Nu ra Saulo bi un ran ʉnbi yʉ ꞌyɛ̨cꞌyɛi
8
1-3 Nɛ nuꞌa ra Saulo ꞌdaꞌangu bi mamhbʉ ʉ bi hyoꞌa ra Esteban. Janangueꞌa nu ra pa ngue bi nu ran ʉnbi ra Esteban, nu yʉ ꞌyɛ̨cꞌyɛi mi ꞌbʉpʉ Jerusalén bi mba ma ʉcpi. Nɛ xʉn ngu ʉ bi mba bʉ miꞌda yʉ hnini bʉ ra häi Judea, nɛpʉ ra häi Samaria, pɛ bi gopʉ ʉ ꞌdɛꞌmayoho yʉ́ ꞌbäihʉ ra Cristo. Nɛ ꞌdaꞌʉ yʉ ꞌyɛ̨cꞌyɛi bi ꞌyäh ra Esteban, nɛ ɛ̨mmɛ bin zoni nangueꞌa. Nu ra Saulo ɛ̨mmɛ madi ʉcpa yʉ ꞌyɛ̨cꞌyɛi, nɛ mi cʉrpʉ ja yʉ ngu mi six yʉn ꞌyohʉ nɛ yʉ xisu, nɛ bi gotꞌa fädi. I hman ran ho maꞌdaꞌyo nubʉ ra häi Samaria
4 Pɛ nuꞌʉ bi ꞌdagui, bi mampꞌa rán ho maꞌdaꞌyo ra Cristo bʉ nꞌdanni ním pa. 5 Nuꞌa ra Felipe bi mba bʉ ja nꞌda ra hnini ra häi Samaria, nɛ bi xih yʉ jąꞌi nangue ra Cristo. 6 Gätho yʉ jąꞌi bi ꞌyømanho ꞌbɛꞌa bi man na ra Felipe ꞌbʉ mi nu yʉn tꞌøtꞌe nuįxte bi ꞌyøtꞌa. 7 Nguetho xʉn ngu yʉ jąꞌi bi hyønba thi yʉ zįthu, nɛ ntsꞌɛdi bi mba ꞌbʉ mí bønꞌʉ. Nɛ nuꞌʉ mí ꞌuɛꞌtsꞌ yʉ́ jąꞌi nɛꞌʉ yʉ dogua gätho bi zä. 8 Janangueꞌa ɛ̨mmɛ bin ja ran johya bʉ ja ra hnini.
9 Nɛ mí ꞌbʉpʉ nꞌda ran ꞌyohʉ í Simón, mi øtꞌ ran thäte, nɛ nuꞌʉ yʉ mɛngu Samaria madi hyonya thoho. Nu ra Simón min ndep yʉ jąꞌi da bɛ̨ni jasɛ rá tsꞌɛdi. 10 Nɛ gätho na nguꞌʉ, yʉ tꞌʉhni nɛ yʉ dącꞌyɛi, nuꞌbʉ mi ꞌyøꞌʉ ꞌbɛꞌa bi man a, bi ꞌyɛ̨na:
―Nuna ran ꞌyohʉ na, ja ra tsꞌɛdi tengu Oją, ɛ̨n yʉ jąꞌi.
11 Nuꞌʉ mi numansu ra Simón nguetho nyaꞌa thoho mi häte. Nɛ bi hyonya thoho ʉ ꞌbɛꞌa bi ꞌyøtꞌa. 12 Pɛ nu yʉ jąꞌi bi ꞌyɛ̨cꞌyɛi ꞌbɛꞌa bi manꞌa ra Felipe nuꞌbʉ mí ma ra Hogamhma ꞌbɛpʉ ní manda rá tsꞌɛdi Oją, ngue bi ma nangue ra Jesús. Nɛ bi mba ma xixyąbi yʉn ꞌyohʉ nɛ yʉ xisu. 13 Nɛꞌa ra Simón ɛ̨na bi ꞌyɛ̨cꞌyɛi, nɛ nuꞌbʉ mín xixyą, bi dɛnꞌna ra Felipe. Nɛ nuꞌbʉ mín nu yʉ hmɛpya nɛ yʉn tꞌøtꞌe nuįxte bi ꞌyøtꞌ ra Felipe, bi hyonya thoho ra Simón.
14 Nɛ nuꞌbʉ mi ꞌyøꞌʉ yʉ́ ꞌbäihʉ ra Cristo ꞌbʉpʉ Jerusalén gue bi ꞌyɛ̨cꞌyɛi yʉ mɛngu Samaria, bi mbɛnpʉ ra Pedro nɛ ra Xuua ʉ miꞌda yʉ́ ꞌbäihʉ ra Cristo. 15 Nuꞌbʉ mi zøm bʉ bʉya, bin yąhʉ Oją, bi ꞌyäp rá tsꞌɛdi ngue da hyąn rá Hogandąhi Oją yʉ ꞌyɛ̨cꞌyɛi ꞌbʉpʉ. 16 Nguetho hin ní zøh rá Hogandąhi Oją bʉ ja yʉ́ mbʉi ʉ, pɛ høntꞌa nangue rá thuhu ra Hmu Jesús bin xixyą ʉ. 17 Nu ra Pedro nɛ ra Xuua bʉya, bi gäspa yʉ́ ꞌyɛ yʉ́ yą yʉ ꞌyɛ̨cꞌyɛi, nɛ bi hyąn rá Hogandąhi Oją bʉya.
18 Pɛ nu ra Simón, nuꞌbʉ mi nu bi hyąn rá Hogandąhi Oją ʉ bi gäx yʉ́ ꞌyɛ yʉ́ ꞌbäihʉ ra Cristo, bi ꞌyut ra mbɛti bʉya. 19 Bi ꞌyɛ̨mbi:
―Dami ꞌdac ma tsꞌɛdi gue høntꞌa toꞌo ga cäx ma ꞌyɛ da hyąn rá Hogandąhi Oją tengu guí øtꞌui, ma gá jutꞌaui, bi ꞌyɛ̨na.
20 Pɛ nu ra Pedro bi ꞌyɛ̨mbi:
―Di jua Oją ni mbɛti, nɛꞌe, nguetho guím bɛ̨ni nangue ra mbɛti sä gui tänꞌa ꞌbɛꞌa di un Oją. 21 Nguetho hinga gueꞌe ga comhbʉ na ra ꞌbɛfi, mfądi ya him mahoqui ni mbʉi bʉ ja rá hmi Oją. 22 Dami päh ni mbʉi nangue ran tsꞌo. Dami ꞌyäp rá punbi ra Hmu, nɛ da zä di punꞌnaꞌi nangue ran tsꞌo gá bɛ̨ni. 23 Nguetho dí pądi ɛ̨mmɛ ja ran tsꞌɛya ni mbʉi, nɛ ɛ̨mmɛ xʉn ngu ran tsꞌo ja ni mbʉi guím bɛ̨ni.
24 Nu ra Simón bi dąti:
―Nuꞌaui gui ꞌyähmi tsꞌʉ rá tsꞌɛdi ra Hmu nanguecä, ngue hin gan nugä a guí mammi, bi ꞌyɛ̨mpꞌʉ.
25 Nuꞌbʉ mim ꞌbʉꞌi tsꞌʉ bʉ ra Xuua nɛ ra Pedro, nɛ xí mampꞌa rám hma ra Hmu mahɛ̨tsꞌi, bi mbeng bʉ Jerusalén. Pɛ him ꞌbex bi zøm bʉ, nɛ mꞌbɛtꞌo gätho ná ngu ra häi Samaria bi manꞌa ran ho maꞌdaꞌyo bʉ bi thogui.
Nu ra Felipe nɛ ra mɛngu Etiopía
26 Nuꞌa nꞌda rám ꞌbɛhni Oją mahɛ̨tsꞌi bi zøm bʉ bí ꞌbʉꞌa ra Felipe, nɛ bi ꞌyɛ̨mbi:
―Ní mba ꞌdanguadi guepʉ bí thoh ra ꞌyu ní mba Gaza, gue ní bøm bʉ Jerusalén. Nuna ra ꞌyu ní mba bʉ ra huɛnhäi na, bi ꞌyɛ̨mpꞌa rám ꞌbɛhni Oją.
27 Bi ndantsꞌa ra Felipe ꞌbex bi mba bʉ. Bi nu, i ꞌyo bʉ ꞌyu nꞌda ran ꞌyohʉ xʉn hɛ̨tsꞌi rá ꞌbɛfi, di jamansup rá mbɛti ra xutsꞌʉtꞌabi Candace bʉ ra häi Etiopía. Janangueꞌa i tꞌɛ̨mbi ra eunuco, ngue nde da ma, mꞌboqui. 28 Nuꞌa xpí mbeng bʉ Jerusalén guepʉ bá thąnde Oją. 29 Nu rá Hogandąhi Oją bi ꞌyɛ̨mpꞌa ra Felipe:
―Gui mba gui sʉꞌa ran ꞌyohʉ i hux ra carro.
30 Nu ra Felipe bin tih pʉya nɛ bi zʉdi. Nuꞌbʉ mí zøm bʉ, bi ꞌyøde gue mi nɛh ra søcuą ran ꞌyohʉ, gue rá søcuą ra Isaías rá pøngahyą Oją. Ra Felipe bi ꞌyän bʉya:
―Ha guí pądi ꞌbɛꞌa nam bønꞌa ra søcuą gadín xäh ya.
31 Bi dąꞌa ran ꞌyohʉ:
―Hague dán zä ga pącä nuꞌbʉ njon da xängui.
Nɛ bi xih ra Felipe da ndetsꞌe din hyʉmmi bʉ.
32 Nɛ nuꞌa ra søcuą madin xäh ran ꞌyohʉ mim ma gue:
I tsꞌixꞌa nꞌda ran ꞌyohʉ tengu nꞌda ra dɛꞌyo i tsꞌitsꞌi ngue da hyo.
Nɛ tengu nꞌda ra tꞌʉdɛꞌyo nuꞌbʉ i ąxpa rá xįngu, hin di cꞌuɛ̨hɛ,
nɛ ngutho a ran ꞌyohʉ hin din yą.
33 Nɛ nuꞌbʉ mín nu ran ʉnbi, njom bi yąni, njom bi mbätsꞌi.
Nɛ njon da zä da ma hangu da dɛnni,
nguetho bi thącua rá te ua ja ra ximhäi.
Gueꞌa bi man ra søcuą bi nu ran ꞌyohʉ.
34 Nu ran ꞌyohʉ bʉya bi ꞌyänꞌna ra Felipe:
―Dami xiqui tsꞌʉ toꞌo nín ꞌyohʉ na da nu ran ʉnbi, uague guesɛ na ra pøngahyą bi nu, uague nꞌdanꞌyo, bi ꞌyɛ̨mbi.
35 Nuꞌa ra Felipe bʉya, bi dʉꞌmi bi ma ꞌbɛꞌa nam bønꞌa ra søcuą nubʉ madín xäh na ran ꞌyohʉ, nɛ bi xifi nangue ra Jesús bi tꞌørpa na im man ra søcuą, nɛ bi thoqui bi xifi xʉn ho. 36 Nɛ nuꞌbʉ mí zøm bʉ po ra dehe, nuꞌa ran ꞌyohʉ bi ꞌyɛ̨mpꞌa ra Felipe:
―Ha hin da zä dan xixyągä ꞌbʉ, nɛ po ua ra dehe ya, bi ꞌyɛ̨nꞌa.
37 Bi dąꞌa ra Felipe:
―Da zä, nuꞌbʉ guí ɛ̨cꞌyɛi a dí xiꞌi nangue ra Jesús, gue gätho ni mbʉi.
Bi dąꞌa ran ꞌyohʉ:
―Dí ɛ̨cꞌyɛi gue gueꞌa ra Jesucristo rá Tsꞌʉntꞌʉ Oją a.
38 Nɛ bi säyabi rá carro bʉya. Nɛ bi gąpʉ ja ra carro nɛ bi mba bʉ mi po ra dehe. Nu ra Felipe bʉya bi ꞌyørpa ran xixyą a ranꞌyohʉ. 39 Nɛ nuꞌbʉ mi bøxpʉ mí po ra dehe, ꞌdahmantho bi ꞌbɛrpʉ ra Felipe gue bi zix rá Hogandąhi Oją. Nɛ nu ra mɛngu Etiopía him manꞌdandį bi nuꞌa. Nɛ nuꞌbʉ mí thogui, bin johya rá mbʉi. 40 Pɛ nu ra Felipe ní nɛqui mahønꞌa bʉ ra hnini Azoto. Nɛ nuꞌbʉ mambá thopʉ ja yʉ hnini, bi mam bʉ ran ho maꞌdaꞌyo asta gueꞌbʉ mi zøm bʉ ja ra hnini Cesarea.