Ra Jesús bi mbɛnꞌdʉ hyąte maꞌdɛtꞌa bʉ ja yʉ hnini
10
Nubʉya nuꞌa ra Jesús bi huanꞌdʉ hyąte ma ꞌdɛtꞌa yʉ́ xädi nɛ bi mbɛhni ꞌdaꞌi yoho bʉ ja yʉ hnini guepʉ da thosɛ ra Jesús. 2 Nɛ bi ꞌyɛ̨mbi:―Tenguthoho ꞌbʉ ya xø ꞌyoꞌtꞌa nꞌda ra huąhi, pɛ zʉ yonjąꞌi tho ʉ yʉ xofo, xʉn ngu ʉ yʉ jąꞌi da ꞌyɛ̨cꞌyɛi, pɛ go zʉ yoho thoho ʉ da xifi. Dami ꞌyäfʉ Oją ra Hmu ba pɛnh miꞌda yʉ mbɛfi da xih yʉ jąꞌi da ꞌyɛ̨cꞌyɛi.
3 ꞌBex gui mbähä ya, nɛ nugä dí pɛnꞌnahʉ tenguꞌʉ yʉ dɛꞌyo ꞌbʉ da mba bʉ ꞌbʉh yʉ zate. 4 Nɛ o guí hąx ni mbɛtihʉ, xín ni buxahʉ, xín gui cʉxhʉ ná yopare ni thįxfanihʉ, gui mbäthohʉ nɛ hinga nyaꞌa gui zɛnguahʉ yʉ jąꞌi bʉ ꞌyu.
5 Nɛ nuꞌbʉ guí cʉthʉ bʉ ja nꞌda ra ngu ngue di säya ahʉ a ra mɛngu bʉ, gui zɛnguahʉ, nɛ gui ꞌyäfʉ Oją da ꞌyɛnspa rán jąpi a ra mɛngu bʉ. 6 Nɛ nuꞌbʉ in nde rán jąpi Oją a ra mɛngu bʉ, da gohmi a rán jąpi Oją ꞌbʉ, pɛ nuꞌbʉ hinguin nde, nte da gohmi ꞌbʉ. 7 Nɛ nuꞌbʉ gá sømhbʉ bʉ ja nꞌda ra hnini, gam ꞌbʉhmbʉ bʉ hapʉ rá mbʉdi da mba ma säya ahʉ. Hin gui päpʉ gam ꞌbʉhmbʉ. Nɛ gui sihʉ ꞌbɛꞌa gätho din ꞌda ahʉ, nɛ hin gui pɛsꞌ ni sä gui sihʉ nguetho gueꞌa guí tąhmbʉ a ngue guí xihmbʉ rám hman Oją ʉ. Nɛ njoꞌo nꞌda ra mbɛfi ngue hin da mba njutꞌi. 8 Nɛ høntꞌa go má hnini nguepʉ da tsꞌin ahʉ, gui sihʉ ꞌbɛꞌa gätho di ꞌda ahʉ yʉ jąꞌi.
9 Nɛ gui hocꞌʉ yʉn zämanꞌʉ i ꞌbʉpʉ, nɛ gui xihmbʉ yʉ jąꞌi ngue mi tsꞌʉtho di manda rá tsꞌɛdi Oją ua. 10 Pɛ høntꞌa go ndaꞌa má hnini gui cʉthʉ, nɛ nuꞌbʉ hin da zin ahʉ yʉ jąꞌi bʉ, gan ꞌyohʉ bʉ ja ra hnini, nɛ gui ꞌyɛ̨mfʉ yʉ jąꞌi: 11 “Nugähe dí huąc ma guahe ra fonthäi ua ja ni hninihʉ, ra hmɛpya ngue ga sogahe ua. Pɛ gui pąhmbʉ ɛ̨na xtí manda maha ua rá tsꞌɛdi Oją,” gui ꞌyɛ̨mfʉ ʉ. 12 Nɛ dí xi ahʉ, nuꞌbʉ bi zøn ra pa ran juąnbi, manꞌda xʉn ʉ tho ran ʉnbi da nuꞌʉ, xinda gueꞌʉ mi ꞌbʉpʉ ja ra hnini Sodoma, bi ꞌyɛ̨nꞌa ra Jesús ꞌbʉ mi ꞌyɛ̨mpꞌʉ yʉ́ xädi.
