Ra Jesús bi xänba yʉ́ xädi din yąhʉ Oją
11
Nꞌda ra pa bi ꞌueꞌa ra Jesús nɛ bin yąui Oją. Nɛ nuꞌbʉ mi guaꞌa bin yąui Oją, nꞌda rá xädi bi ꞌyɛ̨mbi:
―Ma Hmuꞌi, dami xängahe dan yąhe Oją tengu thoho ra Xuua bi xänba yʉ́ xädi.
2 Nu ra Jesús bi ꞌyɛ̨na:
―Ngubʉ gui mamhbʉ ꞌbʉ guí yąhʉ Oją:
Ma Ta ahe,
Da hnumansu ni thuhu
Nɛ dín ndehe din ja ua nꞌdihi ni tsꞌɛdi ngue di manda ua.
3 Nɛ dami ꞌdaje ra hmɛ dí homhbe ra pa i ja bʉ ya.
4 Dami punga ma tsꞌoquihe tengu thoho bʉ na punbahe ʉ i ørcahe ran tsꞌo.
O guí hɛgähe da dąje ran tsꞌo,
pɛ dami yąnje nangue ran tsꞌo, gui ꞌyɛ̨mhbʉ, bi ꞌyɛ̨nꞌa ra Jesús.
El Padre Nuestro
5 Nɛ xø bi xih manꞌda ran tꞌuti ʉ, bi ꞌyɛ̨na:
―Xiꞌbʉ nꞌda ran ꞌyohʉ xtí mba bʉ rá ngu nꞌda rá amigo, made ra xui, nɛ xtá ꞌyɛ̨mbi: “Hmiqui tsꞌʉ hyun thuhmɛ, 6 nguetho nuꞌa nꞌda ma amigo ja bi zøm bʉ ja ma ngu, nɛ hinꞌyʉ ꞌbɛꞌa ga unni da zi,” xtá ꞌyɛ̨mbi. 7 Nɛ xiꞌbʉ xtá ꞌyɛ̨mp thoho: “ꞌYo gadí paqui, nguetho ya án thʉꞌtꞌi ma ngu nɛ ya dá ohmbe gätho ma tꞌʉhni, nɛ hingui sä ga ndantsꞌi ngue ga ꞌdaꞌi,” xtá ꞌyɛ̨ntho. 8 ꞌBɛꞌa hmaha xtá ꞌyøtꞌa ran ꞌyohʉ ꞌbʉ. Nuꞌbʉ hingui pɛsꞌ rá sä di thoqui da ꞌyäpi, nɛ guehma da ndantsꞌa rá amigo nɛ di unꞌna bi ꞌyädi, bi ꞌyɛ̨nꞌa ra Jesús. 9 In ja bʉ ꞌbʉ guí yąhʉ Oją, gui thoqui gui ꞌyäfʉ nɛ sä thocua thoho gui hyąmhbʉ. Thocua thoho gui hyomhbʉ nɛ thocua thoho da zä gui tįmhbʉ. Thocua thoho guin zohmbʉ nɛ Oją da xocꞌahʉ. 10 Nguetho gätho toꞌo da ꞌyädi da hyąni, nɛ gätho toꞌo da hyoni, da dįni, nɛ gätho toꞌo da zofo da xocpi, bi ꞌyɛ̨na.
11-13 Nɛ nu ahʉ madague gyʉ́ tsꞌomꞌbäihʉ, xínga nꞌda ahʉ gadí unhdʉ ra pozʉ ni tꞌʉhnihʉ ꞌbʉ i ä ahʉ ra huą, nɛ xíng ra mbozʉ gadí unhdʉ ꞌbʉ i äꞌahʉ ra doꞌøni, pɛ høntꞌa xʉn ho gadí un ni tꞌʉhnihʉ. Ha maguetꞌa Oją ma Tahʉ ꞌbʉpʉ mahɛ̨tsꞌi ngue him ba pɛnꞌnahʉ rá Hogandąhi ꞌbʉ guí äfʉ a, bi ꞌyɛ̨nꞌa ra Jesús.
