Ra Jesús bi mba ma dä bʉ bʉh ra tsꞌʉtꞌabi ra Pilato
15
Nuꞌbʉ tꞌʉxudi tho, nu yʉ ngʉrba mbäją nɛ yʉ dącꞌyɛi nɛ yʉ xänbate niją nɛ gätho ʉ miꞌda ma ngʉrbihe dyʉ́ judíohe, bin yąsɛ ʉ. Nɛ nubʉya bi zix a ra Jesús ngue di däpꞌa ra Pilato. Bin thąꞌtꞌ ꞌbʉ mi zitsꞌi. 2 Nɛ nu ra Pilato bi ꞌyänꞌna ra Jesús:―Ha gue e grá hmutsꞌʉtꞌabi yʉ judío, bi ꞌyɛ̨mpꞌa.
Bi dą a ra Jesús:
―Gueꞌa guím ma, bi ꞌyɛ̨na.
3 Nɛ nu yʉ ngʉrpa mbäją ɛ̨mmɛ bi yąpi. 4 Janangue a nu ra Pilato bi ꞌyänꞌna ra Jesús mahønꞌa, bi ꞌyɛ̨mbi:
―Hanja hin ni thątya i di yąpiꞌi. Nɛ xʉn ngu ꞌbɛꞌa gätho i xiꞌi, bi ꞌyɛ̨mbi.
5 Pɛ nu ra Jesús guextaꞌa him bi dątꞌa ra Pilato. Janangueꞌa nu ra Pilato bi hyonya thoho.
Ra Jesús bin tꞌun ran tsꞌɛmbi ngue da du
6 Nuꞌa ra pa ram pɛti ra mbaxjua, ząi di thø a nꞌda ra ofädi ra Pilato høntꞌa go ndaꞌa da man yʉ jąꞌi. 7 Nɛ min ofädi nꞌda ran ꞌyohʉ i Barrabás, ꞌdarpʉ mi ofädihʉ ʉ ꞌdaꞌingu bi ꞌyøthʉ ngue bin hote ʉ, bi dʉmꞌma nꞌda ra sʉi. 8 Nuꞌbʉ mi zøh yʉ jąꞌi xʉn ngu bʉ mi ꞌbʉh ra Pilato, nuꞌʉ bi xih ra Pilato di thøcpa nꞌda ra ofädi tengu nząi bi ꞌyøtꞌ ꞌbʉ ra pa ram pɛti. 9 Janangue a nu ra Pilato bi ꞌyɛ̨mpꞌʉ:
―Ha gueꞌa ni hmutsꞌʉtꞌabihʉ gyʉ́ israelhʉ, gyʉ́ judíohʉ, ga thøcꞌahʉ, bi ꞌyɛ̨mpꞌʉ.
10 Nguetho mi pąh ra Pilato di sɛya thohoba ra Jesús yʉ ngʉrpa mbäją ꞌbʉ mi däpꞌa. 11 Pɛ nu yʉ ngʉrpa mbäją bi parpa yʉ jąꞌi gueꞌa ra Barrabás da ꞌyäh yʉ jąꞌi. 12 Nu ra Pilato xø bi ꞌyɛ̨mpꞌʉ mahønꞌa:
―Xina ni hmutsꞌʉtꞌabihʉ, gyʉ́ israelhʉ, gyʉ́ judíohʉ, ꞌbɛꞌa ga ørpä na bʉya, bi ꞌyɛ̨nꞌa.
13 Nu yʉ jąꞌi bʉya ntsꞌɛdi bi ꞌyɛ̨n ʉ:
―Go gui cuarpʉ ja ra pontꞌi na ra Jesús.
14 Pɛ nu ra Pilato bi ꞌyɛ̨mpꞌʉ:
―ꞌBɛꞌa gue man tsꞌo xʉ ꞌyøtꞌna, bi ꞌyɛ̨mpꞌʉ.
Nɛ nuꞌʉ yʉ jąꞌi manꞌda ntsꞌɛdi bi ꞌyɛ̨n ʉ:
―Go cuarpʉ ja ra pontꞌi na, bi ꞌyɛ̨n ʉ.
15 Nu ra Pilato bi nde da ꞌyørpa rá pähä yʉ jąꞌi, janangue guehma go bi thøcpa a ra Barrabás. Nɛ bi manda da mba mꞌbɛi a ra Jesús nɛ da mba ma cuati bʉ ja ra pontꞌi.
16 Nu yʉ dofʉi bʉya, bi zixa ra Jesús bʉ mbo guepʉ ja yʉ́n säya yʉ dofʉi, nɛ bi zo ʉ gätho yʉ́ mindofʉihʉ ꞌbʉpʉ. 17 Nɛ bi mba ma hete nꞌda ra pahni xʉn jʉpoi a ra Jesús ngue tengu he yʉ tsꞌʉtꞌabi, nɛ ntsꞌɛdi bi mba ma huspi nꞌda ra corona á mꞌbe yʉ ꞌyʉꞌuįni nguetho bi den thoho. 18 Nɛ bi zɛngua ʉ nɛ bi ꞌyɛnspa yʉ́ biba ʉ: “Damim ꞌbʉmanho gra hmutsꞌʉtꞌabi yʉ judío,” bi ꞌyɛ̨mp ꞌbʉ mi denthoho. 19 Nɛ bi dɛspa rá yą yʉ za nɛ bi zotsꞌi, nɛ bin dąnyahmu, ɛ̨na i thąnde pɛgue bi denthoho. 20 Nuꞌbʉ mi juaꞌa bi denni bi tonspa a ra pahni xʉn jʉpoi nɛ bi hetꞌa rá pahni zɛhɛ. Bi gʉc pʉya ngue bi zitsꞌi da ꞌdømꞌpʉ ja ra pontꞌi.
Ra Jesús bi mba ma cuati bʉ ja ra pontꞌi nɛ bi du
21 Nɛ nuꞌbʉ mi mba bʉ ꞌyu, bin cꞌathʉ ra Simón, ra mɛngu bʉ Cirene, rá ta ra Alejandro nɛ ra Rufo, bí ꞌyɛ̨ a huąhi a. Nɛ nu yʉ dofʉi bʉya bi ꞌyørpa ra tsꞌɛdi a ra Simón da duspa rá pontꞌi a ra Jesús. 22 Nɛ guepʉ ja ra nyuni Gólgota ní tsꞌixa ra Jesús. Nuꞌa Gólgota in nde da ma “ra Nyuni Yąxmu.” 23 Nɛ nuꞌbʉ mi zøm bʉ, bin tꞌun ra vino ngue ma uąntsꞌi nꞌda ra ꞌyɛ̨thi xʉn ju a ra Jesús. Pɛ nuꞌa him bi zi a. 24 Nɛ nuꞌbʉ mi ꞌdømꞌpʉ ja ra pontꞌi bʉya, nu yʉ dofʉi bi ꞌyøtꞌa nꞌda ran tąha ʉ nangue yʉ́ he ra Jesús ngue i nde da bądi ndaꞌa ní ꞌbøꞌtꞌe da gąxa nꞌda ngu nꞌda. 25 Gʉto xudi ꞌbʉ mi mba nꞌdøꞌmi bʉ ja ra pontꞌi a ra Jesús. 26 Nɛ mán tꞌoꞌtꞌi bʉ ja ra pontꞌi a í yąpꞌa bi ꞌyɛ̨na, “Rá hmutsꞌʉtꞌabi yʉ judío na,” ɛ̨m bʉ.
27 Nɛ bi mba ma cuatihʉ ra Jesús yoho yʉ bɛ̨. ꞌDa a nꞌda yʉ pontꞌi. Nɛ bi ꞌbämꞌpʉ ja rán ꞌyɛi a nꞌda nɛ bi ꞌbämꞌpʉ ja rá gąha a manꞌda. 28 Nɛ nuna bin ja, mi mam bʉ ja rá tꞌohni Oją mayaꞌbʉ, bi ꞌyɛ̨na: “Da tꞌɛ̨mbi ngue ꞌdaꞌanguui ʉ yʉ dąditsꞌoqui a.” 29 Nɛ nu yʉ jąꞌi bi thopʉ, bi ʉcpi nɛ bi denthoho, bi ꞌyɛ̨mbi:
―Ha hinga gue e gá ma ngue gui xoꞌtꞌ ma nijąhʉ nɛ hyupa tho gui hyøh mahønꞌa. 30 Sä gui cąpʉ ja ra pontꞌi ya ꞌbʉ, nɛ gan yąnsɛ, bi ꞌyɛ̨mbi.
31 Nɛ ximangutho bi man ʉ yʉ ngʉrba mbäją bin ꞌyɛ̨mpꞌʉ:
―Nuna, bi yąnba yʉ́ te ʉ ꞌda, pɛ hingui sä din yąnsɛ ya. 32 Gan nuhʉ ra Cristo, rá hmutsꞌʉtꞌabi yʉ judío ꞌbʉ ba cąpʉ ja ra pontꞌi, gan nugähʉ, nɛ ga ɛ̨cꞌyɛihʉ bʉya, bi ꞌyɛ̨m ꞌbʉ mi denthoho. Nɛ ʉ mi cuathʉ bʉ, bi ʉcpa ra Jesús.
Bi du ra Jesús
33 Nuꞌbʉ mi zøn a huxhyadi bʉya bim ꞌbɛxui gätho ra häi, ja gueꞌbʉ mi zøn a hyunde bin nɛqui mahønꞌa. 34 Nɛ nuꞌa ra ora a ɛ xø i huxhyadi, ntsꞌɛdi bi mbah ra Jesús, bi ꞌyɛ̨na:
―Eloi, Eloi, lama sabactani, bi ꞌyɛ̨na. Nde da ma: “Ma Oją i, ma Oją i, hanja xcá hyɛga thoho.”
35 Nuꞌbʉ mi ꞌyø ʉ ꞌda ꞌbʉpʉ, bin ꞌyɛ̨mpꞌʉ:
―Nuna, nzo a ra Elías, bin ꞌyɛ̨mpꞌʉ.
36 Nɛ bán ti a nꞌda mí hą nꞌda tengu ra fʉnjo xí ꞌyotꞌi, bi fospʉ ja ra vino xʉn ju, nɛ bi ndøctꞌa nꞌda ra xithi. Pi uąspa ra Jesús ɛ̨mbi da zi, nɛ bi ꞌyɛ̨mpꞌʉ min ꞌyohʉ:
―Pɛ ꞌbɛ ga undä na, ga nuhʉ ꞌbʉ da zøh ra Elías di tongui, bi ꞌyɛ̨mpꞌʉ.
37 Pɛ nuꞌa ra Jesús ntsꞌɛdi bi mbafi nɛ ꞌbex bi du. 38 Nɛ nubʉ mbo ra dąniją ꞌbex gue bin xɛngui nde ra ꞌbøꞌtꞌe mi ndam bʉ. Bá fʉh magątsꞌi nɛ bi zøtahäi a bin xɛni. 39 Nɛ nuꞌa rá hmu yʉ dofʉi, mi hɛ̨tꞌa ra Jesús bi mba ꞌbʉ mi du, nɛ bi ꞌyɛ̨na:
―Majuąni nuna ran ꞌyohʉ na, rá Tsꞌʉntꞌʉ Oją na, bi ꞌyɛ̨n a ra hmudofʉi.
40 Nɛ mi ꞌbʉpʉ ꞌda yʉ xisu bʉ maꞌueni tsꞌʉ, mi hantꞌa ra Jesús. Nuꞌa nꞌda ra Salomé a, nɛ nuꞌa manꞌda ra María, ra mɛngu Magdala, nɛ nuꞌa manꞌda ra María, rá mbe ra Jacobo nɛ ra José. 41 Guehya yʉ xisu mi tɛn ra Jesús ꞌbʉ mi ꞌbʉpʉ Galilea nɛ mi fätsꞌi. Nɛ ʉ miꞌda yʉ xisu bi dɛn ꞌbʉ mi mba bʉ Jerusalén, mi ꞌbäpʉ.
Jesús bi mba ntꞌägui
42-43 Nɛ ya bin de, nɛ mim bɛ̨ni da ꞌyäcpa nꞌdihi rá ngøcꞌyɛi ra Jesús nguetho mi tsꞌʉtho da dʉꞌma ra pa ran tsꞌäya, nɛ nu ra pa ran tsꞌäya njongui sä da tꞌä a. Janangue a nu ra José ra mɛngu Arimatea, bi hyutꞌanzambʉi bi mba bán yąui ra Pilato, bi ꞌyäp a rá ngøcꞌyɛi ra Jesús. Nu ra José nꞌda rá ngʉrbi yʉ jąꞌi israel, pɛ gueꞌa nꞌda majuąni mi ɛ̨cꞌyɛ̨i Oją nɛ mi tømꞌma ra pa di manda ua rá tsꞌɛdi Oją. 44 Nu ra Pilato bi hyonya thoho ꞌbʉ mi sifi bi du ra Jesús. Nɛ nubʉya bi mbɛhna nꞌda ba si a rá hmu yʉ dofʉi ngue da ꞌyän ꞌbʉ majuąni ya bi du. 45 Nɛ nuꞌbʉ mi man a rá hmu yʉ dofʉi gue bi du, nu ra Pilato bi ꞌyɛ̨mpꞌa ra José:
―Da zä gui tuxa rá ngøcꞌyɛi ra Jesús ꞌbʉ.
46 Nu a ra José bʉya, bi dän a nꞌda ra ꞌbøꞌtꞌe nɛ bi mba bi tongba rá ngøcꞌyɛi ra Jesús, nɛ bi mbantꞌa ra ꞌbøꞌtꞌe xi däi nɛ bi cʉꞌtꞌ pʉ ja nꞌda ra hyądo gue ran ꞌyägui xí mba nthɛ̨qui bʉ ja nꞌda ra tꞌʉmbaꞌye. Nɛ bi juaspa nꞌda ra xįndo xʉn ndoho bʉ ja rá goxthi ran ꞌyägui. 47 Nɛ nuꞌa ra María, ra mɛngu bʉ Magdala, nɛ manꞌda ra María ngue rá mbe a manꞌda ra José, bi nu hapʉ bi jätꞌi.