Bi dąmbɛ̨ni ra Jesús
16
Nuꞌbʉ mi thoh ra pa ran tsꞌäya, nuꞌa ra María ra mɛngu bʉ Magdala, nɛ ra María rá mbe a manꞌda ra José, nɛ manꞌda ra xisu ngue ra Salomé, bi dän yʉ ꞌyɛ̨thi ngue yʉmanꞌu ngue da mba bʉ ja ran ꞌyägui da gospa rá ngøcꞌyɛi ra Jesús, tengu man tꞌøtꞌehe dyʉ́ judíohe. 2 Nɛ ntꞌʉxudi dą ndomingo ꞌbʉ mi bøx ra hyadi bi mba bʉ ja ran ꞌyägui ʉ bʉya. 3 Nɛ bin ꞌyɛ̨mzɛhɛ ʉ:―Toꞌo da zä di ꞌuecꞌa ra do bí juaxpʉ ja ra hyądo, bi ꞌyɛ̨n ʉ.
4 Nɛ nuꞌbʉ mi zøm bʉ bi nu bʉya, ya ma ꞌueque a ra do, ngue xʉn ndoho. 5 Nɛ nuꞌbʉ mi yʉrpʉ ja ra hyądo bʉya, bi nu nꞌda ran ꞌyohʉ mi hupʉ rá hyo ngue rán ꞌyɛi ra hyądo, mi he nꞌda ra pahni xʉn tꞌaxi. Nɛ nuꞌʉ yʉ xisu bin su ꞌbʉ mi nu. 6 Pɛ nuꞌa, bi ꞌyɛ̨mpꞌʉ:
―O guín suhʉ. Dí pącä guí homhbʉ ra Jesús ra mɛngu Nazaret, ngue bi ꞌdømꞌpʉ ja ra pontꞌi, pɛ bi dąmbɛ̨ni a, njoꞌo ua ya. Dami nuhʉ ua mí ꞌbɛni, bi tꞌɛ̨mpꞌʉ yʉ xisu.
7 Nɛ xø bi ꞌyɛ̨na:
―Pɛ nuya ni mbähä gui xihmbʉ ra Pedro nɛꞌʉ miꞌda yʉ́ xädi nɛ gui ꞌyɛ̨mfʉ gui tįmhbʉ bʉ Galilea a ra Jesús tengu tho bi xi ahʉ,” bi tꞌɛ̨mpꞌʉ yʉ xisu.
8 Nɛ nuꞌʉ yʉ xisu bʉya ꞌbex bi bønꞌa nꞌdihi bʉ ja ran ꞌyägui nɛ bá ɛ̨ ʉ, ɛ̨mmɛ di fɛtꞌʉ nguetho bin su, nɛ njoꞌo to min nde din yąhʉ ngue bin su.
Ra Jesús bin tįmmi ra María Magdalena
9 Nuꞌa ra Jesús bi dąmbɛ̨ni ꞌbʉ xudi thoho ndomingo. Mꞌbɛtꞌo thoho bin tįmmi ra María ra mɛ̨ngu bʉ Magdala, ngue gueꞌa xí hyønba thi yoto yʉ zįthu. 10 Nɛ nubʉya bi mba a ra María, bá xipꞌʉ yʉ́ xädi ngue bi dąmbɛ̨ni a ra Jesús, nɛ mí zonꞌʉ ngue tu yʉ́ mbʉi, ngue bi du ra Jesús. 11 Nɛ nuꞌbʉ mi ꞌyøde ngue bi dąmbɛ̨ni nɛ bi man a ra María ngue bi nusɛ, pɛ him bi ꞌyɛ̨cꞌyɛi ʉ.
Ra Jesús bin tįmhbʉ yoho yʉ́ xädi
12 Nubʉya bin tįmhbʉ mi yoho yʉ́ xädi a ra Jesús bʉ ꞌyu, ꞌdanꞌyo tsꞌʉ bʉ án nu ʉ. 13 Nɛ nuꞌʉ, bi mba ʉ bʉya, bá xi ʉ miꞌda ngue xø bi nu mahønꞌa, pɛ ngutho him bi ꞌyɛ̨cꞌyɛ̨i a bi man ʉ.
Ra Jesús bi xi ʉ yʉ́ xädi da mampꞌa rám hma ꞌbʉ mí ndex mahɛ̨tsꞌi
14 Rán zɛgui thoho bin tįmhbʉ gätho ꞌdɛꞌmaꞌda yʉ́ xädi ra Jesús. Mi hupʉ ja ra mɛxa ʉ. Nɛ bi zʉ ʉ nguetho him bi ꞌyɛ̨cꞌyɛi a xi sifi ngue bi dąmbɛ̨ni a. 15 Nɛ nubʉya bi ꞌyɛ̨mpꞌʉ:
―Ni mbähä gätho na ngʉni ra ximhäi, gui mamhbʉ ran ho maꞌdaꞌyo. Hønbʉ go hapʉ i ꞌbʉh yʉ jąꞌi gui xihmbʉ. 16 Nuꞌa toꞌo da ꞌyɛ̨cꞌyɛi nɛ din xixyą, gan yąnba rá te a. Pɛ nuꞌa hin da ꞌyɛ̨cꞌyɛi, da nu ran ʉnbi gätho yʉ pa maząi a. 17 Nɛ nuꞌʉ toꞌo da ꞌyɛ̨cꞌyɛigui xʉn ngu yʉ hmɛpya ga japi da ꞌyøtꞌʉ. Nangue ma tsꞌɛdigä da hyøn a thi yʉ zįthu in ꞌyohʉ ꞌda yʉ jąꞌi, nɛ din yą ꞌdahma ꞌdanꞌyo yʉ nde, 18 nɛ nuꞌbʉ da bɛntꞌʉ yʉ pozʉ nte da ja ʉ, ngutho ꞌbʉ da zi ra ꞌyɛ̨thi ngue ran dąte, nte da ja ʉ. Nɛ di japi da yąn ʉ yʉn zämanꞌʉ ꞌbʉ da gäspa yʉ́ ꞌyɛ, bi ꞌyɛ̨mpꞌʉ yʉ́ xädi a ra Jesús.
Bi ndex mahɛ̨tsꞌi a ra Jesús
19 Nɛ nuꞌbʉ mi gua a bi xih yʉ́ xädi, bi tsꞌix bʉ mahɛ̨tsꞌi a ra Hmu, nɛ ꞌdarpʉ ní conhui rá tsꞌɛdi Oją. 20 Nuꞌʉ yʉ́ xädi bi mba bʉya bi man rám hman Oją hønbʉ go hapʉ bi mba. Nɛ nu ra Hmu bi japi da zä da ma xʉn ho nɛ bi japi da ꞌyøtꞌ yʉ hmɛpya ꞌdahma da ꞌyɛ̨cꞌyɛi yʉ jąꞌi yʉ́m hman ʉ. Nɛ høntꞌa dí xi ahʉ ya.