Ra Jesús bi hocpa rá ꞌyɛ̨hɛ nꞌda ra hmudofʉi
7
Nɛ nuꞌbʉ mi guaꞌa manꞌa ra Jesús, bi mba mahønꞌa bʉ ja ra hnini Capernaum. 2 Nɛ mi ꞌbʉpʉ nꞌda ra hmudofʉi, ra mɛngu bʉ Roma a. Nɛ xʉnꞌʉ nꞌda rá ꞌyɛ̨hɛ, nde da du. Nɛ nuꞌa ra hmudofʉi ɛ̨mmɛ madi huɛ̨cꞌa rá ꞌyɛ̨hɛ. 3 Nɛ nuꞌbʉ mi ꞌyøde ꞌbʉpʉ ra Jesús bá pɛhni ꞌda yʉ ngʉrbi bʉ ja ra hnini ngue da zixꞌa ra Jesús di hocpa rá ꞌyɛ̨hɛ. 4 Nɛ nuꞌbʉ mi zøm bʉ ꞌbʉh ra Jesús, bi ꞌyäp ra mate da mba, nɛ bi ꞌyɛ̨mbi:―Dín nde gui ꞌyørcahe ra mate gui mba, nguetho nuꞌa ra hmudofʉi ra hocjąꞌi a, 5 nɛ ɛ̨mmɛ di huɛ̨gahʉ ngue dyʉ judíohʉ. Nɛ nuꞌa bi guzɛhɛ a í thøh ma nijąhʉ, madague hing ra judío a, bi ꞌyɛ̨mbi.
6 Nu ra Jesús bi mbähä, nɛ nuꞌbʉ mi tsꞌʉtho da zøm bʉ ja rá ngu a ra hmudofʉi, pɛ nuꞌa ra hmudofʉi bá pɛhni ꞌda yʉ́ amigo mahønꞌa, din cꞌathʉ a ra Jesús, da ꞌyɛ̨mbi:
―Hingui jatho gui søm bʉ ja ma ngu, nguetho nugä hin dí sucä tengu i, 7 xíngui sä ga ɛ̨na ga mba gan yąui, nɛ hin drá judíogä. Pɛ dí pądi ngue i ja ni tsꞌɛdizɛhɛ, ngue nuꞌbʉ guim ma da yąni, nɛ ꞌbex gue da yąni. 8 Tengu thohogä bin ꞌdacꞌi tsꞌʉ man tꞌɛ̨di, nɛ nuꞌbʉ i ja ꞌbɛꞌa dí xi ʉ ma dofʉi, nɛꞌʉ ma ꞌyɛ̨hɛ, ꞌbexgue ꞌdahmantho in ja. Nɛ ngutho i, sä guim mantho bʉ guí ꞌbäi nɛ ꞌbexgue da yąn bʉya, bi ꞌyɛ̨nꞌa ra nde bá pɛhna ra hmudofʉi ngue bi manꞌʉ yʉ́ amigo. 9 Nu ra Jesús bi hyonya thoho ꞌbʉ mi ꞌyøꞌa bi manꞌʉ yʉn ꞌyohʉ ngue bá pɛhna ra hmudofʉi, nɛ bin yɛ̨gui bi xiꞌʉ mí tɛnni, nɛ bi ꞌyɛ̨na:
―Xínga nꞌda ma mijudíohʉ dá tįngä ngue i ɛ̨cꞌyɛi i ja ma tsꞌɛdi tengu a ran ꞌyohʉ, bi ꞌyɛ̨nꞌa ra Jesús. Nuya bin ja a bi ꞌyäqui, bi ꞌyɛ̨na.
10 Nɛ bi mbeng bʉ ja ra ngu ʉ yʉ́ amigo a ra hmudofʉi bʉya, nɛ bi nuꞌa rá ꞌyɛ̨hɛ ra hmudofʉi ngue ya xí zä.
Nu ra Jesús bi xox rá tsꞌʉntꞌʉ nꞌda ra xisu xí du rá ndø
11 Manꞌda ra pa bʉya, ra Jesús bi mbähä yʉ́ xädi bʉ ja ra hnini Naín. Nɛ xʉn ngu yʉ jąꞌi mi tɛnni. 12 Nɛ nuꞌbʉ mi zøm bʉ ndehnini, ba ɛ̨pʉ yʉ ꞌyägui, ba tu rá tsꞌʉntꞌʉ nꞌda ra xisu xí du rá ndø. Nɛ njoꞌo manꞌda rá tsꞌʉntꞌʉ. Nɛ xʉn ngu yʉ jąꞌi min ꞌyohʉ yʉ ꞌyägui. 13 Nɛ nu ra Jesús ꞌbʉ mi nu a ra xisu bʉya, bi huɛ̨cꞌa nɛ bi ꞌyɛ̨mbi:
―O guí zoni, ɛ̨nꞌa.
14 Nɛ nubʉya, bi däꞌa ra huada mi o ra du a ra Jesús nɛ bim ꞌbäꞌʉ yʉn dute. Nu ra Jesús bi ꞌyɛ̨mpꞌa ra du bʉya:
―Grá tsꞌʉntꞌʉ, dami ndantsꞌi, bi ꞌyɛ̨mbi.
15 Nɛ nuꞌa xí du ꞌbex bi ndants pʉ ja rá huada nɛ bin yą. Nu ra Jesús bʉya, bi xiꞌa rá mbe da zitsꞌi. 16 Nɛ gätho yʉ jąꞌi mi ꞌbäpʉ bin su, nɛ bi ꞌyɛ̨spa Oją ʉ.
―Nuya, nꞌda ra pøngahyą nuįxte dí ꞌbʉhmbʉ ua, nɛ Oją da yąnjʉ ya, yʉ́ jąꞌigähʉ Oją ya, bi ꞌyɛ̨nꞌʉ.
17 Nɛ gätho yʉ jąꞌi mi ꞌbʉpʉ, nɛpʉ ra xɛqui Judea, bi ma ꞌbɛꞌa bi ꞌyøtꞌa ra Jesús.
Juan el Bautista en Prisión
Ra Xuua Nxixyą bi mbɛhni ꞌda da ꞌyänni toꞌo a ra Cristo
18 Nɛ bi siꞌa ra Xuua Nxixyą ꞌbɛꞌa bi ꞌyøtꞌa ra Jesús, bi man ʉ yʉ́ xädi. 19 Janangueꞌa nu ra Xuua bi zonꞌdʉ yoho yʉ́ xädi ngue da mbɛn bʉ ꞌbʉh ra Jesús nɛ da ꞌyänni: “Ha gueꞌe ra Cristo mi hma ba ɛ̨hɛ, uague ga thoqui ga tømhbe,” gui ꞌyɛ̨nui, bi ꞌyɛ̨nꞌa ra Xuua. 20 Nɛ nuꞌbʉ mi dįnꞌa ra Jesús ʉ yʉ́m ꞌbɛhni ra Xuua, bi ꞌyɛ̨mbi:
―Nuꞌa ra Xuua Nxixyą bá pɛngäꞌbe nguetho in nde da bądi gueꞌbʉ gueꞌe ra Cristo i hma ba ɛ̨hɛ, uague ga thoqui ga tømhbe, bi ꞌyɛ̨nꞌʉ.
21 Nɛ ꞌbex bi hocꞌʉ ꞌda yʉ hyɛ̨nni a ra Jesús bʉya, nɛ bi hyønꞌa thi yʉ zįthu ngue mín ꞌyohʉ ꞌda yʉ jąꞌi, nɛ bi xocpa yʉ́ dä yʉ xädä. 22 Nɛ nubʉya, bi ꞌyɛ̨mpꞌʉ yʉ́ xädi ra Xuua:
―Ní mbɛ ya, gui xihmi ra Xuua ꞌbɛꞌa gá nuui ua, nɛ ꞌbɛꞌa gá ꞌyøhmi ya. Gui ꞌyɛ̨nui: “Nu yʉ xädä i nu ran nɛqui ya, nɛ yʉ dogua i sä i ꞌyo ya, nɛ nuꞌʉ mi hɛ̨mb ra tꞌaxcaꞌya bi yąnꞌʉ ya, nɛ yʉ gogu i øhnahyą ya, nɛꞌʉ xí du bi ndantsꞌi, nɛ yʉ hyoya i øꞌa ran ho maꞌdaꞌyo ya. 23 Din johya ʉ toꞌo i ɛ̨cꞌyɛi xʉn ho, nɛ hin di ʉꞌtꞌ yʉ́ mbʉi ʉ,” gui ꞌyɛ̨nui, bi ꞌyɛ̨nꞌa ra Jesús.
24 Nɛ nuꞌbʉ mi mbencꞌʉ yʉ́m ꞌbɛhni ra Xuua bʉya, nu ra Jesús bi ma ꞌbɛꞌa øtꞌ ra Xuua, nɛ bi ꞌyɛ̨mpꞌʉ yʉ jąꞌi:
―Nuꞌbʉ gá mbähä bʉ maꞌueni ngue gá nuhʉ ra Xuua, ꞌbɛꞌa gá bɛ̨mhbʉ ngue gua nuhʉ bʉ. Ha guá nuhʉ nꞌda ran ꞌyohʉ xʉn güentꞌi tengu nꞌda ra xithi i ɛn ran dąhi. 25 Uague gá nuhʉ nꞌda ran ꞌyohʉ mi he ra pahni xʉm hmadi. Pɛ nuꞌʉ, ꞌbʉpʉ ja ra nguntsꞌʉtꞌabi ʉ. 26 Uague guá nuhʉ nꞌda rá pøngahyą Oją. Majuąni a gá nuhʉ, nɛ hinga høntꞌa nꞌda rá pøngahyą Oją, pɛ nuꞌa, xʉn hɛ̨tsꞌi rá tsꞌɛdi xinda gueꞌʉ miꞌda yʉ pøngahyą. 27 Gueꞌa ra Xuua i hmam bʉ ja rá søcuą Oją, gue i ɛ̨na:
Nugä, ga pɛhnꞌna nꞌda mam ꞌbɛhni dim ꞌbɛtꞌo bʉ gní mba, da xih yʉ jąꞌi da døpꞌe xʉn ho, i ɛ̨m bʉ ja rám hman Oją, bi ꞌyɛ̨nꞌa ra Jesús.
28 Xínga nꞌda ra jąꞌi mi ꞌbʉi ngue nuįxte rá ꞌbɛfi tengu ra Xuua. Pɛ nuꞌa toꞌo dim ꞌbʉpʉ di manda rá tsꞌɛdi Oją, nu rá ꞌbɛfi da ꞌyørpʉ madagueꞌa tsꞌʉtho, pɛ manꞌda nuįxte a xinda gueꞌa ra ꞌbɛfi i øtꞌ ra Xuua ya, bi ꞌyɛ̨nꞌa ra Jesús.
29 Nɛ nu yʉ hyącahäi nɛ miꞌda yʉ jąꞌi xí xixyąba ra Xuua Nxixyą, ꞌbʉ mi ꞌyø a bi man ra Jesús, bi bąꞌʉ xʉn ho i øtꞌ Oją. 30 Pɛ nu yʉ fariseo nɛ yʉ xänbate niją, ngue him bi ndeꞌa ran xixyą bi ꞌyøtꞌ ra Xuua, him bi numanhoꞌa bi nde Oją da ꞌyørpaꞌʉ. 31 Nɛ xø bi ꞌyɛ̨nꞌa ra Jesús:
―ꞌBɛꞌa nín tꞌuti ga xi ahʉ ngue gui pąhmbʉ ꞌbɛꞌa guí øthʉ. 32 Guí øthʉ tengu øtꞌ yʉ tꞌʉhni ꞌbʉ in ɛ̨ni nɛ i ɛ̨mpꞌʉ yʉ́ mitꞌʉhnihʉ: “Nugähe, dá pɛhmbe ra ꞌbida pɛ nuꞌahʉ hin gán nɛhmbʉ,” ɛ̨nꞌʉ ꞌda. Nɛ xø ɛ̨nꞌʉ miꞌda bʉya: “Pɛ nugähe, dá pɛhmbe yʉ thuhu tenguꞌbʉ xʉn du nꞌda, nɛ nu ahʉ hin gán zomhbʉ,” ɛ̨nꞌʉ miꞌda. 33 Nɛ ngutho guí øthʉ tengu øtꞌ yʉ tꞌʉhni, ngue nu ra Xuua Nxixyą bi zøcua, nɛ him bin sihmɛhʉ yʉ jąꞌi nɛ xím bi zi ra vino. Pɛ nu ahʉ gá ꞌyɛ̨mdahʉ in ꞌyoui ra zįthu. 34 Pɛ nugä, ngue dán jąꞌigä ua ja ra ximhäi, nɛ bá ɛ̨cä nɛ dí sihmɛhe yʉ jąꞌi, nɛ nu ahʉ sä guí ɛ̨njʉ drá hyʉgugä nɛ drá mihnigä, nɛ guí ɛ̨njʉ dín amigogähe yʉ ziyate hyącahäi nɛ yʉ tsꞌomꞌbäi. 35 Pɛ nuꞌbʉ majuąni i ja rán ꞌyomfɛ̨ni nꞌda, da bądi toꞌo ʉ ngue majuąni bi un rán ꞌyomfɛ̨ni Oją, bi ꞌyɛ̨nꞌa ra Jesús.
Nu ra Jesús bin sihmɛ bʉ ja rá ngu nꞌda ra fariseo í Simón
36 Nɛ nꞌda ran ꞌyohʉ mí tɛn rán xädi yʉ fariseo, bi xiꞌa ra Jesús din sihmɛ bʉ ja rá ngu. Nɛ bi mbähä ra Jesús bʉya, din sihmɛ bʉ. 37 Nɛ nuꞌa nꞌda ra xisu ra ꞌyomtꞌɛ̨ni a, nɛ nuꞌbʉ mi ꞌyøde ꞌbʉpʉ ra Jesús, bi yʉrpʉ mi hu a ra Jesús, i tu nꞌda ra xito án tꞌøtꞌe ra do alabastro, mi po ra ꞌyɛ̨thi yʉmanho, xʉm hmadi di muui. 38 Nɛ nuꞌa ra xisu mi hupʉ ja rá gua ra Jesús, nɛ mi zoni. Janangue bi mboxpʉ ja rá gua ra Jesús a rá guidä,nɛ bi ducua rá gua yʉ́ xtą, nɛ ɛ̨mmɛ zʉspa rá gua ra Jesús, nɛ bi xispa rá gua ra ꞌyɛ̨thi yʉmanho. 39 Nɛ nuꞌa ra mɛngu bʉ, ꞌbʉ mi nu ꞌbɛꞌa i øtꞌa ra xisu, bi bɛ̨nsɛ: “Him majuąni rá pøngahyą Oją a ra Jesús,” nguetho ɛ̨mbi hingui pądi ra ꞌyomtꞌɛ̨ni a ra xisu. 40 Nu ra Jesús bʉya, bi ꞌyɛ̨mpꞌa:
―Nuꞌi grá Simón i jaꞌa ga xiꞌi.
Nu ra Simón bi ꞌyɛ̨na:
―Gra xänbate, dami xic ꞌbʉ.
41 Nu ra Jesús bʉya, bi xih ra Simón nꞌda ran tꞌuti, nɛ bi ꞌyɛ̨mbi:
―Mi ꞌbʉ a nꞌda ran ꞌyohʉ ząi di hmih ra mbɛti. Nɛ mi ꞌbʉꞌa nꞌda ran ꞌyohʉ bi hmiti cʉtꞌa ciɛnto, nɛ manꞌda bʉya bi hmiti yote maꞌdɛtꞌa thoho. 42 Nɛ nuꞌʉ gätho yoho hinꞌyʉ ꞌbɛꞌa dí coꞌtsꞌa ra mbɛti xí mba ma hmiti. Janangue nuꞌa xí hmih ra mbɛti bʉya, bi punba thoho ʉ. Dami xic ya, Simón, ndaꞌa manꞌda da bɛ̨nꞌa ra mate bi tꞌørpe, bi ꞌyɛ̨nꞌa ra Jesús.
43 Nu ra Simón bi dąh pʉya, nɛ bi ꞌyɛ̨na:
―Masque gueꞌa ran ꞌyohʉ min dupate xʉn ngu, manꞌda da bɛ̨nꞌa ra mate bi tꞌørpe, bi ꞌyɛ̨na.
―Majuąni a guím bɛ̨ni, bi ꞌyɛ̨nꞌa ra Jesús.
44 Nu ra Jesús bʉya, bi hyɛ̨tꞌa ra xisu nɛ bi ꞌyɛ̨mpꞌa ra Simón:
―Guí nu na ra xisu ꞌbʉcua, nuꞌbʉ má cʉtꞌua ja ni ngu xíngui tsꞌʉ gá ꞌdac ra dehe gue xcá peꞌtꞌä ma gua, pɛ nu ra xisu i hucua, rá guidä í mbercä ma gua nɛ yʉ́ xtą í dugä ma gua. 45 Pɛ nuꞌi, hin gá sʉsca ma ꞌyogu ngue xquí zɛnguagui, pɛ nuna ra xisu him bin hɛ̨ a ní zʉsca ma gua. 46 Nɛ nuꞌi, hin gá cosca ma yą ra aceite, pɛ nuna ra xisu i hucua, bi xisca ma gua ra ꞌyɛ̨thi yʉmanꞌu. 47 Guehna dí xi a i na, xʉn ngu rá tsꞌoqui na ra xisu nɛ xʉn ngu rá punbi ya, janangue ɛ̨mmɛ im bɛ̨ngä na. Pɛ nuꞌʉ im bɛ̨nsɛ tsꞌʉtho ra punbi i honi, manꞌda tsꞌʉtho im bɛ̨ngä ʉ, bi ꞌyɛ̨nꞌa ra Jesús.
48 Nɛ nubʉya, bi ꞌyɛ̨mpꞌa ra xisu:
―Ya ma punbi ni tsꞌoqui ya, bi ꞌyɛ̨nꞌa ra Jesús.
49 Nɛ nuꞌʉ i sihmɛ bʉ bin ꞌyɛ̨mzɛhɛ ʉ:
―Toꞌo nín ꞌyohʉ na, gue i ɛ̨na sä di punba yʉ́ tsꞌoqui nꞌda, bin ꞌyɛ̨mzɛhɛ ʉ.
50 Pɛ nu ra Jesús bi ꞌyɛ̨mpꞌa ra xisu:
―Gá ꞌyɛ̨cꞌyɛigui, janangue ya ma punbi ni tsꞌoqui ya. Ní mba ya nɛ gan johya, bi ꞌyɛ̨mbi.
Mujer Pecaminosa Perdonada