Ra Jesús bi ma ngue da mba nsoꞌtꞌi ra dąnija
13
Nuꞌbʉ mi bøm bʉ ja ra dąnija ra Jesús nɛ yʉ́ xädi, nuꞌa nꞌda bi ꞌyɛ̨nꞌa:―Xänbate i, hyandi tsꞌʉ nʉ ra niją, ɛ̨mmɛ xʉ ndoho yʉ do nꞌyohʉ nɛ ɛ̨mmɛ mahotho.
2 Mi dąh ra Jesús nɛ bi ꞌyɛ̨mpꞌʉ:
―Guín nuhʉ ngue mahotho nɛ ɛ̨mmɛ ndoho yʉ do, pɛgue da zøn ra pa da soꞌtꞌi, bi ꞌyɛ̨mpꞌʉ.
Yʉ́ hmɛpya ngue rán zɛgui
3 Nɛ nuꞌbʉ mi zøm bʉ ja ra nyuni Olivos, bi hyupʉ ra Jesús, hɛ̨ꞌt ra dąnija. Nɛ høntꞌʉ yʉ́ xädi mi ꞌbʉhmbʉ bʉ. Nɛ nubʉya ra Pedro nɛ ra Jacobo nɛ ra Xuua nɛ ra Andrés:
4 ―Ndaꞌa ní pa da mba nsoꞌtꞌi ra niją gá xije, bi ꞌyɛ̨n ʉ. Ndaꞌa ni hmɛpya da hnu ꞌbʉ din ja a guím ma, tꞌɛ̨mpꞌa ra Jesús.
5 Mi dą a ra Jesús nɛ bi ꞌyɛ̨mpꞌʉ:
―Gam fähmbʉ njon da hyä ahʉ, 6 nguetho xʉn ngu ba ɛ̨hɛ ngue sä da ꞌyɛ̨na: “Nugä, guecä drá Cristogä,” da ꞌyɛ̨nꞌʉ. Nɛ xʉn ngu ʉ da hyätꞌi.
7 Nɛ nuꞌbʉ gui ꞌyøhmbʉ yʉ sʉi nɛꞌbʉ da hma ngue din ja yʉ sʉi, o guin suhʉ nguetho jatho din ja ʉ. Pɛ nuꞌbʉ din ja ʉ xinga gueꞌbʉ ran zɛgui ꞌbʉ. 8 Nguetho nu yʉ jąꞌi bʉ ꞌda yʉ häi din sʉhmi yʉ́ mijąꞌihʉ. Nɛ nu ꞌda yʉ tsꞌʉtꞌabi din sʉhmbʉ yʉ́ mitsꞌʉtꞌabihʉ, nɛ din ja yʉ ꞌyąnhäi, nɛ xʉn ngu yʉ nįdi din ja ra thuhu nɛ yʉn ꞌyoꞌtsꞌi. Nɛ guehya yʉ́ mbʉdi yʉn ʉnbi ya, bi ꞌyɛ̨mpꞌʉ.
9 Nɛ xø bi ꞌyɛ̨nꞌa:
―Nɛ gam fähmbʉ njon di ꞌuecꞌahʉ bʉ ja rá ꞌyu Oją, nguetho da mba ma dä ahʉ bʉ ja ran juąnbate, nɛpʉ ja yʉ́ niją ma mijudíohʉ da ꞌbɛpꞌahʉ, nɛ nangue guí ɛ̨cꞌyɛigahʉ da tsꞌonꞌnahʉ bʉ ꞌbʉh yʉ tsꞌʉtꞌabi, nɛpʉ ꞌbʉh yʉ dątsꞌʉtꞌabi ngue da tsꞌɛpꞌahʉ. Nɛ xʉn ho ꞌbʉ din jabʉ nɛ gueꞌa dí zä gui xihmbʉ mam hmangä ʉ. 10 Pɛ mꞌbɛtꞌo thoho da mba nsifi gätho yʉ jąꞌi ꞌbʉcua ja ra ximhäi ran ho maꞌdaꞌyo dí pø ʉ. 11 Nɛ nuꞌbʉ da zix ahʉ di dä ahʉ bʉ ꞌbʉh ra tsꞌʉtꞌabi, pɛ him ꞌbɛ gui hyonsɛhʉ ꞌbɛꞌa gui mamhbʉ ꞌbʉ da mba ma juąnꞌni ahʉ, nguetho nuꞌbʉ bi zøn ra ora da tꞌänꞌnahʉ, høntꞌa rá Hogandąhi Oją da zä di bɛ̨nꞌnahʉ ꞌbɛꞌa gui mamhbʉ. 12 Nɛ nu nꞌda ran ꞌyohʉ di manda da tho rán ꞌyohʉ, nɛ nuꞌa rá ta di manda da tho rá tsꞌʉntꞌʉ. Nɛ da ndantsꞌʉ yʉ́ tsꞌʉntꞌʉ din tunhdʉ ʉ yʉ́ ta nɛ yʉ́ mbe nɛ di manda da tho rá ta nɛ rá mbe ꞌda yʉ tsꞌʉntꞌʉ. 13 Nɛ gätho yʉ jąꞌi da zan ahʉ nangue a guí ɛ̨cꞌyɛigahʉ. Nɛ nuꞌʉ toꞌo gätho da hyät yʉn ʉnbi gueꞌbʉ go rán zɛgui, gue ʉ dim pø ʉ, bi ꞌyɛ̨mpꞌʉ.
14 Nɛ bi thoqui bi xi ʉ:
―Ba ɛ̨ a nꞌda ra tsꞌɛdi xʉn tsꞌo ngue di tsꞌoni gätho. Ngubʉ bi man ra Daniel gue rá pøngahyą Oją. Nɛ nuꞌbʉ gá nuhʉ dim ꞌbäpʉ guepʉ hin rán säui dim ꞌbäi, dami ꞌdahmbʉ gyʉ́ mɛnguhʉ bʉ Judea, gui mbähä bʉ ja yʉ tꞌøhø guin ꞌyąmhbʉ bʉ. Nu a toꞌo da nu ra søcuą i ja ua, da ꞌyɛ̨ꞌtꞌambʉi na. 15 Nɛ nuꞌbʉ bin ja a, toꞌo i ꞌbäpʉ goxthi hin da yʉrpʉ mbo rá ngu, hin da bɛ̨ni ja ꞌbɛꞌa ꞌbɛ da hyątsꞌi, ꞌbex gue da ꞌdagui. 16 Nɛ nuꞌa toꞌo ꞌbäpʉ ja yʉ́ huąhi hin da mbeng bʉ ja yʉ́ ngu ngue ba cą yʉ́ coto, ꞌbex gue da ꞌdatho bʉ. 17 Huɛ̨cate ʉ yʉ xisu in hątꞌʉhni nɛ ʉ ꞌbʉh yʉ́ ꞌuɛre yʉ pa ʉ. 18 ꞌYäfʉ rá mate Oją ngue hin din ja ahʉ ran ꞌdagui ꞌbʉ yʉ pa xʉn sɛ xøhma hin da zä gui ꞌdahmbʉ. 19 Nɛ nuꞌʉ yʉ pa ʉ, din ja xʉn ngu yʉn ʉnbi hin jąmꞌbʉ nꞌdandį xøn ja gueꞌbʉ go rá mbʉdi ra ximhäi. Nɛ nuꞌbʉ ya bin ja, him manꞌdandį din ja yʉn ʉnbi tengu ʉ. 20 Pɛ nangue ʉ yʉ́ ꞌyɛ̨cꞌyɛi, Oją di japi hingui ngu yʉ pa din ja yʉn ʉnbi, nuꞌbʉ hinꞌna njon xtam bongui, bi ꞌyɛ̨n a ra Jesús.
21 Nɛ bi thoqui bi ma, bi ꞌyɛ̨na:
―Nɛ nuꞌbʉ da si ahʉ: “Dami hyanthʉ, ꞌbʉcua ra Cristo ya, rá Thahni Oją,” da tꞌɛ̨n ahʉ. O gue da tꞌɛ̨nꞌahʉ: “Ba nuhʉ ꞌbʉpʉ ra Cristo ya, rá Thahni Oją,” da tꞌɛ̨n ahʉ, pɛ o guí ɛ̨cꞌyɛihʉ. 22 Nguetho xʉn ngu dim ꞌbʉ ʉ yʉ hyäte Cristo nɛ yʉ hyäte pøngahyą da ꞌyøtꞌ yʉ hyonya ntꞌøtꞌe nguetho i nde da hyät yʉ ꞌyɛ̨cꞌyɛi gue bi huanh Oja, ꞌbʉ da zä da hyätꞌʉ. 23 Pɛ ndeꞌbʉ gam fäsɛhʉ nguetho ya dá xi ahʉ ꞌbɛꞌa gätho din ja mꞌbɛjua, bi ꞌyɛ̨n a ra Jesús.
Nuꞌa din ja ꞌbʉ bi zøcua mahønꞌa ra Jesús
24 Nɛ xø bi ꞌyɛ̨mpꞌʉ yʉ́ xädi a ra Jesús:
―Nɛ nuꞌbʉ ya bi guah yʉn ʉnbi, nu a ra hyadi di ꞌbɛh rá tsꞌɛdi nɛ ra ząna him man ja rán nɛqui. 25 Nɛ nu yʉ sø da dägui. Nɛ gätho miꞌda di ꞌbɛh yʉ́ tsꞌɛdi ʉ gä bí ja bʉ mahɛ̨tsꞌi, di ꞌyąni. 26 Nɛ nubʉya da hnugui ba ɛ̨cä ua ngue dán jąꞌigä ua ja ra ximhäi, ba ogä bʉ ja yʉ güi, dan ꞌyoꞌbe xʉn ngu ma tsꞌɛdi nɛ dam mixte xʉn ho. 27 Ga pɛnꞌdʉ yʉ́m ꞌbɛhni Oją mahɛ̨tsꞌi bʉya, di pɛtꞌʉ gätho xtá huahni guecua gätho na ngʉni ra ximhäi, bi ꞌyɛ̨nꞌa ra Jesús.
28 Nuya da zä gui pąhmbʉ ꞌbɛꞌa gue nin tꞌuti i utꞌahʉ ꞌda yʉ za. Nuꞌbʉ bi bøx yʉ́ ꞌdogui ʉ yʉ́ ꞌyɛ guí pąhmbʉ mi tsꞌʉtho din ja ra hyethe bʉya. 29 Ngutho ꞌbʉ ya bin ja gätho ʉ dá xi ahʉ, gui pąhmbʉ ngue mi tsꞌʉtho ba pengä ua mahønꞌa bʉya, bi ꞌyɛ̨na. 30 Majuąni dí xi ahʉ di ꞌbʉtho ua ꞌda ahʉ ꞌbʉ bi mbʉdi din ja a dí xi ahʉ. 31 Mahɛ̨tsꞌi da guadi, nɛcua ja ra häi, pɛ nuꞌa mam hmangä hin jąmꞌbʉ da gua a.
32 Pɛ nuꞌa ra pa a, njongui pądi ꞌbɛꞌa ní ora din ja a dím mangä, xinga gue ʉ yʉ́m ꞌbɛhni Oją ꞌbʉpʉ mahɛ̨tsꞌi, xinga guecä ngue dán jąꞌigä ua ja ra ximhäi dí pądi. Høntꞌa Oją ma Ta i pądi, bi ꞌyɛ̨n a ra Jesús.
33 Nɛ xø bi ꞌyɛ̨na:
―Thocpa thoho gan nuhmbʉ tenguꞌbʉ hin gui tonspahʉ ra tꞌąha. Nɛ xinga nꞌda zi ora gui pumbɛ̨nihʉ Oją nɛ thocpa thoho gan yąhʉ a, nguetho hin guí pąhmbʉ ndaꞌa ni pa ba pengä mahønꞌa. 34 Tengu nꞌda ran ꞌyohʉ bi mba yatho bi zoh rá ngu, bi un yʉ́n tꞌɛ̨di yʉ́ ꞌyɛ̨hɛ ngue di jamansu bʉ, nꞌda ngu nꞌda bi xi a da ꞌyøtꞌe. Nɛ bi xi a ra mbängoxthi ngue hin di tonspa ra tꞌąha. 35 Nɛ ngutho dí xi ahʉ, dami tømhbʉ tengu ꞌbʉ gan äthąhʉ nguetho hin guí pąhmbʉ ꞌbɛꞌa ní pa ba pengä ua, o gueꞌbʉ bin de, o gueꞌbʉ made ra xui, o gueꞌbʉ bi mbah yʉ øni, o gueꞌbʉ bi hyatsꞌi. 36 Nguetho hin guí pąhmbʉ ndaꞌa ni ora ba ɛ̨cä, xiꞌbʉ ba ɛ̨cä nɛ ga tįn ahʉ bʉ gdi ąhmbʉ. 37 Nɛ nuꞌa dí xi ahʉ, ngutho dí xicä gätho miꞌda: “Dami tømhbʉ,” bi ꞌyɛmpꞌʉ yʉ́ xädi a ra Jesús.