Ra Pedro nɛ ra hmudofʉi Cornelio
10
Mí ꞌbʉpʉ nꞌda ran ꞌyohʉ í Cornelio, nubʉ ra hnini Cesarea. Gue nuna ran ꞌyohʉ im hmu nangueꞌʉ nꞌda muntsꞌi yʉ dofʉi gueꞌa ní tꞌɛ̨mbi Italiano ʉ. 2 Nuna ra Cornelio madagueꞌbʉ hing ra judío a, pɛ nuꞌa nɛ gätho ꞌbʉpʉ rá ngu mi thąnde Oją nɛ mí numansu a. Nząi mi un yʉn tꞌunni yʉ hyoya nɛ nząi min yąhʉ Oją. 3 Nꞌda ra pa mbɛ hyunde, tenguꞌbʉ bi ꞌuį ꞌbʉ mí nu nꞌda rám ꞌbɛhni Oją mahɛ̨tsꞌi, bi yʉrpʉ ja ra cuarto mí ꞌbäi, bi zofo:―Cornelio, bi ꞌyɛ̨mbi.
4 Nɛ nuꞌbʉ mí hyandi, bin su nɛ bi dądi:
―ꞌBɛꞌa ma Hmu.
Nu ram ꞌbɛhni bi ꞌyɛ̨mbi:
―Nuꞌa Oją im bɛ̨nꞌi, nɛ i øꞌbʉ guí yąui, nɛ in nu Oją ꞌbʉ gdí un yʉn tꞌunni yʉ hyoya. 5 Nuya, gui pɛhnꞌdʉ ꞌda yʉn ꞌyohʉ bʉ Jope da dįm bʉ nꞌda gue ra Simón, nɛ guetꞌa ra Pedro a, nɛ gua pɛnhua. 6 Nuꞌa ra Pedro i ꞌbʉhmbʉ nꞌda ran ꞌyohʉ í Simón gue ra hoca xindąni a, nɛ i ꞌbʉpʉ ndendeją. Nuꞌa da xiꞌaꞌi ꞌbɛꞌa gui ꞌyøtꞌe, bi ꞌyɛ̨nꞌa rám ꞌbɛhni Oją.
7 Nuꞌbʉ mí guaꞌa im ma, ꞌbex bi mbeng mahɛ̨tsꞌi ram ꞌbɛhni. Nu ra Cornelio bʉya bi zohni yoho yʉ́ ꞌyɛ̨hɛ nɛ nꞌda ra dofʉi ngue i numansu Oją, ngue rá ꞌyɛ̨hɛ a. 8 Nɛ nuꞌbʉ mi xifi gätho ꞌbɛꞌa bi xih rám ꞌbɛhni Oją mahɛ̨tsꞌi, bi mbɛnpʉ Jope ʉ bʉya.
9 Manꞌda pa bʉya mbɛ huxyadi nuꞌbʉ bá ɛ̨pʉ ꞌyu yʉ́m ꞌbɛhni ra Cornelio, häntho Jope, nu ra Pedro bi ndexpʉ thi bʉ ja ra zɛꞌtsꞌangu bʉ mí ꞌbʉi, guepʉ din yąui Oją. 10 Nuꞌa ra Pedro ɛ̨mmɛ bin tumanthuhu, nɛ gätho ní mba mahoqui ran tsꞌihmɛ, nu ra Pedro bʉya bi nu nꞌda ran tꞌuti, tenguꞌbʉ bi ꞌuį. 11 Nɛ bi nu nsoqui mahɛ̨tsꞌi, nɛ bá cąi tengu nꞌda ra theꞌbøꞌtꞌe xʉn ndoho gue mfɛntꞌi yʉ́ tsꞌątꞌi. 12 Nɛ ba ꞌyo bʉ ja ra ꞌbøꞌtꞌe høntꞌa go ꞌbɛꞌa má zuꞌuɛ̨ i ja goho yʉ́ gua, nɛ yʉ zate, nɛ yʉ pozʉ, nɛ yʉ doja. 13 Nu ra Pedro bi ꞌyøꞌa nꞌda ra nde, bi tꞌɛ̨mbi:
―Dami ndantsꞌi gui hyo gue gui sa.
14 Bi dąꞌa ra Pedro:
―Hinꞌna ma Hmu, nguetho njąmꞌbʉ xtá sagä xʉn tsꞌo, gueꞌa i man nin tꞌɛ̨di hingui ho ꞌbʉ ga sa.
15 Nɛ bi ꞌyɛ̨mbi mahønꞌa:
―ꞌYo guí ɛ̨na hingui ho ꞌbɛꞌa dá sändä da tsꞌa, ngue gätho dí hocä ʉ, bi ꞌyɛ̨mpꞌa ra nde.
