞌda ra hocjąꞌi na, nɛ mí hą rá tsꞌɛdi xʉn ho rá mbʉi nangue rá Hogandąhi Oją in ꞌyoui, nɛ mí ɛ̨cꞌyɛi xʉn ho. Janangueꞌa xʉn ngu miꞌda yʉ jąꞌi bi ꞌyɛ̨cꞌyɛi ra Hmu.
25 Nubʉya, bá pøm bʉ ra Bernabé, bi mba bʉ Tarso bi hyom bʉ ra Saulo. Nɛ nuꞌbʉ mi dįni, bi zixpʉ Antioquía. 26 Nɛ nꞌdajɛya bám ꞌbʉhmi bʉ, nɛ mi pa bʉ ja ram pɛti nɛ bi xänbi xʉn ngu yʉ jąꞌi. Guepʉ ra mbʉdi bi tꞌɛ̨mbi yʉ cristiano ʉ yʉ ꞌyɛ̨cꞌyɛi, gue mí nde da ma, i tɛn ra Cristo ʉ.
27 Nuꞌʉ yʉ pa ʉ, bá nɛxpʉ Jerusalén ꞌda yʉ pøngahyą, bi mba bʉ Antioquía. 28 Nuꞌa nꞌda í Agabo, bi ndantsꞌi bim ꞌbäpʉ madím pɛti yʉ ꞌyɛ̨cꞌyɛi, nɛ bi ma con rá tsꞌɛdi rá Hogandąhi Oją. Bi ma gue din ja ra thuhu gätho ra ximhäi. Nɛ nuna bin ja ꞌbʉ mim hmutsꞌʉtꞌabi bʉ Roma a ra Claudio. 29 Nɛ nuꞌbʉ mín ja ra thuhu, nuꞌʉ yʉ ꞌyɛ̨cꞌyɛi bʉ Antioquía bi zänni hangu na ngu tsꞌʉ ra mbɛti da bądi nꞌda ngu nꞌda, gue da ꞌbɛnpa ʉ yʉ́ mi ꞌyɛ̨cꞌyɛihʉ ꞌbʉpʉ ra häi Judea, ngue da mbäxꞌi tsꞌʉ. 30 Nɛ ngubʉ bi ꞌyøtꞌe, bi mbɛnpa ra mbɛti ʉ yʉ́ ngʉrpi yʉ ꞌyɛ̨cꞌyɛi bʉ Judea, bi hyąxꞌa ra Bernabé nɛ ra Saulo.