Ran tꞌuti ra dɛꞌyo bim ꞌbɛdi
15
Nꞌda ra pa, xʉn ngu yʉ hyącahäi nɛ miꞌda yʉ tsꞌomꞌbäi bim pɛti bʉ, da ꞌyøde ꞌbɛꞌa i manꞌa ra Jesús. 2 Janangueꞌa nuꞌʉ yʉ fariseo nɛ yʉ xänbate niją bi cꞌąmanꞌʉ ra Jesús, nɛ bi ꞌyɛ̨nꞌʉ:―Hingui ho øtꞌna ran ꞌyohʉ, nguetho i yąhʉ nɛ i sihmɛhʉ yʉ tsꞌomꞌbäi, sä bi ꞌyɛ̨nꞌʉ.
3 Nɛ nuꞌa ra Jesús bi xiꞌa nꞌda ran tꞌuti, nɛ bi ꞌyɛ̨mpꞌʉ:
4 ―Xiꞌbʉ nꞌda ran ꞌyohʉ i ꞌbʉꞌa nꞌda ciɛnto yʉ́ dɛꞌyo, nɛ xtim ꞌbɛꞌa nꞌda, nɛ høntꞌʉ goho ꞌdäte maꞌdɛꞌma gʉto di ꞌbʉpʉ, ꞌbɛꞌa da ꞌyøtꞌa. Ha hin da zopʉ goho ꞌdäte maꞌdɛꞌma gʉto, ngue da mba ba honꞌa bim ꞌbɛdi gueꞌbʉ go bi dįni. 5 Nɛ nuꞌbʉ bi dįni, da gäx rá xįxi, din johya bʉya. 6 Da duxpʉ ja rá ngu, da zonꞌdʉ yʉ́ amigo, nɛꞌʉ din tøtꞌamꞌbʉihʉ, nɛ da ꞌyɛ̨mpꞌʉ: “Dan johyahʉ ya, nguetho dá tįngä na ma dɛꞌyo bim ꞌbɛdi,” da ꞌyɛ̨mpꞌʉ. 7 Ngutho bʉ mahɛ̨tsꞌi, ɛ̨mmɛ di johya ʉ bí ꞌbʉpʉ ꞌbʉ bi päh rán ꞌyomfɛ̨ni nꞌda ra dąditsꞌoqui ua ja ra ximhäi. Manꞌda di johya nangueꞌa, xinda gueꞌʉ mbɛ̨ni hingui dim ꞌbɛdi, ngue ɛ̨na hinꞌyʉ yʉ́ tsꞌoqui, bi ꞌyɛ̨nꞌa ra Jesús.
Ran tꞌuti nꞌda ra xisu bi ꞌbɛh rá mbɛti
8 Nɛ manꞌda ran tꞌuti bi man ra Jesús, bi ꞌyɛ̨na:
―Nɛ ximangutho nꞌda ra xisu mi ja ꞌdɛtꞌa yʉ́ mbɛti nɛ bi ꞌbɛ a nꞌda, pɛ ꞌbɛꞌa hmaha da ꞌyøtꞌ ra xisu bʉya. Ha hin di søc rá sibi nɛ da goc rá ngu, da hyoni gueꞌbʉ go bi dįni. 9 Nɛ nuꞌbʉ bi dįm bʉya, da zonꞌdʉ yʉ́ amigo nɛꞌʉ din tøtꞌamꞌbʉihʉ, nɛ da ꞌyɛ̨mbi: “Dan johyahʉ nguetho dá tįngä ma mbɛti dá ꞌbɛcä,” da ꞌyɛ̨mbi. 10 Ngutho ʉ yʉ́m ꞌbɛhni Oją bí ꞌbʉpʉ mahɛ̨tsꞌi, ɛ̨mmɛ di johya ꞌbʉ bi päh rá mbʉi nꞌda ra jąꞌi ua, bi ꞌyɛ̨nꞌa ra Jesús.
Ran tꞌuti nꞌda ran ꞌyohʉ bi huɛ̨c rá tsꞌʉntꞌʉ
11 Ra Jesús bi ma manꞌda ran tꞌuti ꞌbɛpʉ ní huɛ̨gahʉ Oją nɛ bi ꞌyɛ̨na:
―Mi ꞌbʉꞌa nꞌda ran ꞌyohʉ yoho yʉ́ tsꞌʉntꞌʉ mi ꞌbʉi. 12 Nuꞌa ná yoho rá tsꞌʉntꞌʉ bi ꞌyɛ̨mpꞌa rá ta: “Dami ꞌdac ya ꞌbɛꞌa guím bɛ̨ni gui soga ꞌbʉ gá tu,” bi ꞌyɛ̨mbi. Janangue nuꞌa ran ꞌyohʉ bʉya, bi unni ꞌbɛꞌa gätho in ndepe da gohmiꞌʉ yʉ́ tsꞌʉntꞌʉ. 13 Mi thoꞌi tsꞌʉ yʉ pa bʉya, bi hyąxa bin tꞌunꞌna toꞌo xí ꞌyäh ra erencia, nɛ bi mba. Bi mba nꞌdanni ra häi, yatho, nɛ ꞌbexque ꞌdahmantho bi juaꞌa bi hyątsꞌi, nguetho bi ꞌyøtꞌe ꞌbɛꞌa bi numanhosɛ. 14 Gätho bi juadi, xíngui tsꞌʉ nte bi ꞌyɛgui. Nɛ guepʉ ra häi xí zøni bin ja nꞌda ra dąthu, nɛ xíngui tsꞌʉ ꞌbɛꞌa da zi.
15 Pɛ nubʉya bi hyon ra ꞌbɛfi ra tsꞌʉntꞌʉ. Nɛ nu nꞌda ran ꞌyohʉ, ra mɛngu bʉ, bi xifi di jamansup yʉ́ tsꞌʉdi. 16 Pɛ njon bi ꞌuįnꞌa ra tsꞌʉntꞌʉ nɛ in nde da ziꞌa mi si yʉ tsꞌʉdi, nguetho ɛ̨mmɛ tumanthuhu. 17 Nɛ nuꞌbʉ mi thoh yʉ pa, bin ꞌyomfɛ̨ni bʉya, bi bɛ̨ni: “Nubʉ ja rá ngu ma ta, mbongui thoho ꞌbɛꞌa da zi yʉ́ ꞌyɛ̨hɛ, nɛ nugä dí sägä ran ʉnbi ngue hinꞌyʉ ga sigä ua. 18 Pɛ manꞌda xʉn ho ꞌbʉ ga pengä nɛ ga xiꞌa ma ta: “Nuꞌi ma taꞌi, nugä dá øtꞌä ram fɛꞌtsꞌi nangueꞌe nɛ nangue Oją, 19 nɛ him man säꞌbe gui ꞌyɛ̨ngui ni tsꞌʉntꞌʉgä ya. Gui ꞌyɛ̨ngui ni ꞌyɛ̨hɛthohogä ya, ga ɛ̨mbi,” bi ꞌyɛ̨nsɛ a ra tsꞌʉntꞌʉ.
20 ꞌBex bi mba bʉya bi hyąx ra ꞌyu í mba bʉ ꞌbʉh rá ta. Pɛ nuꞌbʉ mi tsꞌʉtho da zøn rá ngu, ꞌbex bi hyantꞌa rá ta ngue ba ɛ̨pʉ, nɛ ɛ̨mmɛ bin johya, bi huɛ̨cꞌa rá tsꞌʉntꞌʉ. Bin tiꞌa rá ta, bin cꞌatꞌui bʉ ꞌyu, bi hyʉfi nɛ bi zʉspa rá ꞌyogu. 21 Pɛ nuꞌa ra tsꞌʉntꞌʉ bi xiꞌa rá ta: “Nugä, dá øtꞌä ram fɛꞌtsꞌi nangueꞌe nɛ nangue Oją. Nɛ him man säꞌbe gui ꞌyɛ̨ngui ni tsꞌʉntꞌʉgä ya,” bi ꞌyɛ̨mbi.
22 Pɛ nuꞌa rá ta, bi xih yʉ́ ꞌyɛ̨hɛ: “Dami hethʉ ra pahni manꞌda xʉn ho, nɛ dami cärpahʉ nꞌda ram foꞌyɛ rá xä, nɛ gui ꞌyʉrpahʉ yʉ́ zapato. 23 Nɛ ba sihʉ ra tꞌʉndąni xʉn zaqui nɛ gui hyohʉ, gui hojʉ ran sihmɛ nɛ dan johyahʉ. 24 Nguetho nuna ma tsꞌʉntꞌʉ tenguꞌbʉ bi du, pɛ nuya, tenguꞌbʉ bim ꞌbʉi mahønꞌa. Bim ꞌbɛdi pɛ nuya dá tįn ya,” bi ꞌyɛ̨nꞌa rá ta.
Nɛ ꞌbex bin ja ran sihmɛ.
25 Pɛ nuꞌa ra ꞌbɛtꞌo tsꞌʉntꞌʉ mi ꞌyo bʉ huąhi, nɛ nuꞌbʉ mi mba bʉ ja rá ngu, i øh ra ꞌbida nɛ ran johya mi ja bʉ ja rá ngu rá ta. 26 Nɛ nuꞌa, bi zohnꞌna nꞌda rá ꞌyɛ̨hɛ bi ꞌyänni: “ꞌBɛꞌa i ja bʉ ja rá ngu ma ta,” bi ꞌyɛ̨mbi.
27 Nɛ nu ra ꞌyɛ̨hɛ bi ꞌyɛ̨mbi: “Nuꞌa nin ꞌyohʉ bi zøhø, nɛ ni ta bi hyo ran dąni xʉn zaqui, bi ꞌyøtꞌa nꞌda ran sihmɛ xʉn ndoho. Nguetho bin johya ngue ya bá pencꞌa nin ꞌyohʉ,” bi ꞌyɛ̨mbi.
28 Pɛ nuꞌa rá mbʉdi tsꞌʉntꞌʉ bin cuɛ nɛ him bi nde bi yʉrpʉ mbo ra ngu. Nɛ nuꞌa rá ta bi bøni, bi ꞌyørpa tsꞌɛdi da yʉrpʉ mbo. 29 Pɛ nu rá tsꞌʉntꞌʉ bi ꞌyɛ̨mpꞌa: “Ɛ̨mmɛ xʉn ngu yʉ jɛya dá øtꞌä ni ꞌbɛfi nɛ xínga nꞌdandį dá fɛsthoho a gá xiqui. Nɛ hin jąmꞌbʉ xcá ꞌdacꞌa nꞌda ra tꞌʉchibo ngue dan sihmɛhe ma amigo. 30 Pɛ nuꞌbʉ go mi zøꞌa ni tsꞌʉntꞌʉ bi juatꞌa ni mbɛti nɛ xʉn tsꞌo bi ꞌyøtꞌe, ꞌbex gá hyo ra tꞌʉndąni xʉn zaqui,” bi ꞌyɛ̨mbi.