Nu ra Jesús bi mbɛhni ꞌdɛꞌmayoho yʉ́ xädi da mampꞌa rám hma
9
Nu ra Jesús bi zohnꞌdʉ ꞌdɛꞌmayoho yʉ́ xädi nɛ bi un yʉ́n tꞌɛ̨di ngue da hyønꞌa thi yʉ zįthu in ꞌyohʉ ꞌda yʉ jąꞌi, nɛ di hocua yʉn ʉ i hɛ̨mb yʉ jąꞌi. 2 Nɛ bi mbɛhnꞌdʉ yʉ́ xädi din ꞌyo bʉ ja yʉ hnini bʉ, nɛ da mam bʉ ꞌbɛpʉ ní manda rá tsꞌɛdi Oją, nɛ di hoc yʉn zämanꞌʉ. 3 Nɛ bi xiꞌʉ hin te da hyątsꞌi, nɛ hin da hyąx rá tøhø xíng ra mbɛti xínga gue miꞌda yʉ́ pahni. Da mbatho. 4 Nɛ bi ꞌyɛ̨mpꞌʉ:―Høntꞌa toꞌo rá ngu bʉ guí cʉthʉ, gam ꞌbʉhmbʉ bʉ gueꞌbʉ go gá thohmbʉ bʉ ja manꞌda ra hnini. 5 Nɛ nuꞌbʉ gá cʉthʉ bʉ ja ꞌda yʉ hnini nɛ hin da ꞌyømanho yʉ jąꞌi bʉ ꞌbɛꞌa guí mamhbʉ bʉ, nɛ ꞌbex gui pømhbʉ bʉ ja yʉ hnini nɛ gui huąjʉ rá häi i pät ni mbonguahʉ, ra hmɛpya ngue gui zohmbʉ bʉ ʉ, bi ꞌyɛ̨nꞌa ra Jesús.
6 Nu yʉ xädi bʉya bi mba hønbʉ go hapʉ ja yʉ hnini nɛ bi mam bʉ ran ho maꞌdaꞌyo. Nɛ bi hoc yʉ hyɛ̨nni.
Nu ra Herodes bi ma bi hyɛcpa rá ꞌyʉga ra Xuua Nxixyą
7 Nɛ mí øꞌa ra tsꞌʉtꞌabi Herodes ꞌbɛꞌa gätho i øtꞌa ra Jesús, nɛ bi hyonya thoho. Nguetho nuꞌʉ ꞌda yʉ jąꞌi bi bɛ̨ni gueꞌa ra Xuua Nxixyą a, gue bi ndantsꞌ mahønꞌa. 8 Nuꞌʉ miꞌda bi bɛ̨ni gue gueꞌa ra Elías a ra Jesús, uague manꞌda rá pøngahyą Oją ngue bi dąmbɛ̨ni. 9 Pɛ nuꞌa ra Herodes bi ꞌyɛ̨na:
―Nugä dá manda bi thɛcpa rá ꞌyʉga ra Xuua Nxixyą, janangueꞌa dí pądi hinga gueꞌa ra Xuua a guí mamhbʉ. Pɛ toꞌo maha a, bi ꞌyɛ̨nꞌa ra Herodes.
Janangue ɛ̨mmɛ min nde da nusɛ a ra Jesús.
Nu ra Jesús bi ꞌuįnꞌʉ cʉtꞌa mahuąhi yʉ jąꞌi
10 Nu yʉ́ xädi bʉya bá peng bʉ xí ꞌbɛhni, nɛ bi xih ra Jesús ꞌbɛꞌa bi ꞌyørpʉ bin ꞌyo. Nɛ nuꞌa ra Jesús bʉya bi mbäsɛhʉ yʉ́ xädi bʉ ja ra hnini Betsaida. 11 Pɛ nuꞌbʉ mi bąꞌʉ yʉ jąꞌi hapʉ ní mba a ra Jesús, bi dɛnni. Nɛ nuꞌa ra Jesús bi zomanho ʉ ꞌbʉ mi zʉdi, nɛ bi xiꞌʉ bʉya ꞌbɛpʉ ní manda rá tsꞌɛdi Oją, nɛ bi hocꞌʉ gätho yʉn zämanꞌʉ.
12 Pɛ nuꞌbʉ mi tsꞌʉtho da yʉh ra hyadi, gätho ʉ ꞌdɛꞌmayoho yʉ́ xädi ra Jesús bi xifi da ꞌyɛtꞌ yʉ jąꞌi, da mba bʉ nꞌdanni ja yʉ hnini, din sihmɛ bʉ nɛ bá opʉ ꞌbʉ bin xui. “Nguetho hinꞌyʉ ꞌbɛꞌa da zi ua maꞌueni, ” ɛ̨nꞌʉ.
