Nuꞌa ra Jesús bi hocꞌa nꞌda xʉn nden rá jąꞌi
14
Nu nꞌda ra pa ran säya, bi mba bán sihmɛ bʉ rá ngu nꞌda ra ngʉrpa fariseo a ra Jesús. Nɛ gätho i ꞌbʉpʉ ja ran sihmɛ ɛ̨mmɛ bi døꞌmi da nu ꞌbɛꞌa da ꞌyøtꞌa ra Jesús. 2 Nguetho mi ꞌbʉpʉ nꞌda ran ꞌyohʉ xʉ nden rá jąꞌi. 3 Nɛ nuꞌa ra Jesús bi ꞌyänꞌdʉ yʉ fariseo nɛ yʉ xänbate niją bʉya:―Ha din thɛui yʉn tꞌɛ̨di ꞌbʉ di hocꞌa nꞌda ra hyɛ̨nni ꞌbʉ ra pa ran säya, ɛ̨nꞌa.
4 Pɛ xínga nꞌdaꞌʉ bi dątꞌa. Nu ra Jesús bʉya, bi hocꞌa ran ꞌyohʉ nɛ bin ꞌyɛ̨hmi. 5 Nɛ nubʉya, bi ꞌyɛ̨mpꞌʉ yʉ fariseo nɛ yʉ xänbate niją:
―Xiꞌbʉ nꞌda ahʉ, ꞌbʉ xtan däh nin dąnihʉ ogue ni buruhʉ bʉ ja ra hyąhäi a ra pa ran säya, ha hin guí jʉxhʉ madague ra pa ran säya, bi ꞌyɛ̨nꞌa ra Jesús.
6 Pɛ xínga nꞌda bi zä bi dądi.
Ra Jesús bi ma hin da hyoni din nuįxte zɛhɛ nꞌda
7 Nu ra Jesús bʉya, bi nuꞌʉ ꞌda i hon yʉ́n thutsꞌi, in nde ꞌdarpʉ da hyuhmbʉ ʉ i pa ntꞌɛ̨spi bʉ ja ran sihmɛ, nɛ bi ꞌyɛna:
8,9 ―O guí homhbʉ ngue ꞌdarpʉ gui hyuhmbʉ ʉ ja yʉ́ tsꞌɛdi, nguetho nuꞌbʉ ꞌdarpʉ guí huhmbʉ ʉ, xiꞌbʉ da zøm bʉ nꞌda ngue manꞌda da tꞌɛ̨spi, nɛ da xi ahʉ ra mɛngu bʉ, “Gui ndanjʉ nguetho rán säui da hyupʉ na,” da ꞌyɛ̨nꞌahʉ. “Bá huhnʉ,” da ꞌyɛ̨nꞌahʉ, nɛ ɛ̨mmɛ gui pɛsꞌ ni sähʉ bʉya. 10 Manꞌda xʉn ho gui hyuxhʉ bʉ maꞌueni tsꞌʉ ꞌbʉ gá cʉthʉ bʉ ja ran sihmɛ, nɛ nuꞌbʉ bi nu ahʉ ra mɛngu bʉ, da xi ahʉ: “Amigo ahʉ, ba ɛ̨hmbʉ ua, gui hyuxhʉ ua manꞌda xʉn ho,” da ꞌyɛ̨nꞌahʉ. Nɛ gäthoꞌʉ ꞌbʉpʉ da numanho ahʉ bʉya, bi ꞌyɛ̨nꞌa ra Jesús. 11 Nguetho gäthoꞌʉ din ꞌyɛ̨zɛhɛ, da zøn ra pa da goꞌahäi. Pɛ gätho toꞌo hin din ꞌyɛ̨zɛhɛ, da zøn ra pa da tꞌɛ̨spi, bi ꞌyɛ̨nꞌa ra Jesús.
12 Nɛ xø bi ꞌyɛ̨nꞌa ra Jesús, bi ꞌyɛ̨mpꞌa ra mɛngu bʉ:
―Nuꞌbʉ gui ꞌyøtꞌa nꞌda ran sihmɛ, o guí zonꞌdʉ ni amigo, xínga gueꞌʉ ni cu, xínga gueꞌʉ ni mɛni, xínga gueꞌʉ yʉ mɛmbɛti guin tøtꞌamꞌbʉihʉ, nuꞌʉ, mꞌbɛjua da zixꞌi i gan sihmɛ, tengu gá ꞌyørpe. 13 Pɛ nuꞌbʉ gui ꞌyøtꞌa nꞌda ran sihmɛ, dami zonꞌdʉ yʉ hyoya, nɛ yʉ mbɛdi, nɛ yʉ dogua, nɛ yʉ xädä, 14 nɛ di jąpꞌahʉ Oją bʉya. Nguetho nuꞌʉ, hin da zä di coꞌtsꞌaꞌi ꞌbɛꞌa gá ꞌyørpa ʉ. Pɛ Oją di coꞌtsꞌa ꞌbʉ bi zøn ra pa da xoxꞌʉ yʉ́ ꞌyɛ̨cꞌyɛi xʉn du, bi ꞌyɛ̨nꞌa ra Jesús.
Ran tꞌuti ra dąnsihmɛ
15 Nꞌda ran ꞌyohʉ mi sihmɛhʉ bʉ, ꞌbʉ mi ꞌyøꞌa bi man ra Jesús, bi ꞌyɛ̨na:
―Mająpi gätho toꞌo din sihmɛ bʉ di manda rá tsꞌɛdi Oją, bi ꞌyɛ̨nꞌa ran ꞌyohʉ.
16 Nɛ nuꞌa ra Jesús bi xiꞌa nꞌda ran tꞌuti nangueꞌʉ toꞌo njuąntho din sihmɛ bʉ di manda rá tsꞌɛdi Oją, nɛ bi ꞌyɛ̨mpꞌʉ:
―Mi ꞌbʉꞌa nꞌda ran ꞌyohʉ bi ꞌyøtꞌa nꞌda ra dąnsihmɛ, nɛ ɛ̨mmɛ xʉn ngu ʉ bi xifi din sihmɛ bʉ. 17 Nɛ nuꞌbʉ mi guaꞌa bi hoc ran sihmɛ, bi mbɛnꞌna rá ꞌyɛ̨hɛ da xiꞌʉ ꞌbex ba ɛ̨hɛ. 18 Pɛ gätho ʉ bi ma hingui sä da mba. Nu nꞌda ran ꞌyohʉ bi ꞌyɛ̨na: “Nugä ja dá tängä nꞌda ma huąhi, jatho ga mba ba nugä. Dami pungagui, hingui sä ga mba,” bi ꞌyɛ̨nꞌa nꞌda. 19 Nɛ nuꞌa manꞌda ran ꞌyohʉ xø bi ꞌyɛ̨na: “Nugä ja dá tängä cʉtꞌa pare yʉ mbʉndąni, jatho ga säpi ga pɛpi, dami pungagui, hingui sä ga mba,” bi ꞌyɛ̨nꞌa manꞌda. 20 Nɛ xø manꞌda bʉya bi ꞌyɛ̨na: “Ja dá singä nꞌda ma xisu nɛ hingui sä ga mba bʉ,” bi ꞌyɛ̨nꞌa.
21 Nuꞌa ra ꞌyɛ̨hɛ bʉya, bi mbengbʉ ja rá nguꞌa rá hmu, nɛ bi xifi ꞌbɛꞌa gätho bi manꞌʉ yʉn ꞌyohʉ. ꞌBex bin cuɛꞌa rá hmu bʉya, nɛ xø bi mbɛnh mahønꞌa ngue da mba nꞌdihi bʉ ja yʉ́ ꞌyu ra hnini, nɛ ba siꞌʉ yʉ hyoya, yʉ mbɛdi, nɛ yʉ xädä, nɛ yʉ dogua da dįm bʉ, ba ɛ̨hɛ din sihmɛ. 22 Nubʉya, nu ra ꞌyɛ̨hɛ bi ꞌyɛ̨mpꞌa rá hmu: “ꞌBʉcua ya bá sigä ya, pɛ him bi yuh ni ngu.” 23 Nu rá hmu bʉya, bi ꞌyɛ̨mbi: “Ní mba bʉ maꞌueni tsꞌʉ ra hnini, nɛ dami ꞌyørpa tsꞌɛdi ba ɛ̨ꞌʉ høntꞌa go toꞌo gui tįm bʉ ꞌyu, da yuh ma ngu. 24 Pɛ xínga nꞌda ran ꞌyohʉ rá mbʉdi dá zohndä da zi na man sihmɛgä,” bi ꞌyɛ̨nꞌa rá hmu, bi ꞌyɛ̨nꞌa ra Jesús ꞌbʉ mi man na ran tꞌuti. Bi ma nangueꞌʉ tꞌɛ̨mbi hin yʉ́n sähʉ, pɛ manꞌda go da yʉrpʉ di manda rá tsꞌɛdi Oją ʉ.