Da tsꞌänba rá muui yʉ́ tsꞌoqui ʉ him bi ꞌyɛ̨cꞌyɛi ra Jesús
13 Í huɛ̨hi gätho ahʉ guí ꞌbʉhmbʉ bʉ ja ra hnini Corazín, nɛ gätho ahʉ guí ꞌbʉhmbʉ bʉ ja ra hnini Betsaida, nguetho ya gá nuhʉ yʉn tꞌøtꞌe nuįxte dá øtꞌä nɛ hin gá päh nin ꞌyomfɛ̨nihʉ. Nu yʉ jąꞌi mi ꞌbʉpʉ ja ra hnini Sidón nɛꞌʉ mi ꞌbʉpʉ ja ra hnini Tiro, nuꞌbʉ xtá nuꞌʉ yʉn tꞌøtꞌe nuįxte gá nuhʉ ya, xtí päh yʉ́n ꞌyomfɛ̨ni ʉ, nɛ xtá hye yʉ pahni tengu yʉ ꞌdøzą nɛ xtá ꞌyʉx yʉ ꞌbospi yʉ́ jąꞌi, ra hmɛpya ngue ɛ̨mmɛ tu yʉ́ mbʉi nangue yʉ́ tsꞌoqui ʉ. 14 Nɛ nuꞌa ra pa rán juąnbi Oją, nu ahʉ manꞌda da zänꞌnahʉ ran ʉnbi xinda gueꞌʉ mi ꞌbʉpʉ ja ra hnini Tiro nɛpʉ ja ra hnini Sidón. 15 Nɛ ahʉ guí ꞌbʉhmbʉ bʉ ja ra hnini Capernaum, gnín ꞌyɛ̨xhʉ a ngue guí ɛ̨mhbʉ gui sømhbʉ bʉ mahɛ̨tsꞌi, pɛ hinꞌna, pɛ guepʉ ja ran ʉnbi maząi gui mbähä, bi ꞌyɛ̨nꞌa ra Jesús.
16 Nɛ bi ꞌyɛ̨mpꞌʉ yʉ́ xädi bʉya:
―Nuꞌʉ i øh ni ndehʉ, tenguꞌbʉ ma ndesɛgä bi ꞌyøꞌʉ. Nuꞌʉ toꞌo hin da zin ahʉ tengu thoꞌbʉ him bi zingäꞌʉ, nɛ nuꞌʉ him bi zingä, xím bi zinꞌa ma Ta bá pɛngä, bi ꞌyɛ̨nꞌa ra Jesús.
Bá pencꞌʉ hyąte ma ꞌdɛtꞌa xí mbɛnꞌna ra Jesús
17 Nuꞌbʉ mambá pencꞌʉ hyąte maꞌdɛtꞌa yʉ́ xädi a ra Jesús bʉ bi mbɛhni,ɛ̨mmɛ bin johya ʉ. Nɛ bi ꞌyɛ̨mpꞌʉ:
―Grá Hmu, hinga høntꞌʉ yʉn zämanꞌʉ dá hoje pɛ nɛꞌʉ yʉ zįthu dá hømhbe thi ꞌbʉ má ndømhbe ni thuhu, bi ꞌyɛ̨mbi.
18 Nu ra Jesús bi ꞌyɛ̨mpꞌʉ bʉya:
―Dá nugä rá hmu yʉ zįthu ꞌbʉ gmí tąfʉ, bi mba häi tengu ra huɛi ꞌbʉ xʉn gąi, bi ꞌyɛ̨na, nɛ ya dá ꞌda ahʉ ra tsꞌɛdi gui tąfʉ rá tsꞌɛdi man sʉihʉ. 19 Pɛ madague gui nɛsꞌhʉ yʉ pozʉ bʉ gui thohmbʉ, nɛ yʉ mbozʉ, pɛ nte da ja ahʉ. 20 Pɛ hin gan johyahʉ ngue bi zä guí hømhbʉ thi yʉ zįthu, pɛ nuꞌa gdín johyahʉ ngue bi zin ahʉ Oją nɛ bi hyux ni thuhuhʉ bʉ mahɛ̨tsꞌi, bi ꞌyɛ̨nꞌa ra Jesús ꞌbʉ mi ꞌyɛ̨mpꞌʉ yʉ́ xädi.
Bin johya ra Jesús
21 Nubʉya nu rá Hogandąhi Oją bi japi ɛ̨mmɛ di johya ra Jesús, nɛ bi ꞌyɛ̨na:
―Dí ɛ̨ꞌtsꞌa i nguetho gá japi bi bąꞌa ni tsꞌɛdi ʉ i honꞌi, tengu yʉ tꞌʉhni ngue hin te i pądi, nɛ hinga gueꞌʉ im bɛ̨nsɛ ja yʉ́n ꞌyomfɛ̨nisɛ gá japi bi bąꞌʉ. Nɛ gueꞌa gá ꞌyøtꞌe ma Oją i, ngue gueꞌa gá numanhosɛ guí øtꞌe, bi ꞌyɛ̨mpꞌa Oją.
22 Nɛ manꞌda bi man ra Jesús, bi ꞌyɛ̨na:
―Gätho i ja a ma Ta bi ꞌdaqui. Nɛ hønsɛ ma Ta i pącä xʉn ho ngue rá Tsꞌʉntꞌʉgä, nɛ hønsɛgä rá Tsꞌʉntꞌʉgä dí pącä xʉn ho a ma Ta, nɛꞌʉ toꞌo ga japi da bąꞌa, bi ꞌyɛ̨nꞌa ra Jesús.
23 Nɛ bi ꞌyɛ̨mpꞌʉ yʉ́ xädi:
―Gan johyahʉ ngue guín nuhʉ a dí øtꞌä ya. 24 Majuąni dí xi ahʉ, xʉn ngu yʉ́ pøngahyą Oją nɛ xʉn ngu yʉ tsꞌʉtꞌabi mi ꞌbʉi, mi nde da nuꞌa guín nuhʉ ya, nɛ da ꞌyøꞌa guí øhmbʉ ya, pɛ him bi zä, bi ꞌyɛ̨mpꞌʉ yʉ́ xädi ra Jesús.
Rán tꞌuti a ran ꞌyohʉ bi huɛ̨c rá mijąꞌiui
25 Nɛ bi zøm bʉ ꞌbʉh ra Jesús nꞌda ra xänbate niją, im bɛ̨ni da zäꞌa ra Jesús, nɛ bi ꞌyänni:
―Xänbate i, ꞌbɛꞌa sä ga øtꞌä nꞌdahma din jagä ra te maząi, bi ꞌyɛ̨na.
26 ―Bɛꞌa mam bʉ ja yʉ́n tꞌɛ̨di ra Moisés, bi ꞌyɛ̨nꞌa ra Jesús.
27 Nuꞌa ra xänbate niją bi ꞌyɛ̨na:
―I mam bʉ: “Gam bɛ̨mhbʉ Oją ra Hmu ngue gätho ma mbʉihʉ nɛ gätho ma tehʉ, nɛ gätho ma tsꞌɛdihʉ, nɛ gätho man ꞌyomfɛ̨nihʉ, nɛ ga huɛ̨c ma mijąꞌihʉ tengu bʉ nan huɛ̨c zɛhɛhʉ,” i ɛ̨n rán tꞌɛ̨di Oją, bi ꞌyɛ̨nꞌa ra xänbate niją.
28 Bi dąꞌa ra Jesús bʉya:
―Majuąni guí ma. Nuya gui ꞌyøtꞌʉ nɛ din jaꞌa ra te maząi, bi ꞌyɛ̨mbi.
29 Nu ra xänbate niją mi pąpʉ mbo rá mbʉi ngue hinga gueꞌa mí øtꞌe, nɛ bi ꞌyɛ̨mthoho:
―Pɛ toꞌo ma mijąꞌiꞌbe ga huɛ̨cä, bi ꞌyɛ̨nꞌa.
