Ra Jesús bi ma ꞌbɛꞌa din ja toꞌo i mam maxøtsꞌe thoho
12
Nɛ bim pɛti bʉ ꞌbʉh ra Jesús xʉn ngu yʉ jąꞌi, nɛ ɛ̨mmɛ din tønthoho. Nu ra Jesús bi ꞌyɛ̨mpꞌʉ yʉ́ xädi:―Gam fähmbʉ nangue yʉ́ ixi yʉ fariseo ngue hin gui tɛnbahʉ yʉ́n tꞌøtꞌe, ɛ̨na xʉn ho bʉ na hnu ʉ pɛ nꞌdanꞌyo thoho im bɛ̨n yʉ́ mbʉi. 2 Hin gui ꞌyøthʉ tenguꞌʉ nguetho gätho ꞌbɛꞌa im bɛ̨m bʉ mbo rá mbʉi nꞌda, da fądi. Madagueꞌbʉ ɛ̨nꞌʉ njon da bądi, pɛ guehma din cꞌą yʉ́ tsꞌoqui. 3 Nɛ gätho a i manꞌa nꞌda bʉ njongui øde, da hmam bʉ ꞌbʉh yʉ jąꞌi. Nɛ gätho i mam mantꞌągui nꞌda bʉ ja rá ngu, da fąpʉ ꞌbʉh yʉ jąꞌi, bi ꞌyɛ̨mpꞌʉ yʉ́ xädi ra Jesús.
Gui suhʉ Oją, bi ꞌyɛ̨nꞌa ra Jesús
4 Nɛ xø bi ꞌyɛ̨na:
―Nuꞌahʉ, ma amigo ahʉ, o guí suhʉ ʉ in nde da hyo ahʉ. Nuꞌʉ, sä da hyoꞌa ni jąꞌihʉ pɛ hinꞌyʉ ꞌbɛꞌa manꞌda i sä da ꞌyøtꞌe. 5 Ga xi ahʉ toꞌo a gui suhʉ. Dami suhʉ Oją nguetho nuꞌa, i sä da hyo ahʉ nɛ i ja rá tsꞌɛdi da ꞌyɛntꞌahʉ bʉ ja ran ʉnbi maząi. Majuąni dí xi ahʉ, jatho gui suhʉ Oją.
6 Nɛ njom manꞌda gui suhʉ. Guim bɛ̨mhbʉ yʉ doja, tsꞌʉtho di muui, høntꞌa zʉ yocentavo di muui ʉ cʉtꞌa ndoja, pɛ guextaꞌa i pa mfɛ̨ni ʉ, Oją im bɛ̨nꞌʉ. 7 Nɛ nu ahʉ manꞌda di mu ahʉ xinda gue yʉ doja bʉ ní bɛ̨n Oją, nɛ asta i pądi hangu na ngu i ja ni xtąhʉ. Janangueꞌa o guín suhʉ.
Toꞌo hingui su da ma nangue ra Jesús
8 Nɛ manꞌda bi man ra Jesús, bi ꞌyɛ̨na:
―Majuąni dí xi ahʉ, gätho toꞌo hingui su da mangua ja ra häi gue i pąqui, nugä, ngue dán jąꞌigä ua ja ra ximhäi, ga mam bʉ ja yʉ́ hmi yʉ́m ꞌbɛhni Oją, gue dí pącä ʉ. 9 Pɛ nuꞌa toꞌo da gøngä ua ja ra häi, nɛcä ga cøngä bʉ mahɛ̨tsꞌi a.
10 Nuꞌa toꞌo di cꞌąmanꞌʉgä nguecä ngue dán jąꞌigä ua ja ra ximhäi, sä da mba ma punbi ꞌbʉ da bɛ̨nꞌa bi ma. Pɛ nuꞌʉ toꞌo di cꞌąmanꞌʉ rá Hogandąhi Oją, hinꞌyʉ rá punbi ʉ.
11 Nuꞌbʉ pa ma yąpiꞌahʉ nɛ da tsꞌix ahʉ bʉ ꞌbʉh yʉ ngʉrpi ja ra niją o guepʉ ꞌbʉh yʉ zɛꞌmi nɛ yʉ tsꞌʉtꞌabi, pɛ o ɛ̨mmɛ guím bɛ̨mhbʉ ꞌbɛꞌa sä gui mamhbʉ ꞌbʉ da mba ma juąnni ahʉ, 12 nguetho nuꞌbʉ gám ꞌbähmbʉ bʉ ja rá hmi ʉ, nuꞌa rá Hogandąhi Oją ꞌbex di bɛ̨nꞌnahʉ gui mamhbʉ, bi ꞌyɛ̨nꞌa ra Jesús.
Rán tꞌuti ra mɛmbɛti bi bɛ̨nsɛ ꞌbɛꞌa da hyoni
13 Nɛ nuꞌbʉ min yąꞌa ra Jesús, mi ꞌbä inde bʉ ꞌbʉh yʉ jąꞌi nꞌda ran ꞌyohʉ, nɛ bi ꞌyɛ̨mbi:
―Xänbate i, dami xih man ꞌyohʉ da xɛgätsꞌʉ ra häi bi zoh ma taꞌbe.
14 Nu ra Jesús bi ꞌyɛ̨na:
―Nuꞌi, grán ꞌyohʉ, hin dra zɛꞌmigä ngue ga øtꞌä a guí ma, bi ꞌyɛ̨mbi.
15 Nɛ xø bi ꞌyɛ̨mpꞌʉ ꞌbʉpʉ:
―Dami jamansu ni mbʉihʉ hin din ja ahʉ ran ꞌyʉya. Nguetho hinga gueꞌa i ja nꞌda dám ꞌbʉꞌa nꞌda, madagueꞌa xʉn ngu i ja.
16 Nɛ nubʉya, bi xiꞌa nꞌda ran tꞌuti, nɛ bi ꞌyɛ̨mpꞌʉ:
―Mi ꞌbʉꞌa nꞌda ran ꞌyohʉ ra mɛmbɛti. Nɛ nuꞌa rá häi ɛ̨mmɛ xʉn ho, nɛ xʉn ngu ꞌbɛꞌa gätho bin ja bʉ. 17 Nɛ nuꞌʉ yʉ́ ngumpɛꞌtsꞌi, ɛ̨mmɛ bi yudi nɛ bi bongthoho ꞌbɛꞌa mi ja bʉ ja rá huąhi. Nɛ nuꞌa ran ꞌyohʉ bʉya, bi bɛ̨ni ꞌbɛꞌa sä da ꞌyøtꞌe. 18 Nɛ bi bɛ̨nsɛ: “Nuya, ga xoꞌtꞌ ma ngumpɛꞌtsꞌi nɛ ga høh miꞌda xʉn ndoho, nꞌdahma din ja hapʉ ga pɛꞌtsꞌä ꞌbɛꞌa gätho i jagä. 19 Nɛ nubʉya, dam ꞌbʉtho, høntꞌa dí hyu ma mbʉi ga øtꞌä,” bi ꞌyɛ̨nsɛ ran ꞌyohʉ. 20 Pɛ nuꞌa Oją bi ꞌyɛ̨mpꞌa: “Nuꞌi, hin guí pądi ꞌbɛꞌa guím ma, nguetho nán xui ya gui tu. Nɛ toꞌo hmaha da gohmi ꞌbɛꞌa gätho guím bɛ̨ni gui hyonsɛ,” bi ꞌyɛ̨mbi, bi ꞌyɛ̨nꞌa ra Jesús.
21 Ngubʉ din ja gätho yʉ ꞌyʉya, ngueꞌa høntꞌa i ja ua ja ra ximhäi im bɛ̨ni, pɛ hinga gueꞌa rá mbɛti dí yąnba yʉ́ te ʉ, bi ꞌyɛ̨n a ra Jesús.
Nu Oją di jamansu yʉ́ tꞌʉhni
22 Nɛ nubʉya, bi ꞌyɛ̨mpꞌʉ yʉ́ xädi:
―ꞌYo ɛ̨mmɛ gui hyądumbʉihʉ ꞌbɛꞌa gui sihʉ nɛ ꞌbɛꞌa gui hyehʉ. 23 Nɛ manꞌda xʉn ho guim bɛ̨mhbʉ ni tehʉ xinda gue nin sihmɛhʉ, nguetho manꞌda di muui ni tehʉ, nɛꞌa ni jąꞌihʉ manꞌda di muui xinda gue ni hehʉ. 24 Damin ꞌyomfɛ̨nihʉ tsꞌʉ ꞌbɛꞌa i øtꞌ yʉ ca. Nuꞌʉ, hingui øtꞌ yʉ́ huąhi nɛ hin te i pɛꞌtsꞌi ꞌbɛꞌa i honi, pɛ nu Oją di jamansuꞌʉ. Pɛ manꞌda di jamansu ahʉ Oją xinda gue yʉ doja, nguetho manꞌda di mu ahʉ. 25 Nte sä gui tįnsɛhʉ, xinga gue nin sihmɛhʉ, xinga gue ni hehʉ, xinga gue ni tehʉ, gue gam ꞌbʉhmbʉ ua nyaꞌa thoho. 26 Janangueꞌa hin gui hyądumbʉihʉ ʉ nte di muui.
27 Dami nuhʉ yʉ døni. Hin te má ꞌbɛfi i øtꞌe, pɛ guehma i te. Nɛ nuꞌa ra tsꞌʉtꞌabi Salomón mi he rá pahni mahotho nɛ xʉm hmadi. Pɛ nu yʉ døni manꞌda mahotho xinda gue rá pahni mi he ra Salomón. 28 Nuꞌa Oją di jamansu yʉ døni nɛ di japi din te, madague nꞌda pa thoho i døni. Xi ahʉ, ha hin guím bɛ̨mhbʉ ngue manꞌda xʉn ho di ꞌda ahʉ Oją. Xøgue tsꞌʉtho guí ɛ̨cꞌyɛihʉ. 29 Janangue o guí hądumbʉihʉ ꞌbɛꞌa gui sihʉ nꞌda pa ngu nꞌda pa, 30 nguetho nuꞌʉ hingui ɛ̨cꞌyɛi Oją, gueꞌa i øtꞌʉ. Pɛ nuꞌahʉ ni Tahʉ ꞌbʉpʉ mahɛ̨tsꞌi i pądi ꞌbɛꞌa gätho guí homhbʉ. 31 Mꞌbɛtꞌo thoho guin unsɛhʉ di manda ahʉ rá tsꞌɛdi Oją, nɛ nubʉya di ꞌda ahʉ Oją ꞌbɛꞌa gätho guí homhbʉ, bi ꞌyɛ̨nꞌa ra Jesús.
Enseñando Sobre Oración y Fe
Toꞌo di mɛmbɛti bʉ mahɛ̨tsꞌi
32 Xø bi ꞌyɛ̨nꞌa ra Jesús:
―O guín suhʉ, madagueꞌa hingui ngu ahʉ, nguetho i hu rá mbʉi Oją ngue ya guí ꞌbʉhmbʉ bʉ di manda rá tsꞌɛdi. 33 Dami pähʉ ꞌbɛꞌa i ja ahʉ, gui unhdʉ yʉ hyoya, nɛ din ja ahʉ xʉn ngu bʉ mahɛ̨tsꞌi. Nubʉ, nte dim ꞌbɛpʉ nɛ njąmꞌbʉ din thegue, hingui sä nꞌda ra bɛ̨ da yʉrpʉ, xinga gueꞌʉ yʉ zuꞌuɛ̨. 34 Nuꞌbʉ guecua ja ra ximhäi i ja ꞌbɛꞌa pɛꞌtsꞌa nꞌda, høntꞌua im bɛ̨nꞌa nꞌda, nɛ nuꞌbʉ guepʉ mahɛ̨tsꞌi, guepʉ im bɛ̨nꞌa nꞌda bʉ, bi ꞌyɛ̨nꞌa ra Jesús.
Ra Jesús bi ma da thøꞌmi xʉn ho
35 Nɛ xø bi ꞌyɛ̨nꞌa ra Jesús:
―Dami tøgbahʉ nɛ gan sähʉ tenguꞌbʉ i sø ni sibihʉ. 36 Tengu i øtꞌ yʉ ꞌyɛ̨hɛ ꞌbʉ i tømꞌbʉ yʉ́ hmu da mbeng bʉ xín sihmɛ bʉ ja ran thąti, nꞌdahma ꞌbex da xocpa nꞌdihi ꞌbʉ bi zofo. 37 Ɛ̨mmɛ din johya ʉ bi døꞌmi, nguetho da xiꞌʉ da hyupʉ ja rá mɛxa, go guesɛꞌa ra hmu din ꞌyɛ̨hɛ bʉya, ngue da ꞌuįnꞌʉ yʉ́ ꞌyɛ̨hɛ. 38 Din johya ʉ bi døꞌmi madagueꞌa made nxui uague tꞌʉxuditho ꞌbʉ bi zøh ra hmu. 39 Nu nꞌda ran ꞌyohʉ ꞌbʉ xtám bądi ꞌbɛꞌa ní pa da yʉrpʉ ra bɛ̨ bʉ ja rá ngu, xtán døꞌmi, hin di japi da fɛ̨pi ꞌbɛꞌa pɛꞌtsꞌi. Pɛ hingui pądi ꞌbɛꞌa ní pa da yʉrpʉ ra bɛ̨, janangue i tøꞌmi gätho yʉ pa. 40 Ngutho ahʉ gui tøgbahʉ nguetho hin guí pąhmbʉ ꞌbɛꞌa ní ora ba pengä, nugä ngue dán jąꞌigä ua ja ra ximhäi, bi ꞌyɛ̨nꞌa ra Jesús.
Rán tꞌuti yʉ ꞌyɛ̨hɛ xʉn ho nɛꞌa hingui ho
41 Nuꞌa ra Pedro bʉya, bi ꞌyänni ꞌbɛꞌa bi man ra Jesús, bi ꞌyɛ̨mbi:
―Ma Hmu i, ha høngdähe guí xije ran tꞌuti, uague gätho ʉ miꞌda guí xifi.
42 Nu ra Jesús bi dąti:
―Nuꞌa ra ꞌyɛ̨hɛ xʉn ho, nząi i øtꞌ rá ꞌbɛfi xʉn ho, nɛ di manda bʉ ja rá ngu rá hmu, nɛ di darpa yʉ́ miꞌyɛ̨hɛhʉ. Nɛ nuꞌbʉ bi zøn ra ora din sihmɛ tsꞌʉ yʉ́ miꞌyɛ̨hɛhʉ, i ꞌuįni xʉn ho. 43 Nɛ nuꞌa ra ꞌyɛ̨hɛ, da dįnꞌa rá hmu bʉ dim pɛh ꞌbʉ bi zøhø, da nu ran johya a bʉya. 44 Nguetho majuąni dí xi ahʉ, nu rá hmu di un manꞌda ra ꞌbɛfi ngue di manda bʉya ꞌbɛꞌa gätho i pɛꞌtsꞌi. 45 Pɛ nuꞌbʉ nꞌda ra ꞌyɛ̨hɛ im bɛ̨nsɛ him ba ɛ̨ꞌa nꞌdihi rá hmu, nɛ di dʉꞌmi di ʉnba yʉ́ míꞌyɛ̨hɛhʉ, madague yʉ xisu o gue yʉn ꞌyohʉ, nɛ i sihmɛzɛhɛ nɛ i mihni, 46 tsꞌʉrpʉ thoho ba ɛ̨h rá hmu nɛ bi dįnꞌa rá ꞌyɛ̨hɛ bʉ hin di jamansu rá ꞌbɛfi, nɛ da zʉꞌa rá ꞌyɛ̨hɛ bʉya. Nɛ da hyønꞌa thi, nɛ da ꞌyɛ̨mbi nte rán jaui a. Nɛ da mbɛnpʉ ba nu ran ʉnbi bʉ ꞌbʉh miꞌda guextaꞌa him bi ꞌyøtꞌa xí sifi, bi ꞌyɛ̨nꞌa ra Jesús.