16 Ná hyundį bi sifi, bi ndex mahønꞌa mahɛ̨tsꞌi ra ꞌbøꞌtꞌe. 17 Nu ra Pedro, nuꞌbʉ gätho madí hyonya thoho nɛ im bɛ̨ni ꞌbɛꞌa ní mbaꞌa xí nu tengu ra tꞌį, ꞌbex bi zøh yʉ́m ꞌbɛhni ra Cornelio. Nɛ mí ꞌbäpʉ thi ja ra goxthi rá ngu ra Simón, nɛ xí ꞌyänni hapʉ jaꞌa ra ngu. 18 Nuꞌbʉ mí zøm bʉ, bi ꞌyänni:
―Ha ꞌbʉcua ra Simón Pedro.
19 Nɛ gätho nín ꞌyomfɛ̨ni ra Pedro ꞌbɛꞌa ní mba a xí nu, nuꞌa rá Hogandąhi Oją bi ꞌyɛ̨mbi:
―ꞌBʉpʉ hyu yʉn ꞌyohʉ i honꞌi. 20 Dami ndantsꞌi, gui cąi nɛ gui mbähä ʉ yʉn ꞌyohʉ, gui tɛnni nɛ hin gan su, nguetho nugä bá pɛnhdä ʉ, bi ꞌyɛ̨mbi.
21 Nu ra Pedro bʉya bi gąpʉ mi ꞌbäh yʉn ꞌyohʉ gue bá pɛnh ra Cornelio, nɛ bi xifi:
―Nugä guecä guí hongui. ꞌBɛꞌa gní hyonjʉ.
22 Bi dąꞌʉ:
―Nu ra Cornelio ra ngʉrpa dofʉi bá pɛncähe. Nu ra Cornelio nꞌda ra hocjąꞌi gue i numansu Oją. Nɛ gätho yʉ judío i ndømanho nangueꞌa. Nɛ nꞌda ram ꞌbɛhni mahɛ̨tsꞌi bi xiꞌa da zonhꞌnaꞌi, gue gui mba bʉ rá ngu, nɛ da tꞌømanho ꞌbɛꞌa gätho gui xifi, bi ꞌyɛ̨nꞌʉ.
23 Nu ra Pedro bi xifi da yʉrpʉ mbo ra ngu, bin oxpʉ bʉya. Nuꞌbʉ mi hyatsꞌi bi mbähä ra Pedro. Nɛꞌʉ ꞌda yʉ ꞌyɛ̨cꞌyɛi mí ꞌbʉpʉ Jope bi mbähä.
24 Manꞌda pa bʉya bi zøm bʉ ra hnini Cesarea. Nu ra Cornelio xí zohni gätho ꞌbʉpʉ ja rá ngu nɛ yʉ́ amigo, ngue dim pɛti bʉ ja rá ngu. Gätho i tømꞌbʉ. 25 Nuꞌbʉ mí zøm bʉ ja ra goxthi ra Pedro, bá pøn ra Cornelio, bi dądi nɛ bin dąnyahmu bi dąnde. 26 Pɛ nu ra Pedro bi gʉꞌtsꞌi nɛ bi ꞌyɛ̨mbi:
―Dami ndantsꞌi nguetho nugä dran ꞌyohʉ thohogä tengutho i, bi ꞌyɛ̨na.
27 Nɛ i yąui gätho án yʉtꞌa mbo rá ngu. Nɛ bi nu xʉn ngu xím pɛti bʉ. 28 Nu ra Pedro bi ꞌyɛ̨mpꞌʉ bʉya:
―Guí pąhmbʉ hin ꞌyʉ man tꞌɛ̨dihe dyʉ judíohe gue dan uąnsꞌhʉ o gue ga cʉthe bʉ ja ni ngumhbʉ, nguetho hin gyʉ judío ahʉ. Pɛ Oją xʉ ꞌyurcagui gue xínga nꞌda yʉ jąꞌi ga ɛ̨mhbe hin da zä dan yąmanhohe, ogue ga ɛ̨mfe hingui ho. 29 Janangueꞌa nuꞌbʉ gmí zoncagui, bá ɛ̨cä nɛ nte mán tꞌänni dá änni. Nuya dín nde ga pądi hanja gá zoncagui, bi ꞌyɛ̨nꞌa.
30 Nu ra Cornelio bi ꞌyɛ̨m bʉya:
―Ná goho pa tengu ra ora jabʉya, dá ɛꞌtꞌ man tsꞌihmɛ ꞌbʉ mán yągäꞌbe Oją, ꞌbex bi zøꞌa nꞌda ran ꞌyohʉ ua dí ꞌbʉi, mí he ra pahni di fɛxni. 31 Nɛ bi ꞌyɛ̨ngui: “Cornelio, Oją bi ꞌyøde ꞌbɛꞌa gám ma nɛ bi nu yʉn tꞌunni gá un yʉ hyoya, nɛ im bɛ̨nꞌaꞌi. 32 Nuya guin zohna ra Simón Pedro ꞌbʉpʉ Jope bʉ ja rá ngu ra Simón ra hoca xindąni a, nɛ i ja rá ngu bʉ ndendeją. Nɛ nuꞌbʉ da zøcua gan yąui,” ɛ̨nꞌa ram ꞌbɛhni mahɛ̨tsꞌi ꞌbʉ min zoqui. 33 Jananjabʉ dá zonhꞌna ꞌi nɛ xʉn ho guá ɛ̨hɛ. Nuya gäthogähe dí ꞌbʉhmbe ua ngue da nuje Oją, ga øhmbe ꞌbɛꞌa gätho da xije Oją, gue gui xije, ɛ̨nꞌa ra Cornelio.
