Xuua Nxixyą bi dʉꞌmi bi man rám hma Oją bʉ maꞌueni
3
1,2 Nuꞌbʉ ná ꞌdɛꞌma cʉtꞌa njɛya in tsꞌʉtꞌabi ra hmutsꞌʉtꞌabi Tiberio, nɛ bin yąui Oją ra Xuua bʉ ja ra dąpo mi ꞌbʉi, bi xifi di dʉmpꞌa rá ꞌbɛfi. Nɛ gueꞌa ra Xuua rá tsꞌʉntꞌʉ ra Zacarías a. Nɛ guetꞌa ra jɛya bin tsꞌʉtꞌabi ra Poncio Pilato bʉ ja ra xɛqui Galilea, nɛ nꞌdatꞌa ra jɛya bin tsꞌʉtꞌabi a ra Felipe bʉ ja ra xɛqui Iturea nɛ ra xɛqui Traconite. Nuꞌa ra Felipe ngue rán ꞌyohʉ ra Poncio Pilato. Nɛ guetꞌa ra jɛya a bin tsꞌʉtꞌabi ra Lisanias bʉ ja ra xɛqui Abilinia. Nɛ ꞌdatꞌa ra jɛya mi ngʉrpa mbäją ra Anás nɛ ra Caifás bʉ Jerusalén. 3 Nɛ nubʉya, bi dʉmpꞌ rá ꞌbɛfi ra Xuua Nxixyą, bin ꞌyo bʉ nꞌdanguadi ra dąthe Jordán nɛ bi xih yʉ jąꞌi di päh yʉ́n ꞌyomfɛ̨ni nangue yʉ́ tsꞌoqui, nꞌdahma da mba ma punbi. Nɛ bi xifi din xixyą bʉya. 4 Nɛ guehna ra Xuua bi manꞌa ra Isaías ꞌbʉ mi ꞌyɛ̨na:Nꞌda ra jąꞌi din yą bʉ ja ra dąpo nɛ da ꞌyɛ̨na:
“Dami päh nin ꞌyomfɛ̨nihʉ, ga simhbʉ ra Hmu mi tsꞌʉtho da zøcua.
Dami hoc ni mbʉihʉ, ga tømhbʉ xʉn ho.
5 Tengu yʉ mbothäi nɛ yʉ tꞌøhø din juąni
tengu nꞌda ra ꞌyu i pa ma hoqui, hingui ndaxni, i uɛ̨ntho, din ja bʉ ni mbʉihʉ.
6 Nɛ gätho yʉ jąꞌi da nuꞌa ram pørpate ba pɛnd Oją,” da ꞌyɛ̨na, bi ꞌyɛ̨nꞌa ra Isaías.
7 Nɛ bi zøm bʉ yʉ jąꞌi bʉ ꞌbʉh ra Xuua ngue in nde din xixyą ʉ. Nɛ nu ra Xuua bi ꞌyɛ̨mpꞌʉ:
―Nuꞌahʉ tengu thoho ꞌbʉ gyʉ́ pozʉhʉ, nɛ guí ɛ̨nsɛhʉ hin guin nuhʉ rá muui ni tsꞌoquihʉ ꞌbʉ gan xixyąhʉ, nɛ hin gui hoc ni mbʉihʉ. 8 Pɛ nte di muui ꞌbʉ guí ɛ̨mhbʉ gán yąmhbʉ ngue ya nim bombøtahʉ ra Abraham. Pɛ nɛhya yʉ do i ꞌbongua mi sä xtá ꞌyɛ̨na yʉ́ tꞌʉhni ra Abraham gueꞌbʉ gueꞌa xtán nde Oją a. 9 Nɛ nuꞌa toꞌo gätho him bi päh yʉ́n ꞌyomfɛ̨ni nangue yʉ́ tsꞌoqui, tenguꞌbʉ yʉ za ngue hingui ho yʉ́n dätꞌo. Nɛ nu rán tsꞌonza Oją ya mahoqui xʉn ho ngue da ꞌyɛxꞌʉ yʉ za hingui ho yʉ́n dätꞌo, nɛ da thøspʉ ja ra sibi din zø, bi ꞌyɛ̨n a ra Xuua.
10 Nu yʉ jąꞌi bʉya, bi ꞌyɛ̨nꞌʉ:
―ꞌBɛꞌa sä ga øtꞌähe ꞌbʉ, bi ꞌyɛ̨mpꞌa ra Xuua.
11 Nu ra Xuua bi dąti:
―Nuꞌa toꞌo i ja yoho yʉ́ pahni, di unꞌna nꞌda toꞌo hinꞌyʉ rá pahni. Nɛ nuꞌa toꞌo i ja ꞌbɛꞌa da zi, di unni tsꞌʉ a toꞌo hinꞌyʉ da zi, bi ꞌyɛ̨na.
12 Nɛꞌʉ ꞌda yʉ hyącahäi xí zøm bʉ ngue in nde da mba ma xixyąbi, bi ꞌyänꞌdʉ:
―Xänbate i, ꞌbɛꞌa sä ga øtꞌähe.
13 Nu ra Xuua bi dąti:
―ꞌYo guí huspahʉ manꞌda ra renta, pɛ høntꞌa i man rán tꞌɛ̨di ra häi gui hyąjʉ.
14 Nɛꞌʉ ꞌda yʉ dofʉi bi ꞌyänni:
―Nɛcähe, ꞌbɛꞌa sä ga øtꞌähe, bi ꞌyɛ̨nꞌʉ.
Nu ra Xuua bi dąti:
―O guí hącuahʉ ra mbɛti yʉ jąꞌi nangue ni tsꞌɛdizɛhɛhʉ. Nɛ o gadí yąfʉ nꞌda ra jąꞌi ꞌbʉ guí pąhmbʉ him majuąni a guí mamhbʉ. Nɛ hin guim bɛ̨mhbʉ ngue manꞌda ɛ̨mmɛ xʉn ngu gui tąhmbʉ, pɛ høntꞌa nin zäbi gui tąhmbʉ, bi ꞌyɛ̨nꞌa ra Xuua.
15 Nɛ xʉn ngu ʉ ngue mi tøꞌma ra Cristo mim bɛ̨nsɛ ʉ ngue ɛ̨mbi ra Cristo a ra Xuua. 16 Pɛ nuꞌa ra Xuua bi ꞌyɛ̨mpꞌʉ:
―Nugä dí xixyą ahʉ ngue ra dehe thoho, pɛ ba ɛ̨ꞌa nꞌda ja rá tsꞌɛdi xinda guecä, hin dí sʉcä tengu a. Nuꞌa di hocꞌahʉ nangue rá Hogandąhi Oją tenguꞌbʉ xtí hocꞌahʉ ra sibi. 17 Nɛ da huahnꞌdʉ yʉ jąꞌi tengu ꞌbʉ i pa ntꞌɛi yʉ trigo. Nu rá xi di ꞌuec ran dąhi, nɛ nu yʉ trigo da mba mꞌbɛꞌtsꞌi, pɛ nu yʉ́ xi da tꞌupʉ ja ra sibi njąmꞌbʉ i huɛ̨tꞌi, in jabʉ da ꞌyøtꞌ ꞌbʉ bi huahn yʉ jąꞌi a ra Cristo, bi ꞌyɛ̨n a ra Xuua.
18 Nɛ xʉn ngu miꞌda yʉm hma bi xi ʉ yʉ jąꞌi nangue ran ho maꞌdaꞌyo. 19 Pɛ nu ra Xuua bi dąmhyą ra tsꞌʉtꞌabi Herodes nguetho nu ra Herodes bi zinꞌa rá ꞌbɛpozɛhɛ, ngue rá xisu ra Felipe, í Herodías a ra xisu. Nɛ hinga høntꞌa pɛ xʉn ngu miꞌda yʉn tsꞌo bi ꞌyøtꞌa, janangue bi dąmhyą. 20 Pɛ nu ra Herodes manꞌda xʉn ngu rá tsꞌoqui bi ꞌyøtꞌe nguetho bi gotꞌa fädi a ra Xuua.
Ra Jesús bin xixyą
21 Nuꞌbʉ mi xixyąba yʉ jąꞌi a ra Xuua, nɛꞌa ra Jesús bi mba bʉ, bin xixyą. 22 Nɛ nu ra Jesús ꞌbʉ mi yąui Oją, ꞌbex bá xoh mahɛ̨tsꞌi nɛ bá cą a rá Hogandąhi Oją tengu nꞌda ra tꞌazʉ, nɛ bi zoxpʉ ja rá jąꞌi ra Jesús. Nɛ bi tꞌøꞌa nꞌda ra nde mahɛ̨tsꞌi bi ꞌyɛ̨na:
―Nuꞌi ma Tsꞌʉntꞌʉ i, ɛ̨mmɛ dadí huɛ̨cꞌi i, nɛ dí numanho i, bi ꞌyɛ̨n Oją.
Bautizo de Jesús por Juan
Nuꞌʉ yʉ́m bombøta ra Jesús
23 Nu ra Jesús mi pɛꞌtsꞌa nꞌdäte maꞌdɛtꞌa njɛya ꞌbʉ mi dʉmpꞌ rá ꞌbɛfi ua ja ra häi. Nu yʉ jąꞌi mim bɛ̨ni rá tsꞌʉntꞌʉ ra José a ra Jesús. Nɛ nu ra José rá tsꞌʉntꞌʉ ra Elí a. 24 Nu ra Elí, nuꞌa rá ta, gueꞌa ra Matat a. Nu ra Matat, nuꞌa rá ta gueꞌa ra Leví a. Nu ra Leví, nuꞌa rá ta gueꞌa ra Melqui a. Nu ra Melqui, nuꞌa rá ta gueꞌa ra Jana a. Nu ra Jana, nuꞌa rá ta gueꞌa ra José a. 25 Nu ra José, nuꞌa rá ta ra Matatías a. Nu ra Matatías, nuꞌa rá ta ra Amós a. Nu ra Amós, nuꞌa rá ta ra Nahum a. Nu ra Nahum, nuꞌa rá ta ra Esli a. Nu ra Esli, nuꞌa rá ta ra Nagai a. 26 Nu ra Nagai, nuꞌa rá ta ra Maat a. Nu ra Maat, nuꞌa rá ta, ra Matatías a. Nu ra Matatías, nuꞌa rá ta ra Semei a. Nu ra Semei, nuꞌa rá ta ra José a. Nu ra José, nuꞌa rá ta ra Judá a. 27 Nu ra Judá, nuꞌa rá ta ra Joana a. Nu ra Joana, nuꞌa rá ta ra Resa a. Nu ra Resa, nuꞌa rá ta ra Zorobabel a. Nu ra Zorobabel, nuꞌa rá ta ra Salatiel a. Nuꞌa ra Salatiel, nuꞌa rá ta ra Neri a. 28 Nu ra Neri, nuꞌa rá ta ra Melqui a. Nu ra Melqui, nuꞌa rá ta ra Adi a. Nu ra Adi, nuꞌa rá ta ra Cosam a. Nu ra Cosam, nuꞌa rá ta ra Elmodam a. Nu ra Elmodam, nuꞌa rá ta, ra Er a. 29 Nu ra Er nuꞌa rá ta ra Josué a. Nu ra Josué, nuꞌa rá ta ra Eliezer a. Nu ra Eliezer, nuꞌa rá ta ra Jorim a. Nu ra Jorim, nuꞌa rá ta ra Matat a. 30 Nu ra Matat, nuꞌa rá ta ra Leví a. Nu ra Leví, nuꞌa rá ta ra Simeón a. Nu ra Simeón, nuꞌa rá ta ra Judá a. Nu ra Judá, nuꞌa rá ta ra José a. Nu ra José, nuꞌa rá ta ra Jonán a. Nu ra Jonán, nuꞌa rá ta ra Eliaquim a. 31 Nu ra Eliaquim, nuꞌa rá ta, ra Melea a. Nu ra Melea, nuꞌa rá ta, ra Mainán a. Nu ra Mainán, nuꞌa rá ta ra Matata a. Nu ra Matata, nuꞌa rá ta, ra Natán a. 32 Nu ra Natán, nuꞌa rá ta, ra David a. Nu ra David, nuꞌa rá ta, ra Isaí a. Nu ra Isaí, nuꞌa rá ta, ra Obed a. Nu ra Obed, nuꞌa rá ta, ra Booz a. Nu ra Booz, nuꞌa rá ta ra Salmón a. Nu ra Salmón, nuꞌa rá ta, ra Naasón a. 33 Nu ra Naasón, nuꞌa rá ta ra Aminadab a. Nu ra Aminadab, nuꞌa rá ta ra Aram a. Nu ra Aram, nuꞌa rá ta ra Esrom a. Nu ra Esrom, nuꞌa rá ta ra Fares a. Nu ra Fares, nuꞌa rá ta ra Judá a. 34 Nu ra Judá, nuꞌa rá ta ra Jacob a. Nu ra Jacob, nuꞌa rá ta ra Isaac a. Nu ra Isaac, nuꞌa rá ta ra Abraham a. Nu ra Abraham, nuꞌa rá ta, ra Taré a. Nu ra Taré, nuꞌa rá ta ra Nacor a. 35 Nu ra Nacor, nuꞌa rá ta ra Serug a. Nu ra Serug, nuꞌa rá ta ra Ragau a. Nu ra Ragau, nuꞌa rá ta, ra Peleg a. Nu ra Peleg, nuꞌa rá ta, ra Heber a. Nu ra Heber, nuꞌa rá ta, ra Sala a. 36 Nu ra Sala, nuꞌa rá ta, ra Cainán a. Nu ra Cainán, nuꞌa rá ta ra Arfaxad a. Nu ra Arfaxad, nuꞌa rá ta, ra Sem a. Nu ra Sem, nuꞌa rá ta, ra Noé a. Nu ra Noé, nuꞌa rá ta, ra Lamec a. 37 Nu ra Lamec, nuꞌa rá ta, ra Matusalén a. Nu ra Matusalén, nuꞌa rá ta, ra Enoc a. Nu ra Enoc, nuꞌa rá ta, ra Jared a. Nu ra Jared, nuꞌa rá ta, ra Mahalaleel a. Nu ra Mahalaleel, nuꞌa rá ta ra Cainán a. 38 Nu ra Cainán, nuꞌa rá ta ra Enós a. Nu ra Enós, nuꞌa rá ta ra Set a. Nu ra Set, nuꞌa rá ta ra Adán a. Nɛ nu ra Adán, bi zänd Oją a.