47 Nɛ manꞌda ran tꞌuti bi xiꞌʉ, nɛ bi ꞌyɛ̨mpꞌʉ:
―Nu nꞌda ra ꞌyɛ̨hɛ ꞌbʉ mi bądi ꞌbɛꞌa in nde rá hmu, nɛ him bi ꞌyøtꞌe, pɛ xʉn ʉ tho ram fɛi din japꞌa. 48 Pɛ nuꞌa nꞌda ra ꞌyɛ̨hɛ ꞌbʉ hingui pądi ꞌbɛꞌa in nde rá hmu, nɛ him bi ꞌyøtꞌa i numanho rá hmu, pɛ tsꞌʉtho ram fɛi din japꞌa. Nuꞌa toꞌo bin japi da bądi xʉn ngu, jatho da ꞌyøtꞌe xʉn ngu. I jatho da ꞌyøtꞌe nꞌda ngu nꞌda hangu na ngu bin japi da bądi, bi ꞌyɛ̨nꞌa ra Jesús.
Din ja yʉn heque
49 Nɛ xø bi ꞌyɛ̨nꞌa ra Jesús:
―Nugä bá ɛ̨cä, pɛ hinga gätho yʉ jąꞌi da numanhogui, janangue din sʉꞌʉ ꞌda. Pɛ guextaꞌa hinga nan ja xʉn ho. 50 Mꞌbɛtꞌo ga nu xʉn ngu yʉn ʉnbi, nɛ nuꞌbʉ bi zøn ra pa din jaꞌa dím ma, nꞌda ran ʉnbi xʉn ʉtho ga nugä bʉya. Nɛ xʉn ho ꞌbʉ ga nu nꞌdihi. 51 Pɛ o guí ɛ̨mhbʉ din hɛ̨ yʉ sʉi ngue bá ɛ̨cä ua, pɛ manꞌda din ja yʉ sʉi. 52 Nuya din hec yʉ́n ꞌyomfɛ̨ni ʉ ꞌbʉpʉ ja nꞌda ra ngu. Tenguꞌbʉ hyuꞌʉ ꞌbʉpʉ da dɛngui, yoho ʉ hin da dɛngui. 53 Nɛ din hec yʉ́n ꞌyomfɛ̨ni yʉn ꞌyohʉ nɛ din sʉhmbʉ yʉ́ tsꞌʉntꞌʉ nanguecä. Nɛ yʉ xisu din sʉhmbʉ yʉ́ tꞌįxu nɛ din sʉhmbʉ yʉ́ tsꞌįhuɛ, hinga ꞌdaꞌangu da bɛ̨mhbʉ, bi ꞌyɛ̨nꞌa ra Jesús.
Nu yʉ jąꞌi him bi bąꞌa rá hmɛpya ra Jesús
54 Nɛ xø bi ꞌyɛ̨nꞌa ra Jesús:
―Nuꞌbʉ guí nuhʉ nꞌda ra güi ní bøxpʉ ní yʉh ra hyadi, guí ɛ̨mhbʉ din ꞌye, nɛ din ꞌye bʉya. 55 Nɛ nuꞌbʉ guí nuhʉ ba ɛ̨h ran dąhi bʉ sur, guí ɛ̨mhbʉ xtám pa ra pa bʉya, nɛ xtám pa bʉya. 56 Maxøtsꞌe tho guím mamhbʉ, guí pąhmbʉ ꞌbɛꞌa din ja ra pa, pɛ nɛ hin guí pąhmbʉ ꞌbɛꞌa ní hmɛpya guí nuhʉ ya, bi ꞌyɛ̨nꞌa ra Jesús.
Damin hocpazɛhɛ nin sʉihʉ
57 ―Hanja ngue hingui sä gan ꞌyomfɛ̨ni ꞌbɛꞌa xʉn ho gui ꞌyøthʉ, bi ꞌyɛ̨nꞌa ra Jesús. 58 Nuꞌbʉ ꞌbʉꞌa nꞌda da zix ahʉ bʉ ꞌbʉh ra zɛꞌmi in nde di yąpꞌahʉ, nuꞌbʉ gá mbɛ bʉ ꞌyu, gan hocuazɛhɛhʉ bʉ ꞌyu. Nuꞌbʉ hinꞌna, guehma gui sømmi bʉ ꞌbʉh ra zɛꞌmi, nɛ di manda da jo ahʉ. 59 Nɛ hin da zä gui pømhbʉ bʉ asta gueꞌbʉ go gá juthʉ gätho bi zänni gui juthʉ, bi ꞌyɛ̨nꞌa ra Jesús.