Da nu yʉn ʉnbi toꞌo da dɛnꞌna ra Cristo
25 Nɛ xʉn ngu yʉ jąꞌi mi tɛn bʉ ꞌyu ra Jesús. Nu ra Jesús bʉya, bi nyɛ̨gui nɛ bi ꞌyɛ̨mpꞌʉ:
26 ―Toꞌo gätho in nde da dɛngui, jatho manꞌda xʉn ngu da bɛ̨ngä xinda guepʉ nam bɛ̨nꞌa rá ta o gue rá mbe, ogue rá xisu, ogue yʉ́ tꞌʉhni, o gue yʉ́ cu. Jatho manꞌda da bɛ̨ngä xinda guepʉ nín huɛ̨czɛhɛ. Nuꞌbʉ hinꞌna, hin da zä da dɛngui. 27 Nɛ toꞌo gätho hin da hyät yʉn ʉnbi, ngue i su da tho ꞌbʉ da dɛngui, hin da zä da dɛngä ʉ.
28 Nɛ ꞌbɛ gan ꞌyomfɛ̨nihʉ tsꞌʉ ꞌbʉ gui hyäthʉ gui tɛngahʉ, tenguthoho nꞌda ran ꞌyohʉ ꞌbʉ da ꞌyɛ̨na da hyøh rá ngu. 29 Mꞌbɛtꞌo din ꞌyomfɛ̨ni ꞌbɛꞌa da ꞌyøtꞌe, nuꞌbʉ hinꞌna, tsꞌʉrpʉ thoho hinga xøtꞌa dí juaꞌa rá ngu. Nu yʉ jąꞌi bʉya da denthoho, 30 nɛ da ꞌyɛ̨nꞌʉ: “Nuna ran ꞌyohʉ bi dʉꞌma rá ngu, pɛ hinga xøtꞌa bi juadi,” da ꞌyɛ̨nꞌʉ,bi ꞌyɛ̨nꞌa ra Jesús. 31 Nɛ ngutho nꞌda ra tsꞌʉtꞌabi ꞌbʉ i ꞌbʉꞌi ꞌdɛtꞌa mahuąhi yʉ́ dofʉi, pɛ mꞌbɛtꞌo din ꞌyomfɛ̨ni ꞌbʉ da zä din tunhui a manꞌda ra tsꞌʉtꞌabi ꞌbʉꞌi ꞌdäte mahuąhi yʉ́ dofʉi. 32 Nɛ nuꞌbʉ im bɛ̨ni hingui sä da dąpi, pɛ da mbɛhna nꞌda rám ꞌbɛhni da ꞌyän ꞌbʉ da zä din hocpadahʉ.
33 Nɛ ngutho ahʉ, pɛ jatho ꞌbɛ gan ꞌyomfɛ̨nihʉ ꞌbʉ da zä gui ꞌyɛꞌtsꞌ ni pähä zɛhɛhʉ, nɛ him man guim bɛ̨mhbʉ ꞌbɛꞌa i ja ahʉ, janangue da zä gui tɛngahʉ bʉya, bi ꞌyɛ̨nꞌa ra Jesús.
Hingui ho ra ų ꞌbʉ di ꞌbɛh rán ho
34 Nɛ manꞌda bi man ra Jesús, bi ꞌyɛ̨na: