Xʉn dʉxqui ra tsꞌoqui
17
Nuꞌa ra Jesús bi xih yʉ́ xädi, bi ꞌyɛ̨mpꞌʉ:―Hinꞌyʉ nꞌda ra pa hin da tsꞌä a ni mbʉihʉ gue i nde di ꞌbɛp ahʉ gui ꞌyøthʉ ra tsꞌoqui. Pɛ ndumbʉitho da nuꞌa toꞌo di japi da ꞌyøtꞌ yʉ tsꞌoqui rá mijąꞌiui. 2 Dí xi ahʉ, toꞌo di japi da ꞌyøtꞌ ran tsꞌo nꞌda hinga na te rá mbʉi, manꞌda xʉn ho ꞌbʉ xtín thąrpa nꞌda ra dojʉni rá ꞌyʉga nɛ xtá tꞌɛntpʉ ja ra deją, xinda gueꞌbʉ xtí japi xta ꞌyøtꞌ ran tsꞌo a nꞌda hinga na te rá mbʉi. 3 Dami jamansu ꞌbɛꞌa guí øthʉ. Nuꞌbʉ ꞌbʉꞌa nꞌda ni mijąꞌihʉ bi ꞌyøtꞌahʉ ran tsꞌo, dami xihmbʉ hingui hoꞌa bi ꞌyøtꞌahʉ. Nɛ nuꞌbʉ da ꞌyømanho a guí xihmbʉ, damim punbahʉ ꞌbʉ. 4 Nɛ nuꞌbʉ yoto nidi nꞌdapa da ꞌyøtꞌahʉ ran tsꞌo, nɛ nꞌdandį ngu nꞌdandį da ꞌyä ahʉ ra punbi, dami punbahʉ gätho, bi ꞌyɛ̨nꞌa ra Jesús.
Desdicha Hacia Aquellos que Hagan Pecar a Otros
Gätho xʉn hɛ̨i sä da ꞌyøtꞌa nꞌda ꞌbʉ i ɛ̨cꞌyɛi xʉn ho
5 Nuꞌʉ yʉ xädi bi ꞌyɛ̨m bʉya:
―Grá Hmu, dami jaje ga ɛ̨cꞌyɛihe xʉn ho, bi ꞌyɛ̨mpꞌa ra Jesús.
6 Nuꞌa ra Jesús bi ꞌyɛ̨mpꞌʉ:
―Madagueꞌa ɛ̨mmɛ zʉ tsꞌʉtho gui ꞌyɛ̨cꞌyɛigahʉ, tengu bʉ ni nɛqui rá hmudä ra cꞌu, sä gui xihmbʉ ra za ꞌbäcua da ꞌuegue dím ꞌbäpʉ ja ra deją nɛ da ꞌueh pʉya. Hinꞌyʉ ꞌbɛꞌa xʉn hɛ̨i ꞌbʉ gui ꞌyɛ̨cꞌyɛigahʉ, bi ꞌyɛ̨nꞌa ra Jesús.
Hin ga ɛ̨mfʉ xʉn ho dí øthʉ ꞌbʉ dí øthʉꞌa i sijʉ
7 ―Nuꞌbʉ nꞌda ran ꞌyohʉ ꞌbʉh rá ꞌyɛ̨hɛ di jamansup yʉ́ dɛꞌyo uague dim pɛpʉ rá huąhi, nɛ nuꞌbʉ bin de bá ɛ̨pʉ ja rá ngu bʉya, ha da sifi din sihmɛ. 8 Pɛ hinꞌna, pɛ da sifi di hocpa rán sihmɛ rá hmu, nɛ nuꞌbʉ bi niyą, ja din sihmɛ ra ꞌyɛ̨hɛ bʉya. 9 Nuꞌa ra ꞌyɛ̨hɛ ꞌbʉ bi ꞌyøtꞌ rá ꞌbɛfi bi xih rá hmu, hingui tꞌɛ̨mbi “jamadi gá ꞌyørca ma ꞌbɛfi,” hingui tꞌɛ̨mbi, ngue ya ra ꞌyɛ̨hɛ thoho. 10 Nɛ ngutho ahʉ ꞌbʉ gá ꞌyøthʉ rá ꞌbɛfi Oją, gui ꞌyɛ̨nthohʉ bʉya: “Hin nte dá øthe ngue dí hnumanhoje, nguetho høntꞌa bi xije Oją dá øthe,” gui ꞌyɛ̨mhbʉ, bi ꞌyɛ̨nꞌa ra Jesús.