13 Pɛ nuꞌa ra Jesús bi ꞌyɛ̨mpꞌʉ yʉ́ xädi:
―Pɛ nuꞌa zɛhɛhʉ gui ꞌuįmhbʉ.
Nuꞌʉ yʉ xädi bʉya bi ꞌyɛ̨mpꞌa ra Jesús:
―Pɛ høntꞌʉ cʉtꞌa yʉ hmɛ nɛ yoho yʉ tꞌʉhuą i ja ua. Pɛ hinda høn ꞌbʉ ga tämhbe miꞌda yʉ hmɛ, sä ga ꞌuįmhbe gätho yʉ jąꞌi i ꞌbʉcua bʉya.
14 Nguetho mbɛ cʉtꞌa mahuąhi mi ꞌbʉpʉ yʉn ꞌyohʉ. Nuꞌa ra Jesús bʉya bi xiꞌʉ yʉ́ xädi di japi ꞌda nꞌdanni da hyuꞌi yote ma ꞌdɛtꞌa yʉ jąꞌi. 15 Nɛ bi hyu pʉ ya gätho tengu xi xifi. 16 Nɛ nuꞌa ra Jesús bi hyąnꞌa ra hmɛ nɛ yʉ huą, bi ndøsꞌ mahɛ̨tsꞌi, nɛ bi jąpꞌʉ. Nɛ bi xɛni bi un yʉ́ xädi di darpa ʉ yʉ jąꞌi. 17 Nɛ gätho na ngu yʉ jąꞌi bin niyą nɛ bi bong thoho, ꞌdɛꞌmayo ꞌbøtsꞌe bi mbɛsꞌʉ yʉ́ xädi.
Jesús Alimenta a 5,000
Nu ra Pedro bi ma gueꞌa ra Jesús ra Cristo
18 Nꞌda ra pa bin yąsɛui Oją ra Jesús, min ꞌyohʉ ʉ yʉ́ xädi. Nuꞌbʉ mi guaꞌa bin yąui Oją, bi ꞌyänꞌdʉ yʉ́ xädi:
―ꞌBɛꞌa man yʉ jąꞌi nanguecä, ꞌbɛꞌa im bɛ̨nꞌʉ toꞌogä.
19 Nu yʉ́ xädi bi ꞌyɛ̨mpꞌa:
―Nuꞌʉ ꞌda i ma gueꞌe grá Xuua Nxixyą. Nɛ nuꞌʉ miꞌda i ma gueꞌe gra Elías, nɛ nuꞌʉ miꞌda i ma gueꞌe manꞌda ra pøngahyą mi ꞌbʉh mayaꞌbʉ ngue bi dąmbɛ̨ni, bi ꞌyɛ̨nꞌʉ.
20 Nɛ nuꞌa ra Jesús bi ꞌyänzɛhɛ yʉ́ xädi:
―Pɛ xi ahʉ, ꞌbɛꞌa guím bɛ̨mhbʉ toꞌogä.
Nɛ nuꞌa ra Pedro bi ꞌyɛ̨mbi:
―Nuꞌi gra Cristo rá Thahni i Oją, bi ꞌyɛ̨mbi.
21 Nɛ nuꞌa ra Jesús bʉya bi hɛcpa yʉ́ xädi njon da xifi toꞌo a.
Nu ra Jesús bi man rán dąte
22 Nɛ bi ꞌyɛ̨mpꞌʉ:
―Nugä ngue dán jąꞌigä ua ja ra ximhäi, i jatho ga nu ran ʉnbi xʉn ngu. Nu ma ngʉrpihʉ yʉ dącꞌyɛi nɛ yʉ ngʉrpa mbäją nɛ yʉ xänbate niją hin da ꞌyɛ̨cꞌyɛigui. Nɛ nuꞌʉ da hyogä ʉ, pɛ ná hyu pa ga thąmbɛ̨nigä nɛ dam ꞌbʉi mahønꞌa, bi ꞌyɛ̨nꞌa ra Jesús.
Pedro Declara a Jesús como Cristo
23 Nɛ manꞌda bi xiꞌʉ yʉ́ xadi, bi ꞌyɛ̨mpꞌʉ:
―Toꞌo gätho in nde da dɛngui da hyɛh rán tꞌɛ̨di zɛhɛ nɛ da hyät yʉn ʉnbi nꞌda pa ngu nꞌda pa, madague da tho. Nɛ da bɛ̨ni tengu dím bɛ̨ngä. 24 Pɛ nuꞌbʉ ꞌbʉ a nꞌda im bɛ̨n rá te, nɛ i su da nu yʉn ʉnbi, pɛ da nu ran ʉnbi maząi a. Pɛ nuꞌa hinguim bɛ̨n rá te madague da tho ꞌbʉ da dɛngä, di pøh rá te a. 25 Hin te di muui nꞌda ran ꞌyohʉ ꞌbʉ da ꞌyøtꞌe rá mbɛti ꞌbɛꞌa gä i ja ua ja ra ximhäi, ꞌbʉ hin da dįnꞌa ra temaząi.
26 Nɛ nuꞌa gätho toꞌo i pɛsꞌ rá sä nanguecä nɛ nangue mam hmangä, nɛcä hín ga ɛ̨mbi ma tꞌʉhni ʉ ꞌbʉ bá ɛ̨cä ua nɛ gan ꞌyohe yʉ́ hoga mꞌbɛhni Oją mahɛ̨tsꞌi, nɛ din jagä rá tsꞌɛdi Oją ma Ta, nugä ngue dán jąꞌigä ua ja ra ximhäi. 27 Pɛ majuąni dí xi ahʉ, ꞌbʉcua ꞌda hin da nu ran dąte asta gueꞌbʉ go di dʉꞌmi di manda rá tsꞌɛdi Oją ua ja ra ximhäi.
Ra Jesús ꞌdanꞌyo bʉ í nɛqui bʉ ja ra tꞌøhø
28 Mbɛ ná hyąto pa bʉya, ra Jesús bi mbähä bʉ ja nꞌda ra nyuni ra Pedro, ra Jacobo nɛ ra Xuua, ngue din yąui Oją. 29 Nɛ nuꞌbʉ min yąui Oją a ra Jesús, ꞌdanꞌyo bʉ í nɛqui a rá hmi nɛ nu rá pahni ɛ̨mmɛ xʉn tꞌaxi, di fɛxni a. 30 Nɛ ꞌbex bi nɛqui bʉ ra Moisés nɛ ra Elías bin yąhʉ ra Jesús, mi ꞌbʉh mayaꞌbʉ ʉ. 31 Nɛ bi hyärpʉ nꞌda ran nɛqui hapʉ mi ꞌbä ʉ. Nɛ nuꞌʉ bi mamhbʉ ꞌbɛꞌa da tꞌørpa ꞌbʉ bi tho bʉ Jerusalén a ra Jesús. 32 Pɛ nuꞌa ra Pedro nɛꞌʉ min ꞌyohʉ bi zʉh ra tꞌąha ʉ, pɛ nuꞌbʉ min nuhu bi nu di hyärpʉ nꞌda ran nɛqui bʉ ꞌbäh ra Jesús nɛ ra Moisés nɛ ra Elías. 33 Nɛ nuꞌbʉ ma guepʉ da mba ra Moisés nɛ ra Elías, nu ra Pedro bi ꞌyɛ̨na:
―Ma Hmu i, ɛ̨mmɛ xʉn ho ngue dí ꞌbʉhmbʉ ua ya, ga høcähe hyu yʉ tꞌʉngu, ꞌdaꞌa nꞌda ni mbɛtihʉ. Nuꞌi, nɛ ra Moisés nɛ ra Elías, bi ꞌyɛ̨na.
Pɛ him mim bɛ̨nꞌa mi manꞌa. 34 Nɛ nuꞌbʉ mi ꞌyɛ̨nꞌa ra Pedro, ꞌbex bá cą nꞌda ra güi bi goꞌma ra Moisés nɛ ra Elías, nɛ ɛ̨mmɛ bin suꞌʉ yʉ́ xadi ra Jesús. 35 Nɛ bi tꞌøpʉ nꞌda ra nde bʉ ja ra güi ngue bi ꞌyɛ̨na:
―Nuna ma tsꞌʉntꞌʉ dadí huɛ̨cä na, dami ꞌyøhmbʉ ꞌbɛꞌa i man na, bi ꞌyɛ̨nꞌa ra nde.
36 Nɛ nuꞌbʉ mi guaꞌa bi manꞌa ra nde bʉ ja ra güi, nu yʉ xädi bi nu ꞌbäsɛ bʉ ra Jesús. Nɛ nuꞌʉ yʉ xädi, njom bi xiꞌʉ ꞌbɛꞌa bi nuꞌʉ.
