Bim ꞌbʉꞌa ra Jesús
2
Nuꞌbʉ mím ꞌbʉh ra Jesús, gueꞌʉ yʉ pa bin ja ra dąpede bi ꞌyøtꞌa ra hmutsꞌʉtꞌabi ngue ra Augusto César. 2 Nɛ gueꞌʉ yʉ pa bin tsꞌʉtꞌabi ra Cirenio bʉ ja ra xɛqui Siria, nɛ gueꞌʉ yʉ pa ja bi dʉꞌmi bi ꞌyøtꞌ ra pede ʉ. 3 Gätho yʉ jąꞌi bi mba bʉ ja rá hnini zɛhɛ yʉ́m bombøta ngue da thuspa bʉ yʉ́ thuhu. 4 Janangue nu ra José bi nɛxpʉ ja ra hnini Nazaret ngue ra xɛqui Galilea, nɛ bi mba bʉ ja ra hnini Belén ngue ra xɛqui Judea, nguetho guepʉ rá hnini a rám bombøta a ra José, ngue ra David. 5 Nɛ bi mba da thuspa bʉ rá thuhu. Bi mbɛ a ra María rá xisu. Pɛ nuꞌa ra María ya min hątꞌʉhni a. 6 Nɛ nuꞌbʉ mi zøm bʉ ja ra hnini Belén, bi zøn ra pa dim ꞌbʉh rá tꞌʉhni bʉya. 7 Nɛ bim ꞌbʉ a rá mbʉdi tsꞌʉntꞌʉ a ra María ngue ra Jesús. Nɛ bi mbant yʉ bazu, nɛ bi cärpʉ ja rán tsꞌadɛthą yʉ fani bʉ ja ra ngumfani, nguetho hinꞌyʉ bʉ din säya bʉ ja nꞌda ra ngu. Yʉ́m ꞌbɛhni Oją bi xih yʉ mbändɛꞌyo ngue bim ꞌbʉh ra Jesús
8 Nuꞌa ra xui a bʉya, mi ꞌbʉpʉ häntho ra hnini Belén ꞌda yʉ mbändɛꞌyo, madí jamansu yʉ́ dɛꞌyo ʉ. 9 ꞌBex bi nu nꞌda rám ꞌbɛhni Oją ʉ, nɛ bi yorpʉ rán nɛqui Oją bʉ ꞌbʉi, nɛ ɛ̨mmɛ bin suꞌʉ. 10 Pɛ nuꞌa rám ꞌbɛhni Oją bi ꞌyɛ̨mpꞌʉ:
―O guín suhʉ, nguetho bá ɛ̨cä ga xi ahʉ nꞌda ram hma gue di ja ahʉ gan johyahʉ gyʉ́ jąꞌihʉ ua ja ra ximhäi. 11 Nu bʉ ra hnini Belén, ngue rá hnini ra David, ja bim ꞌbʉꞌa nim pørpatehʉ , gueꞌa ra Cristo ra Hmu bi ma ba pɛnꞌnahʉ Oją. 12 Nɛ nuꞌbʉ gá tįmhbʉ nꞌda ra ꞌuɛre xí järpʉ ja rá yänza yʉ fani mꞌbantꞌi yʉm ꞌbahni, gueꞌa gdí pąhmbʉ a bʉya, bi ꞌyɛ̨nꞌa rám ꞌbɛhni Oją ꞌbʉ mi ꞌyɛ̨mpꞌʉ yʉ mbändɛꞌyo.
13 ꞌBex bi nɛqui nꞌdan nɛtsꞌi yʉ́m ꞌbɛhni Oją, bi ꞌyɛ̨spa Oją ngue bin tuhu, nɛ bi ꞌyɛ̨nꞌʉ:
14 Nuįxte rá tsꞌɛdi Oją mahɛ̨tsꞌi.
Oją da hyurpa yʉ́ mbʉi gätho ʉ i ꞌbʉcua ja ra häi, høntꞌa go toꞌo da hyąnꞌa rá mate, bi ꞌyɛ̨m ꞌbʉ min tuhu.