Ra Jesús bi hoqui ꞌdɛtꞌa yʉn ꞌyohʉ mí hɛ̨mb ra tꞌaxcaꞌya
11 Nuꞌa ra Jesús ꞌbʉ mi ꞌyo bʉ ja ra ꞌyu ní mba Jerusalén, bi tho inde bʉ ja yʉ́n yąni yʉ xɛqui Samaria nɛ Galilea. 12 Nɛ nuꞌbʉ mi tsꞌʉtho da yʉtꞌa nꞌda ra hnini, ba ɛ̨pʉ ꞌdɛtꞌa yʉn ꞌyohʉ i nde din cꞌathʉ ra Jesús. Gätho mi hɛ̨mb ra tꞌaxcaꞌya ʉ. Nɛ nuꞌʉ yʉn ꞌyohʉ yabʉ tsꞌʉ bim ꞌbäi nɛ ntsꞌɛdi bi mbafi, bi ꞌyɛ̨nꞌʉ:
13 ―Nuꞌi Jesús, grá xänbate i, dami huɛ̨gahe tsꞌʉ, bi ꞌyɛ̨mbi.
14 Nu ra Jesús ꞌbʉ mi nuꞌʉ bʉya, bi xiꞌʉ da ꞌyut yʉ́ jąꞌi ʉ yʉ mbäją. Nɛ nuꞌbʉ mi mba ʉ, nuꞌa ra Jesús bi japi bin hoc yʉ́ jąꞌi bʉ ní mba. 15 Nɛ nu nꞌda, ꞌbʉ mi bądi bi zä rá jąꞌi, ꞌbex bá peng bʉ ꞌbäh ra Jesús nɛ ntsꞌɛdi bi ꞌyɛ̨spa Oją. 16 Bin dąnyahmu bʉ ja rá gua ra Jesús, bi ꞌyäp ra jamadi nguetho bi yąnꞌa. Nɛ nuꞌa, ra mɛngu Samaria a, hing rá mijudíohʉ ra Jesús. 17 Pɛ nu ra Jesús bi ꞌyɛ̨na:
18 ―Ha hinga gueꞌʉ ꞌdɛtꞌa dá hoqui. Hapʉ i ꞌbʉꞌʉ mi gʉto. Ha hingui sä ba ɛ̨ꞌʉ ꞌda xtí un ra jamadi Oją. Pɛ hønna nꞌda ranꞌyohʉ hing ra judío bi bɛ̨nꞌa ra mate bi ꞌyørpa Oją, nɛ im bɛ̨nsɛ ʉ miꞌda ngue ɛ̨na i pą Oją ʉ, bi ꞌyɛ̨na.
19 Nɛ xø bi ꞌyɛ̨mpꞌa ran ꞌyohʉ:
―Damim ꞌbäi, ní mba ya. Bin yąnꞌa ya nguetho gá ꞌyɛ̨cꞌyɛi gue i ja ma tsꞌɛdi, bi ꞌyɛ̨nꞌa ra Jesús.
Ra Jesús bi ma ꞌbɛꞌa di ja bʉ di manda rá tsꞌɛdi Oją
20 Nuꞌʉ ꞌda yʉ fariseo bi ꞌyänꞌna ra Jesús:
―ꞌBɛꞌa ní pa di manda ua rá tsꞌɛdi Oją, bi ꞌyɛ̨nꞌʉ.
Nu ra Jesús bi ꞌyɛ̨mpꞌʉ:
―Hin da fą ꞌbʉ bi manda rá tsꞌɛdi Oją ua. 21 Hingui sä nꞌda da ꞌyɛ̨na: “Guecua di manda ua rá tsꞌɛdi Oją,” xíngui sä nꞌda da ꞌyɛ̨na: “Guembʉ di manda rá tsꞌɛdi Oją bʉ,” njon da zä da ꞌyɛ̨na, nguetho guepʉ ja ní mbʉi nꞌda di manda rá tsꞌɛdi Oją, bi ꞌyɛ̨nꞌa ra Jesús.
22 Nɛ nubʉya, bi ꞌyɛ̨mpꞌʉ yʉ́ xädi:
―Da zøn ra pa ɛ̨mmɛ guin ndehʉ ba pengä, nugä ngue dán jąꞌigä ua ja ra ximhäi. Pɛ di ꞌbɛtho yʉ pa ba pengä. 23 Pɛ nuꞌʉ ꞌda da ꞌyɛ̨nꞌahʉ: “Guecua i ꞌbʉcua ya,” da ꞌyɛ̨nꞌahʉ. Nɛ nuꞌʉ miꞌda da ꞌyɛ̨nꞌahʉ: “Guembʉ i ꞌbʉpʉ a.” Pɛ ꞌyo guí øhmbʉ ꞌbɛꞌa da manꞌʉ. 24 Nguetho nuꞌbʉ bá pengä, nugä ngue dán jąꞌigä ua ja ra ximhäi, di nɛqui tengu ra huɛi ngue di hyätꞌi gätho na ngʉni ra ximhäi. 25 Pɛ mꞌbɛtꞌo thoho ga nugä xʉn ngu ran ʉnbi, nguetho yʉ jąꞌi ꞌbʉcua ya, hin da ꞌyɛ̨cꞌyɛigui.
26 Nuꞌa ra pa ba pengä, nugä ngue dán jąꞌigä ua ja ra ximhäi, nu yʉ jąꞌi dim ꞌbʉi da ꞌyøtꞌʉ tengu bi ꞌyøtꞌ yʉ jąꞌi mi ꞌbʉhmbʉ a ra Noé. 27 Nuꞌʉ yʉ pa mi ꞌbʉꞌa ra Noé, gätho yʉ jąꞌi mi øtꞌe ꞌbɛꞌa mi numanhosɛ, mi sihmɛ, mi mihni, nɛ mi sin yʉ́ xisu, nɛ gueꞌa mi øtꞌʉ gätho yʉ pa gueꞌbʉ go mi zøn ra pa bi yʉt ra dąmbosa ra Noé. Nɛ bin dąꞌye bʉya, bi goꞌmi gätho ra häi a ra dehe, bi du gätho ʉ yʉ jąꞌi mi ꞌbʉi. Din jabʉ da ꞌyøtꞌ yʉ jąꞌi ꞌbʉ bá pengä.
28 Nɛ tengu bi ꞌyøtꞌ yʉ jąꞌi yʉ pa mi ꞌbʉꞌa ra Lot, nɛ ngutho da ꞌyøtꞌ yʉ jąꞌi dim ꞌbʉ ꞌbʉ bá pengä. Gätho yʉ jąꞌi bi ꞌyøtꞌe ꞌbɛꞌa mi numanhosɛ da ꞌyøtꞌe, bin sihmɛ, bim mihni, bim pä, nɛ bin täi, bi ꞌyøtꞌ yʉ́ huąhi, bi hyøh yʉ́ ngu. 29 Gueꞌbʉ go mi zøn ra pa bi bøn ra Lot bʉ ja ra hnini Sodoma, nɛ bá cąh mahɛ̨tsꞌi ra sibi ma uąnspi ra azufre, bi juah ra hnini, nɛ gätho mi ꞌbʉpʉ bi du bʉya. 30 Nɛ din jabʉ da ꞌyøtꞌ yʉ jąꞌi ꞌbʉ bi zøn ra pa gua pengä.
31 Nɛ toꞌo i ꞌbäpʉ maxøtsꞌe ra zɛtsꞌąngu, hin da yʉrpʉ mbo rá ngu ngue da hyątsꞌi ꞌbɛꞌa ja bʉ, da mba tho. Nɛ gätho toꞌo dim pɛpʉ ja rá huąhi, hin ba peng bʉ ja rá ngu. 32 Dami bɛ̨mhbʉ tsꞌʉ ꞌbɛꞌa bi ꞌyøtꞌa rá xisu ra Lot ꞌbʉ mi sifi da ꞌdaꞌʉ, nɛ manꞌda bi bɛ̨nsɛ rá ngu, nɛ gueꞌa í duꞌa bʉya. 33 Nɛ gätho toꞌo in nde da yąnsɛ rá te, da nu ran ʉnbi maząi a. Pɛ gätho toꞌo hin da bɛ̨ni da yąnsɛ rá te, din ja ra te maząi a.
34 Nuꞌbʉ bi zøn ra ora gua pengä, di ąpʉ yoho bʉ ja rá oi, nuꞌa nꞌda da tsꞌixꞌa, nɛ nuꞌa nꞌda da gopʉ. 35 Nɛ nuꞌbʉ yoho yʉ xisu ꞌdarpʉ i jʉni, nuꞌa nꞌda da tsꞌixꞌa, nɛ nuꞌa manꞌda da gopʉ. 36 Nɛ nuꞌbʉ yoho yʉn ꞌyohʉ i ꞌyo bʉ ja yʉ́ huąhi, nuꞌa nꞌda da tsꞌixa, nɛ nuꞌa manꞌda da gopʉ, nɛ høntꞌa toꞌo da ꞌyɛ̨cꞌyɛi, da tsꞌitsꞌi, bi ꞌyɛ̨nꞌa ra Jesús.
37 ―Grá Hmu, hapʉ din jaꞌa guím ma, bi ꞌyɛ̨mpꞌʉ yʉ́ xädi.
―Nubʉ hapʉ di pɛti yʉ pada, gui pąhmbʉ gue di ꞌbom bʉ xʉn du, bi ꞌyɛ̨nꞌa ra Jesús.