30 Nɛ nuꞌa ra Jesús bi xiꞌa nꞌda ran tꞌuti nɛ bi ꞌyɛ̨mbi:
―Nu nꞌda ran ꞌyohʉ mi ꞌyo bʉ ja ra ꞌyu, bí nɛxpʉ Njerusalén ní mba bʉ Jericó. Nɛ nuꞌʉ ꞌda yʉ bɛ̨ bi gorpaꞌyu nɛ bi ʉnbaꞌa ran ꞌyohʉ, nɛ gätho ʉ yʉ́ pahni mi he bi gąspi nɛꞌa rá mbɛti. Nɛ bi zopʉ ndenꞌyu a ran ꞌyohʉ bʉya, ɛ̨na da du. 31 Nɛ bi thopʉ nꞌda ra mbäją, nɛ bi nuꞌa ran ꞌyohʉ ꞌbɛm bʉ pɛ bi mbäcthoho. 32 Nɛꞌa manꞌda ran ꞌyohʉ, ra mbɛfi bʉ ra niją a, bi thopʉ, bi nuꞌa ran ꞌyohʉ ꞌbɛm bʉ, nɛꞌa bi mbäcthoho tengu bi ꞌyøtꞌ ra mbäją. 33 Pɛ nuꞌa nꞌda ran ꞌyohʉ, ra mɛngu Samaria, ꞌbʉ mi thopʉ bʉya, bi nu mi ꞌbɛm bʉ a ran ꞌyohʉ, nɛ bi huɛ̨cꞌa. 34 Nɛ bi xispa ra aceite nɛ ra vino bʉ xí tsꞌɛrbi, nɛ bi mbantpa ra ꞌbøꞌtꞌe. Nɛ bi ꞌyɛ̨xa rá fani bʉya, bi zixpʉ ja nꞌda ra ngunꞌoi nɛ bi jamansuꞌa. 35 Nɛ nuꞌbʉ mi hyatsꞌi, bi thopʉ ní mba, nɛ bi zocpi tsꞌʉ ra mbɛti a ra mɛngu bʉ, nɛ bi xifi di jamansuꞌa ran ꞌyohʉ, nɛ da gurpa rá gasto ꞌbʉ hin dí guaꞌa ꞌbʉ bá peng bʉ ní mba, bi ꞌyɛ̨nꞌa ra Jesús ꞌbʉ mi man ran tꞌuti.
36 Nubʉya bi ꞌyänꞌna ra xänbate niją:
―Xiya, ndaꞌa nín ꞌyohʉ bi ꞌyørpa ran huɛ̨cate rá mijąꞌiui.
Bi dąꞌa ra xänbate niją:
37 ―Nuꞌa bi mbätsꞌi.
Nu ra Jesús bi ꞌyɛ̨mpꞌa bʉya:
―Ní mba din jabʉ gui ꞌyørpa ni mijąꞌihʉ, bi ꞌyɛ̨mbi.
Parábola del Buen Samaritano
Ra Jesús bi mba bá nuꞌa ra Marta nɛ ra María
38 Ra Jesús nɛꞌʉ yʉ́ xädi mi ꞌyo bʉ ja ra ꞌyu ní mba bʉ ja ra hnini Jerusalén, nɛ bi zøm bʉ ja nꞌda ra hnini guepʉ ꞌbʉꞌa nꞌda ra xisu í Marta a. Nɛ nuꞌa ra Marta bi xiꞌʉ din säya bʉ ja rá ngu. 39 Nɛ mi ꞌbʉpʉ nꞌda rá juhuɛ í María. Nuꞌa mi hupʉ i yą ra Jesús, bi ꞌyøꞌa bi manꞌa. 40 Pɛ nuꞌa ra Marta, xʉn ngu ra ꞌbɛfi i øtꞌe. Nɛ bi ꞌyɛ̨mpꞌa ra Jesús:
―Ma Hmuꞌi, ha hin guí ʉrpa ra güɛnda ꞌbɛꞌa øtꞌ ma cu, ndeꞌbʉ gui xifi di zɛqui, bi ꞌyɛ̨mbi.
41 Nu ra Jesús bi dątꞌa: