Hnɛhi thoho di päh rán ꞌyomfɛ̨ni nꞌda
13
Nɛ bi siꞌa ra Jesús ꞌbɛꞌa xí tꞌørpa ꞌda yʉ mɛngu bʉ Galilea nɛ bi tꞌɛ̨mbi:―Nuꞌa ra Pilato bi manda dí hoꞌʉ ꞌda nuꞌbʉ mim bøx yʉ́ ꞌbøtsꞌe bʉ ja ra dąniją Njerusalén, bi ꞌyɛ̨mbi.
2 Nuꞌa ra Jesús bi ꞌyɛ̨mpꞌʉ:
―Ha guím bɛ̨mhbʉ manꞌda i ja yʉ́ tsꞌoqui ʉ toꞌo bi mba ntho xinda gueꞌʉ miꞌda yʉ́ mɛnguhʉ. 3 Pɛ hinꞌna maha. Pɛ dí xi ahʉ, ngubʉ dín ʉnꞌnahʉ. Gui nuhʉ ran tsꞌɛmbi maząi ꞌbʉ hin gui päh nin ꞌyomfɛ̨nihʉ. 4 Nɛꞌʉ ꞌdɛꞌma hyąto bi du bʉ Siloé ꞌbʉ mi yøtꞌ ra jądo, ha guí ɛ̨mhbʉ manꞌda mi ja yʉ́ tsꞌoqui ʉ xinda gueꞌʉ miꞌda ꞌbʉpʉ Jerusalén. 5 Hinꞌna maha, nɛ ngutho ahʉ guin nuhʉ ran ʉnbi ꞌbʉ hin gui päh nin ꞌyomfɛ̨nihʉ, bi ꞌyɛ̨nꞌa ra Jesús.
Ra hmɛpya ra za him bin zʉh yʉ́n dätꞌo
6 Nɛ nubʉya, bi xiꞌa nꞌda ran tꞌuti, bi ꞌyɛ̨na:
―Mi ꞌbʉꞌa nꞌda ran ꞌyohʉ mi ja nꞌda rá huąhi. Nɛ bi ꞌyɛ̨tꞌa nꞌdanza ra higo. Nɛ mi pa ran ꞌyohʉ da nu ꞌbʉ di zʉpʉ yʉ́n dätꞌo, pɛ xínga nꞌdandį bin zʉh yʉ́n dätꞌo ra higo. 7 Janangue bi zonꞌna rá mbɛfi bʉ ja rá huąhi nɛ bi xifi da ꞌyɛxa ra za: “Nuya, ná hyu jɛya ya ngue dí tøꞌmi din ja yʉ́n dätꞌo na ra za, pɛ hin te i zʉdi. Dami ꞌyɛx ya, ndetho í sʉnba yʉ́ dehe ra häi a ra za,” bi ꞌyɛ̨mbi. 8 Pɛ nuꞌa rá mbɛfi bi ꞌyɛ̨na: “Dím ꞌbäpʉ manꞌda jɛya, ga zʉnspa ra häi bʉ rán dʉi, nɛ ga ponbä xʉn ho yʉ häi. 9 Xøhma din zʉh yʉ́n dätꞌo bʉya. Pɛ nuꞌbʉ hin din zʉdi, ga ɛxä ꞌbʉ,” bi ꞌyɛ̨nꞌa ra mbɛfi bʉya, bi ꞌyɛ̨nꞌa ra Jesús ꞌbʉ mi manꞌa ran tꞌuti.
Nuꞌa ra Jesús bi hocꞌa nꞌda ra mbɛdi xisu
10 Nꞌda ra pa ran säya bʉya, min xänbate bʉ ja ra niją ra Jesús. 11 Nɛ mi ꞌbäpʉ nꞌda ra xisu ngue ná ꞌdɛꞌma hyąto jɛya madí ʉnba ra zįthu, him madi japi di juąn rá jąꞌi. 12 Nɛ nuꞌbʉ mi nuꞌa ra Jesús, bi ꞌyɛ̨mbi:
―Grá xisu, ya bi zä ni jąꞌi ya, bi ꞌyɛ̨mbi.
13 Nɛ bi mba nthädi ra xisu bʉya, bi däꞌa ra Jesús, ꞌbex bi juąn rá jąꞌi a bʉya. Nɛ nuꞌa ra xisu bi ꞌyɛ̨spa Oją. 14 Pɛ nuꞌa ra ngʉrpi bʉ ja ra niją ɛ̨mmɛ bin cuɛ nguetho bi nu ra Jesús bi hocꞌa nꞌda ra jąꞌi ra pa ran säya. Nɛ bi ꞌyɛ̨mpꞌʉ mi ꞌbʉpʉ:
―Ntsꞌänni ꞌdato pa gam pɛhmbʉ nꞌda semana, nɛ gueꞌʉ yʉ pa gua ɛ̨hmbʉ ngue din hocꞌahʉ ua, pɛ hinga gue ra pa ran säya gua ɛ̨hmbʉ da mba ma hocꞌihʉ ua, bi ꞌyɛ̨nꞌa ra ngʉrpi bʉ ja ra niją.
15 Nu ra Jesús bi ꞌyɛ̨na:
―Xi ahʉ, ha hin guí xojʉ nin dąnihʉ nɛ guí sixhʉ bʉ ja ra dehe madague ra pa ran säya. 16 Nɛ mi ꞌbäcua nꞌda ra xisu rám bomꞌbɛto ra Abraham, ná ꞌdɛꞌmahyąto njɛya madi ʉnba ra zįthu tenguꞌbʉ án thuꞌtꞌi, nɛ guí ɛ̨mhbʉ hingui ho ngue dá xocpä a nangue rá tsꞌɛdi ra zįthu, nguetho ra pa ran säya ya, bi ꞌyɛ̨nꞌa ra Jesús.
17 Bin hɛ̨tho ʉ yʉ́n sʉihʉ ra Jesús bʉya, nɛ bi mbɛsꞌ yʉ́ sä. Pɛ nuꞌʉ yʉ jąꞌi bin johya ꞌbʉ mi nu yʉn tꞌøtꞌe nuįxte bi ꞌyøtꞌa ra Jesús.
Sanación en el Sabbat
Rán tꞌuti ra hmudä ra mostaza
18 Nɛ xø bi ꞌyɛ̨nꞌa:
―ꞌBɛꞌa ní hmɛpya sä ga xi ahʉ ngue ga utꞌahʉ ꞌbɛpʉ ní manda rá tsꞌɛdi Oją ua. 19 Nuꞌa, tengu rá hmudä ra mostaza. Zʉ tsꞌʉ ꞌbʉ xʉ ꞌboni, pɛ nuꞌbʉ xʉm bøtsꞌe, i te tengu nꞌda ra za, nɛ yʉ doja i øtꞌ yʉ́ ꞌbafi bʉ ja yʉ́ ꞌyɛ, bi ꞌyɛ̨nꞌa ra Jesús.
El Reino de Dios como una Semilla de Mostaza
Ran tꞌuti rá íxi ra thuhmɛ
20 Nɛ xø bi ꞌyɛ̨na:
―ꞌBɛꞌa manꞌda ra hmɛpya sä ga xi ahʉ ngue ga utꞌahʉ ꞌbɛpʉ ní manda rá tsꞌɛdi Oją ua. 21 Nuꞌa, tengu ra íxi ꞌbʉ din japꞌa ra jʉni, nɛ gätho bi ndenꞌa ra jʉni bʉya, bi ꞌyɛ̨nꞌa ra Jesús.
Ran tꞌuti ra goxthi xʉn tsꞌįtꞌi
22 Nu ra Jesús i ꞌyo ra ꞌyu ní mba bʉ Jerusalén, nɛ bi xänba yʉ jąꞌi bʉ ja yʉ hnini bi thogui. 23 Nɛ nuꞌʉ ꞌda yʉ jąꞌi bi ꞌyänni:
―Ha hin ɛ nguꞌʉ yʉ jąꞌi dim pøhø, gue da mba nhyąni, ɛ̨nꞌʉ.
24 Nuꞌa ra Jesús bi dąti:
―Nuꞌa ní yʉtꞌa nꞌda bʉ mahɛ̨tsꞌi, tengu nꞌda ra goxthi xʉn tsꞌįtꞌi. Dami hyomhbʉ gui cʉthʉ bʉ, nguetho dí xi ahʉ, da zøn ra ora xʉn ngu da nde da yʉrpʉ, pɛ ya him man zä. 25 Nguetho da zøn ra ora da gut ra goxthi ra Hmu, nɛ dim ꞌbäpʉ thi ʉ ꞌda da zoꞌa, da ꞌyɛ̨mbi: “Ma Hmu i, dami xogahe.” Pɛ nuꞌa ra Hmu da ꞌyɛ̨mdaꞌʉ: “Hin dí pą ahʉ,” da ꞌyɛ̨mbi. 26 Nɛ nuꞌʉ da ꞌyɛ̨nꞌʉ: “Pɛ dán sihmɛhʉ, nɛ gá xängahe bʉ ja ma hninihe,” da ꞌyɛ̨mbi. 27 Pɛ nuꞌa ra Hmu da ꞌyɛ̨na: “Pɛ dí xi ahʉ, hin dí pą ahʉ, ní mbähä bʉ, hin da zä gui cʉthʉ ua, gyʉ́ tsꞌomꞌbäihʉ,” da ꞌyɛ̨mthoho ʉ.