Bi sih ran ho maꞌdaꞌyo a ra Cornelio
34 Nu ra Pedro bi ꞌyɛ̨mpꞌʉ:
―Nugä dí pącä ya hingui huahna Oją toꞌo da numanho gueꞌbʉ ra judío o hing ra judío. 35 Nu Oją da zini høntꞌa go ndaꞌa ní nde i yą, ngue toꞌo gätho da numansuꞌa, nɛ toꞌo i øtꞌ ran ho. 36 Guí pąhmbʉ ram hma bá pɛncähe Oją dyʉ israelgähe, dyʉ judíogähe, bi ma nangue ra Jesucristo, gue nuꞌa di hocpa ní mbʉi nꞌda, guehna rá Hmu ʉ gätho høntꞌa go ꞌbɛꞌa ní nde i yą. 37 Nɛ guí pąhmbʉ ram hma nangue ra Jesucristo bi hmam bʉ gätho ra häi Judea, bí mbʉpʉ Galilea, gueꞌbʉ ya xí juah rá ꞌbɛfi ra Xuua Nxixyą gue bi ma di xixyąba yʉ jąꞌi. 38 Nɛ guí pąhmbʉ Oją bi un rá tsꞌɛdi rá Hogandąhi Oją ra Jesús, ra mɛngu bʉ Nazaret. Nu ra Jesús hønbʉ go hapʉ bin ꞌyo mí øtꞌ ran ho, nɛ gätho ʉ mín ꞌyohʉ ra zįthu bi hyønba thi ra zįthu. Gätho bi ꞌyøtꞌʉ nguetho min ꞌyoui Oją. 39 Nɛ nugähe ma ꞌbäigähe a ra Jesús, dí mamhbe majuąni, nguetho dá nuhe ꞌbɛꞌa gätho bi ꞌyøtꞌ ra Jesús nubʉ ma häihe dyʉ judíohe, nɛpʉ ma ngʉrpa hninihe Jerusalén. Nɛ mꞌbɛjua bi tho, bi guarpʉ ja ra pontꞌi. 40 Pɛ Oją bi xoxꞌa ná hyupa, nɛ bi japi dá nugähe xʉn ho. 41 Pɛ njom miꞌda bi nu, høngdähe gue xí huancähe Oją. Janangue dí mamhbe majuąni, gue ya majuąni dán sihmɛgähe ra Jesús ꞌbʉ mi ndantsꞌ ꞌbʉ mi du. 42 Nɛ nuꞌa bi mbɛncähe gue ga xihmbe yʉ jąꞌi nɛ ga mamhbe, gue gueꞌa bi huahnꞌna Oją da ꞌyørpa ran juąnbi yʉ jąꞌi ꞌbʉi nɛꞌʉ xʉn du. 43 Nɛ guehna mím manꞌʉ gätho yʉ́ pøngahyą Oją, gue gätho toꞌo da ꞌyɛ̨cꞌyɛi nangue ra Jesús, da hyąn ra punbi nangue yʉ́ tsꞌoqui, bi ꞌyɛ̨nꞌa ra Pedro.
Nuꞌʉ hing yʉ judío bin tꞌun rá Hocandąhi Oją
44 Nɛ i yą ra Pedro, ꞌbex bá ɛ̨h rá Hogandąhi Oją, gätho bi gohmbʉ yʉ jąꞌi i øh rám hma ra Pedro. 45 Nɛ nuꞌʉ yʉ judío min ꞌyohʉ ra Pedro madí hyonya thoho ꞌbʉ mí bądi bin tꞌun rá Hogandąhi Oją ʉ hing yʉ judío. 46 Nguetho bi ꞌyøde bin yą ꞌda yʉ nde hing yʉ́ ndesɛ ʉ, gue bi ꞌyɛ̨spa Oją ꞌbʉ mí yą. 47 Nɛ bi ꞌyɛ̨nꞌa ra Pedro, bi ꞌyänni:
―Ha sä da mba ma hɛcpi ya ꞌbʉcua gue hin din xixyą, nɛ ya xʉ hyąn rá Hogandąhi Oją tengugahʉ, bi ꞌyɛ̨na.
48 Nɛ bi ma di xixyąbi nangue rá thuhu ra Jesucristo. Mꞌbɛjua bʉya bi ꞌyäp ra mate ra Pedro da gohmbʉ bʉ miꞌda yʉ pa.