Bi hyux ra buru a ra Jesús nɛ bi tꞌɛ̨spi
11
Nɛ mi tsꞌʉtho da zøm bʉ Jerusalén ra Jesús nɛ ʉ mín ꞌyohʉ. Bin ꞌyo bʉ hämbʉ ra hnini Betfagé nɛ ra hnini Betania, hɛ̨rpʉ ja ra nyuni Olivos. Nɛ nubʉya bi mbɛhnꞌdʉ yoho yʉ́ xädi ra Jesús. 2 ―Ni mbɛ nʉ njon nʉ bí ja ra hnini nɛ nuꞌbʉ gá sømmi, gui tįmmi bʉ nꞌda ra buru nthątꞌi ngue njoꞌo to xí hyuxꞌa nꞌdandį, nɛ gua xoc pʉya nɛ gua siui ua. 3 Nɛ nuꞌbʉ da tꞌɛ̨nꞌaui: “Hanja ngubʉ guí øtꞌui,” ꞌbʉ da tꞌɛ̨n aui, gui ꞌyɛ̨nui: “Nuꞌa ra Hmu i honi nɛ xø ba siꞌbe ua mahønꞌa,” gui ꞌyɛ̨nui, bi ꞌyɛ̨nꞌa ra Jesús.
4 Nɛ bi mba bʉya, nɛ bi dįm bʉ a ra buru, nthątꞌi bʉ ja ra goxthi nguepʉ i thoh ra ꞌyu. Nɛ bi xocꞌʉ bʉya.
5 Nuꞌʉ mi ꞌbʉpʉ bi ꞌyɛ̨nꞌʉ:
―ꞌBɛꞌa guí øtꞌui bʉ, hanja guí xocui ra buru.
6 Nuꞌʉ yʉ xädi bi dątꞌʉ nɛ bi xifi tengu xi xih ra Jesús.
―Dami sixui ꞌbʉ, bi tꞌɛ̨mpꞌʉ yʉ xädi bʉya.
7 Bá tsꞌinba a ra buru a ra Jesús bʉya nɛ bi mbøh yʉ́ coto ʉ bá si ra buru, ngue bi gąspi nɛ bi hyuxa ra Jesús bʉya. 8 Nɛꞌʉ yʉ jąꞌi bi mbøh yʉ́m ꞌbɛxøtsꞌe pahni bi xįmba bʉ ꞌyu, nɛ nuꞌʉ miꞌda yʉ jąꞌi bi xɛc yʉ paxi nɛ bi mbøcpa bʉ ja ra ꞌyu.
9 Nuꞌʉ mi ꞌbɛtꞌo bʉ ní mba a ra Jesús, nɛ ʉ mi ꞌbɛjua, gätho í mba ʉ bi ꞌyɛ̨nꞌʉ:
―Mająpi a bá pɛnhd Oją, bi ꞌyɛ̨n ʉ. 10 Din tsꞌʉtꞌabi a tengu tho ma mbombøtahe ra David. Mixte rá tsꞌɛdi Oją, bi ꞌyɛ̨m bʉ ní mba ʉ.
11 Bi yʉthʉ bʉ Jerusalén ra Jesús bʉya. Nɛ bi yʉrpʉ ja ra dąniją, nɛ bi nu ꞌbɛꞌa gätho i tꞌørpʉ nɛ bi bøm bʉya nguetho ya bin de. Bi mba bʉ ra hnini Betania nɛ ʉ ꞌdɛꞌmayoho yʉ́ xädi bi mbähä.
Ra Jesús him bi numanho ra za him mi zʉh yʉ́ ndätꞌä
12 Nuꞌbʉ mi hyax bʉya bi bøm bʉ Betania ra Jesús, bi mbeng bʉ Jerusalén. Nɛ bin tumanthuhu bʉ ꞌyu a. 13 Nɛ mi hantꞌa nꞌda ra za ja yʉ́ paxi, bi mba da nu ꞌbʉ i zʉpʉ yʉ́ ndätꞌo. Pɛ nuꞌbʉ mi zøm bʉ, nte bi dįm bʉ, høntꞌʉ yʉ́ xi nguetho hinga gueꞌʉ yʉ pa i zʉh yʉ́ ndätꞌo, nɛ säti tho ja yʉ́ xi. 14 Nu ra Jesús bʉya bi ꞌyɛ̨mpꞌa ra za:
―Njąmꞌbʉ to da zi mahønꞌa ʉ ni ndätꞌo, bi ꞌyɛ̨mbi.
Nɛ bi ꞌyøh yʉ́ xädi a bi man ra Jesús.
Ra Jesús bi hyøn a thi ʉ yʉ mbä nɛ ʉ yʉ däi bʉ ja ra dąniją
15 Nɛ bi thopʉ Jerusalén ra Jesús nɛ yʉ́ xädi. Nɛ bi yʉrpʉ ja ra dąniją mahønꞌa. Nɛ bi hyøn a thi gätho yʉ mbä nɛ yʉ däi mi ꞌbʉpʉ. Nɛ bi ndønba yʉ́ mɛxa yʉm pämbɛti nɛ yʉ́n thutsꞌi yʉ mbätꞌazʉ. 16 Nɛ njon di japi da thopʉ niją ꞌbʉ i tu yʉ́ ꞌbɛni. 17 Nɛ bi ꞌyɛ̨mpꞌʉ yʉ jąꞌi bʉya:
―Ha hinga ntꞌoꞌtꞌi bʉ ja rá søcuą Oją ngue bi ꞌyɛ̨na: “Í thø a ma ngu nguepʉ da dąndegui gätho yʉ jąꞌi ꞌbʉcua ja ra ximhäi,” i ɛ̨n Oją, bi ꞌyɛ̨n a ra Jesús. Pɛ nuꞌahʉ, xcá ꞌyørpahʉ tengu ꞌbʉ rá hyądo nguepʉ nin yąn ʉ yʉ bɛ̨, bi ꞌyɛ̨mpꞌʉ bʉya.