Bi tꞌɛ̨mpꞌa ra Jesús in ꞌyoui ra zįthu
14 Nɛ mi ꞌbʉpʉ nꞌda ran ꞌyohʉ hingui sä din yą, nguetho madi goreba ra zįthu. Nɛ nu ra Jesús bi hyønꞌa thi ra zįthu nɛ bin yą ran ꞌyohʉ bʉya. Nu yʉ jąꞌi ɛ̨mmɛ bi hyonya thoho. 15 Pɛ nuꞌʉ ꞌda bi ꞌyɛ̨na:
―Nuna ran ꞌyohʉ sä i hønꞌa thi yʉ zįthu, nguetho gueꞌa rá hmu yʉ zįthu bi un rán tꞌɛ̨di na, sä ɛ̨nꞌʉ ꞌda.
16 Nɛ nuꞌʉ miꞌda bi zä ra Jesús ꞌbʉ ya majuąni Oją bi un rá tsꞌɛdi, nɛ bi ꞌyäp ra hmɛpya mahɛ̨tsꞌi. 17 Pɛ nu ra Jesús mi pąrpa yʉ́n ꞌyomfɛ̨ni nꞌda ngu nꞌdaꞌʉ nɛ bi ꞌyɛ̨mpꞌʉ:
―Nuꞌbʉ din heczɛhɛ yʉ jąꞌi ꞌbʉpʉ ja nꞌda ra hnini, nɛ ba ɛ̨h yʉ́n sʉihʉ, hin da zä din tunhdʉ yʉ́n sʉihʉ ꞌbʉ. Da mba ma juadi ʉ. Nɛ ngutho ʉ ꞌbʉpʉ ja nꞌda ra ngu, ꞌbʉ din sʉsɛ ʉ dim ꞌbɛdi. 18 Nɛ ngutho rá tsꞌɛdi ra zįthu, ha da zä din sʉsɛ ʉ ngue di ꞌbɛh yʉ́ tsꞌɛdi, nɛ sä guí ɛ̨mhbʉ, ngueꞌa rá tsꞌɛdi ra zįthu a ná hønꞌa thi yʉ zįthu ʉ. 19 ꞌBɛꞌa ni tsꞌɛdi guí ɛ̨mhbʉ i ja ni xädihʉ ꞌbʉ i hønꞌa thi yʉ zįthu. Guesɛꞌʉ i ut ahʉ ngue him majuąni guím mamhbʉ. 20 Nugä dí hønꞌa thi yʉ zįthu nangue rá tsꞌɛdi Oją, gueꞌa ctí pąhmbʉ ngue ya di manda rá tsꞌɛdi Oją ua guí ꞌbʉhmbʉ, bi ꞌyɛ̨nꞌa ra Jesús.
21 Nɛ manꞌda ran tꞌuti bi ma, nɛ bi ꞌyɛ̨na:
―Nuꞌbʉ ꞌbʉꞌa nꞌda i ja rá tsꞌɛdi nɛ i ja ꞌbɛꞌa dám fädi xʉn ho bʉ ja rá ngu, hin te da ja. 22 Pɛ nuꞌbʉ da zøm bʉ nꞌda ngue manꞌda i ja rá tsꞌɛdi nɛ da dąpi, da hyąnba a nám fädi nɛ da duspi ꞌbɛꞌa gätho i ja bʉ ja rá ngu bʉya.
23 Nuꞌa toꞌo hinga ꞌdaꞌingu dí mamꞌbe, man sʉiꞌbe a. Nɛ nuꞌa toꞌo hingui øtꞌ ma ꞌbɛfi, di japi dim ꞌbɛꞌʉ miꞌda.
Rán tꞌuti ra zįthu bá peng bʉ ja rá mbʉi nꞌda ra jąꞌi
24 Nɛ manꞌda ran tꞌuti bi ma, bi ꞌyɛ̨na:
―Nuꞌbʉ bi bøm bʉ ja rá mbʉi nꞌda ra jąꞌi ra zįthu, bin ꞌyo bʉ ja ra ꞌyonhäi, bi hyoni hapʉ sä dim ꞌbʉi, nɛ nuꞌbʉ him bi dįni, bi bɛ̨nsɛ ba peng mahønꞌa hapʉ mi ꞌbʉi. 25 Nɛ nuꞌbʉ mi zøm bʉ, bi nu njongui ꞌbʉpʉ, nɛ ma hoqui xʉn ho. 26 Nɛ nubʉya, bi mba bá hom mi yoto yʉ zįthu manꞌda xʉn tsꞌo xinda guesɛꞌa bin honte, nɛ gätho bim ꞌbʉhmbʉ bʉ. Nɛ nuꞌa ra jąꞌi bʉya, bi gohi manꞌda xʉn tsꞌo xinda gueꞌbʉ mi ꞌbʉpʉ nꞌdatho ra zįthu, bi ꞌyɛ̨nꞌa ra Jesús ꞌbʉ mi man ran tꞌuti. Din ja bʉ ʉ hinga gätho rá mbʉi i ɛ̨cꞌyɛi.
