Ra Jesús bi nu rán tsꞌäte ra zįthu
4
Nu ra Jesús bi nɛxpʉ ja ra dąthe Jordán nɛ min ꞌyoui rá Hogandąhi Oją. Nɛ nuꞌa rá Hogandąhi Oją bi bɛ̨nbi da mba bʉ maꞌueni bʉ ja ra dąpo. 2 Nɛ nyote pa nɛ nyote xui bim ꞌbʉpʉ ja ra dąpo ra Jesús. Nɛ bi tsꞌäp rá mbʉi, bi zäꞌa ra zįthu. Nɛ xíngui tsꞌʉ bin sihmɛ gätho yʉ pa bim ꞌbʉpʉ, nɛ bin tumanthuhu bʉya. 3 Nɛ bi ꞌyɛ̨nꞌa ra zįthu:―Nuꞌbʉ majuąni gueꞌe rá tsꞌʉntꞌʉ Oją, dami japi dim hmɛ ra do ꞌbɛngua, bi tꞌɛ̨mpꞌa ra Jesús.
4 Nu ra Jesús bi dąti:
―Ntꞌoꞌtꞌi bʉ ja rám hman Oją: “Hinga høntꞌa ra hmɛ dím ꞌbʉh yʉ jąꞌi pɛ nɛꞌa gätho i man Oją,” bi tꞌɛ̨mpꞌa ra zįthu. Nɛ him bi ꞌyøtꞌa bi sifi.
5 Pɛ nubʉya, nu ra zįthu bi zix a ra Jesús bʉ ja nꞌda ra tꞌøhø xʉn hɛ̨tsꞌi, nɛ bi ꞌyuti hapʉ gätho ꞌbʉꞌʉ ja yʉ́ tsꞌɛdi yʉ tsꞌʉtꞌabi ua ja ra häi, 6 nɛ bi ꞌyɛ̨mbi:
―Gätho guí nu ya ga ꞌdaꞌaꞌi, nguetho ma mbɛtigä. Ya binꞌdaqui nɛ sä ga unni toꞌo gätho dín nde ga unni. 7 Nɛ nuꞌbʉ gan dąnyahmu bʉ ja ma gua nɛ gui thąndegui, ga ꞌda a i gätho guín nu ya, i ɛ̨nꞌa ra zįthu.
8 Nu ra Jesús bi dąti:
―“Høntꞌa Oją, ra Hmu, ga thąndehʉ nɛ ga ørpahʉ rá ꞌbɛfi a,” i ɛ̨m bʉ ja rám hman Oją, bi ꞌyɛ̨nꞌa ra Jesús.
9 Nubʉya, nu ra zįthu bi zix mahønꞌa a ra Jesús bʉ ra hnini Jerusalén, nɛ bin tøpʉ magątsꞌi thoho ra dąniją. Nɛ bi ꞌyɛ̨mbi:
―Nuꞌbʉ majuąni gueꞌe rá tsꞌʉntꞌʉ i Oją, damin säqui, gui sonʉ häi, nɛ hin hapʉ gui ꞌuaqui, 10 nguetho ntꞌoꞌtꞌi bʉ ja rám hman Oją:
Nuꞌa Oją ba pɛnꞌdʉ yʉ́m ꞌbɛhni da mbäxꞌi i.
11 Nɛ da bɛntꞌi i nɛ hin hapʉ gui ꞌuaqui, i ɛ̨m bʉ ja rá tꞌohni Oją, bi ꞌyɛ̨nꞌa ra zįthu.
12 Nu ra Jesús bi dąti:
―Pɛ nɛꞌa i mam bʉ ngue: “Nu Oją ma Hmuhʉ njongui sä da zäꞌa ngue da bą ꞌbʉ majuąni da ꞌyøtꞌa im manꞌa,” i ɛ̨m bʉ ja rá tꞌohni Oją, bi ꞌyɛ̨nꞌa ra Jesús.
13 Nuꞌbʉ mi guaꞌa bi man yʉ́n tsꞌäte ra zįthu, bi ꞌuepʉya, bi zoꞌa ra Jesús ꞌda yʉ pa.
El Diablo Tienta a Jesús
Ra Jesús bi dʉmpꞌ rá ꞌbɛfi bʉ ja ra xɛqui Galilea
14 Nu ra Jesús bi mbeng bʉ ja ra häi Galilea, min ꞌyoui rá Hogandąhi Oją. Nɛ gätho yʉ jąꞌi mi ꞌbʉpʉ bi ꞌyøꞌa i øtꞌ ra Jesús. 15 Nɛ bi xänba yʉ jąꞌi bʉ ja yʉ niją, nɛ gätho bi numanho a.
Nu ra Jesús bi mba bʉ ja ra hnini Nazaret guepʉ bin te
16 Nu ra Jesús bʉya bi mba bʉ ja ra hnini Nazaret, guepʉ bin te. Nu ra pa ran säya bi mba bʉ ja ra niją tengu ząi mi ørpʉ hapʉ mí ꞌyo. Nɛ bim ꞌbäi ngue da nɛh rám hman Oją. 17 Nɛ bin tꞌunꞌna rá søcuą bi ꞌyoꞌtꞌa ra pøngahyą Isaías, nɛ bi tʉntsꞌa ra søcuą guepʉ i ɛ̨na:
18 Nuꞌa Oją bi ꞌyɛnscä rá Hogandąhi
nguetho bi huangä nɛ bá pɛngä ga xih yʉ hyoya ran ho maꞌdaꞌyo.
Bá pɛngä ngue ga hurpa yʉ́ mbʉi toꞌo i ja yʉ dumbʉi.
Nɛ ga xocua ʉ toꞌo xí bɛntꞌa ra zįthu tenguꞌbʉ i ofädi ʉ.
Ga xocpa yʉ́n ꞌyomfɛ̨ni yʉ jąꞌi nɛ da bąꞌa majuąni rá ꞌyu Oją ʉ.
Nɛ ga japi him man zä ran ʉ ʉ di ʉnba yʉ́ hmu.
19 Nɛ ga xih yʉ jąꞌi ngue bi zøn ra ora da ꞌyørpa rá mate Oją ʉ, i ɛ̨m bʉ ja rá søcuą ra Isaías guepʉ bi nɛh ra Jesús.
20 Nu ra Jesús ꞌbʉ mi guaꞌa bi nɛh ra søcuą, bi mbantsꞌi, bi uni da ꞌbɛsꞌ mahønꞌa ra søcuą. Nɛ bi hyuh pʉya ngue da xi ʉ ꞌbɛꞌa mí mam bʉ. Nɛ gätho yʉ jąꞌi mi ꞌbʉpʉ ja ra niją bi hyɛ̨tꞌa ra Jesús. 21 Nuꞌa bi ꞌyɛ̨na:
―Nuꞌa dá nɛcä ya, mi mam bʉ ja rá søcuą ra Isaías ngue mi ma din ja, nɛ bin ja a ya, nguetho dí ꞌbʉcä ua, bi ꞌyɛ̨na.
22 Nɛ gätho yʉ jąꞌi bin yąmanho nangue ra Jesús nɛ bi hyonya thoho nguetho mahotho a bi man ra Jesús bʉ ja ra niją. Nɛ ɛ̨nꞌʉ:
―Hanja ngubʉ i øtꞌe, ɛ̨nꞌʉ nguetho im bɛ̨ni gue ra Jesús rá tsꞌʉntꞌʉ ra José.
23 Nu ra Jesús bʉya bi ꞌyɛ̨mpꞌʉ:
―Masque guí nde gui xijʉ a ram hma i ɛ̨na: “Grá ꞌyøthebate, damin hoczɛhɛ,” masque guí nde gui xijʉ a, nguetho guím bɛ̨nsɛhʉ, hin dí øtꞌua ja ma hnini zɛhɛ ʉ yʉn tꞌøtꞌe nuįxte tengu dá øtꞌä bʉ ja ra hnini Capernaum, bi ꞌyɛ̨na. 24 Majuąni dí xi ahʉ, nꞌda rá pøngahyą Oją hingui hnumansu bʉ ja rá häizɛhɛ. 25 Njabʉ bi ꞌyøtꞌ ra pøngahyą Elías ꞌbʉ mayaꞌbʉ. Xʉn ngu yʉ xisu xí du yʉ́ ndø mi ꞌbʉi ngue yʉ́ mijudíohʉ, gueꞌbʉ him bin ꞌye hyu jɛya made, nɛ bin ja ra thuhu bʉ. 26 Pɛ him bi mbäxꞌa nꞌda ra xisu xí du rá ndø bʉ ja rá häizɛhɛ, pɛgue bi ꞌbɛn bʉ ra hnini Sarepta guepʉ ra häi Sidón, da mbäx a nꞌda ra xisu mi ꞌbʉpʉ, bi ꞌyɛ̨na. 27 Nɛ ngutho bi ꞌyøtꞌ ra pøngahyą Eliseo, guextaꞌa xʉn ngu yʉ́ mijudíohʉ mi hɛ̨mb ra tꞌaxcaꞌya, pɛ xínga nꞌda bi hocꞌa ra pøngahyą ngue yʉ́ mɛnguzɛhɛhʉ, høntꞌa ra hmudofʉi Naamán, ra mɛngu bʉ ra häi Siria, bi hoqui, bi ꞌyɛ̨nꞌa ra Jesús.
28 Nɛ nuꞌbʉ mi manꞌa ra Jesús a bi ma, nu yʉ jąꞌi mi ꞌbʉpʉ ja ra niją ɛ̨mmɛ bin cuɛ bʉya. 29 Nɛ bi ndantsꞌʉ bi bɛntꞌa ra Jesús nɛ bi zixpʉ mayą ra nyuni, im bɛ̨ni da hyøm bʉ ja ra mbaꞌye. 30 Pɛ nuꞌa ra Jesús bi tho in de bʉ ꞌbʉh yʉ jąꞌi, nɛ bi zopʉ ʉ, nɛ hin te bin japꞌa.
Jesús Proclama el Cumplimiento de las Escrituras
Bi hocꞌa nꞌda ran ꞌyohʉ min ꞌyoui ra zįthu a ra Jesús bʉ ja ra niją
31 Nɛ nuꞌa ra Jesús bi mbeng bʉ ja ra hnini Capernaum bʉ ja ra häi Galilea, nɛ i xänba yʉ jąꞌi ꞌbʉ ra pa ran säya. 32 Nɛ gätho yʉ jąꞌi bi hyonya thoho nangue rán xädi a, nguetho ra Jesús bi ꞌyuti xʉn ho ngue mi ja rán tꞌɛ̨di gueꞌbʉ mi xänbi.
33 Nu nꞌda ra pa mi ꞌbʉpʉ ra Jesús bʉ ja ra dąniją nɛ mi ꞌbʉpʉ nꞌda ran ꞌyohʉ min ꞌyoui ra zįthu, nɛ ɛ̨mmɛ ntsꞌɛdi bi mbafi, nɛ bi ꞌyɛ̨na:
34 ―Gra Jesús, ra mɛngu Nazaret, ꞌbɛꞌa guí nde gui ꞌyørcahe, ha gui juaje ya. Nugä dí pącä toꞌo i, rá Hogam ꞌbɛhni Oją i.
35 Nɛ nu ra Jesús bi ꞌyɛ̨mbi:
―Damin hɛ̨ nɛ gui pøm bʉ ja rá mbʉi na ran ꞌyohʉ.
Nɛ nuꞌa ra zįthu ntsꞌɛdi bi hyømma häi ran ꞌyohʉ bʉ ꞌbäh yʉ jąꞌi nɛ bi bøm bʉ rá mbʉi ran ꞌyohʉ bʉya, pɛ hin hapʉ bi ʉnba ran ꞌyohʉ. 36 Nɛ bi hyonya thoho yʉ jąꞌi ꞌbɛꞌa bin ja na ran ꞌyohʉ. Nɛ bin ꞌyɛ̨mzɛhɛ nꞌda ngu nꞌda: “ꞌBɛꞌa ní tsꞌɛdi i ja na ran ꞌyohʉ nɛ i sä i hønꞌa thi yʉ zįthu, ” bin ꞌyɛ̨mzɛhɛ ʉ.
37 Nɛ bi tꞌøde gätho ra xɛqui bʉ ꞌbɛꞌa bi ꞌyøtꞌa ra Jesús.
Ra Jesús bi hocpa rá suto ra Simón Pedro
38 Nu ra Jesús bʉya bi bøm bʉ ja ra niją, bi mba bʉ ja rá ngu ra Simón Pedro. Nɛ nuꞌa rá suto ra Simón Pedro, xʉn ʉ, ntsꞌɛdi ra pa mi ja. Nɛ bi si a ra Jesús ngue xʉn ʉ a ra xisu. 39 Nu ra Jesús bim ꞌbäpʉ mi ꞌbɛnꞌa ra hyɛ̨nni, nɛ bi ma ngue da bønꞌa ra pa.ꞌBex bi bønꞌa ra pa, hin hapʉ xʉn ʉ bʉya. ꞌBex bi ndantsꞌa ra xisu nɛ bi hoc ran sihmɛ, bi ꞌuįnꞌʉ.
Nu ra Jesús bi hoqui xʉn ngu yʉ jąꞌi
40 Nɛ nuꞌbʉ mí yʉh ra hyadi, gätho yʉ hyɛ̨nni bi tsꞌixpʉ ꞌbʉh ra Jesús. Nɛ ꞌbex bi yąnꞌʉ yʉ hyɛ̨nni ꞌbʉ mi mba nthädi nꞌda ngu nꞌda ʉ, bi däꞌa ra Jesús. 41 Nɛ yʉ zįthu min ꞌyohʉ ꞌda yʉ jąꞌi bi japi da bønꞌʉ . Nɛ ntsꞌɛdi i mbaꞌʉ, i ɛ̨nꞌʉ:
―Nuꞌi, rá Tsꞌʉntꞌʉ i Oją, bi tꞌɛ̨mpꞌa ra Jesús.
Pɛ nu ra Jesús him bi japi din yą nguetho mi pąꞌʉ gue ra Cristo a ra Jesús.
Nu ra Jesús bi man rám hma bʉ ra xɛqui Galilea
42 Nɛ nuꞌbʉ mi hyax bʉya, tꞌʉxuditho bi mbasɛ bʉ maꞌueni ra Jesús. Nu yʉ jąꞌi bi hyoni gueꞌbʉ go mi dįni, nɛ him min ndeꞌʉ da mba ra Jesús. 43 Pɛ nuꞌa ra Jesús bi ꞌyɛ̨mpꞌʉ:
―Nugä jatho ga mbagä miꞌda yʉ hnini, ga mam bʉ ran ho maꞌdaꞌyo, ga xih yʉ jąꞌi ꞌbɛpʉ ní manda rá tsꞌɛdi Oją ua, jananjabʉ bá pɛngä Oją, bi ꞌyɛ̨na.
44 Nɛ bi thopʉ ja miꞌda yʉ hnini ja ra xɛqui Galilea bʉya, nɛ bi mam bʉ rám hma bʉ ja yʉ niją.