Nuꞌa ran tꞌunni manꞌda di muui
21
Nuꞌa ra Jesús mi ꞌbäpʉ ja ra dąniją nɛ bi nu yʉ mɛmbɛti i cät yʉ́ mbɛti bʉ ja ra huada, ngue rán tꞌunni Oją. 2 Nɛ bi nu nꞌda zʉ hyoya xisu bi gärpʉ yoho yʉ tꞌʉcꞌaxtꞌi. 3 Nu ra Jesús bi ꞌyɛ̨mpꞌʉ mi ꞌbäpʉ bʉya:―Majuąni dí xi ahʉ, nuna ra hyoya xisu manꞌda di muui bi uni xinda gueꞌʉ gätho miꞌda. 4 Nguetho gätho yʉ mɛmbɛti ꞌbʉ ya bi gätꞌa nꞌda ra mbɛti ja ra huada, pɛ ya mbongui thoho yʉ́ mbɛti, pɛ nuꞌa zʉ hyoya xisu, bi uni gätho mi ja, xíngui tsꞌʉ bi bongui ꞌbɛꞌa da hyonsɛ, bi ꞌyɛ̨nꞌa ra Jesús.
Ofrenda de una Viuda
Ra Jesús bi ma ꞌbɛꞌa din ja ra dąniją
5 Nuꞌa ra Jesús mi øꞌa man yʉ jąꞌi: “Mahotho ra dąniją, nɛ mahotho yʉn tꞌunni i zʉpʉ.” Pɛ ra Jesús bi ꞌyɛ̨mpꞌʉ:
6 ―Nuna gätho guín nuhʉ ya, da zøn ra pa hin te din ja ua, xíngui tsꞌʉ da bonga nꞌda zʉ xɛqui ngue hin da yøtꞌe, bi ꞌyɛ̨nꞌa ra Jesús.
Ran ʉnbi din ja ua ja ra häi
7 Nɛ nuꞌʉ ꞌda yʉ jąꞌi mi øꞌa bi man ra Jesús, nɛ bi ꞌyänni:
―Gra xänbate i, ndaꞌa ní pa din ja a guím ma, ꞌbɛꞌa ní hmɛpya din ja sä ga pąhmbe.
8 Nɛ nu ra Jesús bi ꞌyɛ̨mpꞌʉ:
―Dami jamansu ꞌbɛꞌa guí ɛ̨cꞌyɛihʉ. Nguetho da zøn ra pa ba ɛ̨h yʉ hyäte da hyä ahʉ: “Nugä drá Cristogä,” da ꞌyɛ̨nꞌahʉ. Nɛ da ꞌyɛ̨nꞌʉ: “Ya bi zøn ra pa ran zɛgui,” da ꞌyɛ̨nꞌʉ. Pɛ o guí ɛ̨cꞌyɛihʉ ꞌbɛꞌa da manꞌʉ. 9 Ga xi ahʉ ꞌbɛꞌa gätho din ja ua ja ra häi gueꞌbʉ go ba ɛ̨cä mahønꞌa. O guí suhʉ ꞌbɛꞌa gui ꞌyøhmbʉ, nguetho din ja yʉ dąsʉi, nɛ yʉ jąꞌi hinga ꞌdaꞌangu da bɛ̨ni. Pɛ hinga gueꞌbʉ ran zɛgui din ja ʉ, bi ꞌyɛ̨nꞌa ra Jesús.
10 Nɛ xø bi ꞌyɛ̨na:
―Nɛ ꞌdaꞌa nꞌdanni yʉ häi din ja yʉ sʉi. Nɛ din sʉsɛ nꞌda ngu nꞌda yʉ tsꞌʉtꞌabi. 11 Nɛ din ja yʉ ꞌyąmhäi ntsꞌutho, nɛ din ja ra dąthu, nɛ ra dągɛ̨hɛ, nɛ din ja yʉ hmɛpya ntsꞌutho bʉ mahɛ̨tsꞌi.
12 Pɛ hin nín ja a dím mangä ꞌbʉ bim fɛntꞌahʉ nɛ da mba ma ʉnꞌni ahʉ. Nɛ da tsꞌix ahʉ bʉ ja yʉ niją, di ʉnꞌnahʉ bʉ. Nɛ da mba ma dä ahʉ bʉ ꞌbʉh yʉ tsꞌʉtꞌabi nɛpʉ ꞌbʉꞌʉ ja yʉ́ tsꞌɛdi. Gätho ngubʉ da tꞌøtꞌahʉ ngue guí tɛngahʉ. 13 Pɛ nuꞌbʉ da tsꞌix ahʉ bʉ, da zä gui mamhbʉ bʉ ran ho maꞌdaꞌyo. 14 Nɛ ꞌyo gadín ꞌyomfɛ̨nihʉ ꞌbɛꞌa gui mamhbʉ ꞌbʉ bi mba ma juąnꞌni ahʉ.
15 Nguetho nugä, ga bɛ̨nꞌnahʉ ꞌbɛꞌa da zä gui mamhbʉ ra ora gam ꞌbähmbʉ bʉ. Nɛ nuꞌa ga bɛ̨nꞌnahʉ, xínga nꞌda nin sʉihʉ da zä da dąti ꞌbɛꞌa gui mamhbʉ bʉ. 16 Nɛ madagueꞌbʉ, ni tahʉ ogue ni mbehʉ, ogue ni cuhʉ, ogue ni mɛnihʉ, ogue ni amigohʉ, pɛ guemhma di dä ahʉ bʉ ꞌbʉh yʉ tsꞌʉtꞌabi. Nɛ ꞌdaꞌahʉ da tho ahʉ ngue guí ɛ̨cꞌyɛigahʉ. 17 Nɛ gätho da tsꞌan ahʉ nanguecä. 18 Pɛ o guín suhʉ nguetho xínga nꞌda ni xtąhʉ dim ꞌbɛpʉ ja ni yąhʉ. 19 Pɛ nuꞌbʉ gui hyäthʉ yʉn ʉnbi, Oją di ꞌda ahʉ ra te maząi, bi ꞌyɛ̨nꞌa ra Jesús.
Ra Jesús bi ma ꞌbɛꞌa din ja ra dąhnini Jerusalén
20 Nɛ manꞌda bi man ra Jesús, bi ꞌyɛ̨na:
―Nuꞌbʉ guin nuhʉ xí mbät ra hnini Jerusalén yʉ dofʉi, gui pąhmbʉ mi tsꞌʉtho da guah ra hnini. 21 Nɛ nuꞌbʉ bin ja bʉ Njerusalén, gätho ʉ ꞌbʉpʉ ja ra xɛqui Judea xʉn ho ꞌbʉ da ꞌdagui da mba bʉ dąpo bʉ ja yʉ nyuni. Nɛꞌʉ i ꞌbʉpʉ ja ra hnini, xʉn ho ꞌbʉ da bøni, nɛ gätho i ꞌbʉpʉ dąpo hin da ꞌyɛ̨na da mba bʉ ja ra hnini. 22 Nguetho gueꞌa ra pa di un rán ʉnbi Oją ʉ, nɛ gätho din ja tengu tho i mam bʉ ja rá hman Oją din ja. 23 Nɛ nuꞌbʉ bin ja a, huɛ̨cate ʉ in hątꞌʉhni, nɛꞌʉ gätho ʉ ꞌbʉh yʉ́ ꞌuɛre. Nguetho ndumbʉitho rán tsꞌɛmbi Oją din ja ua ja ra häi nɛ xʉn ngu yʉn ʉnbi da nu yʉ jąꞌi. 24 Nɛ nuꞌʉ ꞌdaꞌʉ dí mba ntho ra juai, nɛ nuꞌʉ miꞌda da tsꞌixpʉ nꞌdanni yʉ häi nɛ da gohi tenguꞌbʉ i ofädi. Gueꞌʉ hing yʉ judío di tsꞌon na ra dąhnini nɛ di manda ua, gueꞌbʉ go da zøn ra pa da hyąnba yʉ́ tsꞌɛdi Oją, bi ꞌyɛ̨nꞌa ra Jesús.
ꞌBʉ bi zøn ra pa ba ɛ̨h ra Cristo
25 Nɛ manꞌda bi man ra Jesús, bi ꞌyɛ̨na:
―Nu Oją da ꞌyøtꞌ yʉ hmɛpya bʉ ja ra hyadi, nɛpʉ ja ra ząna nɛpʉ ja yʉ sø. Nɛ yʉ jąꞌi ꞌbʉcua ja ra häi ɛ̨mmɛ din suꞌʉ ꞌbʉ da ꞌyøde ntsꞌɛdi da ꞌyɛn ran dąhi yʉ deją. 26 Nɛ ɛ̨mmɛ da güent yʉ́ mbʉi nangue ra mbidi din ja. ꞌNɛ da zu ꞌbʉ da bɛ̨ni ꞌbɛꞌa din ja gätho ua ja ra ximhäi. Nɛ gätho ꞌbɛꞌa bí ja bʉ mahɛ̨tsꞌi di ꞌyąni. 27 Nɛ nuꞌbʉ bin ja a dí xi ahʉ, ꞌbex gua ɛ̨cä, ngue dán jąꞌigä ua ja ra ximhäi, ba ɛ̨cä bʉ ja yʉ güi, ban ꞌyoꞌbe ma tsꞌɛdi xʉn ngu ngue dán nuįxtegä. 28 Nɛ nuꞌbʉ gán nuhʉ da mbʉdi din ja, dami hyuthʉ nząmbʉi nɛ gui ndøsꞌhʉ mahɛ̨tsꞌi, nguetho ba ɛ̨h ni pørpatehʉ da yąn ahʉ, bi ꞌyɛ̨nꞌa ra Jesús.
29 Nɛ manꞌda bi man ra Jesús ngue bi manꞌa nꞌda ran tꞌuti, bi ꞌyɛ̨na:
―Gan ꞌyomfɛ̨nihʉ tsꞌʉ ꞌbɛꞌa di ja ra za ra higo nɛꞌʉ miꞌda yʉ za. 30 Nuꞌbʉ guín nuhʉ i pøx yʉ́ paxi yʉ za, guí pąhmbʉ ꞌbex ba ɛ̨h yʉ pa xʉm pa. 31 Ngutho ꞌbʉ bi mbʉꞌa dí xi ahʉ, gui pąhmbʉ mi tsꞌʉtho di manda rá tsꞌɛdi Oją ua bʉya.
32 Majuąni dí xi ahʉ, nu yʉ jąꞌi ꞌbʉcua ya, hinga gätho xtí du ꞌbʉ bi mbʉdi din ja a dí xi ahʉ. 33 Nu bʉ mahɛ̨tsꞌi nɛ ra ximhäi da guadi, pɛ nuꞌa mam hmangä hin da guaꞌa, bi ꞌyɛ̨na.
34 Janangue dami jamansu ꞌbɛꞌa guí øthʉ, o guín nde gui ꞌyøthʉ ni pähä zɛhɛhʉ, nɛ hinga høntꞌa guim bɛ̨mhbʉ nin sihmɛhʉ. Dami jamansu a gui ꞌyøthʉ, hin ga tįnꞌnahʉ ngue gdí øthʉ a ꞌbʉ bá pengä. 35 Nguetho njon da bąꞌa ra ora ba ɛ̨cä, pɛ gätho yʉ jąꞌi ꞌbʉcua ja ra ximhäi da nu. 36 Dami tøm thohohʉ nɛ thocua thoho gan yąhʉ Oją, nꞌdahma din ja ni tsꞌɛdihʉ gui hyäthʉ yʉn ʉnbi din ja. Nuꞌbʉ ngubʉ gui ꞌyøthʉ, hin gui pɛsꞌ ni sähʉ ꞌbʉ gá ꞌbähmbʉ bʉ ja ma hmigä, nugä ngue dán jąꞌigä ua ja ra ximhäi, bi ꞌyɛ̨nꞌa ra Jesús ꞌbʉ mi xih yʉ́ xädi ꞌbɛꞌa gätho din ja.