18 Bi ꞌyø ʉ yʉ xänbate niją nɛ yʉ ngʉrpa mbäją ꞌbɛꞌa xí manꞌa ra Jesús, nɛ i honi hague dán zä da hyo, nguetho bin su ꞌbʉ mi nu gätho yʉ jąꞌi madi hyonya thoho nangue a ꞌbɛꞌa bi xänba ra Jesús. 19 Nuꞌbʉ mín de bi bøm bʉ a ra Jesús bʉ ja ra dąhnihni Jerusalén nɛ yʉ́ xädi. Bi mbähä bʉ ra hnini Betania mahønꞌa.
Bi ꞌyotꞌa ra za
20 Nuꞌbʉ mi hyax bʉya bi thoh mahønꞌa bʉ ꞌbä a ra za ngue mi ɛ̨na xtán zip yʉ́n dätꞌo ra Jesús. Nuꞌbʉ mi nuꞌʉ, ya xí ꞌyotꞌi gätho yʉ́ ꞌyʉ. 21 Nu ra Pedro bʉya bi bɛ̨n a xí man ra Jesús nɛ bi ꞌyɛ̨mbi:
―Xänbate i, nɛ nunʉ ra za gá ꞌyɛ̨mbi him manꞌdandį da tsꞌip yʉ́n dätꞌo nɛ ya xø ꞌyotꞌ ya, bi ꞌyɛ̨n a ra Pedro.
22 Nɛ nuꞌbʉ mi dąh ra Jesús, bi ꞌyɛ̨mpꞌʉ:
―Dami ꞌyɛ̨cꞌyɛihʉ ngue gätho da zä da ꞌyøtꞌ Oją a xʉn hɛ̨i. 23 Janangueꞌa nuꞌbʉ ya gá xihmbʉ nꞌda ra tꞌøhø da ꞌuegue din hyøzɛhɛ bʉ ja ra deją, din ja a gá mamhbʉ ꞌbʉ hingui yoho guím bɛ̨mhbʉ, nɛ guí pąhmbʉ majuąni gätho sä da ꞌyøtꞌ Oją a xʉn hɛ̨i. 24 Janangueꞌa dí xi ahʉ ngue nuꞌbʉ ja a guí äfʉ Oją, dami ꞌyɛ̨cꞌyɛihʉ ngue di ꞌda ahʉ a guí äfʉ nɛ din ja a bʉya. 25 Nɛ nuꞌbʉ guí yąhʉ Oją him man guim bɛ̨mhbʉ a bi ꞌyøtꞌahʉ ni mijąꞌihʉ, gam punbahʉ ʉ nɛꞌa Oją di punꞌnahʉ bʉya. 26 Nguetho nuꞌbʉ hin gadim punbahʉ ni mijąꞌihʉ xinga gueꞌa ni Tahʉ bí ꞌbʉpʉ mahɛ̨tsꞌi di punꞌnahʉ, bi ꞌyɛ̨mpꞌʉ yʉ́ xädi ra Jesús.
Ran tꞌänni nangue rán tꞌɛ̨di ra Jesús
27 Bi zøm bʉ Jerusalén ra Jesús nɛ yʉ́ xädi, nɛ xø bi zøm bʉ ja ra dąniją. Nɛ nu yʉ ngʉrpa mbäją bi zøm bʉ mi ꞌbäh ra Jesús, nꞌyohʉ yʉ xänbate niją nɛ yʉ dącꞌyɛi. 28 Nuꞌʉ bi ꞌyänꞌna ra Jesús:
―Toꞌo bi ꞌda a ran tꞌɛ̨di gui ꞌyøtꞌa guí øtꞌe.
29-30 Nɛ nu ra Jesús ꞌbʉ mi dądi bi ꞌyɛ̨na:
―Nɛcä ga änꞌnahʉ toꞌo bi un rán tꞌɛ̨di ra Xuua Nxixyą, hague Oją uague yʉ jąꞌithoho. Nɛ nuꞌbʉ gá xijʉ, nɛcä ga xi ahʉ toꞌo bi ꞌdacä man tꞌɛ̨di bʉya. 31 Nuꞌʉ bin ꞌyɛ̨mzɛhɛ ʉ bʉya:
―Xiꞌbʉ ga xihmbʉ ngue gueꞌa Oją bi un rán tꞌɛ̨di, nɛ da ꞌyɛ̨njʉ: “Hanja hin gá ꞌyɛ̨cꞌyɛihʉ thą,” da ꞌyɛ̨njʉ bʉya. 32 Nɛ nuꞌbʉ ga ɛ̨mhbʉ yʉ jąꞌi thoho bi un ran tꞌɛ̨di ra Xuua, pɛ hingui sä ga xihmbʉ tengu a, bi ꞌyɛ̨n ʉ, nguetho gätho yʉ jąꞌi mi ɛ̨spa ra Xuua nɛ bi ꞌyɛ̨cꞌyɛi ngue rá pøngahyą Oją a. 33 Nɛ nuꞌbʉ mi dą ʉ yʉ xänbate niją nɛ ʉ gätho min ꞌyohʉ,
―Hin dí pąhmbe, bi ꞌyɛ̨ntho ʉ.
Nu ra Jesús bi ꞌyɛ̨mpꞌʉ:
―Xinga guecä ga xi ahʉ toꞌo bi ꞌdacä man tꞌɛ̨di, bi ꞌyɛ̨nꞌa.