La Transfiguración
Ra Jesús bi hocꞌa nꞌda ra tꞌʉhni min ꞌyoui ra zįthu
37 Nuꞌbʉ mi hyax bʉya, bi gąpʉ ja ra nyuni ra Jesús nɛꞌʉ hyu yʉ́ xädi min ꞌyohʉ. Nɛ xʉn ngu yʉ jąꞌi bin cꞌathʉ ra Jesús. 38 Nu nꞌda ran ꞌyohʉ ntsꞌɛdi bi mbafi:
―Xänbate i, nurqui tsꞌʉ ma tsꞌʉntꞌʉ nguetho hønna zʉ nꞌdatho dí si. 39 Nɛ jaꞌbʉ im bɛnt ra zįthu nɛ ɛ̨mmɛ di ʉnba a, i tɛxa hai, nɛ ɛ̨mmɛ mbafi, nɛ di fɛt rá jąꞌi , nɛ i soh yʉ fʉgui. Nɛ ząi di ja bʉ ra zįthu. 40 Nɛ dá xiꞌʉ ni xädi di hoqui, pɛ nuꞌʉ him bi zä bi hoqui, bi ꞌyɛ̨nꞌa ran ꞌyohʉ.
41 Nu ra Jesús bi ꞌyɛ̨mpꞌʉ:
―Nuꞌahʉ guextaꞌa hin guí ɛ̨cꞌyɛihʉ ꞌbɛꞌa dí xi ahʉ. Hamꞌmi pa ngue ga tøpꞌa thohohʉ ngue gui ꞌyɛ̨cꞌyɛigahʉ.
Nɛ xø bi ꞌyɛ̨mpꞌa ran ꞌyohʉ bʉya:
―Bá si ua ni tsꞌʉntꞌʉ.
42 Nɛ nuꞌbʉ bá si ra tsꞌʉntꞌʉ, bi bɛnt mahønꞌa a ra zįthu, bi dɛxa häi nɛ ntsꞌɛdi bi ʉnbi. Pɛ nuꞌa ra Jesús bi xiꞌa ra zįthu da bøni, nɛ bi hocꞌa ra tsꞌʉntꞌʉ bʉya. Bi xiꞌa rá ta da zix bʉya. 43 Nɛ gätho yʉ jąꞌi bi hyonya thoho a rá tsꞌɛdi Oją.
Jesús sana a un muchacho del espíritu del mal
Ra Jesús bi ma mahønꞌa rán dąte
Nɛ guextaꞌa i yą ʉ yʉ jąꞌi nɛ i ma ꞌbɛꞌa gätho i øtꞌa ra Jesús. Nu ra Jesús bʉya, bi ꞌyɛ̨mpꞌʉ yʉ́ xädi:
44 ―Dami ꞌyøhmbʉ xʉn ho a dí xi ahʉ ya, nugä ngue dán jąꞌigä ua ja ra ximhäi, da mba ma dägä bʉ ꞌbʉh yʉ tsꞌomꞌbäi, bi ꞌyɛ̨mbi.
45 Pɛ nuꞌʉ yʉ́ xädi him mi pądi ꞌbɛꞌa nam bønꞌa i manꞌa ra Jesús, nguetho Oją hin ní japi da bąꞌʉ, nɛ bi zu da ꞌyänꞌna ra Jesús ꞌbɛꞌa nam bønꞌa bi manꞌa.
Ra Jesús bi ꞌyut yʉ́ xädi ndaꞌa dim ꞌbɛtꞌo
46 Nuꞌʉ yʉ́ xädi bin junzɛhɛ ʉ nangueꞌa toꞌo dim ꞌbɛtꞌo. 47 Nɛ nuꞌa ra Jesús mi pądi ꞌbɛꞌa mim bɛ̨n ʉ, nɛ bá si nꞌda ra tꞌʉhni bi mbämpꞌʉ i ꞌbäi, 48 bi ꞌyɛ̨mpꞌʉ yʉ́ xädi:
―Høntꞌa go toꞌo da zimanho nꞌda ra tꞌʉhni tengu na ngue i ɛ̨cꞌyɛigui, nɛcä bi zimanhog ꞌbʉ ya bi ꞌ yøtꞌa. Nɛ toꞌo bi zimanhogä nam bøni bi zimanho ma Ta. Nɛ nuꞌa toꞌo i øtꞌe ngue nte di muui, gueꞌa dim ꞌbɛtꞌo a, bi ꞌ yɛ̨nꞌa ra Jesús.
Nuꞌʉ hingui sʉjʉ, ma amigohʉ ʉ, bi ꞌyɛ̨nꞌa ra Jesús
49 Nu ra Xuua bʉya bi xiꞌa ra Jesús, bi ꞌyɛ̨mbi:
―Nugähe dá nuhe nꞌda ran ꞌyohʉ bi ndønꞌna ni thuhu ꞌbʉ mi hyønꞌa thi yʉ zįthu, nɛ dá hɛcuahe nguetho him man ꞌyogähe a ran ꞌyohʉ.
50 Pɛ nuꞌa ra Jesús bi ꞌyɛ̨mbi:
―Ndeꞌbʉ hin xquí hɛcuahʉ, nguetho nuꞌʉ hingui sʉjʉ ma amigohʉ ʉ, bi ꞌyɛ̨mbi.
Nu ra Jesús bi dąmhyą ra Jacobo nɛ ra Xuua
51 Nɛ ya mi tsꞌʉtho da zøn ra pa da mba mahɛ̨tsꞌi ra Jesús. Nɛ bi nde bi mba bʉ Jerusalén, madague i pądi da mba ma ʉnbi bʉ. 52 Nuꞌbʉ mi mba bʉ ꞌyu, bi xifi da thoꞌʉ ꞌda yʉ́ xädi, da hyonbi hapʉ din säya. Nɛ nuꞌʉ yʉ́ xädi bʉya, bi yʉrpʉ ja nꞌda ra hnini bʉ ra xɛqui Samaria. 53 Pɛ nu yʉ jąꞌi bʉ hinguin ndepe din säya bʉꞌa ra Jesús, nguetho him bi numanho ngue ní mba ba nu ra dąmpɛti bʉ Jerusalén. 54 Nɛ nu ra Jacobo nɛ ra Xuua ɛ̨mmɛ bin cuɛ ꞌbɛꞌa bi man yʉ jąꞌi bʉ bʉya. Nɛ bi ꞌyɛ̨mpꞌa ra Jesús:
―Ha guín nde ngue ga mandagäꞌbe ra sibi ba cąh mahɛ̨tsꞌi, nɛ din zøꞌʉ gätho ꞌbʉcua, bi ꞌyɛ̨nꞌʉ.
55 Pɛ nu ra Jesús bi dąmhyą ʉ yʉ́ xädi bʉya, gue hingui ho a im bɛ̨nꞌʉ. 56 Nɛ bi thopʉ manꞌda ra hnini bʉya.
Hyu yʉn ꞌyohʉ ɛ̨na da dɛnꞌna ra Jesús
57 Nɛ nuꞌbʉ mi ꞌyo bʉ ꞌyu ra Jesús bi ꞌyɛ̨nꞌa nꞌda ran ꞌyohʉ:
―Ma Hmu i, nugä ga tɛnꞌni i hønbʉ go hapʉ guí mba, bi ꞌyɛ̨mbi.
58 Nu ra Jesús bi ꞌyɛ̨mpꞌa:
―Nu yʉ haho i ja yʉ́ oi bʉ ja yʉ hyądo, nɛ yʉ doja i ja hapʉ din säya ʉ, pɛ nugä ngue dán jąꞌigä ua ja ra ximhäi, hin hapʉ i jasɛ ma oigä ua, bi ꞌyɛ̨mbi.
59 Nu ra Jesús bʉya, bi ꞌyɛ̨mpꞌa manꞌda ran ꞌyohʉ:
―Dami tɛngui, bi ꞌyɛ̨mbi.
Pɛ nuꞌa ran ꞌyohʉ bi ꞌyɛ̨m bʉya:
―Grá Hmu, ꞌbɛ ga äcä ma ta ꞌbʉ bi du.
60 Nu ra Jesús bi ꞌyɛ̨mbi:
―Pɛ gueꞌʉ hingui ja ra te maꞌdaꞌyo, da ꞌyäꞌʉ xøn du. Pɛ nuꞌi gui tɛngui, gui xih yʉ jąꞌi ꞌbɛpʉ ní manda rá tsꞌɛdi Oją.
61 Xø manꞌda ran ꞌyohʉ bi ꞌyɛ̨mpꞌa ra Jesús:
―Ma Hmu i, dín nde ga tɛnꞌni i, pɛ ꞌbɛ ga mbagä bʉ ma ngu dan ꞌyɛ̨ꞌbe ma ta nɛ ma mbe.
62 Pɛ nu ra Jesús bi ꞌyɛ̨mbi:
―Gätho toꞌo ɛ̨na da dɛngui nɛ im bɛ̨nꞌa bi zogui, hing yʉ́n sähʉ bʉ di manda rá tsꞌɛdi Oją ʉ. Nuꞌa i øtꞌʉ tengu øtꞌa nꞌda ran ꞌyohʉ ꞌbʉ i hɛnhäi nɛ in yɛ̨h rá xʉthä, hingui uɛ̨ntho yʉ́ the i hɛqui.