15 Nɛ bi mbeng mahɛ̨tsꞌi yʉ́m ꞌbɛhni Oją bʉya. Nɛ nuꞌʉ yʉ mbändɛꞌyo bin ꞌyɛ̨mpꞌʉ bʉya:
―Ga mbähä bʉ ja ra hnini Belén, ga nuhʉ a bin ja ngue bi jajʉ ra Hmu ga pąhmbʉ.
16 Bi mba nꞌdihi ʉ bʉya, nɛ bi dįm bʉ a ra María nɛ ra José nɛ ra ꞌuɛre. Nɛ nuꞌa ra uɛre mi o bʉ ja rá yänza ra fani. 17 Nɛ nuꞌbʉ mi nuꞌʉ yʉ mbändɛꞌyo bʉya, bi mam bʉ a xí xih rám ꞌbɛhni Oją nangue ra tꞌʉhni bim ꞌbʉi. 18 Nɛ gätho ʉ bi ꞌyøꞌa bi manꞌʉ yʉ mbändɛꞌyo, bi hyonya thoho ʉ. 19 Pɛ nuꞌa ra María, bi bɛ̨m bʉ mbo rá mbʉi ꞌbɛꞌa gätho bin ja. 20 Nɛ nu yʉ mbändɛꞌyo bi mbeng bʉya, nɛ bi ꞌyɛ̨spa Oją, ngue gätho bin jaꞌʉ ꞌbɛꞌa gätho bi sifi, nɛ xí nu.
Nacimiento de Jesús
Bi mba ma däpi Oją a ra ꞌuɛre Jesús bʉ ja ra dąniją
21 Nuꞌbʉ mi guaꞌan hyąto pa xím ꞌbʉi, bi thɛcua rá xifani ra ꞌuɛre, nɛ bi thuspa rá thuhu dí Jesús, nɛ ngueꞌa xí xih rám ꞌbɛhni 0ją a ra María ꞌbʉ hin ní hyą rá tꞌʉhni.
22 Nɛ nuꞌbʉ mí guaꞌa ra pa ntsꞌänni da døꞌma ra María, tengu bi man yʉ́n tꞌɛ̨di ra Moisés, ya i sä da mba bʉ ja ra dąniją bʉ Jerusalén. Nɛ bi zixa rá tꞌʉhni ʉ ngue di däp Oją. 23 In ja bʉ bi ꞌyøtꞌe nguetho nɛꞌa i mam bʉ ja rán tꞌɛ̨di ra Moisés, ngue: “Gätho yʉ mbʉdi tsꞌʉntꞌʉ da mba ma däpi Oją,” i ɛ̨m bʉ ja yʉn tꞌɛ̨di. 24 Nɛ bi hyąxa nꞌda ra ꞌbøtsꞌe bʉ ja ra dąniją tengu bi mam bʉ ja rán tꞌɛ̨di ra Moisés ngue i ɛ̨na: “Yoho yʉ tꞌazʉ uague yoho yʉ tsꞌąha ngue da hyo bʉ ja niją toꞌo im ꞌbʉh yʉ́ tꞌʉhni.”
Nu ra Simeón i thɛx ra ꞌuɛre Jesús
25 Nɛ mi ꞌbʉpʉ Jerusalén nꞌda ran ꞌyohʉ i Simeón, ra hocjąꞌi a, mi numansu Oją nɛ mi tøꞌma ra pa ngue da mba nhyąni ʉ yʉ jąꞌi israel, nɛ min ꞌyoui rá Hogandąhi Oją a. 26 Nu rá Hogandąhi Oją bi bɛ̨nba ra Simeón gue hin da du asta gueꞌbʉ go da nuꞌa rá Thahni Oją ba pɛhni ngue ra Cristo a. 27 Nɛ nuꞌa rá Hogandąhi Oją bi bɛ̨nbi da zøm bʉ a ra Simeón bʉ ja ra dąniją ꞌbʉ mi zøm bʉ rá ta nɛ rá mbe di däꞌa ra Jesús. 28 Nu ra Simeón bi dɛxa ra ꞌuɛre nɛ bi ꞌyɛ̨spa Oją bʉya, bi ꞌyɛ̨na:
29 Ma Hmu i, pɛ hin te dím bɛ̨ngä ꞌbʉ ga tugä ya,
nguetho dá nugä na gá xiqui ngue ga nugä, ni ꞌyɛ̨hɛgä.
30 Nuya dá nusɛgä mam pørpatehe,
31 ngue gá sänni ngue da yąnba yʉ́ te ʉ toꞌo da bąh na.
32 Nuna di japi da nu ran nɛqui ʉ hing yʉ judío,
nɛ gueꞌa dí tꞌɛ̨scahe dyʉ jąꞌi israelgähe, dyʉ judíohe, bi ꞌyɛ̨nꞌa ra Simeón ꞌbʉ mi dɛxa ra ꞌuɛre Jesús.
Bim pøngahyą ra Simeón ꞌbʉ mi nu ra Jesús
33 Nu ra José nɛ rá mbe ra Jesús bi hyonya thoho ꞌbɛꞌa bi man ra Simeón nangueꞌa ra ꞌuɛre. 34,35 Nu ra Simeón bʉya, bi ꞌyäp Oją da ꞌyɛnspa rán jąpi ra José nɛ ra María, nɛ bi ꞌyɛ̨na:
―Nuna ra tꞌʉhni ꞌbʉ din dąnꞌyohʉ ntsꞌänni xʉn ngu ʉ yʉ́ miꞌisraelhʉ dim ꞌbɛdi ꞌbʉ hin da numanho. Pɛ nuꞌʉ toꞌo da numanho da yąnꞌa. Guehna dí fądi ꞌbɛꞌa im bɛ̨m bʉ mbo yʉ́ mbʉi nꞌda ngu nꞌda yʉ jąꞌi. Nɛ nuꞌi María, gui nu ra dumbʉi xʉn ʉ tho ngue ꞌbɛꞌa da tꞌørpa na ni tsꞌʉntꞌʉ, bi ꞌyɛ̨nꞌa ra Simeón.
Nɛꞌa ra Ana bim pøngahyą ꞌbʉ mi nu ra Jesús
36 Nɛꞌa nꞌda ra dącꞌyɛi xisu ngue í Ana mi ꞌbʉpʉ ja ra dąniją, nɛꞌa xin rá pøngahyą Oją a. Nuꞌa, rá tꞌįxu ra Fanuel a, rám bomꞌbɛto ra Aser ngue nꞌda rá tsꞌʉntꞌʉ ra Israel. Nu ra Ana, nuꞌa nyoto jɛya bim ꞌbʉhmi rá ndø nɛ ꞌbex bi du. 37 Nɛ bim ꞌbʉsɛ goho ꞌdäte ma goho njɛya, ya xʉn dącꞌyɛi a. Nɛ nu ra Ana, mi ząm bʉ ja ra dąniją a. Min yąui Oją ra pa nɛ ra xui, nɛ ja yʉ pa him mi sihmɛ ꞌbʉ i thąnde Oją. 38 Nuꞌbʉ min yąhʉ ra Simeón ra María nɛ ra José, bi zøm bʉ ra Ana, nɛ ꞌbex bi xi Oją jamadi ꞌbʉ mi nuꞌa ra ꞌuɛre, nguetho bi bądi gue yʉ́ yąnte ʉ. Janangueꞌa bi ꞌyɛ̨mpꞌʉ toꞌo mi tømpꞌ yʉ́ yąnte ngue ya bi zøh ya.
Bi mbencꞌa ra José bʉ ra hnini Nazaret nɛ rá xisu
39 Nuꞌbʉ mi ꞌyøtꞌʉ gätho mi man rán tꞌɛ̨di Oją ngue da ꞌyøtꞌe, nu ra José nɛ ra María bi mbeng bʉ ja ra hnini Nazaret bʉ ja ra xɛqui Galilea. 40 Nɛ nuꞌa ra tꞌʉhni bin te mán zaqui a, nɛ mi ja rán ꞌyomfɛ̨ni xʉn ho. Nɛ ɛ̨mmɛ bi jąp Oją a.
Dɛꞌmayon jɛya pɛꞌtsꞌa ra Jesús ꞌbʉ mi mba bʉ ja ra dąniją
41 Nu ra José nɛ ra María ząi nꞌdandį nꞌda jɛya i pa bʉ ja ra hnini Jerusalén da nu ra dąmpɛti ngue ran dąbaxjua. 42 Nɛ nuꞌbʉ mi mbɛꞌtsꞌa ꞌdɛꞌmayon jɛya ra Jesús, bi mbähä bʉ ja ra hnini Jerusalén ngue da nu ra dąmpɛti bʉ. 43 Nuꞌbʉ mi guaꞌa ram pɛti, bi mbeng bʉ yʉ́ ngu yʉ jąꞌi. Nɛ nuꞌbʉ mi mba bʉ ꞌyu ra José nɛ ra María, him mi pąꞌʉ ngue bá copʉ a ra Jesús. 44 Pɛ mim bɛ̨ni min ꞌyohʉ yʉ́ amigo. Nɛ nꞌdapa bin ꞌyo bʉ ja ra ꞌyu. Nɛ nuꞌbʉ mín de bin säya bʉya, nɛ njoꞌo bʉ ra Jesús. Nɛ nu rá mbe nɛ rá ta bi ꞌyänꞌdʉ yʉ́ amigo: “Ha gbán ꞌyohʉ a ra Jesús,” nɛꞌʉ yʉ́ mɛni bi ꞌyänni. 45 Pɛ him bi dįni, janangueꞌa bi mbeng bʉ Jerusalén, bi hyom bʉ.
46 Nɛ ná hyupa bʉya ja bi dįm bʉ ja ra dąniją. Mi ꞌbʉhmbʉ bʉ yʉ xänbate niją. Nɛ nuꞌa ra Jesús mi øde ꞌbɛꞌa mi manꞌʉ nɛ bi ꞌyän yʉn tꞌänni ꞌbɛꞌa bi ꞌyøde. 47 Nu yʉ xänbate niją bʉya bi hyonya thoho nangue gätho ꞌbɛꞌa mi pąꞌa ra Jesús. 48 Nɛ nuꞌa rá mbe nɛ ra José, bi hyonya thoho ꞌbʉ mi nu i yąhʉ yʉ xänbate. Nuꞌa rá mbe bi ꞌyɛ̨mbi:
―Tsꞌʉnt ꞌʉ, hanja in jabʉ gá ꞌyørcaꞌbe, nguetho nuꞌa ni ta nɛcä ɛ̨mmɛ dá honꞌaꞌbe nɛ mi tu ma mbʉiꞌbe.
49 Nu ra Jesús bi dądi:
―Pɛ ndeꞌbʉ hin xquí hyongüi, nguetho guí pąhmi ngue jatho ga øtꞌä rá ꞌbɛfi ma Ta.
50 Pɛ nuꞌʉ, him bi bądi ꞌbɛꞌa nam bønꞌa bi manꞌa.
51 Pɛ nuꞌa ra Jesús ꞌbex bi mbähä bʉ ja rá ngu bʉ ra hnini Nazaret, nɛ nząi mi øtꞌa i pa nsifi. Pɛ nuꞌa rá mbe mim bɛ̨ntho bʉ ja rá mbʉi ꞌbɛꞌa gätho bin ja. 52 Nu ra Jesús, in te rá jąꞌi nɛ in te rán ꞌyomfɛ̨ni. Nɛ gätho yʉ jąꞌi mi numanho a nɛꞌa Oją mi numanho a.
La Niñez de Jesús.