28 Nɛ ɛ̨mmɛ da bɛ̨ndumbʉi ʉ ꞌbʉ dim ꞌbäpʉ thi bʉ di manda rá tsꞌɛdi Oją. Nɛ din zom bʉ di cuxtꞌ pʉ yʉ́ tsꞌi ʉ nangue ran ʉnbi da nu bʉ. Nɛ da hyantꞌa ra Abraham ꞌbʉpʉ mbo, nɛ ra Isaac, nɛ ra Jacob, nɛ gätho miꞌda yʉ́ pøngahyą Oją, 29 nɛ da hnu ʉ xʉn ngu miꞌda yʉ jąꞌi ngue bi nɛxpʉ gä na ngʉni ra ximhäi i hupʉ di manda rá tsꞌɛdi Oją. 30 Nɛ dí xi ahʉ, toꞌo ɛ̨na i ꞌbɛtꞌo ua, dim ꞌbɛjua bʉ ʉ, nɛ nuꞌʉ tꞌɛ̨mbi i ꞌbɛjua ua, dim ꞌbɛtꞌo bʉ ʉ, bi ꞌyɛ̨nꞌa ra Jesús.
Ra Jesús min nde xtí huɛ̨cꞌʉ ꞌbʉpʉ Jerusalén
31 Nuꞌbʉ mi manꞌa ra Jesús, bi zøꞌi ꞌda yʉ fariseo nɛ bi ꞌyɛ̨nꞌʉ:
―Ndeꞌbʉ gui pønꞌa nꞌdihi ua di manda rá tsꞌɛdi ra Herodes, nɛ in nde da hyoꞌa i.
32 Bi dąꞌa ra Jesús:
―Nu ra Herodes ra hyäte a. Ní mbähä gui xihmbʉ ngue nuya nɛ nixudi ga thoqui ga øtꞌ ma ꞌbɛfi, ga hønꞌa thi yʉ zįthu, nɛ ga hoc yʉ hyɛ̨nni bʉ ga thogui. Nimani bʉya ga juacä ma ꞌbɛfi, gui ꞌyɛ̨mfʉ, bi ꞌyɛ̨mbi. 33 Nuya, nɛ nixudi, nɛ nimani dan ꞌyogä, i jatho ga søm bʉ Jerusalén, nguetho guepʉ i tho bʉ yʉ́ pøngahyą Oją, bi ꞌyɛ̨nꞌa ra Jesús.
34 Nɛ ɛ̨mmɛ bi du rá mbʉi ra Jesús nangueꞌʉ i ꞌbʉpʉ Jerusalén, nɛ bi ꞌyɛ̨na:
―Nu ahʉ gyʉ mɛnguhʉ Jerusalén, guí hohʉ yʉ́ pøngahyą Oją, nɛ gadí batꞌadohʉ ʉ bí pɛnꞌnahʉ Oją. Hangu yʉ pa dá nde ga jamansu ahʉ tengutho nꞌda ra cꞌʉꞌøni i compꞌ yʉ́ bąsi ꞌbʉ xʉn de, pɛ nu ahʉ hin gá ndehʉ. 35 Nuya njon da mbäh ni hninihʉ nɛ hin din ja ahʉ rán jąpi Oją. Nɛ dí xi ahʉ, hin gui nujʉ mahønꞌa jagueꞌbʉ bá ɛ̨cä mahønꞌa. Nɛ nuꞌbʉ gá nujʉ, gui ꞌyɛ̨njʉ: “Mająpi a bá ɛ̨hɛ nangue rá thuhu ra Hmu,” gui ꞌyɛ̨njʉ, bi ꞌyɛ̨nꞌa ra Jesús ꞌbʉ mi ꞌyɛ̨mpꞌʉ yʉ mɛngu bʉ Jerusalén.