Ra ntꞌuti ra ngʉrpa ꞌyɛ̨hɛ hinga gueꞌa bi ꞌyøtꞌe
16
Nɛ xø bi ma manꞌda ran tꞌuti a ra Jesús, nɛ bi ꞌyɛ̨na:―Mi ꞌbʉꞌa nꞌda ra mɛmbɛti, nɛ mi si nꞌda rá ngʉrpa ꞌyɛ̨hɛ bi xifi di manda ꞌbɛꞌa gätho i pɛꞌtsꞌi. Pɛ bi siꞌa ra mɛmbɛti hingui ho øtꞌ rá ngʉrpa ꞌyɛ̨hɛ nguetho i hączɛhɛ ꞌbɛꞌa i ndesɛ. 2 Janangueꞌa bi zonꞌna rá ꞌyɛ̨hɛ nɛ bi ꞌyɛ̨mbi: “Dá øcä hingui hoꞌa guí øtꞌe. Nuya, dami däqui hangu din thɛui ma ꞌbɛfi nguetho ya him man gam pɛcua,” bi ꞌyɛ̨mbi.
3 Nuꞌa ra ꞌyɛ̨hɛ bi bɛ̨m bʉya ꞌbɛꞌa da ꞌyøtꞌe. Bi ꞌyɛ̨nsɛ: “Nuya him man zä dam pɛcua ya, nɛ hingui sä dam pɛh na huąhi, nɛ dí pɛꞌtsꞌ ma sä ga ätho ra mbɛti, ꞌbɛꞌa hmaha ga øtꞌya,” bi ꞌyɛ̨nsɛ. 4 Bi bɛ̨m bʉya ꞌbɛꞌa da ꞌyøtꞌe nꞌdahma dim ꞌbʉh yʉ́ amigo di zɛ ꞌbʉ hinꞌyʉ rá ꞌbɛfi.
5 Nɛ nu ra ngʉrpa ꞌyɛ̨hɛ bi zonꞌdʉ toꞌo i tupꞌa rá hmu. Nɛ bi ꞌyänꞌna nꞌda hangu in dupate. 6 Nɛ bi dąti, bi ꞌyɛ̨na: “Nꞌda ciɛnto dąmbotꞌɛgui ra aceite dí tupi.” Nɛ nuꞌa ra ꞌyɛ̨hɛ bi ꞌyɛ̨mbi: “Dami tsꞌon ni søcuą nɛ gui ꞌyoꞌtꞌ maꞌdaꞌyo gui hyuxpʉ ngue høntꞌa yote maꞌdɛtꞌa yʉ dąmbotꞌɛgui guí tupa ma hmu,” bi ꞌyɛ̨mbi. 7 Nɛ xø bi ꞌyänꞌna manꞌda ran ꞌyohʉ hangu xø in dupate a. Nuꞌa bi dąti: “Nꞌda ciɛnto tꞌɛni ra trigo dí tupi.” Nɛ nuꞌa ra ꞌyɛ̨hɛ bi ꞌyɛ̨mbi: “Dami päh ni søcuą, nɛ dami hyuxpʉ goho ꞌdäte tꞌɛni thoho guí tupi.”
8 Nɛ nuꞌbʉ mi pąꞌa rá hmu ꞌbɛꞌa bi ꞌyøtꞌ rá ꞌyɛ̨hɛ, bi ꞌyɛ̨mbi: “Ɛ̨mmɛ guí pądi ꞌbɛꞌa sä gui ꞌyøtꞌe ngue din jasɛ ꞌbɛꞌa gätho gui hyoni,” bi ꞌyɛ̨nꞌa rá hmu. Nu yʉ jąꞌi ꞌbʉh ya, ɛ̨mmɛ i pądi da hyätꞌ yʉ́ mijąꞌihʉ nꞌdahma da dąsɛ. Pɛ nuꞌʉ i ꞌyo bʉ ja ran nɛqui, hingui pądi da ꞌyøtꞌe tengu na, bi ꞌyɛ̨nꞌa ra Jesús.
9 Nɛ dí xi ahʉ ngue nu ra mbɛti di tsꞌonba rán ꞌyomfɛ̨ni ʉ ꞌda, pɛ da zøn ra pa ngue hin te di muui a, pɛ nu ni mbɛtihʉ xʉn ho ꞌbʉ gui fäxhʉ yʉ jąꞌi, nɛ dim ꞌbʉh ni amigohʉ ngue ꞌdarpʉ gním ꞌbʉhmbʉ bʉ mahɛ̨tsꞌi.
10 ꞌBʉꞌi ꞌda zʉ tsꞌʉtho i ja da ꞌyøtꞌe, pɛ i pądi di jamansu a, janangueꞌa mfądi da bądi di jamansu ꞌbʉ di ja xʉn ngu ꞌbɛꞌa da ꞌyøtꞌe. Pɛ ꞌbʉi ꞌda zʉ tsꞌʉtho i ja da ꞌyøtꞌe, nɛ hingui pądi di jamansu a, janangue mfądi ngue hin da bądi di jamansu ꞌbʉ di ja xʉn ngu ꞌbɛꞌa da ꞌyøtꞌe. 11 Nuꞌbʉ hingui pądi di jamansu ꞌbɛꞌa i ja ua ja ra ximhäi, nɛ xín da bądi di jamansu rá ꞌbɛfi Oją. 12 Nɛ nuꞌbʉ hingui pądi di jamansu a hin rá mbɛti zɛhɛ, njon da zä di unꞌna njuąntho rá mbɛti ꞌbʉ.
13 Njoꞌo nꞌda ra jąꞌi sä dim ꞌbʉꞌi yoho yʉ́ hmu, nguetho nuꞌa nꞌda ra hmu hin da numanho a, nɛ nu manꞌda di huɛ̨cꞌa. Uague da ꞌyørpa rá ꞌbɛfi a nꞌda nɛ da zocpada bʉ rá ꞌbɛfi a manꞌda rá hmu. Ngutho nꞌda ra jąꞌi hingui sä da ꞌyɛ̨mbi rá hmu a Oją ꞌbʉ ɛ̨mmɛ di ho ra mbɛti, bi ꞌyɛ̨nꞌa ra Jesús.
14 Nu yʉ fariseo ɛ̨mmɛ di ho ra mbɛti ʉ, nɛ nuꞌbʉ mi ꞌyøꞌa bi man ra Jesús, bi denthoho.
15 Pɛ nuꞌa ra Jesús bi ꞌyɛ̨mpꞌʉ:
―Nu ahʉ gyʉ́ fariseohʉ, guí øthʉ ꞌbɛꞌa ní numansu ahʉ yʉ jąꞌi, pɛ nu Oją i pądi ꞌbɛꞌa i ja bʉ mbo ni mbʉihʉ. Nɛ nuꞌʉ gätho im bɛ̨nsɛ yʉ jąꞌi ngue di muui, pɛ hin te di muui bʉ na nu Oją ʉ, bi ꞌyɛ̨nꞌa ra Jesús.
Ra Jesús bi ma din thɛui ʉ yʉn tꞌɛ̨di a rá tsꞌɛdi Oją
16 ―Nu mam ꞌbɛtꞌo gán xähmbʉ yʉ́n tꞌɛ̨di ra Moisés, nɛ gán xähmbʉ ꞌbɛꞌa bi ꞌyoꞌtꞌ yʉ pøngahyą mayaꞌbʉ, bi ꞌyɛ̨mpꞌʉ. Pɛ nu ra Xuua Nxixyą bi dʉꞌmi bi man ran ho maꞌdaꞌyo nɛ bi ma ꞌbɛpʉ ní manda rá tsꞌɛdi Oją. Nɛ xʉn ngu yʉ jąꞌi ya i øtꞌra tsꞌɛdi da yʉrpʉ di manda rá tsꞌɛdi Oją.
17 Pɛ madagueꞌa, pɛ xínga nꞌdantꞌohni dim ꞌbɛꞌʉ yʉn tꞌɛ̨di. Nu ra ximhäi nɛ mahɛ̨tsꞌi da guadi, pɛ hin dim ꞌbɛꞌʉ yʉn tꞌɛ̨di, bi ꞌyɛ̨nꞌa ra Jesús.
Ra Jesús bi ma hingui ho ran hyɛgui
18 ―Nɛ nuꞌa toꞌo da hyɛh rá xisu nɛ da zim manꞌda, ra ꞌyomtꞌɛ̨ni a. Nɛ nuꞌa toꞌo da zinꞌa ra xisu bi thɛgui, nɛ gueꞌa dín ꞌyomtꞌɛ̨ni a bʉya, bi ꞌyɛ̨nꞌa ra Jesús.
Ran tꞌuti ra mɛmbɛti nɛ ra hyoya í Lázaro
19 Nɛ bi ma manꞌda ran tꞌuti ra Jesús, bi ꞌyɛ̨na:
―Mi ꞌbʉꞌa nꞌda ra mɛmbɛti nɛ mahotho rá pahni xʉm hmadi a mi he, nɛ ɛ̨mmɛ mi ꞌbʉmanho bʉ ja rá ngu, tengu thoho ꞌbʉ i ja ra ngo. 20 Nɛ i ꞌbʉꞌa nꞌda ra hyoya, ɛ̨mmɛ mi sä ran ʉnbi, í Lázaro a. Nɛ gätho rá jąꞌi mi ja yʉ ꞌya. Nɛ mi hupʉ ja rá goxthi ra mɛmbɛti, 21 ngue mim bɛ̨ni da zi ꞌbɛꞌa da hyɛpʉ ja rá mɛxa a ra mɛmbɛti. Nɛ nuꞌʉ yʉ xąꞌyo bi decpa yʉ́ ꞌya bʉ i hudi.
22 Bi zøn ra pa bi duꞌa ra hyoya. Nɛ nu yʉ́m ꞌbɛhni Oją bi zixpʉ mahɛ̨tsꞌi nguepʉ ꞌbʉꞌa ra Abraham. Mbɛjua bʉya bi duꞌa ra mɛmbɛti. 23 Nɛ nuꞌbʉ mi duꞌa ra mɛmbɛti bʉya, ɛ̨mmɛ bi nu ran ʉnbi bʉ bi mba.
Nɛ bi ndøtsꞌe, bi nu yabʉ bí ꞌbʉꞌa ra Abraham nɛ ra Lázaro ꞌdarpʉ bí ꞌbʉhmi. 24 Nu ra mɛmbɛti bi mbafi, bi ꞌyɛ̨mpꞌa ra Abraham: “Nuꞌi mam bombøta i Abraham, dami huɛ̨gui tsꞌʉ, ba pɛnhua ra Lázaro da dʉtꞌra dehe rá xä, da därca ma jąni, nguetho ɛ̨mmɛ di ʉng na ra sibi i ja ua.” 25 Pɛ nu ra Abraham bi ꞌyɛ̨mpꞌa: “Nuꞌi, mam bomꞌbɛto i, dami bɛ̨nꞌi tsꞌʉ ꞌbɛꞌa gá ꞌyøtꞌe ꞌbʉ gmi ꞌbʉpʉ ja ra ximhäi. Gätho xʉn ho ꞌbɛꞌa mi ja i, pɛ nuꞌa ra Lázaro høntꞌa ran ʉnbi bi nu bʉ. Pɛ nuya din johya ua ra Lázaro ya, pɛ go høntꞌa ran ʉnbi guí nu ya. 26 Nɛ manꞌda dí xiꞌi, hingui sä nꞌda da nɛxua da zørpʉ guí ꞌbʉi, nguetho i ja inde nꞌda ra mbaꞌye xʉn ndoho. Nɛ nuꞌi hingui sä gua nɛxpʉ guí ꞌbʉi gui søcua, nguetho i cotꞌa ra mbaꞌye bʉ,” bi ꞌyɛ̨nꞌa ra Abraham.
27 Nu ra mɛmbɛti xø mahønꞌa bi xiꞌa ra Abraham: “Pɛ nuꞌbʉ hin da zä ba pɛnhua, pɛ gui pɛnꞌna ra Lázaro bʉ ja rá ngu ma ta da xiꞌʉ ꞌbʉpʉ ꞌbɛꞌa dí sägä. 28 Nguetho i ꞌbʉpʉ cʉtꞌa man ꞌyohʉ, nɛ dí ndepe nɛꞌʉ da zøm bʉ guí ꞌbʉhmi ꞌbʉ bi du, nɛ him ba ɛ̨cua ja ran ʉnbi,” bi ꞌyɛ̨nꞌa. 29 Pɛ nu ra Abraham bi ꞌyɛ̨mpꞌa: “Nubʉ ꞌbʉh nin ꞌyohʉ, i ja bʉ rám hman ra Moisés nɛ yʉ́ pøngahyą Oją, i sä da ꞌyøxʉ ꞌbɛꞌa i manꞌʉ.” 30 Pɛ nu ra mɛmbɛti bi ꞌyɛ̨nꞌa: “Pɛ nuꞌi ma ta Abraham, hinga xøtꞌa rám hman ra Moisés ngue da ꞌyøꞌʉ man ꞌyohʉ, pɛ nuꞌbʉ da ndantsꞌa nꞌda xʉn du ngue da xifi, da ꞌyø ꞌbʉ.” 31 Pɛ nu ra Abraham bi ꞌyɛ̨mbi: “Nuꞌbʉ hin da ꞌyʉrpa ra güɛnda ꞌbɛꞌa i man ra Moisés nɛ yʉ́ pøngahyą Oją, xín da ꞌyʉrpa ra güɛnda ꞌbʉ da ndantsꞌa nꞌda xʉn du,” bi ꞌyɛ̨nꞌa ra Abraham, bi ꞌyɛ̨nꞌa ra Jesús ꞌbʉ mi man ran tꞌuti.