Ran jąpi majuąni
27 Gätho na yą ra Jesús nɛ bi dąꞌa nꞌda ra xisu, bi ꞌyɛ̨na:
―Mająpiꞌa ra xisu bi teꞌe, bi ꞌyɛ̨mbi.
28 Pɛ nu ra Jesús bʉya bi ꞌyɛ̨mpꞌa:
―Pɛ nɛꞌʉ manꞌda mająpi gätho toꞌo i øh rám hman Oją nɛ i øtꞌa gätho i mam bʉ, bi ꞌyɛ̨mbi.
Bendecidos Son Aquellos que Escuchan y Obedecen
Yʉ tsꞌomꞌbäi bi ꞌyäh yʉ hmɛpya mahɛ̨tsꞌi
29 Bi muntsꞌʉ yʉ jąꞌi bʉ ꞌbäh ra Jesús, nɛ nu ra Jesús bi xiꞌʉ manꞌda ram hma, nɛ bi ꞌyɛ̨mpꞌʉ:
―Nuꞌahʉ guí ꞌbʉhmbʉ yʉ pa ja bʉ ya, gyʉ́ tsꞌomꞌbäihʉ, guí äjʉ ra hmɛpya mahɛ̨tsꞌi, pɛ hin te ma hmɛpya da tꞌutꞌahʉ, pɛ høntꞌa nꞌda ra hmɛpya da tꞌutꞌahʉ tengu bi ꞌyøtꞌa ra Jonás. 30 Nɛ gueꞌa ra hmɛpya bi ꞌyøtꞌ ra Jonás, bi bąh yʉ jąꞌi bʉ ja ra hnini Nínive majuąni Oją bí mbɛhnꞌna. Ngutho ahʉ, sä gui pąhmbʉ majuąni bá pɛngä Oją ꞌbʉ gá nuhʉ ꞌbɛꞌa din jacä, nugä ngue dán jąꞌigä ua ja ra ximhäi, bi ꞌyɛ̨na. 31 Nɛ dí xi ahʉ, nuꞌa ra xisu min tsꞌʉtꞌabi bʉ Sur, ꞌdatꞌa gui ndansꞌhʉ a ꞌbʉ bin ja ran juąnbi ꞌbʉ ran zɛgui. Nɛ da ꞌyutꞌahʉ ngue i ja ni tsꞌoquihʉ. Nguetho nuꞌa yatho bá ɛ̨hɛ ngue mín nde da ꞌyøꞌa bi manꞌa ra tsꞌʉtꞌabi Salomón nangue rán ꞌyomfɛ̨ni bi und Oją, pɛ nu ahʉ, hin guín nde gui ꞌyøhmbʉ a dí mangä ngue dí ꞌbʉhmbʉ ua. Pɛ nugä manꞌda i ja rá tsꞌɛdi mam hmangä xinda gue ra Salomón, bi ꞌyɛ̨nꞌa ra Jesús.
32 Nɛ xø bi ꞌyɛ̨na:
―Nɛꞌʉ mi ꞌbʉpʉ ja ra hnini Nínive ꞌdatꞌa gui ndansꞌhʉ ʉ ꞌbʉ bin ja ran juąnbi ꞌbʉ ran zɛgui, nɛ da ꞌyutꞌahʉ ngue i ja ni tsꞌoquihʉ, nguetho nuꞌʉ ꞌbex bi päh yʉ́ mbʉi ꞌbʉ mí ꞌyøꞌa bi manꞌa ra Jonás, pɛ nu ahʉ, xø hin guín nde gui päh ni mbʉihʉ nangue ni tsꞌoquihʉ. Nɛ nugä, manꞌda xʉn hɛ̨tsꞌi mam hmangä xinda gue ra Jonás, bi ꞌyɛ̨nꞌa ra Jesús.
Nuꞌa dá pąhmbʉ rán nɛqui Oją
33 Nɛ xø bi ꞌyɛ̨nꞌa ra Jesús:
―Pɛ njon di søcꞌa nꞌda ra sibi ngue da goꞌmi, uague di cʉꞌtꞌ pʉ ja ra huada. Pɛ i tixpʉ ja ra mbøxasibi, ndepe di yotꞌi gätho toꞌo ba ɛ̨hɛ. 34 Gueꞌa ni dähʉ di ja ahʉ gui hyanthʉ ran nɛqui. Nuꞌbʉ xʉn ho ni dähʉ, guí hanthʉ xʉn ho ran nɛqui, nɛ nuꞌbʉ hingui ho ni dähʉ, xʉm ꞌbɛxuitho bʉ guí hanthʉ. 35 Nɛ ngutho ni mbʉihʉ di ja ahʉ gui pąhmbʉ rán nɛqui Oją. Nuꞌbʉ i hon ni mbʉihʉ rán ho Oją, i ja ahʉ ran nɛqui ꞌbʉ, nuꞌbʉ hinꞌna, sä guí ɛ̨mhbʉ i ja ahʉ ran nɛqui, pɛ høntꞌa ra ꞌbɛxui i ja ahʉ. 36 Nguetho høntꞌbʉ guín ndehʉ bʉ ni mbʉihʉ, di ꞌuecꞌahʉ ra ꞌbɛxui a Oją nɛ di ꞌda ahʉ rán nɛqui, nɛ nubʉya gui ꞌyøthʉ tenguꞌbʉ gyʉ́ sibihʉ nɛ gui ꞌyuthʉ miꞌda rá ꞌyu Oją, tengu ra nyotꞌi di yorpʉ ní mba nꞌda, bi ꞌyɛ̨nꞌa ra Jesús.
Nu ra Jesús bi xiꞌʉ yʉ fariseo nɛ yʉ xänbate niją maxøtsꞌe thoho i yąꞌʉ
37 Nɛ nuꞌbʉ mi guaꞌa man ra Jesús, nꞌda ra fariseo bi xih ná tsꞌihmɛ a ra Jesús, nɛ bi mba bin sihmɛhʉ. 38 Nɛ nu ra fariseo bi nu him bin xʉꞌyɛ ra Jesús, tengu i man yʉ́n tꞌɛ̨dizɛhɛ yʉ fariseo, nɛ bi hyonya thoho. 39 Pɛ nuꞌa ra Jesús bi ꞌyɛ̨mpꞌa:
―Nu ahʉ gyʉ́ fariseohʉ, guí pethʉ xʉn ho ni jąꞌihʉ, pɛ guextaꞌa xʉn tsꞌo ni mbʉihʉ. Høntꞌa ran tsꞌiyate guím bɛ̨mhbʉ, gyʉ́ tsꞌomꞌbäi thohohʉ. 40 Xøgue, xʉm mɛ tho ni mbʉihʉ. Nu Oją i pądi ꞌbɛꞌa gadí jafʉ ni jąꞌihʉ, pɛ nɛꞌa ni mbʉihʉ i pądi ꞌbɛꞌa im bɛ̨ni, nguetho Oją gätho bi zänꞌdʉ, bi ꞌyɛ̨na. 41 Pɛ nuꞌbʉ gui huɛ̨c ni mijąꞌihʉ nɛ gui fäxhʉ, da fąh pʉya mahoqui ni mbʉihʉ.
42 Í huɛ̨hi maha ahʉ, gyʉ fariseohʉ, nguetho guí hąxhʉ bʉ ja ra niją a ná ꞌdɛtꞌa yʉ́ ꞌyɛ̨thi yʉ tʉhʉ bi bøxpʉ ja ni huąhihʉ, pɛ go hin gá ꞌyøthʉ a manꞌda in nde Oją ngue ꞌda xquín numanhohʉ ni mijąꞌihʉ nɛ xquí huɛ̨jʉ ʉ. Guehya ndeꞌbʉ manꞌda gui ꞌyøthʉ, madagueꞌbʉ gui thoqui gui ꞌyøthʉ ʉ miꞌda. 43 Huɛ̨hi maha ahʉ, gyʉ́ fariseohʉ, ɛ̨mmɛ guí homhbʉ ngue da hnumansu ahʉ bʉ ja ra niją, nɛ gadí hohʉ yʉn zɛngua ꞌbʉ guí ꞌyohʉ bʉ ja ra täi. 44 Í huɛ̨hi maha ahʉ, nuꞌahʉ tenguthoho nꞌda ran ꞌyägui hingam fądi, nɛ nuꞌa da thopʉ hin da bądi o bʉ xʉ ꞌya. Ngutho ahʉ, im bɛ̨n yʉ jąꞌi ngue xʉn ho ahʉ, pɛ him majuąni.
45 Nɛ mi ꞌbʉpʉ nꞌda ra xänbate niją, nɛ bi ꞌyɛ̨na:
―Nuꞌi grá Jesús, gra xänbate i, ɛ̨mmɛ gadí ʉnga ma mbʉihe a gá ma, bi ꞌyɛ̨mbi.
46 Bi dątꞌa ra Jesús:
―Nɛ ahʉ, gyʉ xänbatehʉ, í huɛ̨hi maha ahʉ, nguetho ɛ̨mmɛ xʉn hɛ̨i a gá hyuspahʉ yʉ́n tꞌɛ̨di ra Moisés ngue guí xihmbʉ yʉ jąꞌi da ꞌyøtꞌe, pɛ nusɛ ahʉ xíngui tsꞌʉ guí øthʉ a guí xihmbʉ da ꞌyøtꞌʉ. 47 Í huɛ̨hi maha ahʉ, guí hocpahʉ yʉ́ jądonꞌyägui ʉ yʉ́ pøngahyą Oją bi hyoꞌʉ nim bombøtahʉ, ngue guí nde da ꞌyɛ̨nꞌahʉ yʉ jąꞌi xʉn ho ahʉ. 48 Pɛ gueꞌa gní ꞌyuhmbʉ ngue guín numanhohʉ yʉ́n tꞌøtꞌe ʉ nim bombøtahʉ, bi hyoꞌʉ yʉ́ pøngahyą Oją nɛ go gadí hocpahʉ yʉ́ jądonꞌyägui bi ꞌyo ʉ.
49 Pɛ nu Oją i pądi ꞌbɛꞌa gätho din ja, janangueꞌa bi ꞌyɛ̨na: “Ga pɛhndä ʉ ma pøngahyą, nɛꞌʉ miꞌda da mam mam hmangä. Nuꞌʉ ꞌda da tho, nɛ nuꞌʉ ꞌda da tꞌɛthoho,” bi ꞌyɛ̨n Oją. 50 Janangueꞌa gueꞌa ctí nuhʉ rán tsꞌɛmbi Oją nangue gätho yʉ́ pøngahyą Oją nɛ yʉ́m ꞌbɛhni bi mba ntho gueꞌbʉ go rá mbʉdi ra ximhäi. 51 Nu rá mbʉdi ra Abel bi tho asta gueꞌbʉ nɛꞌa ra Zacarías bi tho bʉ mbo ra dąniją, tengu thoho ꞌbʉ ni tsꞌoquihʉ a gätho í thoꞌʉ yʉ́ pøngahyą Oją, nɛ gueꞌa dí ʉnꞌnahʉ a.
52 Í huɛ̨hi maha ahʉ gyʉ́ xänbatehʉ, guí pąhmbʉ ꞌbɛꞌa nam bønꞌa rá hman Oją pɛ hinga gueꞌa guí xänbahʉ yʉ jąꞌi. Him majuąni guí tɛnhdʉ a nɛ hín gadí jafʉ da dɛnꞌdʉ in nde da dɛnni, bi ꞌyɛ̨nꞌa ra Jesús. 53,54 Nɛ bi bøm bʉ ra Jesús bʉya. Pɛ nu yʉ xänbate niją nɛ yʉ fariseo ɛ̨mmɛ bin cuɛ, nɛ xø bi dʉꞌmi ɛ̨mmɛ bi ꞌyän yʉn tꞌänni, ngue i honi ꞌbɛpʉ dí yąpꞌa ra Jesús.