ꞌDa yʉ mbahuą bi japꞌa ra Jesús xʉn ngu bi dɛ yʉ huą
5
Nɛ manꞌda ra pa, ra Jesús mi ꞌbäpʉ ja ndendądehe Genesaret. Nɛ ɛ̨mmɛ mi dʉ bʉ yʉ jąꞌi in nde da ꞌyøh rám hman Oją, nɛ hingui sä bʉ dim ꞌbäꞌa ra Jesús. 2 Nɛ bi nu, i høpʉ yoho yʉ mbosa hin te i ja bʉ mbo. Nɛ bi zoꞌʉ yʉ́ mbɛti bʉ ndenthe gueꞌbʉ mi mben yʉ́ xitꞌą. 3 Nuꞌa nꞌda, rá mbɛti ra Simón Pedro, nɛ bi hyuꞌa ra Jesús. Nɛ bi xiꞌa ra Simón da gonꞌi tsꞌʉ ra mbosa. Nɛ nu yʉ jąꞌi bim ꞌbäpʉ ndenthe ʉ. Nu ra Jesús bi xänba ʉ yʉ jąꞌi bʉya. 4 Nɛ nuꞌbʉ mi guaꞌa bi man ra Jesús bi ꞌyɛ̨mpꞌa ra Simón:―Dami thąm bʉ xʉn hɛ̨ ra dehe, nɛ gui ꞌyɛm bʉ ni xitꞌą. Guepʉ da zä gui thɛ yʉ huą.
5 Pɛ bi ꞌyɛ̨nꞌa ra Simón:
―Xänbate, gätho ra xui dám pɛhmbe nɛ hin te dá thɛhe yʉ huą, pɛ nuꞌbʉ guím ma, ga ɛmhbe mahønꞌa, bi ꞌyɛ̨na.
6 Nɛ bi ꞌyɛm bʉya, nɛ xʉn ngu bi dɛ yʉ huą gueꞌbʉ go mi mbʉdi bin tʉn yʉ́ xitꞌą. 7 Nɛ bi xiꞌʉ yʉ́ mimbahuąhʉ di zɛꞌi tsꞌʉ. Nɛ bi yutsꞌi gätho yoho yʉ́ mbosa, nɛ in nde da dom bʉ mbo ra dehe yʉ mbosa nangue nán hyʉ yʉ huą. 8 Nɛ nuꞌbʉ mi nu ra Simón Pedro ꞌbɛꞌa bin ja, bin dąnyahmu bʉ ja rá gua ra Jesús, nɛ bi ꞌyɛ̨mbi:
―Dami ꞌueꞌi tsꞌʉ nanguecä nguetho nugä drá dąditsꞌoquigä, bi ꞌyɛ̨nꞌa ra Pedro.
9 Ngubʉ bi ma nguetho bi hyonya thoho ngue xʉn ngu yʉ huą bi dɛ. 10 Nɛꞌa ra Jacobo nɛ ra Xuua ngue yʉ́ tsꞌʉntꞌʉ ra Zebedeo, bi hyonya thoho ʉ. Nɛ nuꞌʉ mi comhbʉ rá ꞌbɛfi a ra Pedro. Pɛ nu ra Jesús bi ꞌyɛ̨mpꞌa ra Simón:
―O guín su nɛ nuya gui dʉꞌmi gui hyon yʉ jąꞌi toꞌo da ꞌyɛ̨cꞌyɛigui, bi ꞌyɛ̨mbi.
11 Nɛ nuꞌbʉ mí zøm bʉ ndenthe ʉ yʉ́ mbosa bʉya, bi dɛnꞌna ra Jesús.
Captura Milagrosa de Peces
Nu ra Jesús bi hocꞌa nꞌda mí hɛ̨mb ra tꞌaxcaꞌya
12 Nu nꞌda ra pa mi ꞌbʉpʉ ja nꞌda ra hnini ra Jesús. Nɛꞌa nꞌda ran ꞌyohʉ mi ꞌbʉpʉ, mi hɛ̨mb ra tꞌaxcaꞌya gätho rá jąꞌi. Nɛ nuꞌa ran ꞌyohʉ ꞌbʉ mi nu a ra Jesús, ꞌbex bim ꞌbɛmfo bʉ ja rá gua ra Jesús, nɛ bi ꞌyäp ra mate ran ꞌyohʉ ngue in nde da yąni, bi ꞌyɛ̨mbi:
―Ma Hmu i nuꞌbʉ guín nde, da zä gui jaqui da yąngä.
13 Nu ra Jesús bi dąti nɛ bi ꞌyɛ̨mbi:
―Nugä, dín nde ngue ꞌbex da zä i. Nuya bi yąnꞌa ya, bi ꞌyɛ̨mbi.
ꞌBex bi zäꞌa ran ꞌyohʉ bʉya.
14 Nɛ nu ra Jesús bi hɛcua a ran ꞌyohʉ gue hin da mam bʉ ꞌbʉh yʉ jąꞌi, pɛ da mam bʉ ꞌbʉh yʉ mbäją. Nɛ bi ꞌyɛ̨mbi:
―Ní mba bʉ ꞌbʉh yʉ mbäją, gui ꞌyøtꞌa rán tꞌɛ̨di ra Moisés ngue da ꞌyøtꞌa nꞌda ꞌbʉ bi yąnꞌa ra tꞌaxcaꞌya, nꞌdahma da bąh yʉ jąꞌi ngue majuąni bi yąnꞌi, bi ꞌyɛ̨nꞌa ra Jesús.
15 Pɛ nuꞌʉ yʉ jąꞌi guemhma mi ma hønbʉ go hapʉ ja yʉ hnini ꞌbɛꞌa gätho øtꞌa ra Jesús, nɛ manꞌda xʉn ngu bi mba bʉ mi ꞌbʉi ngue da ꞌyøsɛ ʉ ꞌbɛꞌa i manꞌa, ngue in nde din hocpa yʉ́n ʉ i hɛ̨mpꞌi ꞌdaꞌʉ. Nɛ xʉn ngu bi hocꞌa ra Jesús, madagueꞌa høntꞌa go mán ʉ mi hɛ̨mpꞌʉ. 16 Nuꞌa ra Jesús bʉya mi pa bʉ maꞌueni guepʉ hingui ꞌbʉh yʉ jąꞌi, din yąui Oją.
Nu ra Jesús bi hocꞌa nꞌda mi tsꞌa rá jąꞌi
17 Nu nꞌda ra pa bi xänba yʉ jąꞌi ra Jesús. Nɛ mi ꞌbʉpʉ ꞌda yʉ fariseo nɛ ꞌda yʉ xänbate niją, xpí ꞌyɛ̨ꞌʉ hønbʉ go hapʉ i ja yʉ hnini bʉ ra xɛqui Galilea nɛ ra xɛqui Judea, nɛpʉ ra dąhnini Jerusalén. Nɛ nuꞌa ra Jesús bi ꞌyutꞌʉ ngue min ꞌyoui xʉn ngu rá tsꞌɛdi Oją ꞌbʉ mi hoc yʉn zämanꞌʉ. 18 Nɛ bi zøm bʉ ꞌda yʉn ꞌyohʉ, bá tu nꞌda ran ꞌyohʉ xʉn ʉ, mi tsꞌa rá jąꞌi a, ox ra ꞌbeza. Nɛ min nde xtán yʉrpʉ mbo ꞌbʉh ra Jesús. 19 Pɛ ɛ̨mmɛ dʉ yʉ jąꞌi bʉ ja ra goxthi, nɛ hin hapʉ sä dí yʉtꞌi. Janangueꞌa bi zix ra därgɛ̨hɛ bʉ maxøtsꞌe ra ngu, nɛ bi xospa rá ꞌbetꞌe nɛ bi cąꞌma ran ꞌyohʉ bʉ made i ꞌbäꞌa ra Jesús. Nɛ ox ra ꞌbeza ꞌbʉ mi cąmpꞌʉ. 20 Bi bąh ra Jesús bʉya gue i ɛ̨cꞌyɛi xʉn ho ʉ yʉn ꞌyohʉ gue i ja rá tsꞌɛdi a, ꞌbʉ mi nuꞌa bi ꞌyøtꞌʉ. Janangueꞌa bi ꞌyɛ̨mpꞌa ra därgɛ̨hɛ:
―Amigo, ya ma punbi ni tsꞌoqui, bi ꞌyɛ̨mbi.
21 Pɛ nuꞌʉ yʉ fariseo nɛ yʉ xänbate niją bin ꞌyɛ̨mzɛhɛ ʉ: “Hanja na ran ꞌyohʉ ngue ɛ̨na da ꞌyøtꞌa i øtꞌ Oją, nɛ ya ɛ̨na sä di punba rá tsꞌoqui nꞌda ra jąꞌi. Hingui numansu Oją na,” bi ꞌyɛ̨mpꞌʉ yʉ xänbate nɛ yʉ fariseo.
22 Pɛ nuꞌa ra Jesús i pądi ꞌbɛꞌa im bɛ̨nꞌʉ, nɛ bi ꞌyɛ̨mpꞌʉ:
―Hanja in jabʉ guím bɛ̨mhbʉ. 23 Ha guím bɛ̨mhbʉ ngue nte ní mbatho dá xicä ran ꞌyohʉ, ngue rá tsꞌoqui ya xʉm punbi. Ha guím bɛ̨mhbʉ manꞌda xquí pąhmbʉ ngue i ja ma tsꞌɛdi ꞌbʉ ga xifi da ndantsꞌi, din ꞌyo. 24 Pɛ ga utꞌahʉ ngue i ja man tꞌɛ̨di ua ja ra häi ga punba yʉ́ tsꞌoqui nꞌda ra jąꞌi, ngue ga japi din ꞌyo na ran ꞌyohʉ, guecä gue dán jąꞌigä ua ja ra ximhäi, bi ꞌyɛ̨nꞌa ra Jesús.
Nɛ nubʉya bi ꞌyɛ̨mpꞌa mí tsꞌa rá jąꞌi:
―Dami ndantsꞌi, gui cąx ni fįdi nɛ gui mba ni ngu, bi tꞌɛ̨mbi.
25 ꞌBex bi ndantsꞌa ran ꞌyohʉ bi gąx rá fįdi nɛ bi mba rá ngu, nɛ bi ꞌyɛ̨spa Oją bʉ ní mba. Nɛ gätho yʉ jąꞌi mi ꞌbʉpʉ bi nu ꞌbɛꞌa bin ja. 26 Nɛ gätho bi hyonya thoho ʉ, nɛ bin su, bi ꞌyɛ̨spa Oją nɛ bi ꞌyɛ̨nꞌʉ:
―Nꞌda ran tꞌøtꞌe nuįxte dá nuhʉ ra pa jabʉ ya, bi ꞌyɛ̨nꞌʉ yʉ jąꞌi.
Ra Jesús bi xih ra Leví da dɛnni
27 Mꞌbɛjua bʉya, bi bøm bʉ ja ra ngu ra Jesús, nɛ bi thopʉ mi huꞌa ra Leví, guepʉ mí hąc rán juꞌtꞌi ra häi, nguetho ra hyącahäi a. Nɛ nuꞌa ra Jesús bi ꞌyɛ̨na:
―Dami tɛngui, bi tꞌɛ̨mpꞌa ra Leví.
28 Nu ra Leví bʉya, ꞌbex bi ndantsꞌa, bi zopʉ gätho mi ja nɛ bi dɛnꞌna ra Jesús.
29 Nɛ nuꞌa ra Leví bʉya, bi ꞌyøtꞌa nꞌda ran sihmɛ xʉn ndoho bʉ ja rá ngu, ngue bin sihmɛ bʉ ra Jesús. Nɛ bi zøm bʉ ja ran sihmɛ xʉn ngu yʉ hyącahäi nɛ xʉn ngu miꞌda yʉ jąꞌi, ꞌdarpʉ bin sihmɛhʉ ra Jesús. 30 Pɛ nuꞌʉ yʉ fariseo nɛ yʉ xänbate niją bi ꞌyɛ̨na:
―Hanja gní sihmɛhʉ yʉ dąditsꞌoqui nɛ yʉ ziyate hyącahäi, bi tꞌɛ̨mpꞌʉ yʉ́ xädi ra Jesús.
31 Nu ra Jesús bi xi a nꞌda ran tꞌuti ꞌbʉ mi dątꞌʉ:
―Toꞌo i ꞌbʉh mán zaqui hingui honꞌa toꞌo da ꞌyøthe, pɛ høntꞌa toꞌo xʉn ʉ i honꞌa da ꞌyøthe. 32 Nugä ma ꞌbɛfigä ngue ga xih yʉ dąditsꞌoqui di päh yʉ́n ꞌyomfɛ̨ni. Pɛ nuꞌʉ toꞌo ɛ̨nsɛ mahoqui yʉ́ mbʉi, nɛ hingui sä ga zɛꞌʉ, bi ꞌyɛ̨nꞌa ra Jesús.
Jesús Pasa Tiempo con Pecadores
Bi tꞌänꞌna ra Jesús hanja him bi ꞌyɛꞌtꞌ yʉ́n sihmɛ yʉ́ xädi
33 Nɛ bi tꞌɛ̨mpꞌa ra Jesús:
―Nu yʉ́ xädi ra Xuua Nxixyą nząi ɛꞌtꞌ yʉ́n sihmɛ ꞌbʉ i yąui Oją, nɛꞌʉ yʉ́ xädi yʉ fariseo, pɛ nu ni xädi hin jąmꞌbʉ ɛꞌtꞌ yʉ́n sihmɛ. Hanja ngue in jabʉ, bi ꞌyɛ̨mbi.
34 Nu ra Jesús bi dąti:
―Pɛ nuꞌʉ i ꞌbʉpʉ ja ran thąti, hin da du yʉ́ mbʉi nguetho ꞌbʉpʉ a ran ꞌyohʉ din thąti. Hin da ꞌyɛ̨na ngue hin din sihmɛ ʉ. 35 Pɛ da zøn ra ora da tsꞌispa a ran ꞌyohʉ, nɛ ja da ꞌyɛꞌtꞌ yʉ́n sihmɛ bʉya, bi ꞌyɛ̨nꞌa ra Jesús.
36 Nɛ xø bi xih manꞌda ran tꞌuti, ngue da ꞌyuti hingui sä yʉ́ xädizɛhɛ ra Jesús da dɛnꞌna ran yonxädi, nɛ bi ꞌyɛ̨mpꞌʉ:
―Njoꞌo nꞌda ra jąꞌi da xɛn maꞌdaꞌyo rá pahni ngue da mbørba rá ꞌyapahni, nguetho nuꞌbʉ da mbørba a, hin da bømanho nɛ di tsꞌontho a maꞌdaꞌyo. 37 Nɛ njoꞌo to da xirpʉ ra ꞌyaxfani mbotꞌasɛ̨i ra vino maꞌdaꞌyo, nguetho nuꞌbʉ bin hogui, da føh ra ꞌyaxfani bʉya. Nɛ dim fän ra vino nɛ di tsꞌonꞌa ra ꞌyaxfani, gätho dim ꞌbɛdi. 38 Nuꞌa ra vino maꞌdaꞌyo da sirpʉ maꞌdaꞌyo ra xifani, ngue hin dim ꞌbɛh ra vino, nɛ xín din tsꞌonꞌa ra xifani.
39 Nɛ toꞌo in ząi i si ra nyomvino, pɛ hingui nde a ra vino maꞌdaꞌyo, nguetho manꞌda xʉ cʉhi ra nyomvino, ɛ̨nꞌʉ. Guín jahʉ bʉ ngue hin guí numanhohʉ man xädigä, bi ꞌyɛ̨nꞌa ra Jesús.