Nuꞌa ra Saulo bi päh rán ꞌyomfɛ̨ni
9
Pɛ nuꞌa ra Saulo mim man yʉn ʉcuate, nɛ ran dąte nangue yʉ ꞌyɛ̨cꞌyɛi, gätho ná ꞌyøtꞌa bi ꞌyøtꞌ ra Felipe. Nɛ bi mba bʉ bí ꞌbʉh ra hmumbäją. 2 Nɛ bi ꞌyäp ra søcuą ngue ran tꞌɛ̨di da mba bʉ ja yʉ́ niją yʉ judío nubʉ ra hnini Damasco. Nɛ nuꞌbʉ ꞌboꞌo da dįm bʉ gue i tɛn ra Cristo, ogue ran ꞌyohʉ ogue ra xisu, da bɛntꞌi nɛ da zixpʉ Jerusalén nthuꞌtꞌi din ofädi bʉ. 3 Nɛ nuꞌbʉ mí mba bʉ ꞌyu, mí tsꞌʉtho da zøm bʉ Damasco, ꞌbex bí ꞌyɛ̨h mahɛ̨tsꞌi nꞌda ra nyotꞌi ɛ̨mmɛ bi hyärpʉ i ꞌbäꞌa ra Saulo. 4 Bi dąng bʉ häi ra Saulo bʉya, nɛ bi ꞌyøꞌa nꞌda ra nde bi ꞌyɛ̨na:―Saulo, Saulo, hanja gní ʉngui.
5 Bi dąꞌa ra Saulo:
―Toꞌo i, gra Hmu.
Nu ra Hmu bi dątꞌa:
―Nugä dra Jesús, guecä gadí ʉngui, nɛ xʉn hɛ̨i guí øtꞌe tengu nꞌda ra mbʉndąni i pa ma sʉni ra tꞌo ndepe dim pɛfi xʉn ho, nɛ i nɛte thoho.
6 Nuꞌa ra Saulo ɛ̨mmɛ bin su nɛ bi fɛtꞌi, bi ꞌyɛ̨na:
―Ma Hmu, ꞌbɛꞌa guín nde ga øtꞌä.
Nu ra Hmu bi ꞌyɛ̨mbi:
―Dami ndantsꞌi gui mba bʉ ja ra hnini, nubʉ, da siꞌi ꞌbɛꞌa gui ꞌyøtꞌe, bi tꞌɛ̨mbi.
7 Nɛ nuꞌʉ gätho mín ꞌyohʉ him mi sä din yą nguetho bin su. Nuꞌʉ mí øh ra nde pɛ him min nu toꞌo min yą. 8 Nuꞌbʉ mi ndantsꞌa ra Saulo bi zøtꞌ rá dä pɛ him mi nu, mi xädä thoho. Nuꞌʉ mín ꞌyohʉ bi bɛntpa rá ꞌyɛ bi zixpʉ Damasco. 9 Nɛ hyupa bám ꞌbʉpʉ, nɛ mi xädä, nɛ him mi sihmɛ, xing ra dehe mi si.
10 Nɛ mi ꞌbʉpʉ Damasco nꞌda ra ꞌyɛ̨cꞌyɛi rá thuhu ra Ananías. Nu ra Hmu mahɛ̨tsꞌi bin ꞌyusɛ bʉ nɛ bi zofo tenguꞌbʉ bin ꞌuį.
―Ananías, bi ꞌyɛ̨mbi.
Nu ra Ananías bi dądi:
―Dí ꞌbʉcä ua gra Hmu.
11 Nu ra Hmu bi ꞌyɛ̨mpꞌa:
―Dami ndantsꞌi gui mba bʉ ja ra ꞌyu tꞌɛ̨mbi xʉn juąni, nɛ gui hyom bʉ nꞌda ran ꞌyohʉ ra Saulo, ra mɛngu Tarso, i ꞌbʉpʉ ja rá ngu ra Judas. Nuya in zocä ya. 12 Nɛꞌa ra Saulo in nu tenguꞌbʉ ra tꞌį ngue guí mba bʉ nɛ guí cäx ni ꞌyɛ, nɛ da nu ran nɛqui mahønꞌa, bi ꞌyɛ̨n Oją.
13 Bi dątꞌa ra Ananías:
―Ma Hmu i, xʉn ngu yʉ jąꞌi bi xiqui ꞌbɛꞌa øtꞌna ra Saulo, xʉn ngu yʉn tsꞌo xʉ ꞌyørpa yʉ ꞌyɛ̨cꞌyɛi ꞌbʉpʉ Jerusalén. 14 Nɛ nuna bá äp rán tꞌɛ̨di yʉ hmumbäją da bɛntꞌi nɛ da gotꞌa fädi gätho toꞌo da ndønꞌna ni thuhu, bi ꞌyɛ̨na.
15 Pɛ nuꞌa ra Hmu bi xiꞌa ra Ananías:
―Ní mbahma nguetho dá huahndä da ma nanguecä bʉ ꞌbʉꞌʉ hing yʉ judío, nɛ yʉ hmutsꞌʉtꞌabi, nɛ yʉ jąꞌi israel ngue yʉ judío. 16 Nɛ ga xifi xʉn ngu yʉn ʉnbi da nu nanguecä, go bi ꞌyɛ̨n Oją.
17 Bi mba ra Ananías bʉya, nɛ nuꞌbʉ mi yʉrpʉ ja ra ngu, bi gäx rá ꞌyɛ rá yą ra Saulo nɛ bi ꞌyɛ̨mbi:
―Ma cuꞌi Saulo, nu ra Hmu Jesús, nuꞌa gue gá nu bʉ ꞌyu ꞌbʉ guá ɛ̨hɛ, bá pɛncä ua ya gue di ja i da xoh ni dä. Nɛ di ja i gui hyą ra tsꞌɛdi xʉn ho nangue rá Hogandąhi Oją gan ꞌyoui, bi ꞌyɛ̨na.
18 Nɛ ꞌbex bi hyøꞌʉ mi comba yʉ́ dä tengu ra xihuą. Nɛ ꞌbex bi hyand ran nɛqui yʉ́ dä ra Saulo, ꞌbex bi ndantsꞌ pʉya nɛ bin xixyą. 19 Nɛ nubʉya, bin sihmɛ nɛ bi zac mahønꞌa rá jąꞌi. Nɛ bám ꞌbʉꞌi tsꞌʉ bʉ bí ꞌbʉꞌi ꞌda yʉ ꞌyɛ̨cꞌyɛi bʉ ra hnini Damasco.
Nuꞌa ra Saulo bi mam bʉ rám Hman Oją bʉ Damasco
20 Nɛ nu ra Saulo bʉya ꞌbex bi dʉꞌmi bá mam bʉ rám Hman Oją bʉ ja yʉ́ niją yʉ judío. Nɛ bi xifi gue nu ra Jesús rá Tsꞌʉntꞌʉ Oją a. 21 Gätho mi øde bi hyonya thoho nɛ bi ꞌyɛ̨na:
―Ha hinga guehna ran ꞌyohʉ na mi cotꞌa fädi gätho mi ndønba rá thuhu ra Jesús bʉ Jerusalén. Nɛ ha him bá ɛ̨cua ngubʉ da ꞌyøtꞌe, nɛ da zitsꞌi nthuꞌtꞌi bʉ ꞌbʉh yʉ hmumbäją, bin ꞌyɛ̨mpꞌʉ.
22 Pɛ nu ra Saulo manꞌda bi hyą ra tsꞌɛdi bi ma xʉn ho. Nɛ nu yʉ judío ꞌbʉpʉ Damasco nte mi sä da ma, nguetho bi xifi, nu ꞌbɛꞌa gätho mán tsꞌänni daꞌyøtꞌa rá Thahni Oją gue ra Cristo, pɛ gueꞌa bi ꞌyøtꞌa ra Jesús, guepʉ bi ꞌyuti nꞌdatꞌa.
Nuꞌa ra Saulo bi ꞌdagui, ɛ̨na xtám bɛnt yʉ judío
23 Nɛ nu ra Saulo ꞌbʉ mím ꞌbʉpʉ nyaꞌa tsꞌʉ yʉ pa, nꞌdatꞌa mí manꞌʉ yʉ judío hing yʉ ꞌyɛ̨cꞌyɛi, ngue da hyo. 24 Pɛ nu ra Saulo mi øde ꞌbɛꞌa mbɛ̨nꞌʉ yʉ judío. Nuꞌʉ mí fäh yʉ́ goxthi bʉ ja ra ndehnini, guepʉ ma mbäꞌtꞌi ra jądo. Ma pa nɛ ra xui mí fäh yʉ goxthi ngue nde da hyo. 25 Pɛ nu yʉ ꞌyɛ̨cꞌyɛi bi zix ra Saulo gue ra xui, í cąꞌma nꞌda ra ꞌbøtsꞌe bʉ thi bʉ ja ra jądo ngue ma føꞌtꞌe ra hnini. Gueꞌa í ꞌdaꞌa.
Ra Saulo ꞌbʉpʉ ja ra hnini Jerusalén
26 Nuꞌbʉ mí zøm bʉ Jerusalén ra Saulo, mim bɛ̨ni gue xtín ꞌyohʉ yʉ ꞌyɛ̨cꞌyɛi. Pɛ nuꞌʉ mín suꞌʉ nɛ him mi ɛ̨cꞌyɛi gue ra ꞌyɛ̨cꞌyɛi ra Saulo. 27 Pɛ nu ra Bernabé bi zixꞌa ra Saulo guepʉ ꞌbʉh yʉ́ ꞌbäihʉ ra Cristo. Nɛ bi xifi ngue bi nu ra Hmu bʉ ꞌyu, nɛ bin yąui ra Hmu. Nɛ bi xifi bi hyutꞌ ran zambʉi bʉ Damasco nuꞌbʉ mím ma nangue ra Jesús. 28 Nu yʉ ꞌyɛ̨cꞌyɛi bi zim bʉya, nɛ bin ꞌyohʉ bʉ Jerusalén. 29 Nɛ nu ra Saulo bi hyutꞌ ran zambʉi bi mampꞌa rám Hman Oją nangue ra Jesús. Pɛ nuꞌʉ ꞌda yʉ́ mijudíohʉ gue i yą ra nde ra griego, madin junthʉ ra Saulo, nɛꞌʉ nde da hyoꞌʉ. 30 Nuꞌbʉ mí ꞌyøh yʉ ꞌyɛ̨cꞌyɛi gue nde da tho ra Saulo, bi zixpʉ Cesarea nɛ bi mbɛnpʉ Tarso.
31 Nuya bin hɛ̨ yʉ́n ʉnbi yʉ ꞌyɛ̨cꞌyɛi gätho ra häi Judea, nɛ ra häi Galilea nɛ ra häi Samaria. Nɛ bin te yʉ́ mbʉi nangue Oją. Bi numansu ra Hmu nɛ bi nu rám fätsꞌi rá Hogandąhi Oją. Nɛ manꞌda xʉn ngu bi ꞌyɛ̨cꞌyɛi.
Bi zäꞌa ra Eneas
32 Nuꞌa ra Pedro mí ꞌyo mi nu ʉ yʉ ꞌyɛ̨cꞌyɛi ꞌbʉpʉ ja yʉ hnini, nɛ bi zøm bʉ ja ra hnini Lida gue da nu yʉ ꞌyɛ̨cꞌyɛi ꞌbʉpʉ. 33 Nɛ bi dįm bʉ nꞌda ran ꞌyohʉ ní hu Eneas, nhyąto njɛya xí ꞌyoi gue xʉn ʉ, xín tꞌɛꞌtsꞌ rá jąꞌi. 34 Nu ra Pedro bi ꞌyɛ̨mpꞌa:
―Eneas, da zäꞌi nangue ra Jesús, dami ndantsꞌi pantsꞌ ni fįdi, bi ꞌyɛ̨mbi.
ꞌBex bi ndantsꞌa ra Eneas bʉya. 35 Nɛ gätho ngue ꞌbʉpʉ Lida nɛpʉ Sarón bi ꞌyɛ̨cꞌyɛi ra Hmu ꞌbʉ mín nuꞌa bin ja, nɛ bi hyɛsɛ yʉ́ tꞌɛ̨cꞌyɛi.
Nuꞌa ra Dorcas bi dąmbɛ̨ni ꞌbʉ mi du
36 Nɛ nuꞌʉ yʉ pa ʉ, mí ꞌbʉpʉ ja ra hnini Jope nꞌda ra xisu gue ra ꞌyɛ̨cꞌyɛi, í Tabita, nɛ í Dorcas ngue rá nde yʉ griego. Nuna ra xisu ɛ̨mmɛ xʉn ngu ran huɛ̨cate mí ørpa yʉ́ mijąꞌihʉ. 37 Pɛ nuya bin zämanꞌʉ, nɛ bi du. Nuꞌbʉ mi ꞌberpa rá jąꞌi, bi jäxpʉ bí ja nꞌda ra tꞌotsꞌi magątsꞌi. 38 Nu ra hnini Lida mí hän bʉ Jope. Nuꞌbʉ mí ꞌyøh yʉ ꞌyɛ̨cꞌyɛi,gue ꞌbʉpʉ Lida ra Pedro, bi mbɛhnꞌdʉ yoho yʉn ꞌyohʉ gue ba ørpa ra tsꞌɛdi ba ɛ̨hɛ. 39 Nu ra Pedro bʉya ꞌbex bán ꞌyohʉ ʉ. Nuꞌbʉ mí zøhø, ꞌbex bi tsꞌixpʉ magątsꞌi ja a ra cuarto guepʉ mí ꞌbäꞌʉ yʉ hyoya xisu mí zoni. Nɛ bi ꞌyut yʉ́ he xí tꞌørpabi, gue bi ꞌyørpa ra Dorcas ꞌbʉ mi ꞌbʉi. 40 Pɛ nu ra Pedro bi xifi:
―Dami pømhbʉ tsꞌʉ nꞌda zʉ ora gätho ahʉ.
Nɛ bin dąnyahmu nɛ bin yąui Oją. Nɛ bi hyantꞌa gue bi du, bi ꞌyɛ̨mbi:
―Tabita dami ndantsꞌi, bi ꞌyɛ̨mbi.
ꞌBex bi zøtꞌ rá dä, nɛ nuꞌbʉ mín nu ra Pedro, bi hyudi. 41 Nu ra Pedro bʉya bi bɛntpa rá ꞌyɛ nɛ bi xotsꞌi, bim ꞌbäi. ꞌBex bi zohnꞌdʉ yʉ ꞌyɛ̨cꞌyɛi nɛ yʉ hyoya xisu bʉya:
―Dami nuhʉ na xí du, nɛ bi dąmbɛ̨ni ya, bi ꞌyɛ̨mpꞌʉ.