Rán tꞌuti yʉn tsꞌombɛfi
12
Nu ra Jesús ꞌbex bi dʉꞌmi bi xi a nꞌda ran tꞌuti nɛ bi ꞌyɛ̨mpꞌʉ:―Nu nꞌda ran ꞌyohʉ bi ꞌyøtꞌa nꞌda ra nuąndätꞌo, nɛ bi føꞌtꞌe nɛ bi ꞌyaꞌma nꞌda ra hyąhäi guepʉ da ꞌyøtꞌa nꞌda ran thɛꞌma guindätꞌo, nɛ bi hyø a nꞌda ra jądo xʉn hɛ̨tsꞌi da ndex ʉ da nu rá häi.
Nɛ bi hmitꞌʉ yʉ mbɛfi a rá häi ngue dim pɛpʉ, nɛ bi mba nꞌdanni a ran ꞌyohʉ. 2 Nuꞌbʉ bi zøn ra pa din ja ʉ yʉn dätꞌo, bá pɛhna nꞌda rá ꞌyɛ̨hɛ ba tu a xí mamhbʉ di unni. 3 Pɛ nuꞌʉ yʉ mbɛfi bi bɛntꞌa ra ꞌyɛ̨hɛ, nɛ bi mbɛꞌmi nɛ bi mbɛnthoho bʉya nɛ nte bi unni. 4 Nu rá mbɛti ra nuąndätꞌä bá pɛhn manꞌda rá ꞌyɛ̨hɛ bʉya. Pɛ nɛꞌa bi mba ma batꞌa do a, nɛ bi mba ma ʉnba rá yą, nɛ bi zantho, nɛ xø bi mbɛnthoho bʉya. 5 Nɛ bá pɛhn manꞌda, nɛ xø bá tho a. Nɛ xʉn ngu miꞌda bí ꞌbɛhni. Nuꞌʉ ꞌda bi ʉnba thoho nɛ nu miꞌda bi hyo.
6 Mi ꞌbʉ a nꞌda rá tsꞌʉntꞌʉ a rá mbɛti ra nuąndätꞌo nɛ ɛ̨mmɛ di huɛ̨cꞌa. “Nu yʉ mbɛfi masque da numansu ma tsꞌʉntꞌʉ,” bi ꞌyɛ̨nsɛ, nɛ bá pɛnꞌna bʉya. 7 Pɛ nu ʉ yʉ mbɛfi ꞌbʉ mi nurpa a rá tsꞌʉntꞌʉ, bin ꞌyɛ̨mzɛhɛ ʉ: “Nuna, guehna da gohmi ra häi ꞌbʉ bi du rá ta. Mbähä ga hohʉ nɛ nubʉya ma mbɛti zɛhɛhʉ ra nuąndätꞌo,” bin ꞌyɛ̨mzɛhɛ ʉ. 8 Nɛ bi bɛntꞌi nɛ bi hyo nɛ bi ꞌyɛm bʉ maꞌueni bʉ ja ra nuąndätꞌo, bi ꞌyɛ̨nꞌa ra Jesús ꞌbʉ mi man a ran tꞌuti.
9 ―Nuya guim bɛ̨mhbʉ ꞌbɛꞌa da ꞌyøtꞌa rá mbɛti ra nuąndätꞌo, bi ꞌyɛ̨mpꞌʉ. Guehma ba ɛ̨sɛ nɛ da hyo ʉ xí hmitꞌa rá nuąndätꞌo nɛ di un ra nuąndätꞌo ʉ miꞌda, bi ꞌyɛ̨n a ra Jesús. 10 Ha hin gán xähmbʉ rá tꞌohni Oją ngue i ɛ̨na:
Nuꞌa ra do bi bʉntꞌʉ yʉ gądo,
gueꞌa manꞌda mahyoni tengutho bʉ ná thon yʉ guangu.
11 Gueꞌa bi zänd Oją,
hanja gní hyonya thohohʉ,
ɛ̨m bʉ rám hman Oją, bi ꞌyɛ̨n a ra Jesús.
12 Nu yʉ ngʉrba mbäją nɛꞌʉ min ꞌyohʉ, bi nde da bɛntꞌa ra Jesús nguetho bi bądi ngue go yʉ́n tꞌuti ʉ nangue a bi man ra Jesús, pɛgue bi zutho din cuɛ yʉ jąꞌi, janangue him bi bɛntꞌi. Bi mbatho ʉ bʉya.
Ran tꞌänni nangue ra renta im man ra tsꞌʉtꞌabi Roma
13 Nɛ bi ꞌbɛnpʉ ꞌbʉh ra Jesús ʉ miꞌda yʉ fariseo nɛ ʉ ꞌda ma ngʉrpihe mi tɛnꞌna ra tsꞌʉtꞌabi Herodes. Bi ꞌbɛhni ngue da ꞌyänꞌna nꞌda ran tꞌänni nɛ nuꞌbʉ hinga gue a da ma, ꞌbex gue di yąpi. 14 Nuꞌbʉ mi zøm bʉ bi ꞌyɛ̨n ʉ:
―Xänbate i, dí pąhmbe gätho majuąni guím ma nɛ njon guí su, nguetho hin guí ørpa masu a man yʉ jąꞌi nɛ guí xänba a majuąni rám hman Oją ʉ yʉ jąꞌi. Dín nde gui xije, ha din thɛui yʉ́n tꞌɛ̨di Oją ꞌbʉ dí øthʉ ngue dí juthʉ ra renta im man ra tsꞌʉtꞌabi bʉ Roma in tsꞌʉtꞌabi ua, uague hinꞌna. Ha xʉn ho ꞌbʉ ga thoqui ga juthʉ uague hinꞌna, bi ꞌyɛ̨n ʉ. 15 Pɛ nuꞌa ra Jesús mi pądi høntho i nde da dįnbi ꞌbɛꞌa dí yąpꞌa, janangue a bi ꞌyɛ̨mpꞌʉ:
―Hanja gní ꞌyängahʉ, xiꞌa ni mbɛti gní juthʉ ra renta im man ra tsꞌʉtꞌabi, gan nugä.
16 Nɛ bi un bʉya.
―Toꞌo rá pøte nɛ rá thuhu i cuat na ra mbɛti, bi ꞌyɛn a ra Jesús.
Nɛ nuꞌʉ bi ꞌyɛ̨n ʉ:
―Rá pøte nɛ rá thuhu ra tsꞌʉtꞌabi Roma i cuat na.
17 Mí dąh ra Jesús nɛ bi ꞌyɛ̨mpꞌʉ:
―Nuꞌa rá mbɛti ra tsꞌʉtꞌabi Roma, gui unꞌna. Nuꞌa xin rá mbɛti Oją gui unꞌna Oją a, bi ꞌyɛ̨mpꞌʉ.
Nɛ nuꞌʉ bi hyonya thoho nangue a bi manꞌa ra Jesús.
Ran tꞌänni nangue ʉ da dąmbɛ̨ni
18 Nɛ bá ɛ̨ ʉ ꞌda yʉ saduceo bʉya ngue mi ɛ̨n ʉ njoꞌo to da dąmbɛ̨ni. Nɛ bi ꞌyänꞌna ra Jesús, bi ꞌyɛ̨mbi:
19 ―Xänbate i, nuꞌa nꞌda ran tꞌɛ̨di bi manꞌa ra Moisés i ɛ̨na, ngue nuꞌbʉ da du nꞌda ran ꞌyohʉ nɛ njoꞌo rá tꞌʉhni ꞌbʉ bi du, nɛ nuꞌa rán ꞌyohʉ zɛhɛ da zinba a rá xisu a rán ꞌyohʉ bi du. Nɛ nuꞌa rá tꞌʉhni dim ꞌbʉi da tꞌɛ̨mbi rá tꞌʉhni a xí du. 20 Nɛ mi ꞌbʉ i yoto yʉn ꞌyohʉ i din ꞌyohʉ zɛhɛ ʉ. Nɛ nuꞌa ra ꞌbɛtꞌo nꞌyohʉ bi zinꞌa nꞌda ra xisu, nɛ nuꞌbʉ mi du njoꞌo yʉ́ tꞌʉhni. 21 Janangueꞌa nu a rán ꞌyohʉ a bi du bi zin a ra xisu mahønꞌa. Nɛꞌa bi du a, nɛ xinga gue a bim ꞌbʉh yʉ́ tꞌʉhni a. Nɛ ná hyu ngutho. 22 Nɛ gätho ʉ yoto ma ꞌyohʉ nɛ ꞌdatꞌa ra xisu bi zini, nɛ xinga nꞌda mím ꞌbʉh yʉ́ tꞌʉhni ꞌbʉ bi du ʉ. Nɛ nzɛgui nɛsɛ ra xisu bi du. 23 Nuya dami xije nuꞌbʉ majuąni da dąmbɛ̨ni yʉ jąꞌi, ndaꞌa nin ꞌyohʉ dim ꞌbʉhmi ra xisu, nguetho gätho yoto bim ꞌbʉhmi, bi ꞌyɛ̨n ʉ yʉ saduceo. 24 Mi dąh ra Jesús nɛ bi ꞌyɛ̨mpꞌʉ:
―Nuꞌahʉ ꞌdanꞌyo thoho guí mamhbʉ nguetho hin guím bɛ̨mhbʉ ꞌbɛꞌa mam bʉ ja rá tꞌohni Oją xín rá tsꞌɛdi Oją guí pąhmbʉ. 25 Nuꞌbʉ bi dąmbɛ̨ni ʉ xʉn du him man ja ran sini bʉ pɛgue dim ꞌbʉtho yʉ jąꞌi tengu yʉ́m ꞌbɛhni Oją ꞌbʉpʉ mahɛ̨tsꞌi. 26 Nɛ nuꞌa ram hma ngue da dąmbɛ̨ni ʉ xʉn du, majuąni a nɛ guin nuhʉ bʉ ja rám hman Oją ngue nuꞌbʉ min yąui Oją ra Moisés bʉ ja ra tꞌʉza bi ꞌyɛ̨mbi: “Nugä drá Ojągä, nu ra Abraham nɛ ra Isaac nɛ ra Jacob ngue nim bombøtahʉ, i ɛ̨cꞌyɛigui,” bi ꞌyɛ̨n Oją. 27 Ngubʉ bi ma nguetho guextaꞌa i ꞌbʉh yʉ́ mbʉi ʉ. Pɛ hin guím bɛ̨mhbʉ, nguetho ꞌdanꞌyo thoho guí mamhbʉ, bi ꞌyɛ̨n a ra Jesús.
Rán tꞌɛ̨di Oją manꞌda ja tsꞌɛditho
28 Nuꞌbʉ min yąhʉ yʉ saduceo ra Jesús, mi ꞌbʉpʉ nꞌda ra xänbate niją bi ꞌyøde ꞌbɛꞌa bi man ra Jesús nɛ bi bądi ngue xʉn ho a bi ma. Janangueꞌa bi ꞌyänni:
―Ndaꞌa rán tꞌɛ̨di Oją ngue manꞌda ja tsꞌɛditho ga øthʉ, bi ꞌyɛ̨nꞌa.
29-30 Bi dąꞌa ra Jesús:
―Nuꞌa rán tꞌɛ̨di Oją manꞌda jatsꞌɛditho ga øthʉ, gueꞌa ran tꞌɛ̨di ngue i ɛ̨na: “Dami ꞌyøhmbʉ gyʉ́ jąꞌi israelhʉ, nuꞌa Oją ra Hmu, nꞌdatho a. Nɛ guim bɛ̨mhbʉ a nangue gätho ni mbʉihʉ, nɛ gätho ni tehʉ, nɛ gätho nin ꞌyomfɛ̨nihʉ, nɛ gätho ni tsꞌɛdihʉ,” i ɛ̨n rá tꞌohni Oją. Pɛ guehna ran tꞌɛ̨di manꞌda ja tsꞌɛdi tho ga øthʉ, bi ꞌyɛ̨nꞌa ra Jesús. 31 Nɛ ꞌdaꞌangutho ui ná yoho ran tꞌɛ̨di ga øthʉ i ɛ̨na: “Gui huɛ̨c ni mijąꞌihʉ tengu bʉ gnin huɛ̨c zɛhɛhʉ,” i ɛ̨n rá tꞌohni Oją. Guehya yʉn tꞌɛ̨di manꞌda ja tsꞌɛditho ga øthʉ xinda gue ʉ miꞌda, bi ꞌyɛ̨n a ra Jesús.
32 Nɛ nuꞌa ra xänbate niją, bi ꞌyɛ̨m bʉya:
―Xänbate i, majuąni xʉn ho guím ma, ngue høntꞌa nꞌda Oją i ꞌbʉi nɛ njoꞌo manꞌda tengu a. Nɛ ja tsꞌɛdi tho da bɛ̨n Oją nꞌda ngue gätho rá mbʉi, nɛ gätho rá te, nɛ gätho rán ꞌyomfɛ̨ni, nɛ gätho rá tsꞌɛdi, 33 nɛ di huɛ̨c rá mijąꞌiui tengu bʉ nin huɛ̨czɛhɛ nꞌda. Manꞌda ja tsꞌɛditho da ꞌyøtꞌa nꞌda ʉ xinda gue ʉ gätho yʉ ꞌbøtsꞌe nɛ yʉn tꞌunni dí mbøspa Oją nꞌda, bi ꞌyɛ̨n a ra xänbate niją.
34 Nɛ nu ra Jesús ꞌbʉ mí ꞌyø a bi man ra xänbate niją bi bądi ngue nꞌdatꞌa Oją im bɛ̨ni janangue a bi ꞌyɛ̨mbi:
―Nuꞌi tsꞌʉtho di ꞌbɛ i ngue da zä gui cʉrpʉ di manda rá tsꞌɛdi Oją, bi ꞌyɛ̨mpꞌa.
Nɛ nubʉya njom manꞌda bi zäpi da ꞌyän miꞌda yʉn tꞌänni.
Toꞌo gue rá Tsꞌʉntꞌʉ a ra Cristo
35-36 Nɛ mí xänba yʉ jąꞌi a ra Jesús bʉ ja ra dąnija, nɛ bi ꞌyɛ̨mpꞌʉ:
―Hanja ɛ̨n ʉ yʉ xänbate niją ngue nu ra Cristo rám bomꞌbɛto ra David a, nɛ xim mi ɛ̨mbi rá Hmu ꞌbʉ hin ním ꞌbʉi, nguetho mi ɛ̨nꞌa ra David:
Nuꞌa Oją bi ꞌyɛ̨mpꞌa ma Hmu:
“ꞌDatꞌua ga huhmi ga conhui ma tsꞌɛdi
gueꞌbʉ go dá tąpä nin sʉihʉ ua ja ra ximhäi
nɛ gui manda ʉ bʉya,”
bi tꞌɛ̨mpꞌa ma Hmu, bi ꞌyɛ̨n a ra David ꞌbʉ mí bɛ̨nba rá Hogandąhi Oją nangue ꞌbɛꞌa da ꞌyøtꞌ ra Cristo. 37 Guesɛ ra David bi ꞌyɛ̨mbi rá Hmu a ra Cristo. Hague nja pɛ nɛ rám bomꞌbɛto a, bi ꞌyɛ̨n a ra Jesús.
Pɛ nu yʉ jąꞌi, bi ꞌyømanho gätho a bi man ra Jesús.
Ra Jesús bi ma ꞌbɛꞌa i øtꞌʉ yʉ xänbate niją
38 Nɛ bi thoqui bi xänba yʉ jąꞌi a ra Jesús bi ꞌyɛ̨mpꞌʉ:
―Gam fähmbʉ nangue a i xi ahʉ yʉ xänbate niją, nguetho høntꞌa ran ꞌyɛ̨tsꞌi i øtꞌʉ nɛ di ho da hye yʉ pahni xʉ mba guepʉ i ꞌyo, nɛ di ho da mba ma zɛngua bʉ ja yʉ täi, 39 nɛ di ho da hyux bʉ ja yʉn thutsꞌi xʉn ho bʉ ja yʉ niją, nɛ di ho yʉ́ mbʉdi din sihmɛ bʉ ja yʉn sihmɛ ʉ, 40 nɛ i hąspi ꞌbɛꞌa gätho bi tsꞌocpa ʉ yʉ xisu xøn du yʉ́ ndø, nɛ sä nyaꞌa thoho in yąhʉ Oją ngue i nde da tꞌɛ̨mbi xʉn ho tho yʉ́ mbʉi. Manꞌda xʉn ngu ran ʉnbi da nu ya, bi ꞌyɛ̨nꞌa ra Jesús.
Ran tꞌunni manꞌda di muui bʉ na nu Oją
41 Nɛ mi hupʉ ra Jesús bʉ mí ja ra huada guepʉ i pa njätꞌi ra mbɛti rán tꞌunni Oją. Nɛ in nu bʉ i cätꞌ ra mbɛti ʉ yʉ jąꞌi bʉ ja ra huada. Nɛ bi nu xʉn ngu yʉ mɛmbɛti bi thopʉ ngue xʉn ngu ra mbɛti bi gärpʉ ja ra huada nꞌda ngu nꞌda ʉ. 42 Nɛ bi zøm bʉ nꞌda ra hyoya xisu xi du rá ndø, nɛ bi gätꞌi yocentavo thoho. 43 Nɛ nuꞌbʉ mi nu a bi ꞌyøtꞌa ra xisu bʉya nɛ bi ꞌyɛ̨mpꞌʉ: